ជួបគ្នាទៀតហើយអគ្គទាំងបួន ខែ វិច្ឆិកា 12, 2007
Posted by សុភ័ក្ត្រ in ពីនេះពីនោះ, អំពីសុភ័ក្ត្រ.8 comments
បញ្ហាស្រុកទេសតម្រូវឲ្យអគ្គទាំងបួនជួបគ្នាទៀតហើយ បងប្អូន។ ង៉ៃនោះនាយខ្នយខ្ញុំតាមដានយ៉ាងស្អិតរមួត ពីសកម្មភាពទាំងឡាយរបស់អគ្គទាំងបួននេះ ដើម្បីធ្វើសេចក្ដីរាយការណ៍ជូនថ្នាក់លើ ព្រោះអគ្គទាំងបួននេះអត់សូវស្រួលទេ ញាតិមិត្រ។
ដើម្បីបង្វែរដាននាយខ្នយខ្ញុំ អគ្គទាំងបួនម្សិលមិញនេះ (១១ វិច្ឆិកា ២០០៧) ពួកគេបានរើទីតាំងណាត់ជួបពីកន្លែងលក់ស៊ុបមកកន្លែងលក់ប័រគ័រ នៅផារ៍កវេយ៍ស្កវែវិញម៉ាដង (យីស ឡើងកាលីប)។ តែធ្វើម៉េចអាចគេចផុតពីនាយខ្នយខ្ញុំបាន? ហាហា! បណ្ដាញខ្ញុំលឿនជាងអេហ្វប៊ីអាយ អាគាំង និងកាហ្សេបេ សូវៀតទៀតនោះ។
ម្សិលមិញនេះអគ្គទាំងបួនរូបនិយាយដើមគេដល់ហើយតាំងពីម៉ោង៩កន្លះព្រឹក ដល់ម៉ោងជាង១២ថ្ងៃត្រង់។ ម្នាក់ៗ សុទ្ធតែដល់កហើយ។ ដើម្បីលើកកម្ពស់ក្រុម ពួកគេតែងតែមិនភ្លេចអួតគ្នាទៅវិញទៅមក ដូចរាល់ដង។ អ្នកខ្លះចេះល្បិចសូកគេ ដោយយកមកតាមខ្លួន នូវកាដូជាច្រើន មានទាំងពីសេដេ សៀវភៅ។ល។
នាយខ្នយខ្ញុំរង់ចាំសង្កេត និងដាក់វេបខេមតាមកាបូបដើម្បីកុំឲ្យពួកគាត់ចាប់អារម្មណ៍ ហើយបានស៊ើបដឹងថា ពួកគេមានគម្រោងអញ្ជើញសមាជិកថ្មីឲ្យជួបប្រជុំដែរ តែត្រូវបរាជ័យទៅវិញដោយមានបញ្ហាបច្ចេកទេសពីស្ដេចត្រាញ់ ទើបមិនបាន មិនប៉ុណ្ណោះទៀតសោត ត្រូវបានស្ដេចត្រាញ់ស៊ុត១០០ៗ ទាំងព្រលឹមអុលទៀតផង។
ព័ត៌មានពីនាយខ្នយខ្ញុំនៅពេលនេះចប់អស់ត្រឹមនេះ ពេលមានវិវដ្តណាមួយកើតឡើងថ្មី នាយខ្ញុំនឹងរាយការណ៍ជូនជ្រាបបន្ថែមទៀត។ សូមអរព្រះគុណ!
ញាតិមិត្រមើលចុះ ពួកអគ្គទាំងបួននេះ នាំគ្នាបរិភោគអាហារលឿនតាមបែបអាគាំងទៀត ហើយអស់ស្ទះអគ្គមួយនោះស៊ីច្រើនជាងជ្រូកទៀត (ថាកុំឲ្យគាត់ឮ)។ រូបនេះត្រូវបានបណ្ដាញសម្ងាត់នាយខ្នយខ្ញុំថតបានពីផ្កាយរណប៕
ការចាប់ខ្លួនលោក អៀង សារី និងភរិយា ខែ វិច្ឆិកា 12, 2007
Posted by សុភ័ក្ត្រ in នយោបាយ, អំពីស្រុកខ្មែរ.10 comments
សាលាក្តីកាត់ទោសខ្មែរក្រហមនិយាយថា លោក អៀង សារី និងភរិយារបស់លោកគឺ លោកស្រី អៀង ធីរិទ្ធ បានទទួលការចាប់ខ្លួននៅព្រឹកថ្ងៃនេះ។
អ្នកនាំពាក្យម្នាក់និយាយថា លោក អៀង សារី និង ភរិយាត្រូវបានគេនាំទៅកាន់ការិយាល័យរបស់សហចៅក្រមស៊ើបអង្កេតនៃសាលាក្តីកាត់ទោសខ្មែរក្រហម ហើយគេរំពឹងថា លោក អៀង សារី និងភរិយា នឹងទទួលការចោទប្រកាន់នៅពេលក្រោយមក។
លោក អៀង សារី ជារដ្ឋមន្រ្តីការបរទេសនៃរបបខ្មែរក្រហមក្នុងអំឡុងឆ្នាំ ១៩៧៥ ដល់ ១៩៧៩។
គេបានប៉ាន់ស្មានថា មានប្រជាជនប្រហែលជា១លាន៧សែននាក់ ត្រូវបានគេសម្លាប់ ឬបាត់បង់ជីវិតដោយសារការធ្វើទារុណកម្ម ជំងឺផ្សេងៗ និងការបង្អត់អាហាររហូតដល់ស្លាប់ នៅក្នុងរបបនេះ។
សាលាក្តីដែលគេរង់ចាំជាយូរមកហើយនេះបានចាប់ខ្លួន និង ចោទប្រកាន់សមាជិកជាន់ខ្ពស់របស់ប៉ុលពតដែលនៅរស់ចំនួន២នាក់ ពីបទជាប់ពាក់ព័ន្ធនឹងអំពើឃោរឃៅ។ ក្នុងនោះរួមមាន ឌុច ដែលជាប្រធានគុកទួលស្លែង និងលោក នួន ជា៕
(ប្រែសម្រួលដោយ ស៊ូ ភនី)
