លទ្ធផលប្រឡងក្រសួងការបរទេស ខែ មិថុនា 12, 2008
Posted by សុភ័ក្ត្រ in ពីនេះពីនោះ, អំពីសុភ័ក្ត្រ, អំពីស្រុកខ្មែរ.22 comments
តាំងពីថ្ងៃសម្ភាសមកដល់ថ្ងៃនេះស្ងាត់ឲ្យឈឹងអត់ឃើញខាងក្រសួងតេរេសាប់មកសោះ (កាលពីជាប់លើកទី១ ខាងក្រសួងទូរស័ព្ទមកឲ្យទៅមើលឈ្មោះលទ្ធផលប្រឡងលើកទី១) ឯងសង្ស័យតែធ្លាក់គ្ឌុកបាត់ទៅហើយ បើជាប់ម្ល៉េះសមខាងក្រសួងទូរស័ព្ទមកប្រាប់ដូចលើកមុនហើយ។ ឯម្យ៉ាងឯងគ្មានលុយសូកអីនឹងគេហង ឮថា៣, ៤ពាន់ដូឡាអ៊ុយអេសឯណោះ។
ល្ងាចនេះចេញពីធ្វើការក៏នឹកឃើញជិះកាត់ក៏ឆៀងទៅក្រសួងសួរគេមើលក្រែងលោហ៍គេចេញឈ្មោះហើយដឹង ធ្លាក់ក៏ដោយក៏គួរដឹងដែរ ឲ្យវាអស់ចិត្ត។
មកដល់ក្រសួងបុគ្គលិកគេចាប់ផ្ដើមចេញពីធ្វើការអស់ទៅហើយ មេឃវាភ្លៀងរលឹម និងម៉ោង៥កន្លះទៅហើយ។ ក៏សួរអ្នកយាម:
– “ បងៗលទ្ធផលប្រឡងលើកទី២ចេញហើយឬនៅ?”
– “ អូ! ចេញយូរហើយតើហ៍ ងាប់ហើយ នួកទៅមើលនៅក្ដាខៀននោះមើល៍” (លទ្ធផលគេចេញតាំងពីថ្ងៃសុក្រ ទី០៦ មិថុនា សប្ដាហ៍មុនឯណោះ)។ ថាហើយគាត់ក៏នាំខ្ញុំទៅមើលនៅក្ដារខៀនដែលនៅក្រលៀតបន្ទប់មួយ (ព្រោះគេយកចូលពេលយប់ម៉ោងធ្វើការ)។ ដើរបណ្ដើរខ្ញុំគិតបណ្ដើរ យីស!សង្ស័យអានេះជាលទ្ធផលកាលពីលើកមុនទេដឹង? អ្នកយាមនេះច្រឡំទេដឹង?
ដើរមកដល់ខំមើលក្រដាសគេឲ្យច្បាស់ជាលទ្ធផលលើកក្រោយនេះ ឬពីលើកមុន។ តាមពិតគឺលទ្ធផលចុងក្រោយមែន។ លោកអ្នកដឹងទេ? លទ្ធផលគឺ៖ “ ខ្ញុំជាប់ហើយ” ព្រមទាំងជាប់ចំណាត់ថ្នាក់លេខ២ទៀតផងក្នុងចំណោម២០នាក់។ ខ្ញុំសឹងតែមិនជឿភ្នែកខ្លួនឯងសោះ។ ខ្ញុំខំមើលហើយមើលទៀតឲ្យវាប្រាកដ និងមើលប្រកាសមួយទៀតដែលគេបិទក្បែរនោះឲ្យអ្នកជាប់ទាំងអស់មកបង្ហាញខ្លួនមុនថ្ងៃទី២០ មិថុនានេះ។ ខ្ញុំមិននឹកស្មានថាខ្លួនជាប់ទេ ព្រោះម្នាក់ៗ ទាំងមិត្រខាងក្រៅ ទាំងមិត្រនៅតាមប្លក់នេះ ម្នាក់ៗនាំគ្នានិយាយពីរឿងសូកលុយសូកប្រាក់ ទើបបានជាប់ ឯខ្ញុំនេះបើមិនបានស៊ីស៊ួសអីគេផងរឿងអីមានមុខទៅមើលឈ្មោះទៅ? តាមពិតនោះខ្ញុំចេះតែទៅប្រឡងឲ្យដឹងវិញ្ញាសារប៉ុណ្ណោះឯង តែនៅពេលដែលឃើញឈ្មោះខ្លួនឯងជាប់យ៉ាងនេះក៏រកនឹកនិយាយអីមិនត្រូវ។
នេះជាលើកទី៣ហើយដែលខ្ញុំបានប្រឡងជាប់មន្ត្រីរាជការ។ កាលពីលើកទី១នោះជាប់ជាគ្រូភាសាអង់គ្លេស និងបង្រៀននៅវិទ្យាល័យព្រែកឯង ឯលើកទី២ជាប់ជាមន្ត្រីក្រសួងព័ត៌មាន និងធ្វើការនៅទទក បន្ទាប់មកខ្ញុំបានបោះបង់ចោលទាំងពីរ។ ឯលើកនេះទៀតសោតខ្ញុំមិនដឹងជាគិតយ៉ាងមិចដែរទេ ព្រោះមិនដឹងជាខ្ញុំត្រូវស៊ីអត់ស៊ីឃ្លានជាមួយប្រាក់ខែរដ្ឋយ៉ាងណា បើធ្លាប់តែហ៊ឺហារគួរសមជាមួយប្រាក់ខែអង្គការដែលខ្ញុំទទួលបានរាល់ខែនេះ។ យ៉ាងណាៗ ថ្ងៃស្អែកក៏ត្រូវទៅបង្ហាញឈ្មោះ និងយករូបថតឲ្យក្រសួងសិនដែរ ចាំគិតក្រោយទៀត។
ថ្ងៃនេះអាចចាត់ទុកថាហេងក៏បានដែរ ដោយព្រឹកនេះក៏បានឈ្នះទឹកប្រាក់បូនើស ពីក្រុមហ៊ុនហេឡឡូ០១៦ ចំនួន៥០ដុល្លារទៀតផង។ 
ជយោ!
———————————————————
អានប្រកាសទាក់ទង៖
១. អស្ចារ្យណាស់ស្រុកខ្ញុំ
២. ប្រឡងក្រសួងការបរទេស
៣. សម្ភាសក្រសួងការបរទេស
៤. អវសានក្រសួងការបរទេស
គេហទំព័រក្រសួងការបរទេស៖ www.mfaic.gov.kh
