ដំណើរកម្សាន្តទៅប្រទេសលាវ លើកទី២ (ភាគ៨) ខែ មិថុនា 29, 2008
Posted by សុភ័ក្ត្រ in ภาษาไทย, ពីនេះពីនោះ, អំពីសុភ័ក្ត្រ, អំពីស្រុកខ្មែរ.5 comments
អានភាគទី៧
ថ្ងៃសៅរ៍ ទី១៧ ខែឧសភា ឆ្នាំ២០០៨
មកដល់ក្រុងទេពមហានគរ (បាងកក)
ព្រឹកម៉ោង៥គត់ឡានក្រុងពួកយើងបានមកដល់ស្ថានីយ៍រថក្រុងក្រុងបាងកក។ គិតទៅមកមុនម៉ោងកំណត់ដល់ទៅមួយម៉ោង ដែលតាមពិតទៅត្រូវមកដល់ម៉ោង៦។
អ្វីដែលត្រូវធ្វើមុនគេនោះគឺចូលបន្ទប់ទឹក ក្រោយមកក៏បាននាំគ្នាទិញស៊ីមកាតម្នាក់១ នៅស្ថានីយ៍រថភ្លើងស៊ីមកាតមួយតម្លៃតែ៦០បាតឯង។ មិននៅរង់ចាំយូរពួកយើងត្រូវចាកចេញពីស្ថានីយ៍មកខាងក្រៅ ដើម្បីហៅតាក់ស៊ីជិះទៅសណ្ឋាគារ។ ដោយសារខ្ញុំធ្លាប់ទៅបាងកកញយដងដែរ ហេតុនេះវាមិនលំបាកទេចំពោះខ្ញុំ គ្រាន់តែហៅតាក់ស៊ី រួចប្រាបើគោលដៅដែលត្រូវទៅជាការស្រេច។ ថ្ងៃនោះពួកយើងទៅដេកសណ្ឋាគារម្ដុំផ្លូវខាវសាន (កន្លែងខ្ញុំធ្លាប់ទៅដេករាល់ដង)។
មកដល់សណ្ឋាគារពីព្រលឹមអុរ តែមានបន្ទប់ដែរ ពួកយើងក៏បានជួលបន្ទប់ហើយ នាំគ្នាដេកតែម្ដង (អស់កម្លាំងពេក)។
តាមពិតទៅអ្វីដែលពួកយើងមានបាងកកនេះ ក្រៅពីមកដើរហាងមើលអីវ៉ាន់ និងទិញសំលៀកបំពាក់បន្តិចបន្តួចគឺគ្មានមកលេងអ្វីផ្សេងទៀតទេ។ និយាយឲ្យត្រង់ទៅបាងកកគ្មានអ្វីសម្រាប់ខ្ញុំមកលេង មកមើលទៀតទេ។
ម៉ោងប្រហែល១០ពួកយើងនាំគ្នាជិះទុកៗ ទៅផ្សារចតុចក្រ (ផ្សារចុងសប្ដាហ៍ គេបើកតែថ្ងៃសៅរ៍អាទិត្យទេ ជាផ្សារធំមួយមានលក់របស់របរជាច្រើន និងតម្លៃសមរម្យ ភាគច្រើនសំលៀកបំពាក់យកពីស្រុកខ្មែរយើងនឹងឯងម្ដុំផ្សររុងក្លឿអីអស់ហ្នឹង)។ ថ្ងៃនោះភ្លៀងធ្លាក់តាមផ្លូវយ៉ាងខ្លាំង តែហេងដែរ មកដល់ផ្សារក៏រាំងល្មម។ ថ្ងៃនោះយើងដើរផ្សារតាំងពីម៉ោង១១ រហូតដល់ម៉ោងប្រហែល៣កន្លះ ទើបយើងត្រឡប់ទៅវិញ។
ពេលមកដល់សណ្ឋាគារហើយ ពួកយើងនាំគ្នាងូតទឹកហើយត្រូវចេញទៅស្សបពីងបន្តទៀត។ ល្ងាចនេះយើងដើរហាងទំនើបបន្តិច ហេហេ… គឺពួកយើងនាំគ្នាទៅប៊ីខេ និងផារ៉ាហ្កនដើម្បីទៅញ៉ាំអាហារនៅទីនោះ និងបានមើលខនសឺតផងដែរ។ ល្ងាចនោះភ្លៀងធ្លាក់មកខ្លាំងមែនទែន រហូតដល់រំខានខនសឺត និងពួកយើងពិបាករកតាក់ស៊ីត្រឡប់មកសណ្ឋាគារវិញណាស់ គ្មានតាក់ស៊ី ឬទុកៗណាចង់ដឹកទេ។
ថ្ងៃអាទិត្យ ទី១៨ ខែឧសភា ឆ្នាំ២០០៨
ព្រឹកឡើងពួកយើងត្រូវត្រឡប់មកស្រុកខ្មែរវិញ។ ដំណើរកម្សាន្តរបស់យើងត្រូវបញ្ចប់ហើយ។ ពួកយើងត្រូវស្រូតដើម្បីមកចំណតឡានក្រុង ដោយចេញតាក់ស៊ីមកម៉ោងប្រហែល៦ មកដល់ចំណតឡានក្រុងទាន់ពេលល្មមឡានចេញ។ យើងត្រូវចេញពីបាងកកមកអារញ្ញប្រទេស ដោយតម្លៃសំបុត្រគឺ២១៥បាត។
ម៉ោងប្រមាណ១១យើងបានមកដល់ព្រំដែនថៃខ្មែរល្មម។ ថ្ងៃនោះបន្ទាប់ពីស្សបស្រុកថៃអស់ចិត្តនាំគ្នាស្សបផ្សាររុងក្លឿថែមទៀត និងទិញបានខោមួយទៀតខ្ញុំ ហាហា។ នៅមិននៅឃើញផ្លែឈើថោក ក៏នាំគ្នាទិញមង្ឃុតម្នាក់១០គីឡូមកផ្ទះវិញទៀត។
ថ្ងៃនោះអាឡែតែត្រេតត្រតនៅរុងក្លឿទើបធ្វើឲ្យពួកយើងយឺតឆ្លងដែន ព្រោះមានជនជាតិថៃច្រើនសម្បើមណាស់នៅថ្ងៃនោះ ដែលរង់ចាំឆ្លងដែន។ បន្ទាប់ពីឆ្លងដែនរួចម៉ោង១ទៅហើយ និងទម្រាំចាំមនុស្សពេញចេញឡានតាក់ស៊ីមកភ្នំពេញក៏ធ្វើឲ្យខកដំណើរទៀត។ ថ្ងៃនោះខ្ញុំគិតបម្រុងនឹងដេកប៉ោយប៉ែតមួយយប់ទៅហើយ។ ទីបំផុតម៉ោងប្រហែល២កន្លះ ខ្ញុំក៏បានចេញឡានពីប៉ោយប៉ែត និងម៉ោប្រហែល៨កន្លះមកដល់ភ្នំពេញ និងផ្ទះដោយសុវត្ថិភាព៕
សូមរង់ចាំតាមដានវីដេអូ ភាគផ្ដាច់ព្រ័ត្រ។
ផ្លូវខាវសាន នាម៉ោងប្រមាណ១១ព្រឹក
ប៉ោយប៉ែត ប្រទល់ដែនថៃខ្មែរ
ផ្លូវថ្នល់ថ្មីរបស់កម្ពុជាពីប៉ោយប៉ែតមកភ្នំពេញ
