បុណ្យឯករាជ្យជាតិឆ្នាំនេះ ខែ វិច្ឆិកា 9, 2008
Posted by សុភ័ក្ត្រ in ពីនេះពីនោះ, អំពីសុភ័ក្ត្រ.1 comment so far
ជារៀងរាល់ឆ្នាំ ថ្ងៃទី០៩ ខែវិច្ឆិកា ខ្ញុំមិនដែលភ្លេចទេ ទៅចាំថតរូបមុខវិមានឯករាជ្យផ្នែកខាងលិច ដើម្បីផ្ដិតយករូបភាពវិមានឯករាជ្យ ជាមួយនឹងកាំជ្រួចដែលបាញ់នៅម៉ោងប្រមាណ៧យប់។
ឆ្នាំនេះខុសពីឆ្នាំទៅយ៉ាងស្រឡះ និងគួរឲ្យស្ដាយជាពន់ពេកដែលខ្ញុំមិនបាននៅស្រុកខ្មែរដើម្បីចូលរួមជាមួយជនរួមជាតិក្នុងទិវាដ៏អស្ចារ្យនៃខេមរជន។ តាមពិតខ្ញុំមានបំណងទៅស្រុកខ្មែរក្នុងឱកាសនេះដែរ តែខាងសាលាគេមិនអនុញ្ញាតដោយហេតុមិនទាន់មានទិដ្ឋាការចេញចូល រហូតដល់រយៈពេលបីខែ។ គួរឲ្យស្ដាយណាស់។
ព្រឹកនេះខ្ញុំដាច់ខាតត្រូវទស្សនាយ៉ាងហោចណាស់បំណាច់មិននៅស្រុក ត្រូវទស្សនាទូរទស្សន៍ដែរ។ ដោយហេតុបន្ទប់ខ្ញុំមិនអាចទស្សនាទូរទស្សន៍ពីស្រុកខ្មែរបានទេ ខ្ញុំត្រូវរូតរះពីព្រលឹមដើម្បីធ្វើដំណើរទៅកន្លែងស្នាក់នៅរបស់មិត្ររួមថ្នាក់ខ្ញុំដែលជាជនជាតិលាវ (ប្រហែល២០ទៅ៣០នាទីតាមរថយន្តក្រុង) ដោយសារនៅអាផាតរ៍មេនត៍គេ អាចទស្សនាទូរទស្សន៍ខ្មែរបាន គឺប៉ុស្តិ៍ស៊ីធីអេន។
ខ្ញុំពិតជារំភើបមែនបានទស្សនាការផ្សាយបន្តផ្ទាល់ពីស្ថានីយ៍ទូរទស្សន៍ស៊ីធីអេន ទស្សនាពិធីព្យុះហយាត្រាបុណ្យខួបឯករាជ្យជាតិលើកទី៥៥នៃខេមរជនយើង ដ្បិតតែឆ្នាំនេះខ្ញុំមិនបាននៅថតរូបដោយផ្ទាល់ ខ្ញុំជឿជាក់ថាបងប្អូនជនរួមជាតិយើងពិតជាសប្បាយរីករាយខ្លាំងណាស់នៅថ្ងៃនេះ។
រីករាយបុណ្យឯករាជ្យជាតិខ្មែរពីក្រៅប្រទេស! ជយោ កម្ពុជឯករាជ្យ!!!
__________________________________________________________
ប្រកាសទាក់ទង៖
១. បុណ្យឯករាជ្យឆ្នាំនេះ
២. វិមានឯករាជ្យនាពេលថ្ងៃ
៣. វិមានឯករាជ្យខ្មែរនាយប់ថ្ងៃ៩ វិច្ឆិកា ២០០៧
៤. ជ័យោក័ម្ពុជាឯករាជ្យ!
៥. កម្ពុជាប្រារព្ធពិធីរំឭកខួបទិវាឯករាជ្យជាតិលើកទី៥៥
៦. រូបភាពបុណ្យឯករាជ្យជាតិលើកទី៥៥
៧. អបអរសាទរខួបអនុស្សាវរីយ៍លើកទី៥៥ ទិវាបុណ្យឯករាជ្យនៃព្រះរាជាណាចក្រកម្ពុជា
កម្ពុជាប្រារព្ធពិធីរំឭកខួបទិវាឯករាជ្យជាតិលើកទី៥៥ ខែ វិច្ឆិកា 9, 2008
Posted by សុភ័ក្ត្រ in អំពីស្រុកខ្មែរ.1 comment so far
ដោយ មុំ សុផុន
2008-11-09
ប្រទេសកម្ពុជានៅថ្ងៃទី៩ ខែវិច្ឆិកានេះ បានរៀបចំពិធីរំឭកខួបទិវាឯករាជ្យជាតិលើកទី៥៥ ពីអាណានិគមនិយមបារាំង។
AFP Photo
ព្រះមហាក្សត្រ ព្រះបាទ ព្រះបរមនាថ នរោត្តម សីហមុនី (កណ្ដាល) និងលោកនាយករដ្ឋមន្ត្រី ហ៊ុន សែន (ទី២ពីស្ដាំ) ព្រមទាំងមន្ត្រីនៃរាជរដ្ឋាភិបាលដទៃទៀត ស្ដាប់ភ្លេងជាតិក្នុងអំឡុងពេលប្រារព្ធពិធីរំឭកខួបទិវាឯករាជ្យជាតិលើកទី៥៥ នៅក្នុងទីក្រុងភ្នំពេញ នាថ្ងៃទី៩ វិច្ឆិកា ២០០៨។
នៅក្នុងពិធីនោះដែរក៏មានការយាងចូលរួមពីព្រះមហាក្សត្រនៃព្រះរាជាណាចក្រកម្ពុជា ព្រះបាទ សម្តេចព្រះបរមនាថ នរោត្តម សីហមុនី រួមទាំងប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រីនៃរាជរដ្ឋាភិបាលកម្ពុជាផងដែរ ក៏ប៉ុន្តែ ព្រះបាទ សម្ដេចព្រះនរោត្តម សីហនុ អតីតព្រះមហាក្សត្រដែលបានទាមទារឯករាជ្យពីបារាំងនោះមិនមានវត្តមាននៅក្នុងពិធីនោះឡើយដោយព្រះអង្គកំពុងតែគង់ប្រថាប់នៅឯក្រៅប្រទេស។
នៅក្នុងឱកាសនោះព្រះមហាក្សត្របានមានព្រះរាជបន្ទូលថា ការធ្វើពិធីជួបជុំគ្នានេះគឺជាព្រឹត្តិការណ៍ប្រវត្តិសាស្រ្តរបស់ប្រទេសកម្ពុជា ៖ «មិទ្ទិញដ៏មហោឡារិករំឭកខួបអនុស្សាវរីយ៍លើកទី៥៥ ទិវាបុណ្យឯករាជ្យជាតិ ៩ វិច្ឆិកា និងទិវាកំណើតនៃកងយោធពលខេមរភូមិន្ទដែលជាទិវាប្រវត្តិសាស្ត្រដ៏មានតម្លៃបំផុតនិងត្រូវតែចងចាំអំពីការទទួលបាននូវឯករាជ្យដ៏ពេញលេញនិងសិទ្ធិសេរីភាពដ៏ពិសិដ្ឋដែលប្រជាជាតិកម្ពុជាបានទាមទារពីអាណានិគមនិយម ក្រោមព្រះរាជបូជនកិច្ចដ៏ឧត្តុង្គឧត្ដមរបស់ព្រះមហាវីរក្សត្រ ព្រះវររាជបិតាឯករាជ្យជាតិ ជាទីសក្ការៈដ៏ខ្ពង់ខ្ពស់បំផុត»។
ព្រះមហាក្សត្រ សម្តេច ព្រះបាទ នរោត្តម សីហមុនី បានមានព្រះរាជបន្ទូលរំឭកពីការតស៊ូទាមទារឯករាជ្យពេញទីដែលមានការចូលរួមចលនាពីប្រជាពលរដ្ឋ រួមជាមួយនឹងចលនាជីវពល នារីក្លាហាន នៅក្នុងខេត្តកំពង់ធំ ខេត្តសៀមរាប ខេត្តបាត់ដំបង ក្រោមការដឹកនាំពីអង្គសម្តេចឪ ដោយតស៊ូបានឯករាជ្យពេញបរិបូរណ៍ពីសាធារណរដ្ឋបារាំងនៅក្នុងថ្ងៃទី៩ ខែវិច្ឆិកា ឆ្នាំ១៩៥៣។
ព្រះមហាក្សត្របានមានបន្ទូលថា ដើម្បីរំឭកអនុស្សាវរីយ៍ជាប្រវត្តិសាស្ត្រនេះ ប្រជាពលរដ្ឋខ្មែរនិងមន្ត្រីរាជការបានប្រារព្ធពិធីនេះជារៀងរាល់ឆ្នាំ ៖ «នេះគឺជាព្រឹត្តិការណ៍ជាតិដ៏មានអត្ថន័យជ្រាលជ្រៅបំផុតដែលឆ្លើយតបយ៉ាងស័ក្តិសមទៅនឹងបេសកកម្មនិងពលិកម្មប្រកបដោយមនសិការជាតិដ៏ខ្ពង់ខ្ពស់បំផុតរបស់ព្រះមហាវីរក្សត្រ ព្រះវររាជបិតាឯករាជ្យជាតិ ដែលជានិច្ចកាលព្រះអង្គតែងតែសព្វព្រះរាជហឫទ័យស្ងើចសរសើរចំពោះភ័ព្វវាសនារបស់មាតុភូមិនិងប្រជារាស្ត្រកម្ពុជាយើងដែលបានរួចចាកផុតពីគ្រោះមហន្តរាយនៃសង្គ្រាមនិងទទួលបានការរីកចម្រើនយ៉ាងឆាប់រហ័សលើគ្រប់វិស័យក្នុងការកសាងការពារនិងអភិវឌ្ឍតាមយន្តការនៃការគ្រប់គ្រងប្រកបដោយវិចារណញ្ញាណដ៏អស្ចារ្យ»។
នៅក្នុងក្បួនព្យុះហយាត្រានោះក្រសួងមន្ទីរនីមួយៗបានដង្ហែក្បួនដោយរៀបចំមានផែនមន្ត្រីរាជការ ដោយមានការបង្ហាញអំពីសកម្មភាពការងារនិងសក្តានុពលនៃលើគ្រប់វិស័យ និងមានក្បួនសិស្ស និស្សិត ក្បួនកម្មករ កសិករ ហើយក៏មានការចូលរួមពីប្រជាពលរដ្ឋផងដែរ៕
ប្រភព៖ អាស៊ីសេរី
__________________________________________________________
ប្រកាសទាក់ទង៖
១. រូបភាពបុណ្យឯករាជ្យជាតិលើកទី៥៥
២. អបអរសាទរខួបអនុស្សាវរីយ៍លើកទី៥៥ ទិវាបុណ្យឯករាជ្យនៃព្រះរាជាណាចក្រកម្ពុជា
៣. បុណ្យឯករាជ្យជាតិឆ្នាំនេះ
រូបភាពបុណ្យឯករាជ្យជាតិលើកទី៥៥ ខែ វិច្ឆិកា 9, 2008
Posted by សុភ័ក្ត្រ in អំពីស្រុកខ្មែរ.2 comments
________________________________________________________
ប្រកាសទាក់ទង៖
១. បុណ្យឯករាជ្យជាតិឆ្នាំនេះ
២. កម្ពុជាប្រារព្ធពិធីរំឭកខួបទិវាឯករាជ្យជាតិលើកទី៥៥
៣. អបអរសាទរខួបអនុស្សាវរីយ៍លើកទី៥៥ ទិវាបុណ្យឯករាជ្យនៃព្រះរាជាណាចក្រកម្ពុជា
៤. រូបភាពបុណ្យឯករាជ្យជាតិលើកទី៥៦
