ថៃដើរឆ្ងាយ ឆ្ងាយដាច់សង្វែង ខែ វិច្ឆិកា 13, 2008
Posted by សុភ័ក្ត្រ in ภาษาไทย, ពីនេះពីនោះ, អំពីស្រុកខ្មែរ.7 comments
វាគួរឲ្យធុញ និងថែមទាំងទ្រាញ់សម្បើមណាស់នៅពេលបញ្ហាជម្លោះជាមួយប្រទេសខ្មែរ និងថៃកាន់តែអូសបន្លាយយូរវែងអន្លាយដូចអាចម៍អណ្ដែតទឹកនោះ។
កិច្ចប្រជុំថ្មីៗនេះទៀតសោតនៅសៀមរាបមិនបាននាំអ្វីជាលទ្ធផលធំដុំគួរឲ្យកត់សម្គាល់ទេ បានត្រឹមតែចំណាយពេល និងអស់លុយរដ្ឋតែប៉ុណ្ណោះ។
ក្រៅមិនបានទទួលផលជាផ្លែជាផ្កា អ្វីដែលគួរឲ្យភ្ញាក់ផ្អើលនោះគឺភាគីថៃកាន់តែព្រហើនកោងកាច និងចេញចង្កូមកាន់តែវាយឆ្ងាយទៅៗ រហូតដល់ទាមទារដូរឈ្មោះប្រាសាទព្រះវិហារ ទៅជាព្រះវិហាន តាមសំនៀងភាសាថៃ ឬបន្ថែមពាក្យ “ ព្រះវិហាន” ដូចដែលអាស៊ីសេរី និងកោះសន្តិភាពបានរាយការណ៍នោះ។
ការព្រហើនកោងកាចរបស់ថៃក្នុងករណីនេះ បើយើងមើលម្យ៉ាងទៅវិញ ទោះបីជាភាគីកម្ពុជាបដិសេធជំទាស់ក៏ដោយ តែនេះជាសញ្ញាណបង្ហាញឲ្យឃើញថា ថៃគ្មានចេតនាល្អនឹងបញ្ឈប់ជម្លោះនេះទេ ហើយនេះជាពូថៅមួយដែលដំក្បាលរដ្ឋាភិបាលខ្មែរ ដែលថៃដឹងច្បាស់ជាមិនអាចយកឈ្នះថៃបាន ហេតុនេះសំណើរបែបហួសហេតុ និងឡប់សតិជាច្រើនថ្មីៗ ថៃនឹងបន្តលើកឡើងគ្រប់ពេល សម្រាប់អ្នកដឹកនាំខ្មែរ ដើម្បីមកលេងកូនអុកជាមួយថៃ។ Sic
ភាពអាប់ប្រាជ្ញារបស់រដ្ឋាភិបាលខ្មែរ និងភាពឃោឃៅល្បិចរាប់ជំពូករបស់រដ្ឋាភិបាលថៃ បានធ្វើឲ្យប្រាសាទព្រះវិហារដ៏កម្សត់ក្លាយជាចំណាត់ខ្មាំងនៃជម្លោះដែលគ្មានថ្ងៃបញ្ចប់នេះទៅវិញ។
មកដល់កាលៈទេសៈនេះទៅហើយ នៅពេលដែលយើងឃើញកាន់តែច្បាស់នូវមហិច្ឆិតាដ៏ថោកទាបមារយាទឥតមេបារក្សាកេរ្តិ៍របស់រដ្ឋាភិបាលថៃ យើងកំពុងតែមានចម្ងល់កាន់តែខ្លាំងឡើងៗចំពោះរដ្ឋាភិបាលខ្មែរទៅវិញដែលកំពុងព្យាយាមបិទបាំង រក្សាហ្កេមស៍ជម្លោះនេះជាមួយថៃទៅវិញ។ តើនេះជាការព្យាយាមដោះស្រាយដោយសន្តិវិធីពិតប្រាកដរបស់រដ្ឋាភិបាលខ្មែរឬយ៉ាងណា?
យើងឃើញច្បាស់ណាស់នៅពេលដែលជំហរនៃរដ្ឋាភិបាលខ្មែរមានភាពមិនប្រាកដប្រជានេះហើយ ដែលបានធ្វើឲ្យថៃឡើងចាង ចេញឫកក្អេងក្អាងពីមួយថៃទៅមួយថ្ងៃ ព្រមទាំងមើលងាយមើលស្រាលរដ្ឋាភិបាលខ្មែរក៏ដោយសាររឿងនេះឯង។
តើអ្វីនៅពីក្រោយឆាកល្ខោននយោបាយពិតប្រាកដនៃរដ្ឋាភិបាលកម្ពុជា នៅពេលដែលរដ្ឋាភិបាលនេះចាញ់រណបរដ្ឋាភិបាលថៃ មិនព្រមលើកឡើងជាអន្តរជាតិ បើទោះបីជាមកដល់ពេលនេះគ្រប់គ្នាដឹងពីចារិកពិតនៃរដ្ឋាភិបាលថៃទៅហើយនោះ។
រដ្ឋាភិបាលខ្មែរគួរមានសេចក្ដីក្លាហានឲ្យពិតប្រាកដ ហ៊ានដោះស្រាយបញ្ហាជាតិមួយនេះឲ្យបានសម្រាប់ជាតិ និងមិនត្រូវបង្អែររហូតដល់ជាតិដទៃមើលងាយ វាយថ្បកក្បាលឃូសៗមួយលើកជាពីរលើកបែបនេះទេ៕
អានព័ត៌មានបន្ថែម៖
១. លទ្ធផលនៃកិច្ចប្រជុំរវាងកម្ពុជានិងថៃស្ដីពីបញ្ហាជម្លោះព្រំដែន
២. ចំណុចមួយបានបង្កឲ្យតឹងតែងគឺភាគីសៀមចង់ឲ្យដាក់ពាក្យ “ ព្រះវិហាន” ក្រោយពាក្យប្រាសាទព្រះវិហារ
៣. ក្រសួងការបរទេសថៃនឹងស្នើឲ្យសភាកែពាក្យ”ប្រ៉ៈវិហាន”ទៅជា”ព្រះវិហារ”
