ថៃ, មានតែសង្គ្រាមធំដែលអាចរំលំសង្គ្រាមតូច?! ខែ វិច្ឆិកា 23, 2008
Posted by សុភ័ក្ត្រ in ภาษาไทย, នយោបាយ, ពីនេះពីនោះ.5 comments
ស្ថានការណ៍ប្រទេសថៃ ហាក់ដូចភ្លៀងរលឹមអ៊ុរៗមិនព្រមឈប់ មិនត្រឹមតែធ្វើឲ្យសេដ្ឋកិច្ចប្រទេសនេះធ្លាក់ដាំដូងទេ ថែមទាំងបានធ្វើឲ្យបែកបាក់សាមគ្គីក្នុងប្រទេសយ៉ាងជូរចត់ក្នុងប្រវត្តិសាស្ត្រស្យាមប្រទេស។
ព្រឹកនេះ ស្ថានការណ៍អាចនឹងមានគ្រោះថ្នាក់ មិនអាចទាយទុកបាននៅពេលដែលពួកគាំទ្ររដ្ឋាភិបាល អាវក្រហម នឹងរួមគ្នាប្រជុំធំម្ដងទៀតនៅឯបរិវេណវត្តសួនកែវ ក្រៅក្រុងបាងកក ចំណែកឯពួកប្រឆាំងរដ្ឋាភិបាលដាច់ក្បាលដាច់កន្ទុយ ពួកអាវលឿង នឹងនាំគ្នាធ្វើបាតុកម្មធំទៅវិមានរដ្ឋសភា ដើម្បីប្រឆាំងនឹងកិច្ចប្រជុំរដ្ឋសភាពីរបៀបវារៈកែប្រែរដ្ឋធម្មនុញ្ញ បើទោះបីជាមានការអះអាងពីប្រធានរដ្ឋសភា ថាមិនមានរបៀបវារៈនេះ នៅក្នុងកិច្ចប្រជុំរដ្ឋសភាក៏ដោយចុះ។
ការដែលពួកអាវលឿង អះអាងដាច់ខាតថានឹងធ្វើបាតុកម្មធំចុងក្រោយនេះក៏ព្រោះតែពួកនេះខឹងនឹងការបោះគ្រាប់បែកមួយគ្រាប់កាលពីដើមសប្ដាហ៍នេះចូលទៅក្នុងបរិវេណតំបន់ផ្ដាច់ខ្លួនរបស់ខ្លួននៅកណ្ដាលក្រុងបាងកក និងបានចោទប្រកាន់រដ្ឋាភិបាល និងពួកតម្រួតថាមិនបានជួយការពារពួកខ្លួន ខណៈដែលពួកនេះ មិនបានអនុញ្ញាតឲ្យតម្រួតចូលទៅក្នុងបរិវេណតំបន់ស្វយ័តរបស់ខ្លួនដើម្បីធ្វើការស៊ើបអង្កេតផងនោះ Sic
ពួកអ្នកគាំទ្រទាំងសង្ខាងបាននាំគ្នាជិះឡានក្រុងពីតាមខេត្តកាលពីយប់ម្សិលមិញនេះ (២២ វិច្ឆិកា ២០០៨) ដើម្បីមកចូលរួមគាំទ្រម្ចាស់ពួកគេរៀងៗខ្លួន។ ហេតុការណ៍អាចនៅផុយស្រួយប្រសិនបើពួកអ្នកគាំទ្រទាំងសង្ខាងមិនអាចទប់ស្មារតីបាន អាចបណ្ដាលឲ្យមានការពើបប្រយុទ្ធគ្នាកណ្ដាលទីក្រុងក៏ថាបាន។ ក៏ប៉ុន្តែ ទាំងអ្នកដឹកនាំទាំងសង្ខាង និងតម្រួត បានអះអាងថា នឹងមិនឲ្យមានករណីនេះកើតឡើងបានឡើង តែសំណួរនៅត្រង់ថា តើពួកគេអាចគ្រប់គ្រងស្ថានការណ៍បានកម្រិតណា?
អ្វីដែលជាព្រឹត្តិការណ៍គួរឲ្យកត់សម្គាល់កាលពីចុងសប្ដាហ៍កន្លងទៅនោះផងដែរ គឺអតីតនាយករដ្ឋមន្ត្រីថៃ ទក្សិណ ជិនវ័ត្រ បានលះលែងភរិយាជាទីស្រឡាញ់របស់លោក។ អ្នកវិភាគមួយចំនួនបានវិភាគថា នេះគឺជាព្យុះរលកដ៏ធំដែលលោកទក្សិណ នឹងបង្កើតនៅស្រុកថៃ ដើម្បីសម្អាតភាពស្មោះត្រង់របស់លោក ដោយមិនឲ្យជាប់ពាក់ព័ន្ធនឹងគ្រួសារ នេះជាស្មារតីដែលគួរឲ្យកោតសរសើរ។ តើលោកអតីតនាយករដ្ឋមន្ត្រីនឹងលេងមែនទែនដើម្បីរំលត់សង្គ្រាមនៅស្រុកថៃនេះមែនឬទេ។ បើពិតជាយ៉ាងដូច្នោះមែន ល្ខោនមួយរឿងធំនេះប្រកដជាល្អមើលជាងទីតានិកសម្បើមណាស់។ ប្រជាជនតូចតាចគ្មានអ្វីធ្វើបានក្រៅពីរង់ចាំតាមដានសាច់រឿងនេះតទៅទៀតទេ។ ស្យាមប្រទេស! ឬមួយដល់កាលអវសាន?
________________________________________________________
ប្រកាសប្រហាក់ប្រហែល៖
១. ផលប៉ះទង្គិចពីពួកអាវលឿង
