មកដល់ភ្នំពេញ ខែ ធ្នូ 27, 2008
Posted by សុភ័ក្ត្រ in ពីនេះពីនោះ, អំពីសុភ័ក្ត្រ, អំពីស្រុកខ្មែរ.16 comments
ចេញពីបាងកកក្រុងប្រមាណ៣ព្រឹកភ្លឺនេះ មកដល់ប៉ោយប៉ែតប្រមាណ៧ព្រឹកគត់។ នឿយហត់អស់កម្លាំង ម៉ោងប្រមាណជិត១០ បានចាកចេញពីប៉ោយប៉ែតមកភ្នំពេញក្រុង។
ហ៊ឺ! និយាយពីរឿងប៉ោតប៉ែតយើងនោះ មិនបាច់ថ្លែងទេ ដូចបារាំងគេថា ណូខមមេនត៍ចឹងឯង។ ចំណែកឯតាក់ស៊ីវិញ គឺមហាបោក និងកុហកសម្បើមណាស់ អ្នកដែលមានបទពិសោធន៍ច្រកប៉ោយប៉ែតច្បាស់ជាយល់ហើយ។
ល្ងាចមិញនេះខ្ញុំបានមកដល់រាជធានីយើងប្រមាណជាម៉ោង៤រសៀលមកដល់ផ្ទះល្មម តម្លៃតាក់ស៊ី៧ម៉ឺនរៀលគត់។ មកដល់ម្ដុំផ្សារថ្មី ខ្ញុំភ្ញាក់ខ្លួនឲ្យព្រឺត គេសាងសង់ស្តូបលក់ដូរកណ្ដាលផ្លូវតែម្ដង ហាហា…។ អាគារមួយចំនួនបានសាងសង់ខ្ពស់ឡើងជាងពីបីខែមុន និងខ្លះបានសាងសង់ជិតរួចផងដែរ។ ស្ពានច្បារអំពៅបានបំពាក់គ្រោងមើលឃើញច្បាស់ជាស្ពានឡើង ចំណែកឯកន្លែងផ្សេងៗទៀត មិនជាប្លែកអ្វីណាស់ណាទេ។
រូមស្វីតរូម
ក្រោយពីមកដល់ផ្ទះភ្លាមបានណែមមួយចំនួនទិញពីរបាត់ដំបងខែត្រ ចែកបងប្អូន ហេហេ… ក្រៅពីនេះចូលបន្ទប់ឆែករបស់របរ។ ម៉ែអឺយ បន្ទប់ស្អុយ ព្រោះទុកចោល។ របស់របសរេប៉ាយ ព្រោះប្អូនស្រីខ្ញុំយកតុ និងកន្ទេលទៅដាក់បន្ទប់គេអស់ទៅ !ឡ!
បើកទូរទស្សន៍មើល ម៉ែអឺយ មិនដឹងជាកើតស្អុយវា ដូចចង់អែរ៉ឺ មិនដឹងរម៉េច ទូរទស្សន៍ចេះតែលោតៗ មើលសឹងមិនកើត សង្ស័យតែមានថ្មីទេ។ យកកៅអីឡើងទៅដលក្រដាសដែលគ្របម៉ាស៊ីនត្រជាក់ ដើម្បីបើកសាកល្បងមើល ព្រោះទុកចោលយូរក្រែល។ ចុចតេឡេ! ម៉ាស៊ីននៅស្ងៀមគ្មានកម្រើកអ្វីសោះ។ ចុម! ដកថ្ម ដាក់ឡើងវិញ អីយ៉ា ដើរបស់គេ ហេហេ… បន្ទាប់មកឃើញថា អ្វីៗ ដើរជាធម្មតាទេ ក៏ចាត់ការសម្អាតបន្ទប់ បាញ់ក្រែមឲ្យឈ្ងុយបន្តិច កាកា…
និយាយពីផ្ទះខ្ញុំវិញ បន្ទាប់ពីថាឲ្យគាត់ច្រើនលើកសាទៅ ឳខ្ញុំបានចាក់សាប និងរៀបកាឡូរ៉ាមុខផ្ួះហើយ។ កាលពីមិនទាន់រៀបមិនបាច់ទេ ភ្លៀងមោម្ដងៗ ទឹកលិច និងបែកម៉ាំពេញតែមុខផ្ទះ។ សុនករបស់ខ្ញុំវិញ អាពីរគ្រឿងតូចៗនោះ ឥឡូវនេះមិនបាច់ទេ ធំឡើងខ្ញុំមើលលែងស្គាល់ តែពួកវាក៏លែងស្គាល់ខ្ញុំ ព្រូសខ្ញុំពេញផ្ទះ ហាហា…។ ចំណែកឯពីរគ្រឿងទៀតអត់ធំអីរលែង អាមួយអស់ធំ និងអាមួយទៀតឆ្កែស្រមូវ បានអីធំ ហេហេហ នៅស្គាល់ខ្ញុំទេ នាំគ្នាលោតអរទទួលដូចព្យុះ ហេហេ..។
ម៉ោង៥ជាងងូតទឹកស្លៀកពាក់ដល់ម៉ោងដើរដួស។ អាស្ទេព របស់ខ្ញុំនៅដដែល សាំងពេញធុង ហាហា ចេញមកមាត់ទន្លេ យកខ្យល់អាកាសឡើងត្រជាក់រំភើយម្រ៉ងង៉ៃនេះ ឡើងចង់រងារ បន្ទាប់មកអ្វីដែលត្រូវធើមុនគេនោះគឺកាត់សក់ ហាហា.. សក់វែងគ្រាន់ជាង៣ខែហើយ លើកនេះកាត់ឲ្យខ្លីបន្តិច ហាហា…
អ្វីដែលអស្ចារ្យនោះ ញាតិមិត្រអឺយ សំបុត្រការពីរច្បាប់នៅលើតុស្វាគមន៍ខ្ញុំពេលមកដល់ផ្ទះ៕ !ឡ!!!
បន្ទប់ខ្ញុំរញ៉េរញ៉ៃ និងក្លិនអស់ស្ទះ ព្រោះទុកចោលប្រមាណ៣ខែ កិកិកិ…
________________________________
ប្រកាសទាក់ទង៖
១. ជួបភ័ក្ត្រភ្នំពេញ
២. មកដល់បឹងកក់
៣. មកដល់ស្រែខ្មុកហើយ
ជួបភ័ក្ត្រភ្នំពេញ ខែ ធ្នូ 26, 2008
Posted by សុភ័ក្ត្រ in ពីនេះពីនោះ, អំពីសុភ័ក្ត្រ.12 comments
ស្រណោះថ្ងៃទេរ រសៀលជ្រាលជ្រេ រៀបអស្ដង្គត
ជិះស្ទេពសង្ហារ កាយាមុះមុត តែម្នាក់ឯងគត់
តាមដងទន្លេ។
ឃ្លាតឃ្លាបីខែ បែកពីមាសស្នេហ៍ មករៀនស្រុកគេ
អស់ឱភ្នំពេញ នឹកអ្នកម្ល៉េះទេ ស្នេហ៍ស្នងមាសមេ
វិលជួបអ្នកហើយ។
ប្រហែលជាអ្នក ផ្លាស់ប្ដូរវង់ភ័ក្ត្រ មិនដូចមុនឡើយ
អ្នកពិតជាស្រស់ សម្រស់ត្រាណត្រើយ ជួបអ្នកឆាប់ហើយ
ឆាប់មែនឆាប់មែន៕ !ឡ!
See you Phnom Penh!
________________________________
ប្រកាសទាក់ទង៖
១. មកដល់ភ្នំពេញ
២. មកដល់បឹងកក់
រាមកេរ្តិ៍ Vs รามเกียรติ์ ខែ ធ្នូ 25, 2008
Posted by សុភ័ក្ត្រ in ภาษาไทย, ពីនេះពីនោះ, អំពីស្រុកខ្មែរ.15 comments
ផ្ទាំងគំនូររឿងរាមកេរ្តិ៍ខ្មែរ ដែលឆ្លាក់គូរក្នុងថែវនាព្រះបរមរាជវាំងចតុម្មុខ
ផ្ទាំងគំនូររឿងរាមកេរ្តិ៍ថៃ (รามเกียรติ์) ដែលឆ្លាក់គូរក្នុងព្រះបរមរាជវាំងក្រុងបាងកក
______________________________________________
អានផងដែរ៖
១. ទស្សនកិច្ចសិក្សា៖ ព្រះបរមរាជវាំងក្រុងបាងកក
២. កំប្លែងសើចចុកពោះ៖ កេង វ៉ាន់សាក់ បន្ទោសហ្លួងនរោត្ដម រឿងឲ្យជាងគំនូរគូរ ផ្ទាំងរឿងរាមកេរ្តិ៍ នៅក្នុងរាជវាំង
៣. ចម្បាំងវៃយរាពណ៍
៤. ទៅមើលល្ខោនខោល
៥. ល្ខោនខោលខ្មែរ ជួបជាមួយល្ខោនខោលថៃ ចាំមើលវាយ៉ាងណា?
ទស្សនកិច្ចសិក្សា៖ ព្រះបរមរាជវាំងក្រុងបាងកក ខែ ធ្នូ 23, 2008
Posted by សុភ័ក្ត្រ in ภาษาไทย, ពីនេះពីនោះ, អំពីសុភ័ក្ត្រ.12 comments
ព្រឹកមិញនេះថ្នាក់រៀនរបស់ខ្ញុំបានទៅធ្វើទស្សនកិច្ចសិក្សាម្ដងទៀត។ លើកនេះពួកយើងធ្វើដំណើរទៅទស្សនាព្រះបរមរាជវាំងនៃព្រះមហាក្សត្រិយ៍ថៃនាសម័យក្រុងរតនកូស៊ីន។ ដូចរាល់ដងដែរ ពួកយើងជួបជុំគ្នានៅម៉ោង៩ព្រឹក រួចបន្តដំណើរទស្សនកិច្ច លើកនេះដោយមានមគ្គុទេសក៍ផ្លូវការជួយណែនាំពួកយើងផង។ នេះជាលើកទីពីរហើយដែលខ្ញុំបានចូលទស្សនាព្រះបរមរាជវាំងថៃ ដែលកាលពីលើកដំបូងមកទស្សនាផ្ទាល់ខ្លួនកាលពីឆ្នាំ ២០០២មកម្ល៉េះ។
ដំបូងឡើយពួកយើងធ្វើដំណើរទស្សនាតំបន់ព្រះវិហារព្រះកែវមក៌ត ឬវត្តព្រះស្រីរតនសាស្ដារាម។ បរិវេណក្រុមប្រាសាទវត្តព្រះកែវនេះរួមមានក្រុមប្រាសាទមួយចំនួនដែលយើងបានទស្សនារួមមានព្រះឧបោសថ, ប្រាសាទព្រះទេពបិតរ, ចេតីយផ្សេងៗ និងចម្លាក់មូដែលប្រាសាទអង្គរវត្តរបស់ខ្មែរជាដើម។ តាមមគ្គុទេសក៍ដែលបានបរិយាយនេះគឺជាសម្បួរណ៍បែបភាពនៃព្រះមហាបរមរាជវាំងថៃ ដែលបានទទួលវប្បធម៌ពីប្រទេស និងជនជាតិផ្សេងៗជាច្រើនក្នុងការយកមករចនាព្រះបរមរាជវាំងនេះពីសំណាក់អតីតព្រះមហាក្ស័ត្រិយ៍ថៃ។ អារ្យធម៌ខ្មែរក៏ត្រូវបានព្រះមហាក្ស័ត្រិយ៍តាមចំណាប់អារម្មណ៍នឹងសាងសង់តាមដែលដោយឆ្លុះបញ្ចាំងតាមប្រាង្គនានានៅក្នុងបណ្ដាប្រាសាទមួយចំនួននៅក្នុងរាជវាំងថៃនេះ។
ពួកយើងធ្វើដំណើរទស្សនាក្រោមការបរិយាយយ៉ាងក្បោះក្បាយ និងស្ទាត់ជំនាញទាំងចំណេះដឹង និងភាសាអង់គ្លេសពីសំណាក់មគ្គុទេសក៍របស់យើងឈ្មោះ ។ បន្ទាប់ពីបានទស្សនារូបចម្លាក់រាមកេរ្តិ៍នានានៅតាមថែវរួចមកពួកយើងក៏បានបន្តចូលក្នុងព្រះឧបោសថ ដែលជាកន្លែងតម្កល់ព្រះកែវមក៌ត។ យើងសង្កេតឃើញថាក្រោមកម្ដៅដ៏ក្ដៅហែង អ្នកទេសចររាប់រយនាក់កំពុងប្រជែងគ្នាចូលទស្សនាព្រះរាជវាំងថៃ។ តាមការឲ្យដឹងពីមគ្គុទេសក៍ មានអ្នកទេសចរបរទេសក្នុងមួយថ្ងៃជាមធ្យម៥.០០០នាក់ចូលទស្សនាទីនេះ។
បន្ទាប់មកពួកយើងបានចូលទស្សនាព្រះទីន័ងអមរិន្ទ្រវិនិច្ឆ័យ (ថៃ៖ พระที่นั่งอมรินทรวินิจฉัย)។ ប្រាសាទនេះឯងដែលបណ្ដាក្ស័ត្រិយ៍ថៃធ្វើពិធីក្នុងថ្ងៃឡើងរាជាភិសេក។ តាមការសង្កេតរបស់ខ្ញុំប្រាសាទនេះមិនជាមានសភាពធំដុំដូចប្រាសាទទេវានិច្ឆ័យ ដែលជាទីតាំងឡើងសោយរាជ្យនៃព្រះមហាក្ស័ត្រិយ៍ខ្មែរយើងទេ។ ប្រាសាទនេះតូច និងទាប ព្រមទាំងមិនមានគ្រឿងមានតម្លៃអ្វីច្រើនទេ ក្រៅពីបល្ល័ង្ក និងស្វេតច្ឆត្រ៩ជាន់ដែលបានដាក់តាំងទីនេះអស់ជាង៦០ឆ្នាំមកហើយ តាំងពីថ្ងៃសោយរាជ្យរបស់ព្រះមហាក្ស័ត្រិយ៍អង្គបច្ចុប្បន្ននេះមកម្ល៉េះ។ ក៏ប៉ុន្តែ ក្រៅពីប្រាសាទមួយនេះ ព្រះមហាក្ស័ត្រិយ៍ថៃនៅមានប្រាសាទមួយទៀតដែលគេបម្រើពិធីដាច់ដោយឡែកសម្រាប់ពិធីផ្សេងៗគ្នា ដែលខុសពីប្រាសាទទេវាវិនិច្ឆ័យរបស់យើងប្រើគ្រប់ព្រះរាជពិធី និងពិធីរដ្ឋទាំងអស់នោះ។
ពួកយើងមានវាសនា ជាភ្ញៀវកិត្តិយស តាមរយៈលិខិតពីសាលា ពួកយើងដែលមានគ្នាប្រមាណ១០នាក់នោះ បានចូលទៅទស្សនាដោយផ្ទាល់នៅក្នុងព្រះទីន័ងចក្រីមហាប្រាសាទ (ថៃ៖ พระที่นั่งจักรีมหาปราสาท)។ ប្រាសាទនេះអ្នកទេសចរមិនត្រូវបានអនុញ្ញាតឲ្យចូលទស្សនាឡើយ។ ទោះបីជាពួកយើងបានអនុញ្ញាតឲ្យចូលទស្សនាក្ដី ក៏ពួកយើងមិនត្រូវបានអនុញ្ញាតឲ្យថតរូបទេ។ អ្វីដែលខ្ញុំសង្កេតឃើញនៅខាងក្នុងបរិវេណប្រាសាទនេះមានសភាពធំមហាសាលណាស់ និងមានផ្ទកទៅដោយរបស់របរមានតម្លៃជាច្រើនជាសម្បត្តិទ្រព្យនៃរាជាណាចក្រថៃ។ ពួកយើងក៏បានចូលទៅទស្សនាល្វែងដែលសម្រាប់ភ្ញៀវទៅចូលគាល់ព្រះមហាក្ស័ត្រិយ៍ផងដែរ ទាំងល្វែងសម្រាប់បុរសភេទ និងស្ត្រីភេទផងដែរ។ អ្វីៗទាំងអស់ដែលមាននៅខាងក្នុងនោះគឺអស្ចារ្យសម្បើមណាស់ ជាពិសេសភ្លុកដំរីដែលធំនិងវែងដែលជាតង្វាយព្រះមហាក្ស័ត្រិយ៍ពីជៀងម៉ៃ។
បន្ទាប់មកទៀតពួកយើងបានបន្តទៅទស្សនាព្រះទីន័ងតុសិតមហាប្រាសាទ (พระที่นั่งดุสิตมหาปราสาท)។ ប្រាសាទនេះកាលពីដើមសាងសង់ដោយឈើ តែបានផ្ទុះឆេះដោយសាររន្ទះបាញ់ ទើបក្រោយមកព្រះមហាក្ស័ត្រិយ៍ថៃបានបញ្ជាឲ្យសាងសង់ជាថ្មីដោយថ្ម។ ខ្ញុំសង្កេតឃើញមួយទៀតនៅទីនេះក៏មានតាំងព្រះរាជបល្ល័ង្កសម្រាប់ព្រះមហាក្ស័ត្រិយ៍ឡើងសោយរាជ្យដែរ។ ទីនេះបច្ចុប្បន្នប្រើប្រាស់សម្រាប់ពិធីសាសនាព្រាហ្មណ៍ និងទីនេះក៏យកធ្វើជាទីតម្កល់ព្រះបរមសពព្រះមហាក្ស័ត្រិយ៍ថៃផងដែរ។
ពួកយើងបញ្ចប់ការទស្សនាប្រាសាទនេះនៅម៉ោងប្រមាណ១២គត់ រួចបន្តមកទស្សនាមួយម៉ោងទៀតនៅសារមន្ទីរមួយក្នុងបរិវេណព្រះបរមរាជវាំងនេះ។ សារមន្ទីរនេះមានផ្ទុកវត្ថុមានតម្លៃជាច្រើនដែលជាកម្មសិទ្ធិនៃព្រះមហាក្ស័ត្រិយ៍ថៃ និងមន្ត្រីនានាកាលពីអតីតកាល ជារបស់របរដែលអ្នកធម្មតាជាច្រើនរាប់លាននាក់មិនដែលបានឃើញផ្ទាល់នឹងភ្នែក។ អ្វីដែលអស្ចារ្យសម្រាប់ខ្ញុំនោះគឺ ខ្ញុំបានឃើញទ្រព្យសម្បត្តិនៃផែនដីខ្មែរមួយចំនួនដែលមិនដែលបានប្រទះដោយផ្ទាល់ភ្នែកនៅកម្ពុជប្រទេសយើង ហើយប្រហែលជាកូនខ្មែរយើងជាច្រើនទៀតនោះគឺគ្រឿងឥស្សរិយយសខ្មែរ (មិនជ្រាបថ្នាក់) ព្រមទាំងប្រាក់កាក់ខ្មែរជំនាន់ដើមរបស់យើងមួយចំនួនផងដែរ (ប្រហែលក្នុងសម័យព្រះអង្គឌួង)។ លោកអ្នកជ្រាបទេ ប្រាក់កាក់ទាំងនោះមានប្រភេទខ្លះតូចៗទេ គឺតូចៗប្រមាណកូនដៃយើងតែប៉ុណ្ណោះ។ ពួកយើងបានបញ្ចប់ទស្សនកិច្ចសិក្សានេះនៅម៉ោង១គត់ ដោយម្នាក់ៗអស់កម្លាំងយ៉ាងខ្លាំង៕
__________________________________________________________
អានផងដែរ៖
១. អាថ៌កំបាំងការរំលាយព្រះសពព្រះរាមមហាក្សត្រិយ៍ថៃ
២. សារមន្ទីជាតិថៃ
៣. ទស្សនកិច្ចសិក្សា៖ សារមន្ទីរនានានៅបាងកក
៤. រាមកេរ្តិ៍ Vs รามเกียรติ์
គណៈរដ្ឋមន្ត្រី ទី៥៩ ខែ ធ្នូ 22, 2008
Posted by សុភ័ក្ត្រ in ภาษาไทย, នយោបាយ, ពីនេះពីនោះ, អំពីភាសា.9 comments
គណៈរដ្ឋមន្ត្រីថ្មីថតរូបមុខវិមានរដ្ឋាភិបាល
ប្រទេសថៃបានមានរដ្ឋាភិបាលថ្មីពេញបរិបូរណ៌ហើយ បន្ទាប់ពីព្រះមហាក្ស័ត្រិយ៍ថៃបានត្រាស់បង្គាប់ និងល្ងាចនេះលោកនាយករដ្ឋមន្ត្រីវ័យក្មេង អភិសិទ្ធិ វេជ្ជាជីវៈ បាននាំគណៈរដ្ឋមន្ត្រីរបស់លោកចូលគាល់ព្រះមហាក្ស័ត្រិយ៍ និងធ្វើពិធីស្បថចូលកាន់តំណែង។
ខាងក្រោមនេះខ្ញុំសូមណែនាំ និងលើកពីរបៀបសរសេរ និងហៅឈ្មោះបណ្ដារដ្ឋមន្ត្រីថៃថ្មីទាំងអស់ដូចតទៅ៖
គណៈរដ្ឋមន្ត្រីថៃ ២០ ធ្នូ ២០០៨ មកដល់បច្ចុប្បន្ន
|
លរ |
ឈ្មោះជាភាសាខ្មែរ និងថៃ |
សំនៀងដែលគួរអាន |
មុខតំណែង |
|
១ |
ឯ.ឧ. អភិសិទ្ធិ វេជ្ជាជីវៈ |
អៈ-ភិ-សិត-វេជ-ជា-ជី-វៈ |
នាយករដ្ឋមន្ត្រី |
|
២ |
ឯ.ឧ. សុទេព ទឿកសុបណ្ណ นายสุเทพ เทือกสุบรรณ |
សុ-ទេប-តឿក-សុ-បាន់ |
ឧបនាយករដ្ឋមន្ត្រី
|
|
៣ |
ឯ.ឧ. ករ៍បស័ក្ដិ៍ សភាវសុ |
កប-សាក់-សៈ-ភា-វៈ-សុ |
|
|
៤ |
ឧត្ដមសេនីយត្រី ស្ន័ន ខចរប្រសាន្ន |
ស្នាន់-ខៈ-ចៈ-រៈ-ប្រៈ-សាន |
|
|
៥ |
ឯ.ឧ. សាទិត្យ វង្សហ្នងតឿយ |
សា-ទិត-វង់-ណង-តឿយ |
រដ្ឋមន្ត្រីប្រចាំខុទ្ទកាល័យ
|
|
៦ |
ឯ.ឧ. វីរៈជ័យ វីរៈមេធីកុល |
វី-រៈ-ជៃ-វី-រៈ-មេ-ធី-កុល |
|
|
៧ |
ឧត្ដមសេនីយឯក ប្រវិត្រ វង្សសុវណ្ណ |
ប្រ-វិត-វង់-សុ-វ៉ាន់ |
រដ្ឋមន្ត្រីក្រសួងការពារប្រទេស |
|
៨ |
ឯ.ឧ. ករណ៍ ចាតិកវណិជ |
ក-ចា-តិ-កៈ-វៈ-ណិច |
រដ្ឋមន្ត្រីក្រសួងហិរញ្ញវត្ថុ |
|
៩ |
ឯ.ឧ. ប្រតិស្ឋ ភ័ទ្រប្រសិទ្ធិ |
ប្រ-ដិត-ភាក់-ត្រ-ប្រ-សិត |
អនុរដ្ឋមន្ត្រី
|
|
១០ |
ឯ.ឧ. ពឬឍិជ័យ តម្រុងរ័ត្ន |
ព-រិត-ធិ-ជៃ-តំ-រ៉ុង-រាត់ |
|
|
១១ |
ឯ.ឧ. ក្សិត ភិរម្យ |
ក្សិត-ភិ-រំ |
រដ្ឋមន្ត្រីក្រសួងការបរទេស |
|
១២ |
ឯ.ឧ. ជុមពល សិល្បអាជា |
ជុំ-ពុល-សី-លៈ-ប៉ៈ-អា-ជា |
រដ្ឋមន្ត្រីក្រសួងទេសចរណ៍ និងកីឡា |
|
១៣ |
ឯ.ឧ. វិឌូរ្យ នាមបុត្រ |
វិ-ឌូ-នាម-បុត |
រដ្ឋមន្ត្រីក្រសួងអភិវឌ្ឍន៍សង្គម និងសន្តិសុខ |
|
១៤ |
ឯ.ឧ. ធីរៈ វង្សសមុទ្រ |
ធី-រៈ-វង់-សៈ-មុត |
រដ្ឋមន្ត្រីក្រសួងកសិកម្ម និងសហករណ៍ |
|
១៥ |
ឯ.ឧ. ជាតិ ពុគ្យាភរណ៍ |
ជាត-ពុក-យា-ភ |
អនុរដ្ឋមន្ត្រី
|
|
១៦ |
ឯ.ឧ. ជាតិជាយ ពុគ្យាភរណ៍ |
ជាត-តិ-ជាយ-ពុក-យា-ភ |
|
|
១៧ |
ឯ.ឧ. សោភ័ណ្ឌ សារម្យ |
សោ-ភាន់-សា-រុំ |
រដ្ឋមន្ត្រីក្រសួងគមនាគម |
|
១៨ |
ឯ.ឧ. ប្រចក្ស ក្លែវក្លាហាន |
ប្រ-ចាក់-ក្លែវ-ក្លា-ហាន |
អនុរដ្ឋមន្ត្រី
|
|
១៩ |
ឯ.ឧ. កឿកូល តានជ័យវិចិត្រ |
កឿ-កូល-ដាន-ជៃ-វិ-ចិត |
|
|
២០ |
ឯ.ឧ. សុវិទ្យ គុណកិត្តិ |
សុ-វិត-គុណ-កិត-តិ |
រដ្ឋមន្ត្រីក្រសួងធនធានធម្មជាតិ និងបរិស្ថាន |
|
២១ |
ឧត្ដមសេនីយត្រី ជំទាវ រៈនងរក្ស សុវណ្ណឆវី |
រៈ-នង-រាក់-សុ-វ៉ាន់-ឆ-វី |
រដ្ឋមន្ត្រីក្រសួងបច្ចេកវិជ្ជា និងព័ត៌មាន |
|
២២ |
ឯ.ឧ. វណ្ណរ័ត្ស ជាញនុកូល |
វ៉ាន់-នៈ-រាត់-ជាញ-នុ-កូល |
រដ្ឋមន្ត្រីក្រសួងថាមពល |
|
២៣ |
ជំទាវ ពរទិវា នាគាស័យ |
ព-រៈ-ទិ-វា-នា-គា-សៃ |
រដ្ឋមន្ត្រីក្រសួងពាណិជ្ជកម្ម |
|
២៤ |
ឯ.ឧ. អលុងករណ៍ ពលបុត្រ |
អ-ឡុង-ក-ព-លៈ-បុត |
អនុរដ្ឋមន្ត្រី |
|
២៥ |
ឯ.ឧ. ជវរ័ត្ន ជាញវីរកូល |
ជៈ-វៈ-រាត់-ជាញ-វី-រៈ-កូល |
រដ្ឋមន្ត្រីក្រសួងមហាផ្ទៃ |
|
២៦ |
ឯ.ឧ. បុណ្យចុង វង្សត្រៃរ័ត្ន |
បុន-ចុង-វង់-ត្រៃ-រាត់ |
អនុរដ្ឋមន្ត្រី
|
|
២៧ |
ឯ.ឧ. ថាវរ សេននៀម |
ថា-វន-សេន-នាម |
|
|
២៨ |
ឯ.ឧ. ភីរៈពន្ធុ សាលីរដ្ឋវិភាគ |
ភី-រៈ-ពន់-ធុ សា-លី-រាត់-វិ-ភាក |
រដ្ឋមន្ត្រីក្រសួងយុត្តិធម៌ |
|
២៩ |
ឯ.ឧ. ពៃឌូរ្យ កែវថង |
ពៃ-ឌូ-កែវ-ថង |
រដ្ឋមន្ត្រីក្រសួងការងារ |
|
៣០ |
ឯ.ឧ. ធីរៈ ស្ល័កពេជ្រ |
ធី-រៈ-ស្លាក់-ពេច |
រដ្ឋមន្ត្រីក្រសួងវប្បធម៌ |
|
៣១ |
ជំទាវ កល្យា សោភណ្ឌពណិជ |
កល់-លៈ-យ៉ា-សោ-ភាន់-ពៈ-ណិច |
រដ្ឋមន្ត្រីក្រសួងវិទ្យាសាស្ត្រ និងតិចណូឡូជី |
|
៣២ |
ឯ.ឧ. ចុរិន្ទ្រ លក្សណវិសិដ្ឋ |
ចុ-រិន-លាក់-សៈ-ណៈ-វិ-សិត |
រដ្ឋមន្ត្រីក្រសួងសិក្សាធិការ |
|
៣៣ |
ឯ.ឧ. ជ័យវុឌ្ឍិ បណ្ណវ័ឌ្ឍន៍ |
ជៃ-យៈ-វុត-បាន់-ណៈ-វាត់ |
អនុរដ្ឋមន្ត្រី
|
|
៣៤ |
កញ្ញា នរិសរា ជវាលតនពិភ័ទ្ន |
ន-រិ-សៈ-រា-ជ-វាល-តៈ-នៈ-ពិ-ភាត់ |
|
|
៣៥ |
ឯ.ឧ. វិទ្យា កែវភរាត័យ |
វិត-ទ្យា-កែវ-ភ-រា-ដៃ |
រដ្ឋមន្ត្រីក្រសួងសុខាភិបាល |
|
៣៦ |
ឯ.ឧ. មានិត នពអមរបតី |
មា-និត-នៈ-ពៈ-អៈ-មៈ-រៈ-បៈ-ដី |
អនុរដ្ឋមន្ត្រី |
|
៣៧ |
ឯ.ឧ. ជាញជ័យ ជ័យរុងរឿង |
ជាញ-ជៃ-ជៃ-រុង-រឿង |
រដ្ឋមន្ត្រីក្រសួងឧស្សាហកម្ម |
ប្រកាសទាក់ទង៖
១. គណៈរដ្ឋមន្ត្រីថៃថ្មី
២. ឈ្មោះរដ្ឋមន្ត្រីថៃ
អាថ៌កំបាំងការរំលាយព្រះសពព្រះរាមមហាក្សត្រិយ៍ថៃ ខែ ធ្នូ 20, 2008
Posted by សុភ័ក្ត្រ in ภาษาไทย, ពីនេះពីនោះ, អំពីសុភ័ក្ត្រ.5 comments
ព្រឹកមិញនេះ ថ្នាក់រៀនរបស់ខ្ញុំត្រូវបន្តធ្វើទស្សនកិច្ចសិក្សាជាលើកទីពីរនៅសារមន្ទីរជាតិក្រុងបាងកក ក្រោយពីសប្ដាហ៍មុននេះទស្សនាមិនទាន់អស់។ (សូមអានទីនេះ ប្រកាសគ្រាមុន)។
ពួកយើងបានជួបជុំគ្នាតាមការណាត់នៅមុខបរិវេណសារមន្ទីរម៉ោងប្រមាណ៩ព្រឹក។ អាគារដែលពួកយើងត្រូវទស្សនាដំបូងបំផុតនោះ គឺអគារដាក់រាជរថនានា នៃព្រះរាជពិធីព្រះមហាក្សត្រិយ៍ថៃ។ បរិវេណអគារនេះ មានផ្ទុកទៅដោយរាជរថធំៗចំនួនពីរ និងរាជរថតូចៗចំនួនបីទៀត ដែលក្នុងនោះមានរាជរថដែលប្រើប្រាស់ក្នុងព្រះរាជពិធីរំលាយព្រះសពព្រះរាមមហាក្សត្រិយ៍ថៃកាលពីពេលថ្មីៗកន្លងទៅនេះផងដែរ។ ក្រៅពីរាជរថ អគារនេះមានផ្ទុកទៅដោយព្រះកោដ្ឋ និងសម្ភារៈបុរាណជាច្រើនដែលគេបានសាងសង់ក្នុងព្រះរាជពិធីបុណ្យព្រះសពព្រះមហាក្សត្រិយ៍ និងរាជវង្សានុវង្សថៃផងដែរ។
ថ្ងៃនេះអានិតគ្រូដែរ ព្រោះត្រូវបរិយាយឡើងពេញកន្លះថ្ងៃ ហើយដល់បាយថ្ងៃត្រង់ត្រូវប៉ាវបាយសិស្សសិស្សទៀត (គាត់ប៉ាវរហូតមករាល់ពេលចេញក្រៅមកទស្សនកិច្ចសិក្សា)។
ថ្ងៃនេះតាមរយៈបរិយាយរបស់អ្នកគ្រូ ខ្ញុំបានជ្រាបព័ត៌មានមួយដែលមិននឹកដល់ នោះគឺអាថ៌កំបាំងការរំលាយព្រះសពព្រះរាមមហាក្សត្រិយ៍ថៃ។ ចម្ងល់មួយដែលខ្ញុំមានមកយូរហើយដែរនោះ ក៏ត្រូវបានដោះស្រាយក្នុងថ្ងៃនេះដែរ នោះគឺ តើសពព្រះមហាក្សត្រិយ៍, ព្រះសង្ឃ ឬអ្នកមានព្រះនាមខ្ពស់ៗនោះគេដាក់ក្នុងកោដ្ឋយ៉ាងដូចម្ដេច ដែលធម្មតាយើងធ្លាប់តែឃើញសពសមញ្ញជនគេដាក់ផ្ដេកនៅក្នុងម្ឈូសនោះ។ ខ្ញុំធ្លាប់ដោះស្រាយខ្លួនឯងថា ប្រហែលជាគេដាក់បញ្ឈរ តែខ្ញុំសួរខ្លួនឯងថា បើដាក់បញ្ឈរវាមិនដួល? តែក្រោយមកមិនដឹងជាមាននរណាទេ បានប្រាប់ខ្ញុំថាសពពេលស្លាប់ហើយ បើនៅកាយវិការណា គឺនៅកាយវិការនោះ វាមិនដួលទេ ចម្លើយនេះវាម្យ៉ាងដែរ តែបើខ្ញុំគិតម្យ៉ាងទៀតនោះគឺគេដាក់អង្គុយ។
ថ្ងៃនេះចម្លើយបានដោះស្រាយហើយ តាមពិតនោះគឺអង្គុយទេបងប្អូន។ អ្វីដែលអស្ចារ្យនោះទៅទៀតនោះ គឺមិនមែនអង្គុយធម្មតាទេ។ ការអង្គុយរបស់សពគឺត្រូវអង្គុយដោយយកដៃទាំងពីដាក់ពីក្រោមភ្លៅទាំងសងយកមកប្រណម្យគ្នាដោយមានស្នូលឈើដាក់ភ្ជាប់ក្នុងចន្លោះដៃដែលប្រណម្យ និងទ្រូងរួចទើបគេចងភ្ជាប់ (ខ្សែសីមា?) រុំសព។ កាលនេះមើលទៅវាពិតជាពិបាក (លោកអ្នកសាកល្បងអង្គុយបែបនេះលោហ៍មើល៍) និងវេទនាភ្នែកណាស់។ ចំណេះដឹងដែលទទួលបានយ៉ាងល្អមួយទៀតនោះគឺឆ្លើយទៅនឹងសំណួរ ថាតើ ហេតុអ្វីបានជាមហាក្សត្រិយ៍ និងអ្នកមានឥស្សរិយយសធំៗ គេដាក់ព្រះសពនៅក្នុងកោដ្ឋជាជាងម្ឈូសដូចសាមញ្ញជននោះ? លោកអ្នកសាកល្បងគិតមួយសន្ទុះទៅមើល ប្រសិនបើឆ្លើយសមហេតុផល ខ្ញុំមានរង្វាន់ឲ្យ កិកិកិ… (ចម្លើយប្រាប់សប្ដាហ៍ក្រោយប្រសិនបើគ្មាននរណាឆ្លើយត្រូវ)។
អូខេ! អាឡែតែប៉ប៉ែប៉ប៉ាច់ងាកឆ្ងាយពីចំណងជើង។ យើងបែរមកយល់ដឹងពីអ្វីដែលខ្ញុំថាអាថ៌កំបាំងពីក្រោយការរំលាយព្រះសពព្រះរាមមហាក្សត្រិយ៍ថៃ សម្ដេចព្រះចៅភីនាងធើ ចៅហ្វាកល្យាណិវឌ្ឍនា ក្រុមហ្លួងនរាធិវាសរាជនគរិន្ទ្រ វិញម្ដង។ ប្រហែលជាលោកអ្នកមួយចំនួនបានឃើញពីពិធីហែរក្បួនព្រះសពដ៏អស្ចារ្យ ឬយ៉ាងហោចណាស់ក៏តាមទូរទស្សន៍ និងអ៊ីនធ័រណេតដែរ កាលពីខែកន្លងទៅនេះ។
អ្វីដែលខ្ញុំគិតមិនដល់នោះ លោកអ្នកដឹងទេ តាមពិតនៅក្នុងព្រះកោដ្ឋដែលគេហែរនោះមិនមែនជាព្រះសពរបស់ព្រះអង្គទេ។ នៅក្នុងព្រះកោដ្ឋិនោះមានត្រឹមតែគ្រឿងជារបស់ព្រះអង្គមួយចំនួនដូចជាសក់ និងរបស់មួយចំនួនទៀតតែប៉ុណ្ណោះ។ ធាតុពិតសពរបស់ព្រះអង្គមិនត្រូវបានគេដាក់ក្នុងព្រះកោដ្ឋទេ គឺគេដាក់នៅក្នុងម្ឈូសដូចសាមញ្ញជនធម្មតា។ ទំនៀមនេះគេធ្វើតាំងពីជំនាន់ម្ដាយរបស់គាត់មកម្ល៉េះ ហេតុដូចនេះព្រះអង្គក៏សុំឲ្យបន្តស្នងព្រះបាទព្រះមាតាទ្រង់។
សពរបស់ព្រះអង្គត្រូវបានក្រុមព្រះរាជវាំងយកទៅដាក់នៅក្នុងព្រះមេរុ ដោយអាថ៌កំបាំង ពោលគឺមិនឲ្យមានសាធុជនណាដឹង ឬបានឃើញទេ គឺមានតែអ្នកស្និទ្ធនឹងព្រះរាជវាំង ឬអ្នកដែលធ្វើការងារនោះផ្ទាល់តែប៉ុណ្ណោះ។ ចំណែកឯការរំលាយព្រះសពនោះក៏មានអាថ៌កំបាំងមួយចំនួនទាក់ទងនឹងពេលវេលាផងដែរ។ ការនេះប្រហែលជានៅមានជនជាតិថៃជាច្រើនណាស់ដែលមិនបានដឹងពីរឿងនេះ ដោយនឹកស្មានតែគេហែរព្រះសពពិតដូចជាខ្ញុំដែរ៕
______________________________________________________
ប្រកាសទាក់ទង៖
១. ម្ចាស់បង ស្ដេចថៃសោយទិវង្គត
២. សារមន្ទីជាតិថៃ
៣. ទស្សនកិច្ចសិក្សា៖ ព្រះបរមរាជវាំងក្រុងបាងកក
៤. ការរំលាយសពព្រះមហាក្ស័ត្រិយ៍ និងអ្នកមានឋានៈខ្ពង់ខ្ពស់
៥. កោដ្ឋ
