ដំបៅមិនឈឺយកឈើចាក់ ខែ កក្កដា 16, 2009
Posted by សុភ័ក្ត្រ in នយោបាយ, បរិយាយថ្ងៃនេះ, អំពីស្រុកខ្មែរ.add a comment
វាគួរឲ្យអស់សំណើចណាស់ដែលឥរិយាបទរបស់លោក ម៉ម ណៃ បានធ្វើប៉ុន្មានថ្ងៃនេះនៅឯសាលាក្ដីខ្មែរក្រហម។ លោក ម៉ម ណៃ គឺជាអតីតបុគ្គលិកក្រោមបញ្ជារបស់លោក កាំង ហ្កេកអ៊ាវ ហៅ ឌុច ឬហៅសាមញ្ញថា អតីតពេជ្ឈឃាតនៅគុកទួលស្លែងនោះ។
ប្រហែលជាក្នុងបំណងចង់បន្ថែមទម្ងន់ទោសដល់លោក ឌុច ហើយមើលទៅ បានជាលោក ម៉ម ណៃ សុខចិត្តមកធ្វើជាសាក្សីក្នុងអង្គសវនាការ កាលពីរសៀលថ្ងៃច័ន្ទទី១៣ ខែកក្កដា ឆ្នាំ២០០៩ ក៏ប៉ុន្តែអង្គសវនាការត្រូវបានផ្អាកទៅវិញភ្លាមៗ បន្ទាប់ពីមេធាវីការពារឌុចលើកឡើងពីក្តីបារម្ភខ្លាចលោក ម៉ម ណៃ ត្រូវបានចោទប្រកាន់ពីសហឧក្រិដ្ឋកម្មរួមជាមួយនឹង ឌុច ស្របតាមសំណើរបស់សហព្រះរាជអាជ្ញា។ ថាមកធ្វើសាក្សី ចុះឡើងៗប៊ិះនឹងជាប់ចោទដូច ឌុច ទៅវិញ។
ស្អែកឡើង គឺនៅថ្ងៃទី១៤ ខែកក្កដា ឆ្នាំ២០០៩ មើលទំនងលោក ម៉ម ណៃ ដូចជាលែងក្លាហានដូចពីម្សិល ហើយរាល់ចម្លើយរបស់លោកសឹងតែយកជាការមិនបានសោះ ដោយលោកបានព្យាយាមមិនលើកឡើងពីសកម្មភាពផ្ទាល់ខ្លួន និងសូម្បីតែសកម្មភាពរបស់ ឌុច ក៏លោក ម៉ម ណៃ ឆ្លើយថាមិនដឹងដែរ។
អ្វីដែលនៅតែធ្វើឲ្យ ឌុច ក្លាយជាតួអង្គអស្ចារ្យសម្រាប់សាលាក្ដីខ្មែរក្រហមនោះ គឺថា ឌុច បន្តភាពក្លាហានរបស់គាត់ ក៏ដូចជាលើកទឹកចិត្តកូនចៅគាត់ គឺលោក ម៉ម ណៃ នេះឯង។ ឌុច ក្រោកឈរឡើងបែរមុខទៅរក ម៉ម ណៃ ហើយនិយាយទាំងស្វាហាប់ប្រាប់ឲ្យសាក្សី ម៉ម ណៃ និយាយតែការពិតឡើងវិញ «កុំខ្លាចស្លាប់»។ ឌុច ប្រាប់ឲ្យ ម៉ម ណៃ ធ្វើខ្លួនជាអ្នកទទួលខុសត្រូវចំពោះជាតិ និងប្រជាជនដូចរូបគាត់។ ឌុចប្រាប់ ម៉ម ណៃ ថា «ដំរីស្លាប់កុំយកចង្អេរទៅបាំង»។ ពិតណាស់ ទាំង ឌុច និង ម៉ម ណៃ ទីបំផុតសុទ្ធតែជាអ្នកទទួលខុសត្រូវនៃការស្លាប់របស់ប្រជាជនខ្មែរ ក្នុងនាមជាបក្សកុម្មុយនីស្តកម្ពុជា នេះបើតាមសម្ដីរបស់ ឌុច។ បើទោះចង្អេរបាំងដំរីជិត ក្លិនអសោចនៃដំរីស្លាប់វាមិនអាចបាំងបានទេ។
វាពិតជាអស់សំណើចណាស់ តែប៉ុណ្ណេះ លោក ម៉ម ណៃ ក៏ប្រហែលជានឹងមិនរួចខ្លួនទេមើលទៅ។ នេះដូចគេថា សុខៗយកកមកលអន្ទាក់ និងដំបៅមិនឈឺយកឈើមកចាក់ដូច្នេះឯងដែរ៕
________________________________________________________
អានបន្ថែម៖
