ភ្លៀងធំនៅថ្ងៃទី៣ នៃបុណ្យអុំទូក ខែ វិច្ឆិកា 3, 2009
Posted by សុភ័ក្ត្រ in ពីនេះពីនោះ, អំពីស្រុកខ្មែរ.trackback
នៅរសៀលថ្ងៃទី៣ ដែលជាថ្ងៃបង្ហើយនៃព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែឆ្នាំនេះត្រូវរំខានដោយព្រះភិរុណមួយមេយ៉ាងធំ ជាហេតុធ្វើឲ្យព្រះរាជពិធីត្រូវអាក់ខានផងដែរ ជាពិសេសគឺពិធីហែរប្រទីប។
ទោះជាយ៉ាងណាក្ដីការប្រណាំងទូកត្រូវបានបញ្ចប់ដោយជោគជ័យ ដោយព្រះករុណាជាអម្ចាស់ទ្រង់បានចែករង្វាន់ជ័យលាភីដល់កីឡាករប្រណាំងទាំងអស់ផងៗដង រីឯព្រះរាជពិធីកាត់ព្រ័ត្រវិញក៏នៅតែត្រូវបានប្រារព្ធធ្វើដោយការចូលរួមយ៉ាងផុសផុល និងគួរឲ្យស្ញប់ស្ញែងជាខ្លាំងពីសំណាក់បងប្អូនកីឡាករ និងក្រោមការពេញព្រះទ័យពីព្រះមហាក្ស័ត្រិយ៍ និងថ្នាក់ដឹកនាំទាំងអស់ដែលកំពុងទត និងទស្សនាគួរជាទីមោទនៈ។
-
ព្រះករុណាជាអម្ចាស់សព្ធព្រះទ័យបង្ហាញព្រះភ័ក្ត្រកណ្ដាលព្រះភិរុណ
តាមរយៈការផ្សាយបន្តផ្ទាល់ពីស្ថានីយទូរទស្សន៍ជាតិ (ទទក) ព្រះករុណាជាអម្ចាស់ជីវិតតម្កល់លើត្បូងទ្រង់បានសព្ធព្រះរាជហ្ឬទ័យបង្ហាញព្រះភ័ក្ត្រដល់កូនក្មួយព្រះអង្គដែរសុខចិត្តនៅរួមពិធីនាថ្ងៃទីបីនេះទោះបីមានភ្លៀងខ្លាំងយ៉ាងណាក៏ដោយ។
ព្រះករុណាទ្រង់បានយាងចូលព្រះបរមរាជវាំងវិញបន្ទាប់ពីពិធីឯទន្លេចតុម្មុខបានបញ្ចប់ ដោយទ្រង់សព្ធព្រះទ័យឈរក្នុងព្រះទីន័ងរថយន្តបើកដំបូល លើកព្រះហត្ថបក់ស្វាគមន៍កូនក្មួយព្រះអង្គដែរឈរអមជុំវិញផ្លូវ ទោះបីមេឃកំពុងបង្អុរទឹកភ្លៀងយ៉ាងណាក៏ដោយ។
-
ស្ថានីយ៍ប្រគុំតន្ត្រីត្រូវអាក់ខាន
ការប្រគុំតន្ត្រីនានារបស់ស្ថានីយ៍ទូរទស្សន៍ខ្មែរត្រូវបានរំខានដោយសារភ្លៀងមួយមេយ៉ាងធំនេះ លើកលែងតែស្ថានីយ៍ទូរទស្សន៍លេខ៩មួយគត់ គ្រប់ស្ថានីយ៍ដែលធ្វើការផ្សាយបន្តផ្ទាល់ទាំងអស់ត្រូវបានលើកពេលរហូតដល់ម៉ោងជាង៩យប់ឯណោះទើបចាប់ផ្ដើមប្រគុំតន្ត្រី និងការផ្សារបន្តផ្ទាល់តាមទូរទស្សន៍បាន។
-
អ្នកទស្សនានៅបន្តរង់ចាំ
អ្វីដែលញួរឲ្យសរសើរ និងស្ញើចចំពោះប្រិយមិត្រអ្នកតាមដានការប្រគុំតន្ត្រីនោះគឺថា ពួកគាត់នៅរង់ចាំតាមដានការប្រគុំតន្ត្រីនេះ គ្រប់ស្ថានីយ៍ផ្សាយបន្តផ្ទាល់ទាំងអស់មានមនុស្សម្នានៅរង់ចាំទស្សនាយ៉ាងណែនណាំដូចថ្ងៃទី១ និងទី២ដែរ ទោះបីជាមេឃភ្លៀងក៏ដោយ។ គួរឲ្យសរសើរពួកគាត់ជាពន់ពេក។
-
អ្នកទស្សនាបុណ្យឆ្នាំនេះថយចុះ
បើតាមការសង្កេតគឺថាឆ្នាំនេះប្រជាជនមកចូលរួមបុណ្យហាក់បីដូចជាមានការថយចុះជាងឆ្នាំកន្លងទៅ។ នេះក៏ប្រហែលជាដោយសារវិបត្តិសេដ្ឋកិច្ច ការរាលដាលជំងឺផ្ដាសាយ និងជាពិសេសថ្ងៃទី៣ ដែលជាថ្ងៃបញ្ចប់នេះ ត្រូវបានគេរំពឹងថា នឹងមានប្រជាជនចូលរួមច្រើនតែត្រូវរំខានដោយព្យុះភ្លៀងយ៉ាងធំ៕
ជួបគ្នាឆ្នាំក្រោយទៀតបងប្អូន!
ម៉ោងជាង៩យប់ទៅហើយទើបស្ថានីយ៍ទូរទស្សន៍នានាអាចធ្វើការផ្សាយបន្តផ្ទាល់បាន
ការប្រគុំតន្ត្រីរបស់ស្ថានីយ៍បាយ័នប្រជាជននៅរង់ចាំទស្សនាកុះករ
ការផ្សាយ និងប្រគុំតន្ត្រីរបស់ទូរទស្សន៍លេខ៥ក៏ឃើញមានអ្នកទស្សនាកុះករដែរ
ឯស្ថានីយ៍លេខ៣វិញក៏ដូច្នោះដែរ
ដោយឡែកស្ថានីយ៍លេខ៩មិនមានការអាក់ខានទេ និងមនុស្សម្នាយ៉ាងច្រើនដដែល
______________________________________________________
អានផងដែរ៖
១. ទិដ្ឋភាពបុណ្យអុំទូក ថ្ងៃទីមួយ
[...] [...]