អភិសិទ្ធិចេញថ្លែងការណ៍ករណីខ្មែរចាប់ជនជាតិថៃ ថ្ងៃ អាទិត្យ 23 ខែមករា 2011
Posted by សុភ័ក្ត្រ in នយោបាយ, អំពីស្រុកខ្មែរ, ภาษาไทย.11 comments
យប់នេះ អស់រយៈពេល៣០នាទីគត់ (២០:៣០ -២១:០០) នាយ អភិសិទ្ធិ វេជ្ជាជីវៈ នាយករដ្ឋមន្ត្រីនៃរាជអាណាចក្រថៃ បានចេញតាមទូរទស្សន៍ ក្នុងកម្មវិធីពិសេសមួយឈ្មោះថា «រាយការណ៍ពិសេសពីនាយករដ្ឋមន្ត្រី» (ថៃ៖ รายงานพิเศษจากนายกรัฐมนตรี) ដោយផ្សាយបន្តផ្ទាល់គ្រប់ស្ថានីយ៍ទូរទស្សន៍ទាំងអស់ ទាក់ទងនឹងហេតុការណ៍ដែលកម្ពុជាបានចាប់ជនជាតិថៃ៧នាក់កាលពីចុងឆ្នាំ២០១០មកនោះ។
នាយករដ្ឋមន្ត្រីមុខស្រស់ សម្ដីផ្អែមតែពិសពុលរូបនេះ បាននិយាយថា ខ្លួនរង់ចាំបកស្រាយហេតុការណ៍ទាំងនេះជូនប្រជាជាតិថៃឲ្យបានដឹងតាំងពីហេតុការណ៍កើតឡើងភ្លាមៗមកម្ល៉េះ តែដោយសារកម្ពុជាបានសម្រេចយករឿងនេះទៅតុលាការ ហើយបន្ទាប់ពីតុលាការបានកាត់ទោស និងមានជនជាតិថៃចំនួន៥នាក់បានត្រឡប់ទៅស្រុកថៃហើយវិញនោះ ទើបខ្លួនសម្រេចចិត្តចេញតាមទូរទស្សន៍បកស្រាយរឿងនេះ។
នាយ អភិសិទ្ធិ បានព្យាយាមប្រាប់ដល់ជនជាតិថៃថា ការដែលតុលាការកម្ពុជាបានកាត់សេចក្ដីដល់ជនជាតិថៃទាំង៥រូបថាបានចូលមកក្នុងទឹកដីកម្ពុជាដោយខុសច្បាប់នោះ មិនមានចំណងអ្វីទៅនឹងការទទួលស្គាល់ទឹកដីនោះជារបស់កម្ពុជាទេ ដ្បិតអ្នកដែលមានសិទ្ធិអារកាត់បានគឺគណៈកម្មាធិការព្រំដែនរួមកម្ពុជាថៃ ឬជីប៊ីស៊ីឯណោះទេ រួមនិងអនុស្សារណៈឆ្នាំ២០០០ ហេតុនេះទៅអនាគតកម្ពុជាមិនអាចយកហេតុផលនេះមកអាងទេ។
ក្រៅពីនេះ នាយ អភិសិទ្ធិ នៅបានខិតខំការពារអ៊ឹមអូយូ ឬអនុស្សារណៈនៃការយោគយល់គ្នា ក្នុងការដោះស្រាយបញ្ហាព្រំដែនកម្ពុជាថៃ ដែលកាលណោះគណៈបក្សរបស់លោកជាតំណាងបានចុះហត្ថលេខាជាមួយកម្ពុជា។
នាយ អភិសិទ្ធិ តាំងពីមុនធ្វើជានាយករដ្ឋមន្ត្រីមកម្ល៉េះ ត្រូវបានគេមើលឃើញថាជាអ្នកប្រឆាំងនឹងកម្ពុជាយ៉ាងចេញមុខ ជាពិសេសគឺរឿងទាក់ទងនឹងបញ្ហាប្រាសាទព្រះវិហារ។ នៅថ្ងៃនេះផងដែរ នាយ អភិសិទ្ធិ ក៏បានបញ្ជាឲ្យមេទ័ពថៃឲ្យដោះស្រាយជាមួយកម្ពុជាក្នុងការដកស្លាកដែលខាងកម្ពុជាដាក់នៅប្រាសាទព្រះវិហារ ដែលកម្ពុជាបានដាក់ថា ជាកន្លែងដែលកងទ័ពថៃឈ្លានពាននោះផងទៀត។ ចាំមើលថាតើខាងកម្ពុជាមានជំហរខ្លាំងប៉ុណ្ណាចំពោះការដកស្លាកនេះចេញនោះ? (សូមអានអត្ថបទ៖ កម្ពុជា, ឃ្លាត់បានតែម៉ាំង)
នាយ អភិសិទ្ធិ ចេញមុខតាមទូរទស្សន៍គ្រប់ប៉ុស្តិ៍រាយការណ៍ករណីខ្មែរចាប់ថៃ
នាយ អភិសិទ្ធិ ចង្អុលបង្ហាញផែនដីដែលខ្មែរចាប់ថៃ
_____________________________________________________
អានផងដែរ៖
១. ទាហានខ្មែរចាប់បានអាបថៃ
២. ហ៊ុន សែន ជួបជើងខ្លាំងពិតប្រាកដ
៣. កម្ពុជា, ឃ្លាត់បានតែម៉ាំង
៤. យ៉ាងម៉េចហើយទំនាក់ទំនងស្រឡាញ់-ស្អប់?
៥. ដាក់ទោស “ អាប” ឈ្មោល វីរៈ ៨ឆ្នាំ នាងអាបញី៦ឆ្នាំ
