លិខិតចំហទៅ KI មេឌា ថ្ងៃព្រហស្បតិ៍ 27 ខែមករា 2011
Posted by សុភ័ក្ត្រ in ពីនេះពីនោះ, អំពីសុភ័ក្ត្រ.34 comments
● KI ត្រូវបញ្ឈប់ការយកប្រកាសខ្ញុំទៅកេងនយោបាយ
និងយកទៅផ្សាយបន្តដោយគ្មានការអនុញ្ញាត
ពេញមួយថ្ងៃនេះ មានអ្នកចូលមកបើកមើល និងផុសត៍មតិប្លែកៗសំដៅប្រឆាំងរដ្ឋាភិបាល បន្ទាប់ពីគេហទំព័រ អ្វីដែលគេហៅថា “ខេអាយ មេឌា” ក្រុមប្រឆាំងដាច់ក្បាលដាច់កន្ទុយរបស់អស់លោក យកប្រកាសមួយរបស់ខ្ញុំដែលបានដាក់ពីម្សិលមិញនេះ ដោយមិនបានសុំការអនុញ្ញាត និងគ្មានការអនុញ្ញាតសោះឡើយ។ ទង្វើរបស់ខេអាយនេះ ពិតណាស់មិនស័ក្ដិសមឡើយ, ទាំងក្នុងពេលអតីតកាល បច្ចុប្បន្ន និងតទៅអនាគត, ក្នុងការតាំងខ្លួនជាអ្នកមានចំណេះដឹង ឬអ្វីដែលគេហៅថា អ៊ីនថែលលីជេន ស្អីនោះ។ ដ្បិតការយករបស់របរជាកម្មសិទ្ធិរបស់បុគ្គលណាម្នាក់ ដោយគ្មានការអនុញ្ញាតបែបនេះ វាបានផ្ទុយទាំងស្រុងទៅនឹងកម្មសិទ្ធិបញ្ញា ហើយដែលអ្នកចេះដឹងគេមិនធ្វើ។
អ្វីដែលលើសពីនេះទៅទៀតនោះគឺថា ក្រៅអំពីយកអត្ថបទរបស់ខ្ញុំទៅចុះផ្សាយដោយគ្មានការអនុញ្ញាតហើយ វេបសៃត៍ ក៏ដូចជាក្រុមរបស់ពួកលោកកំពុងតែកែប្រែ ក្នុងចរឹតបំផ្លែងអត្ថបទរបស់ខ្ញុំឲ្យទៅជាអត្ថបទនយោបាយ ក្នុងន័យប្រឆាំងរដ្ឋាភិបាល ដូចដែលក្រុម និងវេបសៃត៍របស់ពួកលោកនេះ បាននឹងកំពុងធ្វើ, បាននឹងកំពុងរវើរវាយ និងការប្រឆាំងហួសហេតុ គ្មានទិសគ្មានតំបន់។
ហេតុដូចនេះ ខ្ញុំសូមជូនដំណឹងដល់ក្រុម ឃេអាយ ទាំងអស់ ត្រូវបញ្ឈប់ជាបន្ទាន់ នូវការយកប្រកាសរបស់ខ្ញុំទៅដាក់នៅវេបសៃត៍របស់អស់លោក ដើម្បីបំផ្លែងបម្រើមហិច្ឆតានយោបាយរបស់អស់លោក។ ប្រការសំខាន់បំផុតនោះគឺថា ខេអាយ មេឌា មិនមានគោលគំនិតអ្វីណាមួយស្របនឹងខ្ញុំទាល់តែសោះ។ ខ្ញុំគាំទ្ររដ្ឋាភិបាលស្រឡាញ់បាវចនា និងរដ្ឋធម្មនុញ្ញបច្ចុប្បន្ន ដែលកើតឡើងពិតៗពីប្រជាជនភាគច្រើន ដែលកំពុងរស់នៅក្នុងផែនដីកម្ពុជានេះ។ ខ្ញុំទទួលស្គាល់នូវសមិទ្ធផលនានារបស់រដ្ឋាភិបាលដែលបាននឹងកំពុងធ្វើ ដែលទស្សនៈ និងហេតុផលអស់ទាំងនេះ មិនស្របគ្នាទាល់តែសោះ ជាមួយនឹង ខេអាយ មេឌា។ ហេតុដូចនេះ ប្រកាសរបស់ខ្ញុំទាំងឡាយ មិនមានហេតុផលអ្វីត្រូវមានវត្តមាននៅក្នុងវេបសៃត៍ (ខេអាយ) មួយនេះទេ។
រាល់ប្រកាសទាំងអស់របស់ខ្ញុំ បានសរសេរចេញឡើងក្នុងនាមជាពលរដ្ឋសាមញ្ញមួយ ដោយមិនមានពាក់ព័ន្ធនឹងក្រុម ឬបុគ្គល ឬបក្ខ ឬពួក ណាមួយឡើយ។ ហើយរាល់ប្រកាសនានា គឺធ្វើឡើងតាមវិធីសមធម៌ បើទិទៀន គឺក្នុងន័យស្ថាបនា ធ្វើឲ្យប្រសើរឡើង ពោលគឺមិនមែន រិះគន់បែប អគតិ មិនទទួលស្គាល់ការពិតដូចដែលក្រុម ខេអាយ របស់លោកបានធ្វើនោះទេ។
ជាថ្មីម្ដងទៀត ក្នុងនាមជាពលរដ្ឋក្នុងស្រុកម្នាក់ ខ្ញុំអាចនិយាយថាខ្ញុំមិនពេញចិត្តទាល់សោះនូវសកម្មភាពរបស់ក្រុមលោក ដែលបានប្រមាថ មាក់ងាយ ជាតិសាសន៍ មេដឹកនាំខ្លួន រហូតទៅដល់ព្រះមហាក្ស័ត្រិយ៍ ដែលពួងប្រជាគោរពសក្ការៈ, បង្កជាផលរមាស់រហូតដល់មានការបិទរាំងខ្ទប់វេបសៃត៍របស់អស់លោក ហើយដែលខ្ញុំគាំទ្រទាំងស្រុងក្នុងការបិទខ្ទប់ប្លក់របស់លោកនេះ។ ឥឡូវនេះ ក្រុមរបស់លោកបានហៀរមកដល់ wordpress នេះទៀត។ ខ្ញុំសូមនិយាយថា ខ្ញុំមិនស្វាគមន៍ពួកលោកមក wordpress នេះទេ។ វត្តមានរបស់លោកមិនយូរមិនឆាប់ wordpress អាចនឹងមានបញ្ហាជាយថាហេតុ។ បើក្រុមលោកពិតជាស្នេហាភាពជាអាត្មានៃខ្លួនប្រាកដមែន ខ្ញុំសូមណែនាំដល់ក្រុមលោកជៀសឲ្យឆ្ងាយពីពិភពហ្វ្រីប្លក់នេះ ដើម្បីទុកឲ្យឱកាសដល់ខ្មែរឯទៀត ហើយសូមលោកទៅទិញដូមេន និងបង្ហោះជាវេបសៃត៍ឯករាជ្យផ្ទាល់ខ្លួនឯងទៅ។ ខ្ញុំមិនប្រឆាំងនឹងក្រុមអស់លោកទេ តែខ្ញុំមិនពេញចិត្តទាល់តែសោះនូវទង្វើរបស់ក្រុមលោក៕
ខមមេត៍របស់ខ្ញុំ ទៅគេហទំព័រ ខេអាយ មេឌា ឲ្យបញ្ឈប់ជាបន្ទាន់ការយកប្រកាសខ្ញុំទៅចុះផ្សាយ
