ទៅលេងប្រុយណេ ថ្ងៃ អង្គារ 1 ខែមីនា 2011
Posted by សុភ័ក្ត្រ in ទេសចរណ៍, អំពីសុភ័ក្ត្រ.trackback
សប្ដាហ៍កន្លងទៅនេះ ខ្ញុំបានទៅលេងប្រទេសប្រុយណេ ដារូស្សាឡាម ជាលើកដំបូង ដោយទៅកាន់ទីក្រុង បានដារ សេរី បេហ្កាវាន រាជធានីនៃរាជាណាចក្រដែលសម្បូរទៅដោយទ្រព្យធនប្រេងមួយនេះ។ ដូចលោកអ្នកដឹងស្រាប់ហើយអ្នកណាក៏ដឹងដែរថារាជាណាចក្រមួយនេះជាប្រទេសអ្នកមានមួយក្នុងបណ្ដាប្រទេសអាស៊ាន ឬក្នុងពិភពលោកក៏ថាបាន។ ជាទូទៅការសុំទិដ្ឋាការចូលប្រទេសប្រុយណេ មានភាពតឹងតែងគួរសម ឬជាងប្រទេសណាៗទាំងអស់នៅក្នុងអាស៊ានប្រទេសនេះ ដោយតម្រូវឲ្យមាននីតិវិធីច្រើនគួរសម។ តម្លៃទិដ្ឋាការសម្រាប់ជាតិខ្មែរ គឺ១៨ដុល្លារអាមេរិក។
ការធ្វើដំណើររបស់ខ្ញុំគ្រានេះ គឺត្រូវឆ្លងកាត់ប្រទេសម៉ាឡេស៊ី ដោយធ្វើដំណើរតាមយន្តហោះពីទីក្រុង កួឡា ឡូមពួរ ឆ្ពោះទៅកាន់ទីក្រុង បានដារ សេរី បេហ្កាវាន ផ្ទាល់តែម្ដង។ ការធ្វើដំណើរតាមយន្តហោះនេះ ត្រូវចំណាយពេលប្រមាណ២ម៉ោង២០នាទី (ម៉ោងនៅប្រុយណេលើម៉ោងនៅស្រុកខ្មែរមួយម៉ោង)។ ខ្ញុំបានចេញពីម៉ាឡេស៊ីនៅថ្ងៃសៅរ៍ ទី១៩ ខែកុម្ភៈ ឆ្នាំ២០១១ នៅវេលាម៉ោង៧ព្រឹកគត់ នឹងវេលាថ្ងៃត្រង់ក៏បានមកដល់ប្រទេសប្រុយណេ។ អាកាសយានដ្ឋានប្រទេសនេះ មិនជាធំណាស់ណាទេ ក៏ប៉ុន្តែមានសភាពទាន់សម័យ និងមាត្រដ្ឋានអន្តរជាតិច្រើនជាងអាកាសយានដ្ឋានភ្នំពេញយើង។
ជាមួយនឹងប្រជាជនក្នុងក្រុងសរុបជាងមួយសែននាក់ និងប្រជាជនក្នុងទីប្រជុំជនជាង២ម៉ឺននាក់ លោកអ្នកនឹងប្រទះភាពស្ងប់ស្ងាត់ច្រើននៅតាមដងផ្លូវនៃទីក្រុងនេះ លើកលែងតែផ្នែកខ្លះមានសភាពរវល់ច្រើនគួរសមដូចភ្នំពេញដែរ។ បើទោះបីជាមិនមានប្រជាជនច្រើនដូចបណ្ដាទីក្រុងធំៗក្នុងលោកក៏ដោយ បានដារ សេរី បេហ្កាវាន មានអ្វីៗគ្រប់បែបយ៉ាងទាំងអស់នៃហេដ្ឋារចនាសម្ព័ន្ធបែបទាន់សម័យដូចទីក្រុងធំៗទាំងអស់ក្នុងលោក (សូមអានអត្ថបទ៖ ចរាចរណ៍នៅប្រុយណេ) ក៏ដូចជាផលិតផលទាន់សម័យ និងលំដាប់ពិភពលោកផងដែរ។ តែអ្វីដែលលោកអ្នកធ្លាប់បានដឹងថាប្រុយណេ ជាប្រទេសផលិតប្រេងនោះគឺពិតណាស់ ប្រេងសាំងនៅស្រុកនេះថោកជាងទឹកសុទ្ធទៅទៀត ដែលទឹកសុទ្ធចំណុះ៣០០មិល្លីលីត្រមានប្រមាណជិតមួយដុល្លារ (ប្រាក់ប្រុយណេ ឬប្រមាណ៣០០០រៀល) នោះ ប្រេងសាំងក្នុង១លីត្រមានតម្លៃតែ៥០សេន ដុល្លារប្រុយណេ ឬប្រមាណតែ១៦០០រៀលតែប៉ុណ្ណោះ។
ខ្ញុំបានស្នាក់នៅរយៈពេល៣យប់៤ថ្ងៃ នៅក្នុងទីក្រុងមួយនេះ ដោយបានទស្សនាទីកន្លែងសំខាន់ៗជាច្រើន រួមទាំងបានទស្សនាពិធីសមបុណ្យឯករាជ្យជាតិនៃប្រុយណេផងដែរ។ អ្វីដែលគួរឲ្យកត់សម្គាល់នោះ គឺថាគ្រប់កន្លែងទស្សនានានានៅក្នុងប្រទេសនេះមិនតម្រូវឲ្យអ្នកទេសចរបង់ប្រាក់ចូលទស្សនាទេ។ ប្រជាជននៅទីនេះដែលប្រាស្រ័យទាក់ទងគ្នាជាភាសាម៉ាឡេនោះ ភាគច្រើនមានអធ្យាស្រ័យ (តាមរយៈការប្រើប្រាស់យានយន្ត) ហើយម្ហូបអាហារទៀតសោត គឺប្រហាក់ប្រហែល ឬដូចគ្នាទៅនឹងម៉ាឡេស៊ី ឬឥណ្ឌូណេស៊ី តែម្ដង។
ដោយសារប្រុយណេ ជាប្រទេសប្រកាន់សាសនាឥស្លាម ដំណើរកម្សាន្តរបស់ខ្ញុំភាគច្រើនគឺទៅកាន់ព្រះវិហារ ឬម៉ាសាជិតសំខាន់ៗ និងធំៗ ដែលមានភាពល្បីឈ្មោះរបស់ប្រទេសនេះ ដូចជា អូម៉ារ អាលី សៃហ្វូដឌិន និង Jame’Asr Hassanil Bolkiah ជាដើម។ នេះរាប់ជាលើកដំបូងរបស់ខ្ញុំផងដែរ ក្នុងការចូលទៅក្នុងព្រះវិហាររបស់សាសនាឥស្លាម។ ដូចក្នុងនាមជាប្រទេសអ្នកមានព្រះវិហាររបស់ប្រុយណេ ភាគច្រើនមានសភាពធំធេង ប្រដាប់ទៅដោយម៉ាស៊ីនត្រជាក់ និងបិទទៅដោយមាស នៅផ្នែកខ្លះនៃព្រះវិហារ គឺសម្បើមអស្ចារ្យណាស់នៅពេលយើងចូលទៅដល់ រហូតដល់ជនជាតិម៉ាឡេស៊ី និងឥណ្ឌូណេស៊ី លាន់មាត់ ព្រោះមិនមានបែបដូចគ្នានេះនៅប្រទេសពួកគេ ដែលប្រកាន់សាសនាដូចគ្នាដែរនេះទេ។ ក្រៅពីនេះ ខ្ញុំក៏បានទៅទស្សនាព្រះរាជវាំងស្ដេចប្រុយណេ, ភូមិក្នុងទឹក កំពង់អេយេរ៍, និងសារមន្ទីររបស់ប្រទេសនេះជាដើម។ល។
នៅល្ងាចថ្ងៃអង្គារ ទី២២ ខែកុម្ភៈ ឆ្នាំ២០១១ ខ្ញុំក៏បានធ្វើដំណើរចាកចេញពីប្រុយណេ ឆ្ពោះមកទីក្រុង កួឡា ឡូមពួរ ប្រទេសម៉ាឡេស៊ី ជាថ្មីម្ដងទៀត ដោយបន្សល់ទុកនូវអនុស្សាវរីយ៍ជាច្រើននៅក្នុងរាជាណាចក្រមួយនេះ៕
ផែនដីប្រុយណេពីលើអាកាស ឃើញសមុទ្ទ និងដីគោក
ទិដ្ឋភាពផ្លូវមួយនៅប្រុយណេ
វិហារចិននៅប្រុយណេ
វិហារ អូម៉ារ អាលី សៃហ្វូដឌិន
វិហារ អូម៉ារ អាលី សៃហ្វូដឌិន នាពេលរាត្រី
ព្រះបរមរាជវាំង មានរាប់ពាន់បន្ទប់
កំពង់អាយេរ៍
វិហារ Jame’Asr Hassanil Bolkiah
ស្ថានីយ៍ប្រេងសាំងសែល ដែលមានសិទ្ធិរកស៊ីផ្ដាច់មុខនៅប្រុយណេ
អាកាសយានដ្ឋានក្រុងប្រុយណេ
___________________________________________________
អានបន្ថែម៖
១. មកដល់អាណាចក្រប្រេង
២. ដំណើរកម្សាន្តគ្រានេះ
៣. ចរាចរណ៍នៅប្រុយណេ
៤. ពិធីសមបុណ្យឯករាជ្យជាតិប្រុយណេ ដារូស្សាឡាម
៥. សមុទ្ទប្រុយណេ
៦. ទៅលេងសាំងកាពួរ ក្រោយរយៈពេលមួយទសវត្សរ៍
៧. ទៅលេងម៉ាឡេស៊ី ក្រោយរយៈពេល៩ឆ្នាំ
៨. ទៅលេងម៉ាឡេស៊ី ក្រោយរយៈពេល៩ឆ្នាំ (ចប់)
៩. ឯណាទៅប័ណ្ណប្រៃសណីយ៍របស់ខ្ញុំ
១០. អាគារស្នាក់នៅយុវជន ពូសាត បេលៀ
១១. កំពឹសចៀនប្រុយណេ
១២. ចំណតរថយន្តក្រុងនៅប្រុយណេ
១៣. ស្លាកសញ្ញា និងប៉ាយឃោសនានានានៅប្រុយណេ
១៤. កំពង់អាយេរ៍
១៥. សួនកម្សាន្ត ជេរូដុង ដ៏កម្សត់
[...] ទៅលេងប្រុយណេ « -:- កំណត់ហេតុសុភ័ក… – ថ្ងៃពុធ 2 ខែមីនា [...]
[...] (អានអត្ថបទ៖ ទៅលេងប្រុយណេ) ចំណែកឯប្រទេសពីរទៀតនោះ [...]
គេមានឱ្យថតរូបក្នុងហ្នុងបានអត់? ចែកគ្នាមើលផងម៉ោអ្ហី…! សុំអង្វរ ព្រោះចង់ឃើញណាស់ ម្ដែលបានទៅលេងនៅប្រុយណេ ហង
ក្នុងវិហារគេមិនឲ្យថតទេ តឹងតែងណាស់
អ្ហេ ភាក់! ដូចឆ្ងល់ដល់ហើយ វី…មេចក៏ក្នុង WordPress បាត់ផ្ទាំង អត្ថបទថ្មីៗទៅណាហើយ? ឃើញបង្ហាញតែអត្ថបទប្លក់ស្អីកេនួក (របស់ WordPress )
មានបាត់ឯណា បោះញុំនៅឃើញដដែលតើហ៍!
ឆ្ងល់ណាស់ មេចក៏ប្រទេសមួយចំនួន គេមិនអោយថតចឹង? កាលទៅឥណ្ឌាក៏ចឹងដែរ។
ឆ្ងល់ធើអី? សូម្បីតែស្រុកខ្មែរក៏មិនឱ្យថតដែរ កាលខ្ញុំចូលលេងក្នុងវាំងគឺមិនឱ្យថតដូចតែគ្នាហ្នឹង ថតបានតែក្រៅអគារ តែប៉ុណ្ណោះ
របស់មានតម្លៃជារបស់ជាតិ គេមិនចេះតែឲ្យថតប៉ាតណាណីទេ
មានកន្លែងខ្លះថតបានហើយ ខំតែអរ ដល់តែចេញមកក្រៅគេឲ្យលុបអស់.. អត់តាដែល
អត់ឆ្លាតសោះ! បើខ្ញុំវិញត្រៀមម៉េម៉ូរី ២ ថតបានភ្លាមដោះ ប្ដូរមេមូរីថ្មីក្នុងកាំមេរ៉ា… ចេញដាក់ចូលក្នុង កាប៉ៅក៏បាន ដាក់ក្នុង លីអូក៏បាន
មានបានដឹងចឹងអី ចូលទៅថតក្រិបៗ ដល់ចេញវិញគេសុំមើលលុប អស់ ហាហា…អាម៉ាស់មុខ
អាលីអូក្រហមហ្នឹងហ៎? ស្លាប់ហើយ!
បើតាមមើលរូបភាពកំពង់ផែអាយ៉េ គឺអាចនិយាយថាជីវភាពប្រជាជន ប្រុយណេ មិនជាមានណាស់ណាដេ ដូចជាថៃ ម៉ាឡេដែរ បើទោះបីជាប្រទេសនេះថាជាប្រទេសលំដាប់មានបំផុត នៅអាស៊ី នឹង ពិភពលោកក័ដោយ។ ទ្រព្យធនអ្នកមានគឺបានតែ ស្តេច ពូជពង្សស្តេច នឹង បរិវា បន្តិចបន្តួចប៉ុនណ្ណោះ ។
មិនមែនអញ្ចឹងទេដឹង? បើទោះបីផ្ទះភាគច្រើនសំណង់ឈើ (រួចឲ្យធ្វើថ្មលើទឹកម្ដេចកើត?) ប៉ុន្តែផ្ទះនីមួយៗធំៗ មានសម្ភារៈទំនើបៗគ្រប់បែបយ៉ាងមិនគួរឲ្យនឹកដល់ (ខ្ញុំបានចូលផ្ទះអស់ហ្នុងហើយ)។ ហេដ្ឋារចនាសម្ព័ន្ធក្នុងភូមិក្នុងទឹកនេះមានគ្រប់បែបយ៉ាងទាំងអស់ ហើយពួកគេភាគច្រើនមានរថយន្តផ្ទាល់ខ្លួន ដែលដាក់ចតនៅលើដីគោក។ មានទាំងសាលារៀនទំនើបៗ មន្ទីរក្រសួងរបស់ជាតិ និងស្ថាប័នជាតិ ជាច្រើនទៀត ដែលសូម្បីជនជាតិម៉ាឡេស៊ី ក៏នឹកស្មានមិនដល់ដែរ៕
[...] ២. ដំណើរកម្សាន្តគ្រានេះ ៣. ទៅលេងប្រុយណេ LikeBe the first to like this [...]
[...] ៣. ផ្សារបន្លែនៅប្រុយណេ ៤. ទៅលេងប្រុយណេ LikeBe the first to like this [...]
[...] ៣. ផ្សារបន្លែនៅប្រុយណេ ៤. ទៅលេងប្រុយណេ ៥. [...]
[...] បន្ទាប់ពីលេងកម្សាន្តនៅប្រទេសប្រុយណេ អស់រយៈពេល៣យប់៤ថ្ងៃរួចមក [...]
[...] ៣. ដំណើរកម្សាន្តគ្រានេះ ៤. ទៅលេងប្រុយណេ LikeBe the first to like this [...]
[...] [...]
[...] ប៉ះចំភ្លៀងរហូត មិនថានៅប្រុយណេ, ម៉ាឡេ, សិង្ហបុរី [...]
[...] ៣. ទៅលេងប្រុយណេ ៤. ដំណើរកម្សាន្តគ្រានេះ ៥. [...]
[...] ជាទូទៅនៅពេលដើរកម្សាន្តឯក្រៅប្រទេសរបស់ខ្ញុំម្ដងៗ ខ្ញុំតែងតែផ្ញើប័ណ្ណប្រៃសណីយ៍ពីប្រទេសនោះៗមកខ្លួនឯងដើម្បីទុកជាអនុស្សាវរីយ៍ ជាប្រចាំមិនដែលខានឡើយ។ ដំណើរកម្សាន្តថ្មីៗនេះទៀតសោតទៅប្រទេសប្រុយណេ, ម៉ាឡេស៊ី និងសិង្ហបុរី ដែលខ្ញុំបានដាក់ប្រកាសជាច្រើននោះ ក៏ខ្ញុំបានផ្ញើប័ណ្ណប្រៃសណីយ៍មកផ្ទះដែរ។ តែអ្វីដែលចម្លែកលើកនេះមិនទាន់ឃើញប័ណ្ណប្រៃសណីយ៍ទាំង៣ដែលខ្ញុំបានផ្ញើពីប្រទេសទាំងបីនោះមកដល់ផ្ទះសោះ មិនដឹងជាជាប់ស្ទាក់ពន្ធគយនៅទីណា [...]
[...] ក្នុងរយៈពេលទៅកម្សាន្តនៅប្រទេសប្រុយណេ កាលពីខែកុម្ភៈកន្លងទៅនេះ [...]
[...] កាលពីទៅលេងប្រទេសប្រុយណេ ចុងខែកុម្ភៈ កន្លងទៅនោះ គឺបើនិយាយរឿងអាហារ ខ្ញុំសូមណែនាំអាហារសាមញ្ញៗជក់ចិត្តមួយដែលនៅទីនោះគេហៅថា ណាស៊ី កាតុក ម៉ាម៉ា (Nasi katok mama)។ [...]
[...] ២. ផ្សារបន្លែនៅប្រុយណេ ៣. ទៅលេងប្រុយណេ LikeBe the first to like this [...]
[...] អានបន្ថែម៖ ១. ទៅលេងប្រុយណេ ២. ចរាចរណ៍នៅម៉ាឡេស៊ី ៣. [...]
[...] កាលពីទៅលេងប្រទេសប្រុយណេ នាខែកុម្ភៈកន្លងទៅនេះ កន្លែងដែលខ្ញុំបានទៅទស្សនា មួយសំខាន់ទៀតរបស់ទីក្រុង បានដារ សេរី បេហ្កាវាន នោះគឺកំពង់អាយេរ៍ (ម៉ាឡេ៖ Kampong Ayer)។ កំពង់អាយេរ៍ តាមពិតទៅគឺជាភូមិផ្ទះទឹក ដែលប្រជារាស្ត្រប្រុយណេ នាំគ្នារស់នៅលើទឹកតាមផ្ទះឈើ យ៉ាងមានរបៀបរបប និងមានជីវភាពធូរធារផងទៀត។ [...]
[...] ក្នុងពេលដែលខ្ញុំបានទៅលេងប្រុយណេកន្លងទៅនេះ ខ្ញុំក៏បានសាក្សីអតីតសួនកម្សាន្តដ៏ល្បី និងអស្ចារ្យមួយរបស់ពិភពលោក តែដែលពេលនេះបានក្លាយជាទីរហោស្ថាន យ៉ាងគួរឲ្យខ្លាចភ័យ។ [...]
[...] ដើមឆ្នាំនេះ ពីប្រទេសប្រុយណេ, ម៉ាឡេស៊ី និងសិង្ហបុរី [...]
[...] ចរាចរណ៍នៅប្រុយណេ, ទៅលេងប្រុយណេ, ទៅលេងសាំងកាពួរ [...]