ឬថា ភូថង អេ មោទនថៃជាងជាតិខ្លួន? ថ្ងៃ ចន្ទ 14 ខែមីនា 2011
Posted by សុភ័ក្ត្រ in កីឡា, បរិយាយថ្ងៃនេះ, បុគ្គលសំខាន់, អំពីស្រុកខ្មែរ, ภาษาไทย.trackback
សម្រាប់ជនជាតិខ្មែរ នរណាៗក៏ស្គាល់ ក៏ឮ ក៏ដឹង ដែរ ភូថង អេ ឬ អេ ភូថង (តាមទម្លាប់) ជាស្ដេចប្រដាល់ស្រុកខ្មែរ។ កំពូលអ្នកប្រដាល់គ្មានគូប្រៀបកែងឆេះ ជង្គង់ទិព្វ ឬថាម្យ៉ាងឲ្យខ្លី កំពូលអ្នកប្រដាល់ក្បាច់ខ្មែរបុរាណ របស់នគរក្រុងកម្ពុជា។
ក្នុងនាមជាបុគ្គលសាធារណៈ ឬជាអ្នកល្បីរបស់ប្រទេសជាតិ ភូថង អេ ប្រាកដណាស់ ជាមនុស្សដែលត្រូវបានទទួលការចាប់អារម្មណ៍ និងយកចិត្តទុកដាក់ក្រុងក្រសែភ្នែកខេមរជន។ អ្វីដែលគួរឲ្យកត់សម្គាល់នោះ នៅត្រង់ថា តើភូថង អេ ពិតជាបានប្រតិបត្តិខ្លួនឲ្យសមជាបុគ្គលម្នាក់ដែលខ្មែរទូទាំងនគរបានផ្ដល់កិត្តិយសដល់រូបគាត់ហើយឬនៅ?
ជាអ្នកកើតជាឯខេត្តជាយដែលព្រំប្រទល់ថៃ (កោះកុង) ដែលម្ដងនោះ ធ្លាប់បានដាច់សង្វែគយ៉ាងខ្លាំងចេញពីសង្គមខ្មែរឯទៀត កំពូលអ្នកប្រដាល់របស់ស្រុកខ្មែររូបនេះ ប្រាកដណាស់ច្បាស់ជាឆ្លងឥទ្ធិពលស្រុកថៃច្រើនជាងមាតុភូមិរបស់ខ្លួន។ សំនៀងបែបមិនច្បាស់យកជាបានការរបស់ភូថង អេ បានក្លាយជាគំនិតផុសចេញជាសំណួរថា ភូថង អេ គួរគឺជាមនុស្សដែលអាចតំណាងឲ្យជាតិខ្មែរឬមួយក៏ទេ។
ការនៅដិតដាមក៏ខ្លាំងក្លារបស់ភូថង អេ ប្រទាក់ក្រឡានឹងស្រុកថៃ បើសូម្បីតែត្រកូលគាត់ គឺសន្ដានជាថៃសុទ្ធសាធ (ថៃសរសេរ ภูทอง) រួមទាំងទម្លាប់នៃការហៅឈ្មោះរបស់គាត់ គឺ អេ ភូថង (เอ ภูทอง) ដែលជាការហៅតាមបែបថៃ យកឈ្មោះដាក់មុន ខុសពីខ្មែរជាទូទៅហៅត្រកូលមុននោះ ហើយដែលឈ្មោះគាត់តាមពិតគឺត្រូវហៅ ភូថង អេ នេះឯង។ រហូតមកដល់ពេលមានកូនទៅទៀត អ្នកប្រដាល់លេខ១របស់ខ្មែរយើងនៅតែបន្តទម្លាប់ដាក់ឈ្មោះកូនជាភាសាថៃ និងតាមបែបថៃនេះបន្តទៅទៀត។
នៅមានរឿងជាច្រើនទៀតដែល អេ មានទំនាក់ទំនងនឹងថៃ ក្នុងនាមជាមនុស្សកំពូលរបស់ខ្មែរ។ យើងមិននិយាយដល់ការសាក់រូបសត្វគ្រុឌ ដែលមនុស្សភាគច្រើនទទួលស្គាល់ ហើយថៃបានចាត់ទុកជាតំណាងរបស់ខ្លួនទៅហើយនោះ មកនិយាយទេ ដ្បិតគ្រុឌមិនមែនកម្មសិទ្ធផ្ដាច់មុខរបស់ថៃឯណា តែអ្វីជាកម្មសិទ្ធិផ្ដាច់មុខរបស់ថៃជាក់ៗនោះ គឺតួអក្ខរវិរុទ្ធរបស់ថៃ សាក់ជាប់នឹងដៃអ្នកប្រដាល់តំណាងជាតិខ្មែររូបនេះ។ ភូថង អេ បានបង្ហាញឲ្យជាតិខ្មែរឃើញនូវភាពមោទនរបស់គាត់ចំពោះថៃនូវអក្សរថៃដែលសរសេរថា สุมาลี (សុ-មា-លី អានថា៖ ស៊ុម៉ាលី) នៅនឹងដៃរបស់គាត់។ សំណួរនៅត្រង់ថា ចុះហេតុម្ដេចបានជាកំពូលមនុស្សខ្មែរ ដែលជាតិបានផ្ដល់កត្តិយសដល់រូបគាត់មានមោទនភាពអ្វីម្ល៉េះនូវភាពជាថៃ គ្រប់ទង្វើរបស់គាត់។ ហេតុអ្វីបានជាគាត់មិនសាក់ជាតួអក្សរខ្មែរ? ឬថា ភូថង អេ មោទនថៃជាងជាតិខ្លួន?
ក្នុងនាមជាមនុស្សមួយរូបដែលបានសាងឈ្មោះ រស់សុខរស់សាន្ត ធំធាត់នឹងអង្ករខ្មែរ ចាប់ភពលើផែនដីរបស់ដូនតាខ្មែរ ភូថង អេ គួរតែមានមោទន នឹងភាពជាខ្មែរឲ្យបានច្រើនជាងនេះ។ ភូថង អេ គួរតែដឹងដោយចិត្ត និងរូបវិញ្ញាណហើយថា ខេមរជនមួយនគរនេះបានផ្ដល់កត្តិយសដល់រូបគាត់ដ៏មហាអស្ចារ្យ លើសពីខ្មែរសមញ្ញរូបនានាដទៃទៀត។ ហេតុដូចនេះ ភូថង អេ គួរតែមានមោទនចំពោះជាតិខ្លួន ដូចដែលជាតិខ្លួនបានផ្ដល់ទៅឲ្យរូបគាត់ផងដែរ៕
កាសែតល្បីឈ្មោះ Cambodia Daily (weekly) បានចុះរូបថតភូថង អេ អ្នកប្រដាល់កំពូលរបស់កម្ពុជា ដែលក្នុងដៃឆ្វេងរបស់គាត់មានសាក់អក្សរថៃ
[...] ឬថា ភូថង អេ មោទនថៃជាងជាតិខ្លួន… LikeBe the first to like this . [...]
ខ្ញុំក៏មិនចូលចិត្តចរឹតរបៀបនេះដែរ តែក៏បន្ទោសគាត់មិនចេញដែរ។
បើយើងមើលមកខ្មែរគ្នាឯងវិញ ដែលរស់នៅស្រុកគេសញ្ជាតិគេ មានតិចណាស់ដែលទទួលយកវប្បធម៌គេ។ ម្នាក់ៗ រស់នៅលើដីគេ ចូលសញ្ជាតិគេហើយក៏ដោយ នៅតែរស់ក្នុងភាពជាខ្មែរ ហើយគ្មានភក្ដីភាពអ្វីនឹងប្រទេសដែលខ្លួនរស់នៅនោះទេ។ កុំថាឡើយដល់ទៅនិយាយភាសាស្រុកគេ មិនមានសំនៀងដូចជនជាតិគេ សូម្បីតែចេះនិយាយអោយបានត្រឹមត្រូវ មិននឹងចេះផង។ ទាំងការស្លៀកពាក់ ការនិយាយស្ដី អាកប្បកិរិយា ទំនៀមទំលាប់ នៅដដែលទាំងអស់។ នៅតែមោទនភាពជាតិខ្មែរដដែល។
ដូច្នេះច្រាសមកវិញ ជនជាតិគេមករស់នៅស្រុកខ្មែរ គេនៅតែរស់នៅរបៀបជាជនជាតិគេដដែល។ ចិនរស់តាមរបៀបចិន ហើយមើលងាយខ្មែរទៀត យួនរស់តាមរបៀបយួន … ។
នៅតែមានសញ្ជាតិខ្មែរសំដែងអត្តចរិតផ្ទុយពីលោកគ្រូនិយាយ ជាពិសេសស្រករក្រោយៗ ។ ក្មួយៗខ្ញុំមកដល់ស្រុកខ្មែរវិញអត់ចេះនិយាយរ៉េខ្មែរ ។ ម៉ែវា ក៏អត់សូវនិយាយខ្មែរដែរ និយាយសុទ្ធតែអាគាំង ទៅផ្សារមិនទៅរ៉េ ទៅស្តរ, ផឹកវ៉ាញ, ស៊ីត្រីកំផ្លាញ បានតាត្រូវម៉ាកំផ្លាង!
ប៉ុន្តែយើងសរសើរនរណា សរសើរខ្មែរនៅអាមេរិចរក្សាវប្បធម៌ខ្មែរ រឺសរសើរក្មេងខ្មែរនៅអាមេរិចបំភ្លេចវប្បធម៌ខ្មែរ?
បើយើងធ្វើដាក់គេយ៉ាងណា គេធ្វើដាក់យើងមកវិញបែបដដែល កុំខឹងគេ។
ដូចខ្ញុំ ដូចក្មេងស្រែអីនេះ ទៅដល់ស្រុកណានៅតែស៊ីប្រហុក ស៊ីបាយខ្មែរដដែល អោយទៅប្រកាន់ខឹងនឹងសៀមខ្ចាត់ភ្លាត់មកនៅស្រុកខ្មែរប្រកាន់លក្ខណៈជាសៀមយ៉ាងម៉េចនឹងកើត។
ខ្មែរយើងខ្លះ រស់នៅស្រុកគេម្ភៃសាមសិបឆ្នាំ នៅតែមោទនភាពជាតិខ្មែរដដែលហ្នឹង ដល់អ៊ីចឹងពួកចិនពួកយូនរស់នៅស្រុកខ្មែរម៉ាជាតិហើយ ក៏វានៅតែមោទនភាពជាតិចិនជាតិយួនដដែលដូចតែគ្នាហ្នឹង។
គាត់ប្រហែលជាមានទំនាក់ទំនងជាមួយស្រីថៃទេដឹង ព្រោះមានរូបបេះដូង ធ្លុះធ្លាយនៅជិតពាក្យសុម៉ាលី ។
ប្រហែលគាត់សាក់មុនល្បីដឹង? សាក់តាំងពីអង្កាល់យើងមិនបានដឹងផងហ្នឹង!
តែទម្លាប់ហៅឈ្មោះអេ ភូថង គឺត្រូវបន្ទោសអ្នក អត្ថធិប្បាយជាង ព្រោះបើគាត់ហៅខ្លួនឯង គឺមិនបានជួយកែអោយគាត់ ណាមួយអ្នកល្បីស្រុកខ្មែរ ដូចជាគ្មានអ្នកគ្រប់គ្រងផ្លូវការ សំរាប់កែប្រែ ឬ រៀបចំការរស់នៅ កុំអោយគេចាប់កំហុសដូចស្រុកគេទេ ! ចឹងការរស់នៅរបស់គាត់ គឺរបៀបសាមញ្ញធម្មតាជាង ធ្វើខ្លួនជាអ្នកល្បី! ចំនែករឿងទំនោវប្បធម៌បរទេស ខ្ញុំគិតថា មកពីគាត់ល្បី កាលពេលដែលថៃ វាយលុកទីផ្សារខ្មែរខ្លាំង ទាំងទំនិញ ភាពយន្ត សំលៀកបំពាក់…ជាពិសេសគឺ អ្នកខ្លះចេះថៃ អាចនឹងរកការងារបានគ្រាន់បើដែរ ! ចឹងបើអោយគាត់ប្តូរទំលាប់ ហៅថា ភូថង អេ ហាក់ដូចជាចេញមុខដោយចំហពេក ! មានតែរុញទូកបណ្តោយទឹកទៅ ! អ្វីដែលសំខាន់គឺថា គាត់ជាមនុស្ស ឬ ថាជាពលរដ្ឋខ្មែរ ពេញច្បាប់ មិនបានបទល្មើសណា ដែលធ្វើអោយខាតប្រយោជន៏ជាតិ !
កុំអោយមានអ្នកប្រដាល់ខ្មែរ ម្នាក់ដែល អាជ្ញាកណ្តាលធ្លាប់បញ្ឈប់នៅលើ សង្វៀនព្រោះតែ មិនព្រមតដៃ ព្រោះតែរឿងស៊ីសំនូក….ទីបំផុត អាជីពក៏បាត់ ឈ្មោះល្បីក៏លែងមាន
មានរឿងដូច្នេះផង!
ដែលមានខ្មែរសុទ្ធណា ឈ្មោះ ភូថង រ៉េ ? ស្លាប់ បើនិយាយពីរឿងសាក់វិញនោះអត់អាចយកជាផ្លូវការបានរ៉េ ចុះមានអ្នកខ្លអសាក់ ភាសា ចិន ជប៉ុន ហើយអត់ចេះមើលផងនោះ អាចសំគាល់ថាជាជនជាតិដែលសាក់បានដែររ៉េ ?
អរគុណសម្រាប់ប្រកាស!
ហាហា… ម៉េចបានត្រូវអរគុណ!
មកពីមិនដែលដឹងអីសោះ អានហើយបានដឹងរឿងដែលមិនធ្លាប់ដឹង.. អរគុណ! ហេហេ បើមិនយកទេ យកទៅវិញក៏បាន!
ឲ្យហើយយកវិញ ពកក ហាហា…
ហេហេ ^^
ខាងក្រោមនេះ គឺជាការដកស្រង់ក្បាច់រូបភាពវីដេ នៅក្នុងការប្រកួតរវាង អេ ភូថង និងអ្នកប្រដាល់ជនជាតិបរទេស៖
ខាងក្រោមនេះ គឺជាការដកស្រង់រូបភាពវីដេ នៅក្នុងការផ្តួលរំលំអ្នកប្រដាល់ជនជាតិបរទេស ដោយ អេ ភូថង៖
មិនដឹងថានៅក្នុងអត្តសញ្ញាប័ណ្ណគាត់សរសេរមួយណាមុនផង ។ ខ្ញុំជឿថាម្ចាស់ខ្លួនអាចមិនដឹងខ្លួនថាខ្លួនមានចំណុចដែលត្រូវរិះគន់បែបនេះទេ ។ យើងជាទស្សនិកជនយើងពិតជាមើលឃើញចំណុចល្អនិងអន់របស់តួសម្ដែង។ ឬបើគាត់យល់អំពីបញ្ហាទាំងនេះ (ការហៅឈ្មោះ និង ការសាក់អក្សរថៃនៅនឹងខ្លួន) ហើយគាត់នៅតែធ្វើដោយចេតនា នោះអ្នកប្រដាល់រូបនេះអស់លក្ខណៈជាអ្នកប្រដាល់តំណាងប្រទេសខ្មែរហើយ ។ ខ្ញុំនៅតែយល់ថា ការសាក់អក្សរថៃអាចកើតមុនល្បី ហើយការហៅឈ្មោះអាចជាការកើតពីការនិយមហៅរបស់ពិធីករ និងខ្មែរភាគច្រើន ដោយជួនកាលគេគិតថា អេ នេះជាត្រកូល ។
ឈ្មោះបរទេសមិនប្រាកដថា អ្នកនោះមានខ្សែស្រឡាយបរទេសទេ កូនរបស់មិត្តភក្តិខ្ញុំឈ្មោះសុទ្ធតែ ជូលីណា អីណោះ!! តែសុំទោសអត់មានកាត់បរទេសអីមួយតំណក់ទេ គ្រាន់តែជាការនិយម។ គ្រួសារលោកពូ អេភូថង នៅជាប់ព្រំដែនថៃ ដូចនេះបែបគាត់ទទួលឥទ្ធិពលពីថៃតាំងពីតូចមក តែខ្ញុំយល់ថាក៏មិនមែនមានតែគាត់ដែរ អ្នករស់នៅម្តុំគាត់ក៏គង់នឹងដូចគ្នា យើងបន្ទោសគាត់មិនបានទេ។ ការនិយាយស្តី ក៏មិនមែនមានតែគាត់ដែលនិយាយមិនច្បាស់ ខ្ញុំធ្លាប់ស្គាល់ច្រើននាក់ដែរ អ្នកនៅជាប់ព្រំដែនថៃសុទ្ធសឹងតែមិនច្បាស់ដូចតែគ្នានឹង។
ដូចយើងដឹងស្រាប់ហើយ ខ្មែរយើងមានចរិកបន្ទាបបន្ថោកជាតិឯងតំកើងជាតិដទៃ។ បើគ្រួសារមានកាត់ខ្សែស្រឡាយចិន ឬកាត់សាសន៍ណាផ្សេងនោះ ហាក់មានមោទនភាពជាខ្លាំង។ តែចំលែកត្រង់ បើកាត់យួន ឬចាមវិញ មិនសូវហ៊ានអួតប្រាប់គេទេ។ ចឹងពូ អេ គាត់សាក់ជាភាសាថៃគ្រាន់តែ ចង់បង្ហាញថាគាត់ចេះថៃ ?
យើងដឹងទ័ពទៅសួរគាត់តែម្តងទៅ កុំឲ្យសៅហ្មង^^ ហ៊ីៗៗ
[...] នៅខែមីនា វិញ ខ្ញុំបានដាក់ប្រកាសភាគច្រើនទាក់ទងនឹងដំណើរកម្សាន្តរបស់ខ្ញុំទៅកាន់ប្រទេសម៉ាឡេស៊ី, ប្រុយណេ និងសិង្ហបុរី។ ហើយចំណែកឯប្រកាសផ្សេងទៀត ដែលផុសផុល និងមានការជជែកវែកញែករហូតបង្ខំចិត្តដល់ខ្ញុំបិទលែងឲ្យមានបញ្ចេញវាចារនោះ គឺប្រកាស «កោតតែហង្សមាសធ្វើទៅរួច»។ ចរាចរណ៍នៅប្រុយណេ, ទៅលេងប្រុយណេ, ទៅលេងសាំងកាពួរ ក្រោយរយៈពេលមួយទសវត្សរ៍, ឬថា ភូថង អេ មោទនថៃជាងជាតិខ្លួន? [...]