បឹងកក់បឹងកម្ម ថ្ងៃ អង្គារ 12 ខែកក្កដា 2011
Posted by សុភ័ក្ត្រ in បរិយាយថ្ងៃនេះ, អំពីស្រុកខ្មែរ.11 comments
ម្សិលមិញនេះ (១១ កក្កដា ២០១១) រាជធានីភ្នំពេញ ដឹកនាំដោយលោក កែប ជុតិមា អភិបាលក្រុងភ្នំពេញដ៏ស្រស់ស្អាត បានបើកសម្ពោធការដ្ឋានសាងសង់អ្វីដែលគេហៅថា ទីក្រុងរណបថ្មី កណ្ដាលក្រុងចាស់ លើគំនរទុក្ខសោករាស្ត្របឹងកក់ ជាច្រើនរយនាក់។ បុព្វហេតុនៃក្រុងថ្មី, បឹងកក់ បឹងកម្ម។
បើព្យាយាមនិយាយឲ្យនៅផ្លូវកណ្ដាល ប្រជាជនទីនោះពិតជាមានរួមចំណែកខុស និងទទួលខុសត្រូវដែល។ ការមកតាំងទីរស់នៅអនាធិបតេយ្យពាសវាលពាសកាល ដែលទីនោះពីមុនជាសួនកម្សាន្តសម្រាប់អ្នកក្រុងនោះ។ រដ្ឋក៏បានផ្ដល់ជម្រើសច្រើនបែប ច្រើនយ៉ាងសម្រាប់ពួកគាត់ តែពួកគាត់ទាំងនោះ ហាក់នៅរឹងមិនព្រមទទួលជម្រើសណាមួយសោះ។ តែក្នុងនាមជាអាជ្ញាធរ កំហុសធំពន់ពេក ដែលគួរទទួលស្គាល់។ ទុក្ខរាស្ត្រម្នាក់គឺជាទុក្ខរបស់មន្ត្រី ដែលជាខ្ញុំនៃរាជការ ទទួលបណ្ដាស័ក្ដិ ប្រាក់ខែពីញើសឈាមប្រជា។ ការលុបបឹងធម្មជាតិនៃទីក្រុងគឺជាកំហុសមួយដែលគួរហ៊ានទទួលខុសត្រូវក្នុងនាមជាថ្នាក់ដឹកនាំ។ ពីចំណុចចាប់ផ្ដើមប្រាក់រាស្ត្រថាលុបតែប៉ុន្មានភាគរយនៃផ្ទៃបឹង តែបច្ចុប្បន្នគឺលុបផ្ទៃបឹងកក់ទាំងមូល។
ប្រជារាស្ត្រខ្មែរត្រូវចងចាំសម្ដីរបស់លោកអភិបាលក្រុងភ្នំពេញ កែប ជុតិមា ក្នុងពិធីបើកការដ្ឋានសាងសង់ក្រុងបឹងកក់ កាលពីថ្ងៃម្សិលមិញដូចតទៅ៖
លោក កែប ជុតិមា បានថ្លែងទៅកាន់អ្នកចូលរួមនៅក្នុងពិធីនោះប្រមាណជាង១០០នាក់ដែល សុទ្ធសឹងជាមន្ត្រីរាជការបុគ្គលិកក្រុមហ៊ុនស៊ូកាគូអ៊ីន និងសិស្សមកពីវិទ្យាល័យប៊ុនរ៉ានីហ៊ុនសែនវត្តភ្នំថា តាមប្រវត្តិសាស្ត្រទីក្រុងភ្នំពេញដ៏ចំណាស់នេះ បានអភិវឌ្ឍ ដោយការចាក់បំពេញដីជាបន្តបន្ទាប់ ដូច្នេះការចាក់ដីលុបបឹងកក់ដើម្បីអភិវឌ្ឍមិនជារឿង«ចម្លែក គួរឲ្យភ្ញាក់ផ្អើលនោះទេ»។ លោកអភិបាលបានបន្តថា បឹងនៅភ្នំពេញនៅសល់មួយចំនួនទៀត[ដែលមិនទាន់បូមខ្សាច់ចាក់ បំពេញ] ពិសេសបឹងដែលធំជាងគេគឺ បឹងទំពុន «យើងនឹងអភិវឌ្ឍទៀតបឹងទំពុន…ហើយ ភ្នំពេញ បើយើងមិនចាក់ដីបំពេញ តើវាមានទីក្រុងនេះទេ?»។ (ស្រង់ចេញពីភ្នំពេញប៉ុស្តិ៍)
អ្វីដែលលោក កែប ជុតិមា ប្រហែលជានៅខ្វះចន្លោះចំណុចមួយចំនួនខាងលើ ខ្ញុំសូមបកស្រាយដូចតទៅ៖
ពិតឥតប្រកែកបាន, ការចាក់ដីលុបបឹងដើម្បីអភិវឌ្ឍន៍ គឺគ្មានអ្វីចំឡែកទេ អ្នកដឹកនាំខ្មែរជំនាន់មុនៗក៏បានធ្វើដែរ ដូច្នេះអ្នកដឹកនាំជំនាន់នេះក៏ធ្វើបានដូចគ្នា តែអ្វីដែលខុសគ្នានោះគឺថា អ្នកដឹកនាំជំនាន់មុន ចាក់ដីលុបបឹងនានាក្នុងក្រុងដើម្បីសាងសង់សម្បត្តិរួមសាធារណៈ មានបឹងតេជោ។ល។ សាងសង់សួនច្បារមុខស្ថានីយរថភ្លើង, សាងសង់ផ្សារធំថ្មី, សាងសង់វិមានឯករាជ្យ។ល។ គឺសុទ្ធសឹងសាងជាប្រយោជន៍សង្គមទាំងអស់ ខណៈលុបបឹងកក់ សាងសង់របស់របរឯកជន ជួលឲ្យឯកជនរហូតមួយទសវត្សរ៍ ហើយដែលត្រូវដេញប្រជាជនទីណាត់ទីណែង។ នេះគឺអ្វីដែលមិនដូចគ្នា។
លោក ក៏បានមានប្រសាសន៍ពិតណាស់ទៀតថា បើមិនចាក់ដីបំពេញទេ គ្មានទេភ្នំពេញ។ យេស! អ្នកដឹកនាំជំនាន់មុនលោកចាក់ដីបំពេញដើម្បីពង្រីកភ្នំពេញដែលកាលនោះមានតែមួយផ្នែកតូច គឺចាក់ដីបំពេញជាយក្រុង ដើម្បីធ្វើឲ្យក្រុងធំឡើង ខណៈពេលនេះចាក់ដីបំពេញតែដីនៅកណ្ដាលក្រុង ឯជាយក្រុងនៅដដែលដូចស្រុកស្រែ។
សូមជូនពរយុទ្ធនាការសាងសង់ក្រុងបឹងកក់ ដើម្បីលើកសម្រស់ភ្នំពេញក្លាយជា «ទីក្រុងគុជនៃអាស៊ី!» ជយោៗៗ!
_______________________________________________________
អានបន្ថែម៖
១. អភិវឌ្ឍទីក្រុងត្រូវលុបបឹងធំៗ
២. ព្យុះហួសបឹងកក់
៣. បឹងកក់មិនទាន់ចប់ឯណា!
៤. រូបភាពវេទនាភាពនៃប្រជាជនខ្មែរ ដែលមានឥទ្ធិពលបាំងភ្នែក និងបិទមាត់លោក ហ៊ុន សែន ម្ចាស់គ្រងផែនដី
