គណបក្សប្រជាជនគោរពវិញ្ញាណក្ខន្ធអ្នកស្លាប់នៅក្នុងរបបខែ្មរក្រហម ថ្ងៃ អាទិត្យ 20 ខែឧសភា 2012
Posted by សុភ័ក្ត្រ in ប្រវត្តិសាស្ត្រ, អំពីស្រុកខ្មែរ.4 comments
ភ្នំពេញ: គណបក្សប្រជាជនកម្ពុជាដែលកំពុងដឹកនាំរាជរដ្ឋាភិបាលបានប្រារព្ធពិធីគោរពវិញ្ញាណក្ខន្ធប្រជាជនកម្ពុជា ដែលបានស្លាប់បាត់ជីវិតដោយអយុត្តិធម៌ក្រោមរបបប្រល័យពូជសាសន៏ប៉ុលពតនៅឯមជ្ឈមណ្ឌលប្រល័យពូជសាសន៏ជើងឯក ខណ្ឌដង្កោ រាជធានីភ្នំពេញ។
ពិធីនេះដឹកនាំដោយលោកកែប ជុតិមា អភិបាលសាលារាជធានីភ្នំពេញនិងប្រជាពលរដ្ឋរួមទាំងសកម្មជនគណបក្សជាច្រើរយនាក់ ព្រមទាំងមានពិធីរាប់បាត្រព្រះសង្ឃចំនួន២០៧អង្គផងដែរ។
លោកកែប ជុតិមា អភិបាលសាលារាជធានីភ្នំពេញបានមានប្រសាសន៏ថា ប្រហែលជាប្រជាជនកម្ពុជាទូទាំងមិនអាចបំភ្លេចបានទេថ្ងៃទី២០ឧសភា ដែលជាថ្ងៃដែលយើងទាំងអស់គ្នារម្លឹកគោរពវិញ្ញាណក្ខន្ធប្រជាជនកម្ពុជាដែលបានស្លាប់បាត់ជីវិតនៅក្នុងរបបប្រល័យពូជសាសន៏ប៉ុលពត៣ឆ្នាំ៨ខែ២០ថ្ងៃ។
លោកកែប ជុតិមា បញ្ជាក់ “នៅថ្ងៃនេះគណបក្សប្រជាជនរាជធានីភ្នំពេញរួមទាំងប្រជាពលរដ្ឋនៅជុំវិញនេះហើយនឹងយុវជនយើងជាច្រើនបានប្រារព្ធពិធីនេះក៏ដើម្បីចូលរួមគោរពវិញ្ញាណក្ខន្ធដល់ប្រជាពលរដ្ឋថ្ងៃនេះ ហើយមិនអាចបំភ្លេចបានទេជាថ្ងៃដែលប្រជាជនកម្ពុជាទូទាំងប្រទេស គឺមិនអាចបំភ្លេចបាន”។
លោកបានមានប្រសាសន៍បន្តទៀតថា “យើងបានបង្ហាញហើយថារដ្ឋាភិបាលរបស់យើងមានសុឆន្ទៈពិតប្រាកដកក្នុងការនាំមេក្លោងដែលបានរុញប្រទេសជាតិរបស់យើងធ្លាក់ក្នុងគ្រោះប្រល័យពូជសាសន៏នេះ យើបានបង្ហាញមតិអន្តរជាតិថានេះជារបបប្រល័យពូជសាសន៏ហើយយើងចង់បង្ហាញជូនសាធារណៈមតិថា ដើម្បីផ្តល់យុត្តិធម៌ជូនអ្នកដែលស្លាប់បាត់បង់ជីវិតសាច់ញាតិ ហើយក៏បានផ្តល់សញ្ញាដល់ពិភពលោកថាមិនត្រូឲ្យរបបបែបនេះកើតមានឡើងនៅលើពិភពលោកទេទោះបីកន្លែងណាក៏ដោយ”។
លោកបានបញ្ជាក់ទៀតថា យើងត្រូវកាត់ទោសពួកអតីតមេដឹកនាំជាន់ខ្ពស់នៃរបបខ្មែរក្រហម ប៉ុន្តែយើងចាំបាច់ត្រូវរក្សាការបង្រួបបង្រួមជាតិ រក្សានៅសន្តិភាពសម្រាប់ប្រជាពលរដ្ឋខ្មែរផងដែរអ្វីៗទាំងអស់បានដំណើរការដូចរាជរដ្ឋាភិបាលនិងអង្គការសហប្រជាជាតិបានសហការគ្នាធ្វើ។
សកម្មជនយុវជនរាជធានីភ្នំពេញនិងតំណាងយុវជនម៉ូស្លីមកម្ពុជានៃគណបក្សប្រជាជន សុទ្ធតែបានថ្លែងបញ្ជាក់នៅក្នុងពិធីថ្ងៃទី២០ឧសភានៅជើងឯកយ៉ាងនេះថាបើគ្មានថ្ងៃទីមករាឆ្នាំ១៩៧៩ គ្មានគណបក្សប្រជាជនកម្ពុជាគឺគ្មានរាជានិយមដែរ។ជាមួយនះក៏បានថ្កោលទោសចំពោះពួកជនអគតិដែលបានចាត់ទុកអ្នកគាំទ្រថ្ងៃ៧មករាថា ជាជនក្បត់ជាតិផងដែរ ជាពិសេសសកម្មជនយុវជនរាជធានីភ្នំពេញក៏បានសម្តែងការគាំទ្រដល់ដំណើរការកាត់ទោសពួកអតីតមេដឹកនាំជាន់ខ្ពស់នៃរបបខ្មែរក្រហមដូចជា សំណុំរឿងលេខ០០១ ដែលបានសម្រេចកាត់ទោសកាំងហ្គេចអ៊ាវហៅឌុច ឲ្យជាប់គុកអស់មួយជីវិតនិងគាំទ្រដំណើរការសំណុំរឿងលេខ០០២ ដែលរួមមានខៀវសំផន នួន ជា អៀង សារី និងអៀង ធារិទ្ធ ឲ្យបញ្ចប់ត្រឹមសំណុំរឿងលេខ០០២ ដើម្បីរក្សាសន្តិភាព និងសេចក្តីសុខសាន្តរបស់ប្រជាពលរដ្ឋកម្ពុជា៕
ចម្លងចេញពី CEN
