ផ្សារណាត់បៃតងនៅក្រុងសុរិន្ទ្រ ថ្ងៃ សៅរ៍ 26 ខែឧសភា 2012
Posted by សុភ័ក្ត្រ in អំពីសុភ័ក្ត្រ.5 comments
ព្រឹកមិញនេះពួកអ្នកទេសចរណ៍យើងបាននាំគ្នាចូលទៅលេងផ្សារអ្នកស្រុកសុរិន្ទ្រ ក្នុងក្រុងសុរិន្ទ្រ ដែលគេហៅថាផ្សារណាត់បៃតង (ថៃ៖ ตลาดนัดสีเขียว)។ ស្ថិតនៅមិនឆ្ងាយប៉ុន្មានពីសណ្ឋាគារដែលពួកយើងស្នាក់ ផ្សារនេះ គឺមួយផ្នែកអនុញ្ញាតឲ្យក្រុមកសិករសុរិន្ទ្របានដាក់លក់របស់របរដែលគ្មានប្រើជាតិគីមី។
ដោយមានទំហំធំគួរសម ផ្សារណាត់បៃតងបែបនេះមានរហូតដល់ទៅ៤ផ្សារនៅទូទាំងខេត្តសុរិន្ទ្រ និងបើកដាក់លក់តាំងពីព្រឹកព្រហាមរហូតដល់ថ្ងៃត្រង់។
ការលក់ដូរស្ទើរតែតាមបែបបុរាណទាំងអស់ ដោយមនុស្សម្នាមានអធ្យាស្រ័យនឹងគ្នា នៅពេលដែលដាក់លក់មិនអស់ក៏ចែកគ្នាផ្លាស់ប្តូរគ្នា មានបន្លែបន្លុកជាដើម នេះបើតាមការឲ្យដឹងពីពួកគាត់។
ដូចលោកអ្នកដឹងស្រាប់ហើយ សុរិន្ទ្រ គឺជាអតីតដែនដីមួយស្ថិតជាមួយនឹងចក្រភពខ្មែរ ច្នេះទេប្រជាជននៅទីនោះ (ភាគច្រើនចាស់ៗ) គឺអាចនៅនិយាយភាសាខ្មែរ (ខ្មែរបុរាណ) បានខ្លះ ដោយលាយជាមួយនឹងភាសាថៃរបស់ពួកគាត់ដែលជាជនជាតិថៃ។ អ្នកលក់ដូរទាំងអស់នៅក្នុងផ្សារណាត់នេះ គឺមិនតិចជាង៥០ភាគរយទេ គឺអាចប្រាស្រ័យភាសាខ្មែរបាន។ សម្រាប់លោកអ្នកដែលមានភូមិកំណើតនៅសៀមរាប ឬឧត្ដរមានជ័យ អាចនឹងស៊ាំនឹងសំនៀងភាសាខ្មែររបស់់ពួកគាត់ ដ្បិតពួកគាត់និយាយភាសាខ្មែរតាមបែបសំនៀងប្រហាក់ប្រហែលនឹងខ្មែរនៅសៀមរាប ឧត្ដរមានជ័យដែរ។
ម្ហូបអាហារ របស់របរលក់ដូរទីនោះ គឺភាគច្រើនគាត់ដាំដោយខ្លួនឯងជារបៀបគ្រួសារ ដូច្នេះទេ របស់របរទាំងនោះមានតម្លៃថោកស្ទើរមិនជឿ គឺប្រមាណពី១០ ទៅ២០បាតតែប៉ុណ្ណោះ (ប្រមាណ១៥០០ ទៅ២០០០រៀល)។
ផ្សារណាត់នេះបើកតែថ្ងៃព្រឹកថ្ងៃសៅរ៍ តែប៉ុណ្ណោះ ប្រសិនបើលោកអ្នកមានឱកាសបានទៅលេងក្រុងសុរិន្ទ្រ សូមកុំភ្លេចចូលទស្សនាផ្សារនេះ និងទិញរបស់របរតាមអធ្យាស្រ័យ៕
ទិដ្ឋភាពក្នុងផ្សារណាត់
ទិដ្ឋភាពក្នុងផ្សារណាត់
ស្លាកសញ្ញាបញ្ជាក់ថាទីនេះលក់របស់ដែលគ្មាប្រើថ្នាំគីមី
បន្លែដែលដាំដោយអ្នកសុរិន្ទ្រយកមកដាក់លក់
ទិដ្ឋភាពក្នុងផ្សារ
របស់របរដែលយកមកដាក់លក់
មានសិល្បៈសម្ដែងផងក្នុងផ្សារ
ទិដ្ឋភាពក្នុងផ្សារណាត់
ខ្នុរនេះថោកណាស់ មួយដុំតែ១៥០០រៀលទេ
របស់ដែលដាក់លក់ក្នុងផ្សារ
____________________________________________________
អានផងដែរ៖
១. ទៅលេងភូមិតម្បាញសូត្រនៅសុរិន្ទ្រ
២. ទៅទស្សនាសួនដំរីនៅសុរិន្ទ្រ
៣. ទឹកគ្រឿងអ្នកស្រុកសុរិន្ទ្រ
៤. តាប៉ែសុរិន្ទ្រ
៥. ជីវភាពអ្នកស្រុកសុរិន្ទ្រ
