ទៅលេងកៀនស្វាយ ថ្ងៃ ចន្ទ 22 ខែមេសា 2013
Posted by សុភ័ក្ត្រ in វីដេអូ, អំពីសុភ័ក្ត្រ.1 comment so far
កាលពីថ្ងៃទី១៧ មេសា ២០១៣ កន្លងទៅនេះ ខ្ញុំបានទៅលេងរមណីយដ្ឋានកៀនស្វាយ។ ជារៀងរាល់ឆ្នាំមិនភ្លេចអារឿងទៅលេងកៀនស្វាយនេះ ដ្បិតមិនឆ្ងាយប៉ុន្មានពីភ្នំពេញ និងមិនឆ្ងាយពីផ្ទះខ្ញុំទេ។ ឥឡូវនេះផ្លូវក៏ស្រួលបើកឡានប្រមាណ១៥នាទីទៅដល់កៀនស្វាយបាត់ទៅហើយ។
កៀនស្វាយឥឡូវមិនដូចពីមុនទេ សម័យតេជោហើយ គេអភិវឌ្ឍន៍យ៉ាងស្អាត !ឡ! នេះជាគ្រាទីមួយហើយ ដែលខ្ញុំបានទៅលេងកៀនស្វាយបន្ទាប់ពីគេមានធ្វើជារោងដាក់ឲ្យអ្នកលក់ដូរនៅទីនោះនាំគ្នាលក់ (មិនដឹងជាយកលុយប៉ុន្មានពីពួកគាត់ទេ)។ ឃើញតែស្អាតរបស់គេហើយ តែចំពោះខ្ញុំវិញមិនជាគាំទ្រទេ មើលទៅហាក់បីដូចជាបាត់បងអស់ធាតុដើមជាទីផ្សារទេចរណ៍ជនបទ មកលើកនេះ មើលទៅដូចជាមកដើរផ្សារលេងធម្មតា បាត់អស់លក្ខណៈធម្មជាតិ។ បើខ្ញុំជាអ្នកដឹកនាំនៅទីនោះវិញខ្ញុំមិនធ្វើដូច្នេះទេ តែរៀបចំឲ្យមានរបៀបរៀបរយវិញល្អជាង។ ណាស់ហើយគេថាអ្នកថាបានតែថាទេ តែអ្នកធ្វើបានគេធ្វើ 
កៀនស្វាយបច្ចុប្បន្ន
កន្លែងលក់ខាងក្រៅ
ត្រីអាំងស្រស់ៗ
លក់ដាច់ណាស់
បង្កងអាំង ថ្លៃណាស់
_________________________________________________________
អានផងដែរ៖
១. កៀនស្វាយឥឡូវ
ម៉ោស្រុកថៃវិញ ថ្ងៃព្រហស្បតិ៍ 18 ខែមេសា 2013
Posted by សុភ័ក្ត្រ in អំពីសុភ័ក្ត្រ.add a comment
ល្ងាចមិញនេះខ្ញុំបានត្រឡប់មកស្រុកថៃវិញហើយ តាមជើងយន្តហោះអ៊ែរ អាស៊ី FD67777 ពីភ្នំពេញមកកាន់ក្រុងបាងកក បន្ទាប់ពីបានទៅសម្រាកនៅស្រុកខ្មែរប្រមាណមួយសប្ដាហ៍នាឱកាសបុណ្យចូលឆ្នាំថ្មី និងបានទៅលេងនៅសៀមរាបអស់៣ថ្ងៃរួចមក៕
ព្រលានយន្តហោះស្រុកខ្មែរ
នៅលើយន្តហោះល្ងាចមិញនេះ
ផែនដីខ្មែរពីលើអាកាស
ផែនដីថៃពីលើអាកាស
៣ថ្ងៃនៅសៀមរាប ថ្ងៃពុធ 17 ខែមេសា 2013
Posted by សុភ័ក្ត្រ in អំពីសុភ័ក្ត្រ.4 comments
ពេញមួយសង្ក្រាន្តឆ្នាំថ្មី ឆ្នាំម្សាញ់ទាំង៣ថ្ងៃនេះ ខ្ញុំបានចំណាយពេលទាំងស្រុងទៅលេងខេត្តសៀមរាប ជាមួយក្រុមគ្រួសារ។ តាំងពីព្រឹកថ្ងៃទីមួយនៃថ្ងៃចូលឆ្នាំឯណុះ (ថ្ងៃទី១៤ មេសា) ខ្ញុំបានចេញដំណើរទៅខេត្តសៀមរាប តាំងពីព្រលឹម និងបានទៅដល់នៅម៉ោងប្រមាណជា២រសៀល ចូលសម្រាកនៅក្នុងសណ្ឋាគារអង្គរ ក្រុងសៀមរាប។
បន្ទាប់ពីចូលឆែកអ៊ីនអីរួចរាល់ហើយ ក៏ជិះមកអង្គរវត្តក្រវែលលេងជុំវិញអង្គរតូច រហូតទៅដល់អង្គរធំ ទស្សនានូវពិធីជាច្រើនដែលរៀបចំដោយកម្មវិធីអង្គរសង្ក្រាន្តនៅឆ្នាំនេះ។ មើលទៅហ៊ឹកហ៊ាក់របស់គេនិងគួរជាទីសប្បាយរីករាយ តែខ្ញុំមិនបានចុះទៅលេងទេ។ រហូតដល់ពេលល្ងាចទៅទៅទទួលទានអាហារបុហ្វហ្វេនៅភោជនីយដ្ឋានមេគង្គ។ រួចក៏បន្តមកដើរលេងនៅផ្សាររាត្រីឯក្រុងសៀមរាបបន្តទៀត។
សកម្មភាពលេងល្បែងកម្សាន្តនៅបរិវេណប្រាសាទអង្គរតូច
សកម្មភាពលេងល្បែងកម្សាន្តនៅបរិវេណប្រាសាទអង្គរតូច
សកម្មភាពលេងល្បែងកម្សាន្តនៅបរិវេណប្រាសាទអង្គរតូច
សកម្មភាពលេងល្បែងកម្សាន្តនៅបរិវេណប្រាសាទអង្គរតូច
អ្នកទេសចរណ៍ខ្មែរនាំគ្នាអង្គុយទទួលទាននៅមុខប្រាសាទអង្គរវត្ត
ស្អែកឡើង ដែលជាថ្ងៃទី២ គឺថ្ងៃចន្ទ ១៥ មេសា ២០១៣ បន្ទាប់ពីស្រស់ស្រូបអាហារពេលព្រឹករួច ក៏ចេញមកដើរលេងអង្គរតូច។ មនុស្សម្នាច្រើនសម្បើមណាស់ ជាមួយនឹងអាកាសធាតុក្ដៅមែនទែន។ ដើរចូលអង្គរវត្ត បានត្រឹមពាក់កណ្ដាលផ្លូវក៏ដើរត្រឡប់ក្រោយមកវិញ និងទទួលទានអាហារពេលថ្ងៃនៅមុខអង្គរវត្តទៅ ហេហេ…។
ក្រោយពីទទួលទានអាហារថ្ងៃត្រង់រួច ក៏ត្រឡប់មកសណ្ឋាគារវិញសម្រាក រហូតដល់ម៉ោង១៥ទៅចេញទៅលេងភូមិវប្បធម៌។ មិនថាកន្លែងណាជាកន្លែងណាទេសម្រាប់រយៈពេលចូលឆ្នាំឆ្នាំនេះ គឺថាមនុស្សម្នាពេញទាំងអស់។ នៅពេលល្ងាចក្នុងភូមិវប្បធម៌ក៏បានទស្សនានៅក្នុងភូមិខ្មែរស្ដីពីរឿងកបិលមហាព្រហ្ម ដែលគេធ្វើល្អរបស់គេដែរ។ បន្ទាប់មកក៏មកស្រស់ស្រូបអាហារពេលល្ងាច បុហ្វហ្វេទៀតនៅក្នុងភូមិវប្បធម៌នេះឯង។ បន្ទាប់មកក៏មកដើរលេងឯផ្សាររាត្រីទៀត និងដើរលេងម្ដុំផ្លូវបារដែរ។ មនុស្សច្រើនមែនទែន។
សកម្មភាពនៅភូមិខ្មែរនៅក្នុងភូមិវប្បធម៌
សកម្មភាពនៅភូមិខ្មែរនៅក្នុងភូមិវប្បធម៌
ការសម្ដែងរឿងកបិលមហាព្រហ្ម
ការសម្ដែងរឿងកបិលមហាព្រហ្ម
ថ្ងៃចូលឆ្នាំទី៣ គឺថ្ងៃអង្គារ ១៦ មេសា ២០១៣ បន្ទាប់ពីស្រស់ស្រូបអាហារពេលព្រឹកនៅសណ្ឋាគាររួចរាល់ហើយ នៅម៉ោងប្រមាណ៩ព្រឹក ក៏ចេញដំណើរត្រឡប់មកផ្ទះវិញ ដោយឆ្ពោះទៅឆ្លងកាត់អង្គរតូចនិងអង្គរធំ ត្រូវស្ទះចរាចរណ៍ដោយសារច្រកចូលប្រាសាទអង្គរធំ។ ម៉ោងប្រមាណ១៧ទើបត្រឡប់មកដល់ភ្នំពេញវិញ។
-
ចូលឆ្នាំនេះអត់បានទៅវត្ត
ជារៀងរាល់ចូលឆ្នាំថ្មីម្ដងៗខ្ញុំមិនដែលភ្លេចរឿងទៅវត្តទេ យ៉ាងហោចណាស់បាន១វត្តដែរ តែឆ្នាំនេះរវល់តែទៅលេងសៀមរាប ក៏មិនបានទៅវត្តនិងគេ មិនដឹងថាទិដ្ឋភាពវត្តឆ្នាំនេះយ៉ាងម៉េចដែរទេ។ តែយ៉ាងហោចណាស់ កាលពីពេលចេញទៅស្រុកខ្មែរនាថ្ងៃទី១២ ខែមេសា ឆ្នាំ២០១៣ នោះក៏បានស្រង់ព្រះម្ដងដែរ នៅឯព្រលានយន្តហោះដនមឿង។ និងកាលពីព្រឹកថ្ងៃទី១៣ ឯផ្ទះខ្ញុំក៏បានធ្វើបុណ្យចម្រើនព្រះសង្ឃដូចតែរាល់ឆ្នាំផងដែរ៕
សូត្រមន្តផ្ទះខ្ញុំ កាលពីថ្ងៃ១៣ មេសា
សូត្រមន្តផ្ទះខ្ញុំ កាលពីថ្ងៃ១៣ មេសា
_____________________________________________
អានផងដែរ៖
១. សណ្ឋាគារអង្គរ
អាវុធគ្រាប់ធន់ប៉ុណ្ណឹងៗនឹងទៅតម្លើងសាច់ដុំដាក់ពីណាគេ? ថ្ងៃ អង្គារ 2 ខែមេសា 2013
Posted by សុភ័ក្ត្រ in បរិយាយថ្ងៃនេះ, អំពីសុភ័ក្ត្រ.1 comment so far
និយាយៗទៅចង់តែសើចពេលអានអត្ថបទដែលសរសេរថា សម្ដេចហ៊ុន សែន៖ ការបាញ់គ្រាប់ពិត BM21 មិនមែនជាការតម្លើងសាច់ដុំដាក់ប្រទេសណាទេ។ ឲ្យមែនៗទៅ ខ្ញុំមិនដឹងជាមានអស់លោកណាថា ឃើញអាវុធដែលកងទ័ពកម្ពុជាបាញ់ពីព្រឹកមិញនេះថាជាការគំរាម ឬតម្លើងសាច់ដុំដាក់ស្រុកណាទេ? បើថាចេញមករបៀបកូរ៉េខាងជើងអីវ៉ាន់នោះ ខ្ញុំថាគួរតែនិយាយចេញមកបាន។ នេះអាវុធត្រឹមបែបស្រុកខ្មែរបាញ់ព្រឹកមិញនេះ កោតតែមានអ្នកនិយាយថាកម្ពុជាចង់តម្លើងសាច់ដុះនោះទៅរួច sic
ឱ ពុទ្ធោអរហំ ហ្អឺយ! ស្រុកខ្មែរយើងបើចង់ធ្វើសង្គ្រាមជាមួយប្រទេសជិតខាងនឹង មិនដឹងជាយកឈ្នះប្រទេសណាបានឲ្យពិតប្រាកដទេ។ ក៏ប៉ុន្តែការសមល្បងកម្លាំងមិនមែនជាការខុសឆ្គងអ្វីទេ។ យ៉ាងហោចណាស់ក៏បានដឹងថាគ្រាប់ណាល្អ គ្រាប់ណាស្អុយបានដែរ។ តែបើធ្វើសង្គ្រាមនោះ យ៉ាងហោចណាស់បានត្រឹមទប់ បានត្រឹមទល់ កុំឲ្យចាញ់រហ័សពេកអីវ៉ាន់ថា។
មួយរយៈពេលនេះបើថាមានសង្គ្រាមជាមួយប្រទេសជិតខាង គឺគ្មានប្រទេសណាក្រៅពីប្រទេសថៃទេ គឺរឿងរ៉ាវព្រះវិហារនេះឯង។ ហើយបើថាឃើញខ្មែរបាញ់សមយុទ្ធគ្រាប់ពិតអីអស់ហ្នុងដូចថ្ងៃនេះនោះ មិនបាច់បារម្ភថាថៃគេចោទថាយើងតម្លើងសាច់ដងសាច់ដុំអីនោះ គេមិនចោទទេ។ ចំពោះគ្រឿងអាវុធយុទ្ធោបរណ៍នោះ ថៃគេមានម៉ាកំប្លេឯណុះ ពួកនេះធ្លាប់អួតថា ត្រឹម១០នាទី គេបញ្ជូនយន្តហោះចម្បាំងកម្ទេចភ្នំពេញបាត់ទៅហើយ។ អូ! ហូ ស្ដាប់ហើយព្រឺខ្លួន។ ហេតុដូចនោះ មិនបាច់ភ័យគិតថាគេចោទថាយើងតម្លើងសាច់ដុះទេ ទាន៕
____________________________________________
អានផងដែរ៖
១. សម្ដេចហ៊ុន សែន៖ ការបាញ់គ្រាប់ពិត BM21 មិនមែនជាការតម្លើងសាច់ដុំដាក់ប្រទេសណាទេ
ស្លាកឈ្មោះ៖ រឿងរ៉ាវពីក្មេង ថ្ងៃពុធ 27 ខែមីនា 2013
Posted by សុភ័ក្ត្រ in អំពីសុភ័ក្ត្រ.2 comments
ស្លាកឈ្មោះដែលគូរដោយសិស្សដើម្បីបិទពីលើគ្របសៀវភៅ
មិនដឹងជាមាននរណានៅចាំបានទេ កាលពីនៅរៀនបឋមសិក្សា គ្រូតែងឲ្យរៀបចំសៀវភៅយ៉ាងស្អាត មានទាំងគម្រប មានទាំងស្លាកឈ្មោះត្រឹមត្រូវ។ កាលពីសម័យនោះកម្សត់ និងខ្សត់ណាស់ សិស្សគ្រប់គ្នាត្រូវនាំគ្នាយកក្រដាសសៀវភៅមកវាយបន្ទាត់គូសជាស្លាកឈ្មោះ ដូចរូបខាងលើនេះដើម្បីបិទពីលើគម្របសៀវភៅ។ សម្រាប់សិស្សទាំងហ្លាយណាមានលុយច្រើន គេយកសៀវភៅគេទៅអ៊ុតថង់ប្លាស្ទិកយ៉ាងស្អាត និងមានរបៀបរៀបរយ។ ពេលដាក់ពិន្ទុ គ្រូក៏ដាក់ទៅតាមនឹងដែរ។
មិនដឹងជាសម័យបច្ចុប្បន្ននេះ ក្មេងៗមាននៅធ្វើបែបនេះ ដូចសម័យមុនដែរឬទេហ្ន៎?!
ការបាត់បង់ប្រពៃណី «កោដ្ឋ» នៅក្នុងប្រទេសកម្ពុជា ថ្ងៃព្រហស្បតិ៍ 21 ខែមីនា 2013
Posted by សុភ័ក្ត្រ in អំពីសុភ័ក្ត្រ.4 comments
នៅក្នុងវចនានុក្រមខ្មែរ ពាក្យ កោដ្ឋ [អានថា៖ កោត] ជាភាសាបាលី មានន័យថា ជង្រុក ឬរបស់សម្រាប់ដាក់សព, ដាក់ធាតុ ជាដើម។ល។
ការប្រើប្រាស់កោដ្ឋសម្រាប់ដាក់សព មានអត្ថន័យធំធេងណាស់នៅក្នុងសង្គមខ្មែរសម័យបុរាណ។ ដោយហេតុថាការដាក់សពនៅក្នុងកោដ្ឋខុសពីការដាក់សពនៅក្នុងម្ឈូស មានមតិមួយចំនួនបានលើកឡើងពីសភាពមិនមែនជាមនុស្សសាមញ្ញចំពោះសពដែលបានទទួលមរណភាពទៅ។
មានមនុស្សជាច្រើនមិនតិចទេ ដែលឆ្ងល់ថា តើគេដាក់សពនៅក្នុងកោដ្ឋដោយវិធីណា។ ចំពោះសពដែលត្រូវយកទៅដាក់ក្នុងកោដ្ឋគេត្រូវដាក់ក្នុងសណ្ឋានជាលក្ខណៈអង្គុយ ប្រៀបប្រដូចទារកដែលនៅក្នុងឧទរម្ដាយ មុននឹងប្រសូតមកខាងក្រៅ។ ហេតុដូចនេះ មនុស្សមួយចំនួនដែលយល់ថាគេដាក់សពឈរនៅក្នុងកោដ្ឋនោះ ជាមតិមិនត្រឹមត្រូវទេ។
ដោយហេតុពីភាពខុសគ្នានៃការដាក់សពអង្គុយនៅក្នុងកោដ្ឋ និងការដាក់សពឲ្យដេកនៅក្នុងម្ឈូសនោះ មនុស្សមួយចំនួនយល់ថាការដាក់សពសណ្ឋានអង្គុយនេះ គឺប្រៀបជាការជូនដំណើរបុគ្គលដែលស្លាប់នោះ ទៅកាន់ស្ថានសួគ៌ គឺមិនមែនសាមញ្ញជនឡើយ។ ហេតុដូចនេះគេកម្រឃើញមានណាស់ដែលមនុស្សធម្មតាស្លាប់ទៅហើយ សង្គមខ្មែរមិនបានប្រើកោដ្ឋដាក់សពទេ លើកលែងតែអ្នកដែល មានឋានៈខ្ពង់ខ្ពស់ក្នុងសង្គម មានព្រះរាជា និងព្រះរាជវង្សានុវង្ស, ព្រះសង្ឃ ឬអ្នកទាំងហ្លាយផ្សេងទៀតដែលព្រះមហាក្ស័ត្រិយ៍ទ្រង់ព្រះរាជានុញ្ញាតិ ជាដើម។ល។
បើទោះបីហេតុដូចនេះក្ដី ប្រពៃណីនៃការប្រើប្រាស់កោដ្ឋនៅក្នុងសង្គមកម្ពុជានាពេលបច្ចុប្បន្នបានសាបរលាប និងបាត់បង់បាត់ទៅហើយ គឺទោះបីព្រះរាជា ឬព្រះសង្ឃ ។ល។ ក៏មិនមានឃើញពីការប្រើប្រាស់កោដ្ឋសម្រាប់ដាក់ព្រះសពហើយ។ ជាក់ស្ដែង អតីតព្រះមហាវីរក្សត្រិយ៍ ព្រះ នរោត្ដម សីហនុ ដែលទ្រង់បានព្រះសុវណ្ណគតនាពេលថ្មីៗនេះ ព្រះបរមសពក៏មិនត្រូវបានដាក់ក្នុងព្រះកោដ្ឋ ដូចកាលពីអតីតព្រះមហាក្សត្រិយ៍សម័យមុនៗទៀតទេ។ ការប្រើប្រាស់កោដ្ឋសម្រាប់ដាក់ព្រះសពនៅក្នុងសង្គមកម្ពុជា ដែលឃើញមានចុងក្រោយបង្អស់ គឺមាននៅកាលពីជាង៥២ឆ្នាំមុនមកម្ល៉េះ គឺកាលពីឆ្នាំ១៩៦០ គឺក្នុងបុណ្យព្រះបរមសពសម្ដេច ព្រះ នរោត្ដម សុរាម្រឹត ព្រះរាជបិតានៃព្រះ នរោត្ដម សីហនុ នេះឯង។
នៅក្នុងសង្គមថៃ ដែលមានវប្បធម៌ប្រហាក់ប្រហែលនឹងសង្គមខ្មែរដែរនោះ ការប្រើប្រាស់កោដ្ឋសម្រាប់ដាក់សព ក៏បាត់បង់ដែរ ពោលគឺមិនមានព្រះសព ឬសពណាត្រូវបានគេយកទៅដាក់ក្នុងកោដ្ឋទៀតឡើយ (អានប្រកាស៖ អាថ៌កំបាំងការរំលាយព្រះសពព្រះរាមមហាក្សត្រិយ៍ថៃ)។ ក៏ប៉ុន្តែ បើទោះបីជាប្រពៃណីនៃការយកសពទៅដាក់ក្នុងកោដ្ឋត្រូវបានបាត់បង់ក្ដី ប្រពៃណី «កោដ្ឋ» នៅក្នុងសង្គមថៃ មិនមានការបាត់បង់ទេ។ កោដ្ឋ នៅតែជាគ្រឿងសម្គាល់សម្រាប់ ព្រះរាជា និងព្រះរាជវង្សានុវង្ស, ព្រះសង្ឃ និងអ្នកមានឋានៈខ្ពស់ខ្ពស់នៅក្នុងសង្គមថៃដដែល។ បុគ្គលអស់ទាំងហ្លាយដែលបានរៀបរាប់ខាងមុននេះ នៅពេលដែលមរណភាពទៅ ព្រះមហាក្សត្រិយ៍ថៃជាអ្នកប្រទាន «កោដ្ឋ» ទៅតាមលំដាប់ឋានៈនៃបុគ្គលដែលបានស្លាប់នោះ ជាតំណាងផងដែរ។ នៅប្រកាសខាងមុខ ខ្ញុំនឹងរៀបរាប់ពីការប្រើប្រាស់កោដ្ឋ នៅក្នុងសង្គមថៃនាពេលបច្ចុប្បន្ន។ (អានប្រកាស៖ ប្រពៃណី «កោដ្ឋ» នៅក្នុងសង្គមថៃ)
_______________________________________________
អានបន្ថែម៖
១. កោដ្ឋ
២. ការរំលាយសពព្រះមហាក្ស័ត្រិយ៍ និងអ្នកមានឋានៈខ្ពង់ខ្ពស់
៣. អាថ៌កំបាំងការរំលាយព្រះសពព្រះរាមមហាក្សត្រិយ៍ថៃ
៤. ប្រពៃណី «កោដ្ឋ» នៅក្នុងសង្គមថៃ
សិល្បៈបាលី របាំបារ៉ុង និងរបាំគ្រីស ថ្ងៃពុធ 20 ខែមីនា 2013
Posted by សុភ័ក្ត្រ in ទេសចរណ៍, វីដេអូ, អំពីសុភ័ក្ត្រ.2 comments
កម្មវិធីមួយនៅក្នុងដំណើរទស្សនកិច្ចទៅកាន់កោះបាលីកាលពីគ្រាថ្មីៗនេះ គឺការទៅទស្សនារបាំដ៏ល្បីល្បាញរបស់អ្នកស្រុកនេះ គឺរបាំបារ៉ុង និងរបាំគ្រីស (Barong & Kris Dance)។ ជាប្រភេទបូរាណនិទានរបស់អ្នកស្រុកបាលី តំណាលអំពីសភាវអាក្រក់ និងសភាវល្អ នៅក្នុងភូមិ ដែលជាចុងក្រោយសភាវល្អតែងតែឈ្នះសភាវអាក្រក់ជានិច្ច។
មានក្រុមអ្នកទេសចរណ៍កញ្ចប់ច្រើនណាស់ ដែលត្រូវបានដឹកតាមឡានទៅទស្សនារបាំនេះ រាប់ទាំងខ្ញុំផងដែរ។ ក្រៅពីនោះ គួរឲ្យសង្កេតក្រុមអ្នកទេសចរណ៍ក្នុងស្រុកក៏ច្រើនសន្ធឹកដែរ ដែលពួកគេចូលរួមទស្សនារបាំនេះ៕
ក្រុមភ្លេងបូរាណរបស់អ្នកស្រុកបាលី
អ្នកទស្សនាកុះករ
ការសម្ដែងសិល្បៈបាលី របាំបារ៉ុង និងរបាំគ្រីស
ការសម្ដែងសិល្បៈបាលី របាំបារ៉ុង និងរបាំគ្រីស
អ្នកទស្សនា
ការសម្ដែងសិល្បៈបាលី របាំបារ៉ុង និងរបាំគ្រីស
______________________________
អានផងដែរ៖
១. មកដល់បាលី
២. ជំនឿអ្នកស្រុកបាលី
