jump to navigation

សម្ដេច​ព្រះ​ប្រមុខ​រដ្ឋ​បាន​ចូល​រួម​យ៉ាង​សកម្ម​ជាមួយ​កសិករ​ធ្វើ​ស្រែ​ចម្ការ ថ្ងៃសៅរ៍ 23 ខែ​ឧសភា 2020

Posted by សុភ័ក្ត្រ in សង្គម​រាស្ត្រ​និយម, Français.
add a comment

Untitled-1Untitled-2Untitled-3Untitled-4Untitled-5Untitled-6

ព្រះ​សង្ឃ​លាវ​បិណ្ឌ​បាត្រ​ឯ​ហ្លួង​ព្រះ​បាង ថ្ងៃសុក្រ 22 ខែ​ឧសភា 2020

Posted by សុភ័ក្ត្រ in អំពីស្រុកខ្មែរ, ພາສາລາວ.
1 comment so far

នេះ​ជា​កម្រង​រូប​ភាព​ជីវភាព​ប្រជាជន​លាវ និង​ការ​បិណ្ឌ​បាត្រ​របស់​ព្រះ​សង្ឃ​ឯ​អតីត​រាជធានី​ហ្លួង​ព្រះ​បាង​នៃ​នគរ​លាវ​។ រូប​នេះ​ថត​កាល​ពី​ខែ​មករា ឆ្នាំ​២០១០ គឺ​ប្រមាណ​ជាង​១០​ឆ្នាំ​មុន​៕

______________________________________
អាន​ផង​ដែរ
១. ចេញ​ទៅ​លាវ​ព្រឹក​នេះ
២. ចេញ​ទៅ​ហ្លួង​ព្រះបាង​ព្រឹក​ស្អែក

 

អត្ថបទ​ប្រែ ៖ “ត្រឡែង​កែង” ពាក្យ​នេះ​មក​ពី​ណា​? ហេតុ​ម្ដេច​ប្រែ​ថា “ដែន​ប្រហារ​”​? ថ្ងៃ​ព្រហស្បតិ៍ 21 ខែ​ឧសភា 2020

Posted by សុភ័ក្ត្រ in អំពី​ភាសា, អំពីភាសា, ภาษาไทย.
2 comments

កកន ៖ កាល​ពី​ថ្ងៃ​ទី​២៣ ខែ​មេសា ឆ្នាំ​២០២០ កន្លង​មក​នេះ ​គេហ​ទំព័រ​សិល្បៈ​វឌ្ឍនធម្ម (​ថ. ศิลปวัฒนธรรม)​ បាន​ចុះ​ផ្សាយ​អត្ថបទ​មួយ​ដែល​មាន​ចំណង​ជើង​ថា “ตะแลงแกง” คำนี้มาจากไหน? ไฉนจึงเป็น “แดนประหาร”? ឬ​​ប្រែ​មក​ជា​ភាសា​ខ្មែរ​យើង​ថា “ត្រឡែង​កែង” ពាក្យ​នេះ​មក​ពី​ណា​? ហេតុ​ម្ដេច​ប្រែ​ថា “ដែន​ប្រហារ​”​?

ដោយ​ឃើញ​ថា​អត្ថបទ​លក្ខណៈប្រវត្តិសាស្ត្រ​នេះ​មាន​សារសំខាន់ និង​ទាក់​ទង​នឹង​ប្រវត្តិ​ស្រុក​ភូមិ​យើង​ផង ថ្ងៃ​នេះ ស្រែ​ខ្មុក​សូម​អនុញ្ញាត​បក​ប្រែ​ជា​ភាសា​ខ្មែរ​ក្រៅ​ផ្លូវ​ការ ដោយ​មិន​បញ្ចេញ​បញ្ចូល​បន្ថែម ដើម្បី​ទុក​ជូន​ជា​​ឯកសារ​ នៅ​ទី​នេះ ដូច​ត​ទៅ​។

នៅ​ពេល​ឮ​ពាក្យ​ថា “ត្រឡែង​កែង” ជន​ជាតិ​ថៃ​តែង​តែ​នឹក​ដល់ “ដែន​ប្រហារ” ការ​ពិត​ទៅ​ពាក្យ​ថា​ត្រឡែង​កែង ក្នុង​អត្ថន័យ​ដើម មិន​បាន​សំដៅ​ដល់ “ដែន​ប្រហារ” នោះ​ទេ​។ បើ​ដូច​នេះ​ពាក្យ​ថា “ត្រឡែង​កែង” នៅ​ក្នុង​ភាសា​ថៃ​មាន​ប្រភព​មក​ពី​ភាសា​ណា និង​មាន​ន័យ​ដើម​ក្នុង​ភាសា​នោះ​ថា​ដូច​ម្ដេច​?

“ត្រឡែង​កែង” ជា​ពាក្យ​ខ្មែរ​ដែល​ថៃ​ខ្ចី​មក​ប្រើ មក​ពី​ពាក្យ​ថា “ត្រឡែង​កែង” បញ្ចេញ​សំឡេង “ត្រឡែង​កែង”​។ វចនា​នុក្រម​ខ្មែរ ច្បាប់​ពុទ្ធ​សាសន​បណ្ឌិត្យ ក្រុង​ភ្នំពេញ បាន​ឲ្យ​និយមន័យ​ថា “ដែល​មាន​មុខ​៤ ឬ​បែក​ជា​៤ (​ឈ្មោះប្រាសាទ, វិហារ, ផ្លូវ)” ដូច​ជា​ “ប្រាសាទ​ត្រឡែង​កែង” ប្រែ​ថា “​ប្រាសាទ​ចតុម្មុខ​ដែល​​មានមុខ​​៤” ឬ​ក្នុង​ពាក្យ​ថា​ “ផ្លូវ​ត្រឡែង​កែង​”។

“វត្ត​ត្រឡែង​កែង” ជា​វត្ត​បូរាណ​មាន​ទី​តាំង​នៅ​កណ្ដាល​ក្រុង “លង្វែក” ពី​ដើម​ឡើយ​វត្ត​នេះ​អាច​ជា​សាសន​ស្ថាន​របស់​ខ្មែរ​តាំង​តែ​សម័យ​មហា​នគរ មុន​ពេល​ដែល​ខ្មែរ​ផ្លាស់​ប្ដូរ​រាជធានី​មក​នៅ​លង្វែក​នេះ​។ នៅ​ពេល​ចៅ​ពញា​ចន្ទ​រាជា (​ព្រះ​អង្គ​ចន្ទ​) ផ្លាស់​ប្ដូរ​រាជធានី​ខ្មែរ​មក​តាំង​នៅ​លង្វែក ក៏​ទ្រង់​ព្រះ​រាជានុញ្ញាត​ឲ្យ​សាង​វត្ត​ឡើង​នៅ​បរិវេណ​នេះ​។ ដោយ​ហេតុ​​ដែល​សាង​ជា​វិហារ​មាន​មុខ​បួន​ទិស​ ទើប​ឲ្យ​ឈ្មោះ​ថា “ព្រះ​វិហារ​ចតុម្មុខ​មហា​ប្រាសាទ” ត្រូវ​គ្នា​នឹង​ឈ្មោះ​ដែល​ហៅ​ជា​ទូទៅ​ថា “វត្ត​ត្រឡែង​កែង” ដោយ​សារ​មាន​វិហារ​សាង​ជា​មុខ​មាន​បួន​ទិស​។ រាជ​ពង្សាវតារ​ក្រុង​កម្ពុជា​បាន​សរសេរ​ថា ក្នុង​វិហារ​ចតុម្មុខ​ជា​ទី​ប្រតិស្ឋាន​ព្រះ​អដ្ឋារស​កម្ពស់​៩​ម៉ែត្រ ចំនួន​៤​អង្គ បែ​ព្រះ​ភ័ក្ត្រ​ទៅ​កាន់​ទិស​ផ្សេង​ៗ​។ ព្រះ​បាទ​សាង​ពី​សិលា​។

វត្ត​ត្រឡែង​កែង​កណ្ដាល​ក្រុង​លង្វែក ជា​វត្ត​បូរាណ​ដែល​មាន​វិហារ​ប្រតិដ្ឋាន​ព្រះ​អដ្ឋរស​ទាំង​៤​ទិស ឈ្មោះ​របស់​វត្ត​ទើប​​ត្រូវ​បាន​គេ​ហៅ​ជា​ទូទៅ

ក្រោយ​មក​នៅ​ពេល​បែក​ក្រុង​លង្វែក វិហារនេះ​ត្រូវ​បាន​បំផ្លាញ និង​ប្រហែលត្រូវ​បាន​ជួស​ជុល​ឡើង​វិញ​នៅ​សម័យភ្នំពេញ ព្រះ​ទាំង​បាង​សាង​ព្រះ​ពុទ្ធ​រូប​ទ្រង់​គ្រឿង​វរមុទ្រា​ជំនួស​ឲ្យ​ព្រះ​អដ្ឋារស​ដែល​នៅ​សេស​សល់​មក​ដល់​បច្ចុប្បន្ន រួម​ទាំង​ឈ្មោះ «​វត្ត​ត្រឡែង​កែង​» ផង​។ នឹង​សង្កេត​ឃើញ​ថា អត្ថន័យ​របស់ «​ត្រឡែង​កែង​» ក្នុង​ភាសា​ខ្មែរ ជា​ន័យ​សំដៅ​ដល់ «​វត្ថុ​ដែល​បែក​ជា​៤ ឬ​មាន​មុខ​៤​» ទូទៅ​​ដែល​មិន​សំដៅ​ដល់ «​ដែន​ប្រហារ​» នោះ​ទេ​។ នេះ​មាន​ន័យ​ថា ការ​ផ្ដល់​អត្ថន័យ​ពាក្យ​ថា «​ត្រឡែង​កែង​» ពី​ទី «​ដែលមាន​បែក​ជា​មុខ​៤​» មក​ជា «​ដែន​ប្រហារ​» ក៏​ទំនង​កើត​ឡើង​ក្នុង​ភាសា​ថៃ​នេះ​ឯង​។

នៅ​ពេល​ថៃ​ទទួល​ពាក្យ​ថា «​ត្រឡែង​កែង​» មក​ប្រើ​បាន​ផ្លាស់​ប្ដូរ​រូប​ពាក្យ និង​ការ​បញ្ចេញ​សំឡេង​ខ្លះ ជា «​តៈឡែង​កែង​» អត្ថន័យ​យក​មក​ប្រើ​ដំបូង​អាចនឹង​ដូច​គ្នា​នឹង​អត្ថន័យក្នុង​ភាសា​ខ្មែរ គឺ​ប្រែ​ថា «​ទី​ដែល​មាន​ផ្លូវ​បែក​ជា​៤» ឬ​ន័យ​មួយ​ទៀត​គឺ «​ផ្លូវ​បែក​ជា​៤​»​។

ផ្លូវមុខ​ខុនផែន ក៏មាន​លក្ខណៈ​បែក​ជា​៤ សម័យ​ក្រុង​ស្រី​អយុធ្យា​ហៅ​ថា​ផ្លូវ​តៈឡែងកែង

ភស្តុតាង​នៃ​ការ​ប្រើ​ពាក្យ​ថា «​តៈ​ឡែង​កែង​» ក្នុង​អត្ថន័យ​ថា​ផ្លូវ​បែក​ជា​៤​នោះ មាន​ឃើញ​ក្នុង​ច្បាប់​ត្រា​៣​ដួង ដូច​ជា​ច្បាប់​ព្រះ​អយ្យការ​លក្ខណៈ​ប្ដី​ប្រពន្ធ (​ឆ្នាំ​១៣៦១​) ចែង​ថា ប្រសិន​បើ​ស្ត្រី​ណា​មាន​ស្មន់ «​… ស្ត្រី​នោះ​ឲ្យ​កោ​សក់​ជា​តៈឡែងកែង និង​យក​ទៅ​ឲ្យ​គេ​ប្រទេច​…​»។

ហេតុក្រោយ​មក​ដែល​អត្ថន័យ​របស់ «តៈឡែងកែង» បាន​ប្ដូរ​មក​ជា «​កន្លែង​ដែល​ប្រហារ​» នោះ អាច​មក​ពី​កាល​សម័យ​បូរាណ​កន្លែង​ដែល​យក​អ្នក​ទៅ​មក​ប្រហារ គឺ «​ផ្លូវ​បែក​ជា​៤​» ឬ «​ត្រឡែង​កែង​» ដូច​ន័យ​នៃ​ច្បាប់​ព្រះ​អយ្យការ​អំពី​ចោរ​ថា «​… ប្រសិន​បើ​លួច​បន្លែ​ស្ពៃ​ទា​មាន់ … ពិចារណា​ថា​គឺ​ជា​ចោរ ឲ្យ​ចង​យក​ទៅ​តៈឡែងកែង​ប្រទេច​នឹង​វាយ​ដោយ​រំពាត់​ឈើ​៥០​ដង​…​»

ដូច​នេះ​នៅ​ពេល​ក្រោយ​ៗ​មក ប្រើ​ពាក្យ​ថា «​តៈឡែងកែង​» ក៏​ក្លាយ​ជា​កន្លែង​ដោត​ក្បាល​ប្រទេច ដូច​ច្បាប់​ព្រះ​អយ្យការ​ស្ដី​ពី​ចោរ ដែល​និយាយ​ដល់​ការ​ដាក់​ទោស​ចោរ​ប្លន់​ផ្ទះ​ថា «​… ហើយ​ឲ្យ​សម្លាប់​ចោរ​ដែល​បាន​ប្រព្រឹត្ត កាត់​ក្បាល​ដោត​នៅ​តៈឡែងកែង​…​» ភស្តុតាង​ដែល​អះ​អាង​ពី​ការ​ប្ដូរ​អត្ថន័យមក​យូរ​ហើយ​គឺ វចនានុក្រមរបស់​ម៉បរ័តលេយ៍ ឬ​សៀវភៅ «​អក្ខាភិធានសព្ទ​» ​បាន​ឲ្យ​និយមន័យ «​តៈឡែង​កែង​» ថា «​ឈ្មោះ​កន្លែង​សម្លាប់​មនុស្ស​» និង​ប្រើ​ក្នុង​អត្ថន័យនេះ​តែ​មួយ (​មិន​អធិប្បាយ​ថា​សំដៅ​ដល់​ផ្លូវ​បែក​ជា​៤​)​។

នេះ​បាន​ន័យ​ថា​មក​ដល់​សម័យ​ក្រុង​រតនកោសិន្ទ្រ ពាក្យ​ថា «​តៈឡែងកែង​» បាន​ប្ដូរ​អត្ថន័យ​ហើយ ដែល​បាន​ប្រើអត្ថន័យ​នេះមក​ដល់​បច្ចុប្បន្ន ដោយ​ភ្លេចនឹក​ទៅ​ថា ដើម «​តៈឡែងកែង» សំដៅ​ដល់ «​ផ្លូវ​បែក​ជា​៤​» ធម្មតា​​ៗ​នេះ​ឯង​។


ផ្សព្ធ​ផ្សាយ​នៅ​ក្នុង​ប្រព័ន្ធ​អនឡាញ​លើក​ដំបូង​នៅ​ថ្ងៃ​ទី​៣ សីហា ២០១៨

លេខ​កូដ​ប្រៃសណីយ៍​ ៖ កំពង់​ធំ – ក្រុង​ស្ទឹង​សែន ថ្ងៃពុធ 20 ខែ​ឧសភា 2020

Posted by សុភ័ក្ត្រ in កូដ​ប្រៃសណីយ៍-​កំពង់​ធំ.
add a comment

ក្រុង​ស្ទឹង​សែន របស់ខេត្ត​កំពង់ធំ មាន​សរុប​ទាំង​អស់៨សង្កាត់ ដោយ​សង្កាត់​​​នីមួយ​ៗ មាន​លេខ​កូដ​ប្រៃសណីយ៍​ផ្ទាល់​ខ្លួន​ ដូច​ត​ទៅ​នេះ​ ៖

  1. សង្កាត់ដំរីជាន់ខ្លា – ០៦៤០១
  2. សង្កាត់កំពង់ធំ – ០៦៤០២
  3. សង្កាត់កំពង់រទេះ – ០៦៤០៣
  4. សង្កាត់អូរកន្ធរ – ០៦៤០៤
  5. សង្កាត់កំពង់ក្របៅ – ០៦៤០៥
  6. សង្កាត់ព្រៃតាហ៊ូ – ០៦៤០៦
  7. សង្កាត់អាចារ្យលាក់ – ០៦៤០៧
  8. សង្កាត់ស្រយ៉ូវ – ០៦៤០៨

*** សម្រាប់​លេខ​កូដ​ប្រៃសណីយ៍​ស្រុក​ឯ​ទៀត​ៗ​របស់​ខេត្ត​កំពង់​ធំ ចុច​ទី​នេះ

_______________________________________________________
អាន​ផង​ដែរ​៖
១. កូដ​​ប្រៃសណីយ៍ និង​កង្វះ​ការ​យល់​ដឹង
២. លេខ​កូដ ប្រៃសណីយ៍​នៃ​ព្រះរាជាណាចក្រ​កម្ពុជា

WE ARE UNITY ថ្ងៃអង្គារ 19 ខែ​ឧសភា 2020

Posted by សុភ័ក្ត្រ in ពីនេះពីនោះ.
add a comment

ខួប​ឆ្នាំ​ទី​៦០ ព្រះ​រាជ​ពិធី​បញ្ចុះ​បឋម​សិលា​ជួស​ជុល​ព្រះ​វិហារ​ព្រះ​កែវ​មរកត ថ្ងៃចន្ទ 18 ខែ​ឧសភា 2020

Posted by សុភ័ក្ត្រ in ប្រវត្តិសាស្ត្រ.
4 comments

ថ្ងៃ​ទី​១៨ ខែ​ឧសភា ឆ្នាំ​២០២០ នេះ មាន​រយៈ​ពេល​៦០​ឆ្នាំ​នៃ​​​ព្រះ​រាជ​ពិធី​បញ្ចុះ​បឋម​សិលា​ជួស​ជុល​ព្រះ​វិហារ​ឧបោសថ​រតនា​រាម ឬ​​ព្រះ​កែវ​មរកត​។ ព្រះ​រាជ​ពិធី​ជា​ប្រត្តិសាស្ត្រ​នេះ ធ្វើ​ឡើង​កាល​ពី​ថ្ងៃ​ពុធ ៨​រោច ខែ​ពិសាខ ឆ្នាំ​ជូត ទោ​ស័ក ព.ស.​២៥០៣ ត្រូវ​នឹង​ថ្ងៃ​ទី​១៨ ខែ​ឧសភា ឆ្នាំ​១៩៦០​។

ព្រះ​វិហារ​ព្រះ​កែវ​មរកត​ត្រូវ​បាន​កសាង​ឡើង​ក្នុង​រជ្ជកាល​នៃ​ព្រះ​ករុណា ព្រះ​បាទ សម្ដេច​ព្រះ​នរោត្ដម បរមរាមទេវាវតារ ព្រះ​សុវណ្ណ​កោដ្ឋ ដោយ​សាង​ពី​ឈើ និង​ឥដ្ឋ​ រួច​ស្រេច​បរិបូណ៌ និង​ចាត់​ព្រះ​រាជ​ពិធី​ឆ្លង​សម្ពោធ​បញ្ចុះ​សីមា នា​ថ្ងៃ​​ព្រហស្បតិ៍ ៨​កើត ខែ​មាឃ ឆ្នាំ​ខាល ចត្វា​ស័ក ព.ស.​២៤៤៥ ត្រូវ​នឹង​ថ្ងៃ​ទី​៥ ខែ​កុម្ភៈ ឆ្នាំ​១៩០៣​។

ដោយ​សារ​សភាព​នៃ​ព្រះ​វិហារ មាន​ភាព​ទ្រុឌ​ទ្រោម ក្រោម​ព្រះ​រាជ​តម្រិះ​នៃ​សម្ដេច​ព្រះ​មហា​ក្សត្រិយានី ព្រះ​សីសុវត្ថិ មុនីវង្ស កុសុមៈ នារីរតន៍ សិរីវឌ្ឍនា ជា​អម្ចាស់ និង​ក្រោម​ព្រះ​រាជ​កិច្ច​ដឹក​នាំ​ដ៏​ខ្ពង់​ខ្ពស់​នៃ​សម្ដេច​ព្រះ​ប្រមុខ​រដ្ឋ ព្រះ​ករុណា ព្រះ​បាទ​សម្ដេច​ព្រះ​នរោត្ដម សីហនុ ព្រះ​បរម​រតន​កោដ្ឋ ព្រះ​វិហារ​ជា​ព្រះ​កេរ​នៃ​ប្រជាជាតិ​ខ្មែរ​នេះ ត្រូវ​បាន​ធ្វើ​ពិធី​ជួស​ជុល​​ស្ថាបនា​ឡើង​វិញ​ ដោយ​សាង​ពី​បេតុង​អាម៉េ ព្រម​រក្សា​ទុក​នូវ​ស្ថាបត្យកម្ម​ដើម ដោយ​មាន​បន្ថែម​កម្រាល​បន្ទះ​ប្រាក់ និង​សសរ​បិទ​ថ្ម​កែវ ដែល​នាំ​ចូល​ពី​ប្រទេស​អ៊ីតាលី​ផង​៕

DQbxUzESilver-Pagoda

_________________________________________
អាន​បន្ថែម
១. “พระแก้วมรกต” ในพระราชวังหลวงที่พนมเปญต่างกับไทยไหม วัสดุในพระวิหารมูลค่าเท่าใด
២. អំពីវត្តព្រះស្រីរតនសាស្ដារាម ឬវត្តព្រះកែវនៃនគរថៃ
៣. វត្តព្រះកែវក្រុងទេព និងទំនាក់ទំនងនគរខ្មែរ
៤. ព្រះ​ជិនរង្សី​រាជិក​នរោត្ដម
៥. អត្ថបទ​ប្រែ ៖ “ព្រះ​កែវ​មរកត” នៅ​ព្រះ​បរម​រាជ​វាំង​ភ្នំពេញ ខុស​គ្នា​ពី​ថៃ​ទេ? វត្ថុ​ក្នុង​ព្រះ​វិហារ​មាន​តម្លៃ​ប៉ុន្មាន​?
៦. គំនូរបុរាណនៅព្រះវិហារព្រះកែវ បាត់បង់តាំងពីពេលណា?

Repost : «​និរាស​នគរ​វត្ត​» ច្បាប់​ក្រុម​ពញា​តម្រុង​រាជានុភាព ថ្ងៃអាទិត្យ 17 ខែ​ឧសភា 2020

Posted by សុភ័ក្ត្រ in ภาษาไทย.
4 comments

«​និរាស​នគរ​វត្ត​» គឺ​ជា​ស្នាដៃ​អក្សរ​សិល្ប​ដ៏​ល្បី​ល្បាញ​មួយ​របស់​ថៃ ក្នុង​ចំណោម​អក្សរ​សិល្ប​ល្បី​ៗ​ជា​ច្រើន​ទៀត​របស់​ប្រទេស​នេះ​។ បទ​ «​និរាស​នគរ​វត្ត​» ត្រូវ​បាន​តាក់​តែង​ឡើង​ជា​ពាក្យ​កម្រង​កែវ ដែល​ជា​​ព្រះ​និពន្ធ​នៃ សម្ដេច​ព្រះ​ចៅ​បរម​វង្ស​ធើ ព្រះ​អង្គ​ម្ចាស់​តិឝវរកុមារ ក្រុម​ពញា​តម្រុង​រាជានុភាព អ្នក​ប្រាជ្ញ​ដ៏​សំខាន់​ម្នាក់​របស់​ប្រទេស​នេះ​។

រឿង​រ៉ាវ​នៃ​ «​និរាស​នគរ​វត្ត​» គឺ​បន្ទាប់​ពី ព្រះ​អង្គ​បាន​មក​បំពេញ​ព្រះ​ទស្សនកិច្ច​នៅ​ប្រទេស​កម្ពុជា​យើង​ចាប់​ពី​ថ្ងៃ​ទី​១៦ ខែ​វិច្ឆិកា ដល់​ថ្ងៃ​ទី​១៤ ខែ​ធ្នូ ឆ្នាំ​១៩២៤​។ នៅ​ពេល​ត្រឡប់​ទៅ​ប្រទេស​ថៃ​វិញ គឺ​នៅ​ខែ​មីនា ឆ្នាំ​១៩២៥ ព្រះ​អង្គ​បាន​និពន្ធ​ស្នាដៃ​នេះ​ឡើង ដោយ​ដំបូង​ឡើយ​ជា​ពាក្យ​រាយ​រៀប​រាប់​អំពី​ដំណើរ​ទស្សនកិច្ច​ក្នង​លក្ខណៈ​កំណត់​ហេតុ​ធម្មតា​។ ក្រោយ​មក​ព្រះ​អង្គ​ក៏​តាំង​ព្រះ​ទ័យ​យ៉ាង​យក​ចិត្ត​ទុក​ដាក់​រៀប​រៀង​ជា​ពាក្យ​កម្រង​កែវឡើង​។

ស្នា​ដៃ​នេះ​ត្រូវ​បាន​ព្រះ​អង្គ​ចាត់​ទុក​ថា​ជា​ការដូ ឬ​របស់​បញ្ញើ​សម្រាប់​មិត្រ​សហាយ​របស់​ទ្រង់​ដែល​នៅ​ក្នុង​ប្រទេស​ថៃ​ ជំនួស​ឲ្យ​របស់​ផ្ញើ​​ពី​​កម្ពុជា​។ នេះ​ដូច​ក្នុង​ពាក្យ​ប្រារព្ធ​ដែល​ព្រះ​អង្គ​រៀប​រាប់​ឡើង​ជា​ពាក្យ​កាព្យ​នៅ​ក្នុង​សៀវភៅ «​និរាស​នគរ​វត្ត​» នេះ​។

«​និរាស​នគរ​វត្ត​» ជា​ប្រភេទ​សៀវភៅ​ដែល​មាន​លក្ខណៈ​ប្រវត្តិសាស្ត្រ និង​បូរាណ​វិទ្យា​ជា​ច្រើន​ភ្ជាប់​មក​ជាមួយ​គ្នា​។ ក្រៅ​ពី​នោះ​ក៏​នៅ​មាន​បញ្ចូល​ហេតុការណ៍​នានា​របស់​ប្រទេស​ថៃ និង​ប្រទេស​កម្ពុជា​យើង ដែល​ព្រះ​អង្គ​បាន​បំពេញ​ព្រះ​ទស្សនកិច្ច​ទាំង​នៅ​ក្នុង​ខេត្ត​សៀមរាប មាន​ដូច​ជា​ប្រាសាទ​បូរាណ​ខ្មែរ​ជា​ច្រើន ទាំង​នៅ​ក្នុង​ព្រះ​រាជ​ធានី​ភ្នំពេញ មាន​ដូច​ជា​ការ​ចូល​គាល់​ព្រះ​ករុណា ព្រះ​រាជានុកោដ្ឋ និង​ការ​រៀប​រាប់​អំពី​ព្រះ​បរម​រាជវាំង​ខ្មែរ និង​ព្រះ​ឧបោសថ​រតនារាម​ព្រះ​កែវ​មរកត​ ជា​ដើម​។ល។

ខាង​ក្រោម​នេះ​ជា​បទ​ដក​ស្រង់​មួយ​នៃ​ «​និរាស​នគរ​វត្ត​» ច្បាប់​ក្រុម​ពញា​តម្រុង​រាជានុភាព​ ដែល​ស្រែ​ខ្មុក​សូម​ធ្វើ​ការ​បក​ប្រែ​ក្រៅ​ផ្លូវ​ការ​ទុក​គ្រាន់​ជា​ការ​កម្សាន្ត​ដូច​ត​ទៅ​នេះ​៖

                                                 ๏ ធ្លាប់​ឮ​គេ​និយាយ​ត​គ្នា​
អ្នក​ដែល​ធ្លាប់​ទៅ​ស្រុក​ខ្មែរ​មក ថា​ប្រាសាទ​សិលា​គួរ​ទស្សនា​ណាស់
ធំ​ធេង​មហោឡារ​បូរាណ​សាង ថ្វី​ដៃ​ជាង​ខម​ជំនាញ​ការ​ចម្លាក់
ធ្វើ​ក្បាច់​ភ្ញី​ច្រើន​សំភី​​ជាក់ គេ​ចូល​ចិត្ត​បបួល​ឲ្យ​យើង​ទៅ​មើល
តែ​នៅ​ជាប់​រវល់​កិច្ចការ ហេតុ​នេះ​ត្រូវ​រង់​ចាំ​គ្រា​បាន​ធូរ​ណាត់​ខ្លះ
រហូត​មក​ដល់​ឆ្នាំ​ជូត ក៏​នឹង​មាន​ពេល​ទៅ​នគរ​វត្ត
ឯ​ធិតា​ក៏​ចង់​ទៅ​ដែរ ថា​នឹង​មិន​ឲ្យ​ទៅ​ក៏​មិន​បាន
កម្សាន្ត​ទី​ណា​ក៏​ទៅ​គ្រប់​ទី ក៏​ប្រណី​ព្រម​ឲ្យ​ទៅ​ជាមួយ
ទើប​ទូល​លា​នាំ​​វរ​លក្សណ៍​ទាំង​បី ផ្ដើម​និរាស​ក្រុង​ក្រៃ​ហៃ​សួគ៌
ពី​ខែ​វិច្ឆិកា​រហូត​ដល់​ខែ​ធ្នូ ទៅ​កម្សាន្ត​ក្រុង​កម្ពុជា
បារាំង​សែស​សែន​ល្អ​អារី ជួយ​ចាត់​ចែង​គ្រប់​បែប​យ៉ាង
ទៅ​ដល់​ទី​ណា​ក៏​សែន​សុខ​គ្រប់​វេលា ក៏​គួរ​ជា​ទី​អរគុណ​ក្រៃ
ទាំង​ព្រះ​ញាតិ​ក្រុង​កម្ពុជា ក៏​រាក់​ទាក់​ទទួល​មិន​កន្ដើយ
បាន​ប្រាស្រ័យ​សន្ទនា​យ៉ាង​ស្និទ្ធ ចិត្ត​ក៏​ស្រប​ដោយ​អំណរ​គុណ
កម្សាន្ត​សប្បាយ​តែ​នឹក​ដល់​មិត្រ ទាំង​ស្រី​ប្រុស​ដែល​នៅ​ក្រុង​ធំ
ធ្វើ​ឲ្យ​នឹក​ចង់​ផ្ញើ​របស់​ត្រូវ​ចិត្ត តែ​គិត​ទៅ​ក៏​លំបាក​ចិត្ត​មិន​ណយ
ថា​នឹង​ទិញ​របស់​អ្វី​ផ្ញើ​ទៅ ទុន​របស់​យើង​មិន​ល្មម​ត្រូវ​អល់អែក
ដោយ​មិត្រ​ៗ​គឺ​គិត​ទៅ​រាប់​រយ ថា​ចែក​ខ្លះ​ៗ​ក៏​មិន​គួរ
ហេតុ​នេះ​ក៏​មិន​គួរ ទើប​មក​តែង​និរាស​ល្អ​គាប់​ជាង
សាក​និទាន​រឿង​ទៅ​លេង​កម្ពុជា ឲ្យ​បណ្ដា​មិត្រ​គ្រប់​គ្នា​បាន​ស្ដាប់
ហើយ​និពន្ធ​ចែក​ជា​ទំនង​របស់​ផ្ញើ ឃើញ​ថា​សម​ប្រកប​នឹង​បំណង​ប្រាថ្នា
តែ​គិត​កំណាព្យ​ក៏​លើស​កម្លាំង នឹង​តែង​តាំង​រាប់​ឆ្នាំ​ច្បាស់​មិន​ហើយ
ថា​នឹង​តែង​កំណាព្យ​អាច​នឹង​ជួប​ឧបសគ្គ ហេតុ​នេះ​ជាក់​រៀប​រៀង​ជា​កម្រង​កែវ
មាន​កំណាព្យ​នាំ​មុខ​បន្តិច​ដើម្បី​លម្អ តាម​បូរាណ​ប្រាជ្ញ​បែ​ប​និរាស
បើ​មិន​ដូច​នេះ​ម្ដេច​នឹង​ហៅ​និរាស ដោយ​ហេតុ​មិន​មាន​កំណាព្យ​អក្សរ​សារ
ទើប​តែង​ទុក​គ្រាន់​ជា​ភស្តុតាង សូម​អញ្ជើញ​អាន​សាច់​រឿង​ទាំង​ស្រុង​អឺយ​៕៚

______________________________________________________________
អាន​ផង​ដែរ​៖
១. «វរ​វង្ស សូរ​វង្ស» អំណោយ​​ពី​អតីត​ព្រះ​ចៅ​ផែន​ដី​ខ្មែរ ថ្វាយ​អតីត​ព្រះ​ចៅ​ផែន​ដី​សៀម
២. ក្រុម​ពញា​តម្រុង​រាជានុភាព បុគ្គល​ដែល​មាន​ទំនាក់​ទំនង​ជិត​ស្និទ្ធ​និង​កម្ពុជា

%d bloggers like this: