jump to navigation

ព្រះ​អង្គ ​អេង ថ្ងៃ​ចន្ទ 9 ខែ​មីនា 2009

Posted by សុភ័ក្ត្រ in ប្រវត្តិសាស្ត្រ, អំពីស្រុកខ្មែរ, ภาษาไทย.
trackback

កកន៖ ប្រសិនបើលោកអ្នកមិនស្គាល់ថៃឲ្យបានជ្រៅទេ លោកអ្នកក៏ប្រហែលមិនបានដឹងថាថៃដឹងអ្វីពីយើង (ខ្មែរ) ចេះអ្វីពីយើង ស្គាល់អ្វីពីយើង ។ល។ នោះទេ។ ជនថៃមិនតិចទេ ដែលគេមានជំនាញពីខ្មែរ។ ស្គាល់ខ្មែរច្បាស់ជាងខ្មែរស្គាល់ខ្លួនឯងផងទៀត។ នៅពេលដែលជាតិខ្មែរបានចម្រុងរុងរឿង យើងសង្ឃឹមថានឹងមានអ្នកជំនាញជាជនជាតិខ្មែរយើង អំពីប្រទេសនានានៅលើពិភពលោក ដើម្បីបានជាប្រយោជន៍ដល់ខេមរប្រទេស។

ខ្ញុំបានឃើញថាជនជាតិថៃនេះបានសរសេរពីប្រវត្តិទាក់ទងនឹងខ្មែរយើងច្រើនគួរសមណាស់ ហើយជាធម្មតាទេ ដែលគេសរសេរទាញយកចំណុចវិជ្ជមានដាក់ខ្លួនគេជាដរាប នេះហើយជាចំណុចលើសទាក់ទងនឹងជាតិគេ សម្រាប់ជនជាតិគេ នេះហើយជាអ្វីដែលខ្មែរគួរពិចារណាឡើងវិញ។

ដូចយើងបានដឹងស្រាប់ហើយ ម្ដងនោះ ជាតិខ្មែរសឹងតែនឹងបាត់រូបរាងដោយសារសង្គ្រាមរវាងពួកយួន និងសៀម វ៉ៃដណ្ដើមគ្នាយកស្រុកខ្មែរ។ ទម្រាំតែខ្មែរដោះដៃចេញបានពីពួកទាំងពីរនេះ ប្រទេសយើងសឹងតែរលាយសាបសូន្យទាំងវប្បធម៌ ទាំងផែនដី។

ចុល្លតា ភ័ក្ដីភូមិន្ទ្រ (จุลลดา ภักดีภูมินทร์) គឺជាអ្នកជំនាញខាងប្រវត្តិសាស្ត្រថៃខ្មែរមួយរូបដែលបានសរសេរអត្ថបទជាច្រើនទាក់ទងនឹងខ្មែរសៀម សម័យដែលស្រុកយើងធ្លាក់ក្រោមការត្រួតត្រារបស់សៀម។ អត្ថបទជាច្រើនត្រូវបានគាត់សរសេរ និងយកទៅចុះក្នុងទស្សនាវដ្ដីនានា ដើម្បីឲ្យជាតិគេបានយល់ បានដឹង។ ឈ្លៀតពេលទំនេរ ខ្ញុំបានបកប្រែអត្ថបទមួយចំនួនមកជាភាសាខ្មែរ យកមកដាក់នៅទីនេះសម្រាប់ជាឯកសារ ឬអ្នកណាមានចំណាប់អារម្មណ៍អានក៏តាមសប្បាយ។

អត្ថបទដែលលោកបានសរសេរនោះមានចំណងជើងថា «นักองเอง» ប្រែជាខ្មែរថា អ្នកអង្គ អេង គឺជាព្រះមហាក្ស័ត្រិយ៍ខ្មែរយើងនេះឯង ក៏ប៉ុន្តែ ផ្ទៃអត្ថបទទាំងមូលនិយាយភាគច្រើនទាក់ទងនឹងព្រះអង្គ ដួង ទៅវិញ។ ដើម្បីកុំឲ្យខាតពេល សូមអញ្ជើញអានអត្ថបទប្រែ ដើម្បីទុកជាគតិដូចតទៅ៖

ព្រះអង្គ អេង
ដោយ៖ ចុល្លតា ភ័ក្ដីភូមិន្ទ្រ
ប្រែ៖ សុភ័ក្ត្រ

ច្បាប់ទី២៦០៥ ឆ្នាំទី៥០ ប្រចាំថ្ងៃអង្គារ ទី២១ ខែកញ្ញា ព.ស.២៥៤៧ (គ.ស.២០០៤)

ចាប់តាំងពីការបង្កើតក្រុងទេពរតនកោសិន្ទ្រ (១) “ព្រះករុណា” (ខ្មែរហៅព្រះមហាក្ស័ត្រិយ៍ខ្លួនថា “ព្រះករុណា” ប្រហាក់ប្រហែលនឹងជនជាតិថៃដែលហៅថា “នៃហ្លួង” ‘ในหลวง’) របស់ខ្មែរ បានមករស់នៅក្រុងរតនកោសិន្ទ្រ តាំងពីក្មេងៗរហូតស្ដេចផែនដីថៃបានលើកឲ្យសោយរាជ្យ ជា “ព្រះករុណា” នោះ មាន៣ព្រះអង្គ គឺ៖

  1. អ្នកអង្គ អេង (ថៃហៅ ព្រះអង្គ អេង) នៅក្នុងរជ្ជកាលព្រះបាទសម្ដេចព្រះពុទ្ធយ៉តហ្វាចុឡាលោក មហារាជ នៅក្រុងទេពមហានគរ តាំងពីព្រះជន្ម៩វស្សា និងសោយរាជ្យក្នុងព្រះជន្ម២១វស្សា
  2. អ្នកអង្គ ដួង (ព្រះអង្គ ដួង) ឱរសអ្នកអង្គ អេង នៅក្នុងផែនដីរជ្ជកាលទី៣ នៅក្នុងទេពមហានគរ តាំងពីព្រះជន្ម១៦វស្សា ត្រឡប់ទៅខ្មែរវិញជាមួយពញាបតិន្ទ្រតេជោ (សិង្ហ) នៅពេលមានព្រះជន្ម៤៣ ទម្រាំបង្ក្រាបយួនបាន និងឡើងសោយរាជ្យនៅព្រះជន្ម៥១វស្សា។
  3. អ្នកអង្គ រាជាវតី (២) ឱរសអ្នកអង្គ ដួង នៅក្នុងផែនដីព្រះបាទសម្ដេចព្រះចមក្លៅ រជ្ជកាលទី៤។ ប្រសូតនៅក្នុងទេពមហានគរ ក្នុងផែនដីព្រះបាទសម្ដេចព្រះន័ងក្លៅ។ រហូតដល់ព្រះជន្ម២០វស្សា ព្រះបាទសម្ដេចព្រះចមក្លៅ ព្រះរាជទានព្រះផ្នួសរួចហើយ ព្រះអង្គត្រឡប់ទៅខ្មែរវិញធ្វើជាព្រះមហាឧបរាជនៅក្នុងផែនដីព្រះបិតា គឺអ្នកអង្គ ដួង

ក្រោយមកបានបន្តរាជពីព្រះបិតា នៅពេលព្រះជន្ម២៣វស្សា។

ព្រះអង្គ ដួង ទ្រង់រស់នៅប្រទេសថៃយូររហូតដល់២៩ឆ្នាំ រហូតដល់ជនជាតិថៃនៅក្រុងទេពមហានគរសម័យនោះ គិតថាទ្រង់ជាស្ដេចថៃទៅហើយ និងនាំគ្នាហៅព្រះអង្គ ដួង យ៉ាងស្និទ្ធស្នំ ដូចហៅស្ដេចថៃយ៉ាងនោះដែរ និងមានសាវឡឹកជាជនថៃ ធិតាខុនណាង និងអ្នកអង្គម្ចាស់ និងអង្គម្ចាស់ជាច្រើនផងដែរ។

ដោយសារតែព្រះករុណាខ្មែរ មួយព្រះអង្គៗមករស់នៅក្នុងក្រុងទេពមហានគរមានរយៈពេលយូរៗ នៅពេលត្រឡប់ទៅគ្រងរាជ្យវិញ ពិធីការផ្សេងៗនៅក្នុងរាជសំណាក់មានតែងតែឆ្លងទំនៀមបែបផែនដូចរាជសំណាក់ថៃដែរ ជាពិសេសព្រះអង្គរាជាវតី ឱរសព្រះអង្គ ដួង ដែលទ្រង់ចេះស្ទាត់ភាសាថៃជាងភាសាខ្មែររបស់ទ្រង់ទៅទៀត ដោយសារទ្រង់ប្រសូតនៅក្នុងក្រុងទេពមហានគរ ក្នុងរជ្ជសម័យទី៣ ព្រះបាទសម្ដេចព្រះចមក្លៅ ទ្រង់ឧបត្ថម្ភថែរក្សារហូតមក រហូតដល់អាយុគ្រប់បួស។

ព្រះអង្គរាជាវតីនេះ នៅពេលព្រះអង្គឡើងគ្រងរាជ្យជួនពេលល្មមដែលបារាំងបានមកកាន់កាប់យួន ទើបគ្របឥទ្ធិពលចូលមកដល់ខ្មែរ និងដោយសារបារាំងគិតថា ខ្មែរក្លាយជារបស់យួន និងរបស់ថៃផង ព្រោះបានបញ្ជូនសួយសាអាករទៅឲ្យទាំងយួន និងថៃ ដូចនេះបារាំងគិតថា នៅពេលដែលយួនបានក្លាយជារបស់បារាំងហើយ ខ្មែរក៏ត្រូវក្លាយជារបស់បារាំងដែរ។

ហេតុដូចនេះហើយ នៅក្នុងពិធីរាជាភិសេកព្រះអង្គរាជាវតីនោះ ទាំងបារាំង និងថៃ ទើបតែងតាំងខ្ញុំរាជការឲ្យទៅចូលរួមពិធីរាជាភិសេកព្រមគ្នា។

នៅខណៈគ្រងរាជ្យនោះ ក៏ត្រូវបារាំងបង្ខិតបង្ខំរហូតមក និងរហូតដល់បង្គាប់ឲ្យចុះព្រះនាម លើសិទ្ធិសញ្ញាប្រគល់អំណាចឲ្យបារាំងគ្រប់គ្រង។

រឿងនេះព្រះអង្គរាជាវតី ឬ សម្ដេចព្រះនរោត្ដមព្រហ្មបរិរក្ស (តាទួតរបស់នរោត្ដម សីហនុ) ទ្រង់បានចេញចុតហ្មាយសម្ងាត់មួយថ្វាយព្រះបាទសម្ដេចព្រះចមក្លៅថា ទ្រង់នៅស្វាមីភ័ក្ដិ និងមិនមានគំនិតចាកចេញពីថៃទេ ដោយសារតែរាជការសៃហ្កនបាននាំទូកប្រយុទ្ធ និងកាំភ្លើងធំមកដាក់ពីមុខក្រុងភ្នំពេញ ហើយបង្ខំឲ្យចុះហត្ថលេខា។

នៅមានមិត្រអ្នកអានសង្ស័យពីរឿងសឹកយួន ដែលចៅពញាបតិន្ទ្រតេជោ ចេញទៅធ្វើសង្គ្រាមយូររហូតដល់ទៅ១៥ឆ្នាំ។ (អានត)

________________________________________________________
កកន.
(១) ក្រុងទេពរតនកោសិន្ទ្រ នេះសំដៅលើក្រុងបាងកកនេះឯង ថៃគេហៅថាក្រុងទេពមហានគរ
(២) អ្នកអង្គ រាជាវតី គឺព្រះនាមដើមរបស់ព្រះបាទ នរោត្ដម

Advertisements

មតិ»

1. engsamnang - ថ្ងៃ​ចន្ទ 9 ខែ​មីនា 2009

ខ្ងុំធ្លាប់ដឹងដែរត្រង់ថាបន្ទាប់ពីព្រះអង្គដួងឡើងគ្របរាជអី្វជាច្រើនក្នុងវំាងខែ្មរ​រៀបរបៀបរបបដូចថៃ(តាមសៀវភៅជនជាតិខែ្មរភាគ2ដោយអង្គការស៊ីប៉ា)​ហើយ​​ចាស់ចាស់ធ្លាប់ប្រាប់ខ្ងុំថាកំពូលវត្តស្រួចនៅខែ្មរយើងគឺព្រះអង្គដួងយក​ មកពីថៃ។អរគុណណាស់ដែលបងបានជួយប្រាប់បន្ចែម។

2. សុភា - ថ្ងៃ​ចន្ទ 9 ខែ​មីនា 2009

ខ្ញុំ​ដូច​មានអារម្មណ៏មេចមិនដឹង​អត្ថបទណឹង ជាការពិត​ឫអីដែល​ថៃគេសរសេរចឹង? ខ្ញុំ​មិនដែល​ដឹង​ប្រ​វត្តិសាស្ត្រអីសោះ តែ​នេះ​ហាក់ដូចថា ខ្មែរ​យើង​ចំ​លង វប្បធម៌ពីថៃទៅវិញ ក្នុង​រចកាល​ព្រះ​អង្គដូងនោះ។ បើ​អោយ​តែ​យ៉ាង​ណឹង ប្រកដជា​ខ្មែរ​កើត​មក​ពី​ថៃ​មិន​ខាន។ ហើយធ្វើ​មេច​ទេ បើ​ខ្មែរ​យើង​ គ្មានឯកសារ​ លាយលក្ខអក្សរ មកអះអាង​ចឹង។ បើ​ខ្មែរ​នៅ​តែ​គ្មាន​អ្នក​សរសេរ អះអាង​ប្រវត្តិសាស្ត្រ​ចឹង​ទៀត ប្រាកដ​ជា​បាត់​រូប​ដោយ​មិន​បាច់ប្រឹង​ទេ 😦 ។

3. Chivan - ថ្ងៃ​ចន្ទ 9 ខែ​មីនា 2009

សៀមយល់ច្រឡំហើយ។ស្តេចខ្មែរមិនចង់ធ្វើសង្រ្គាមជាមួយស្តេចសៀមព្រោះ
ស្ដេចខ្មែរហេយហត់នីងការចរចារជាមួយស្ដេចសៀមដែលមិនដែលគោរោព
ពាក្សសច្ចះម្តងណាទេ។ដួច្នេះស្តេចខ្មែរត្រួវការអ្នកទី៣ចរចារជំនួសដួចដែល
ស្ដេចខ្មែរយកបារាំងជាអ្នកការពារស្រុកខ្មែរ។
ស្រុកខ្មែរមានឯកសារយ៉ាងច្រើននៅសល់មិនទាន់បាត់បង់នៅឡើយ។
ថ្មីៗនេះមានឯកសារមហាបុរសចំនួន១២ភាគនិយាយការពិតរឿងប្រវត្តិសាសន៍
ខ្មែរទាក់ទងនីងសៀម។
តាមការពិតខ្មែរនីងសៀមជាបងប្អួននិងគ្នាដោលយោលទៅតាមមាតានីងជីតា
ខ្មែររបស់ស្ដេចរាមកំហែង។កួនរបស់សេ្ដចខ្មែរពញាយ៉ាតក៍មានមាតាជាសៀម
ដែរ។ស្តេចធម៍រាជាជាកួនខ្មែរសៀមបានប្រគល់ទីកដីខ្មែរឪយសៀមកាន់កាប់
ប៉ុន្តែស្ដេចចន្ទរាជាជាកូនខ្មែរពិតមិនយល់ព្រមបានទៅរំដោះយកដីខ្មែរពីសៀម
មកវិញ។ពូកភួមាបានកំទេចសៀម២លើកបើអត់មានខ្មែរទៅជួយរំដោះសៀមៗ
ប្រាកដជាបាត់ស្រមោលពីផែនទីបាត់ទៅហើយ។
ដួចជាសៀមចាញ់សង្រ្គាមជាមួយអង់គ្លេសបើអាមេរិកកាំងមិនជួយសៀមៗ
ក្លាយទៅជារបស់អង់គ្លេសបាត់ទៅហើយ។
ខ្មែរសៀមយួនទាំងអស់គ្នាចាញ់សង្រ្គាមនីងពូកបារាំងអង់គ្លេស។ខ្មែនីងយួន
សារភាពមានតែសៀមទេមិនដែលសារភាពថាចាញ់នោះ។

4. ព្រះ​អង្គ​ អេង (ចប់) « -:- កំណត់ហេតុ​សុភ័ក្ត្រ -:- - ថ្ងៃ​អង្គារ 10 ខែ​មីនា 2009

[…] by សុភ័ក្ត្រ in ពីនេះពីនោះ. trackback …… (ត​ពី​លេខ​មុន) […]

5. អង្គ ដួង « ? នរណា​ខ្លះ​នៅ​កម្ពុជា ? - ថ្ងៃ​ព្រហស្បតិ៍ 12 ខែ​មីនា 2009

[…] ភាគ​១ […]

6. សាវតារ​ត្រកូល «អភ័យវង្ស» « -:- កំណត់ហេតុ​សុភ័ក្ត្រ -:- - ថ្ងៃ​អាទិត្យ 6 ខែ​កញ្ញា 2009

[…] អ្នក​អង្គ​ អេង ព្រះ​រាជ​បុត្រា​​ខ្មែរ […]

7. ពូជ​ក្បត់ជាតិ ? | តាម៉ាប់ & យាយ​ម៉ាប់ - ថ្ងៃ​ព្រហស្បតិ៍ 23 ខែ​សីហា 2012

[…] = រដ្ឋមន្ត្រី​ក្រសួង​យុត្តិធម៌ (២) ស្តេច​​អង្គ​អេង (ភាគ ១) និង ស្ដេច​អង្គ​អេង (ភាគ ២) (៣) […]

8. អត្ថបទ​ប្រែ​៖ នៅ​ពី​ក្រោយ​ ព្រះ​រាជ​តម្រាស់ រាមា​ទី​៤ រឿង​ការ​បាត់​បង់​ប្រទេស​ខ្មែរ “ខ្ញ - ថ្ងៃ​អង្គារ 21 ខែ​កុម្ភៈ 2017

[…] _____________________________________________________ អានផងដែរ៖ ១. เบื้องหลัง พระราชดำรัส ร.๔ เรื่องเสียเมืองเขมร “เราขอบอกท่านด้วยความเจ็บปวดยิ่ง” ២. រឿងរ៉ាវបាត់ដំបងក្នុងទស្សនៈសៀម ៣. សាវតារត្រកូល «អភ័យវង្ស» ៤. ប្រវត្តិសាស្ត្រដ៏សែនចុកចាប់៖ ព្រះរាជក្រឹត្យចាត់តាំងក្រុងព្រះដំបង ខេត្តព្រះដំបង គ.ស.១៩៤២ ៥. ព្រះអង្គ អេង ៦. ស្រមោលទំនាក់ទំនងថៃ-ខ្មែរ […]


ឆ្លើយ​តប

Fill in your details below or click an icon to log in:

ឡូហ្កូ WordPress.com

អ្នក​កំពុង​បញ្ចេញ​មតិ​ដោយ​ប្រើ​គណនី WordPress.com របស់​អ្នក​។ Log Out / ផ្លាស់ប្ដូរ )

រូប Twitter

អ្នក​កំពុង​បញ្ចេញ​មតិ​ដោយ​ប្រើ​គណនី Twitter របស់​អ្នក​។ Log Out / ផ្លាស់ប្ដូរ )

រូបថត Facebook

អ្នក​កំពុង​បញ្ចេញ​មតិ​ដោយ​ប្រើ​គណនី Facebook របស់​អ្នក​។ Log Out / ផ្លាស់ប្ដូរ )

Google+ photo

អ្នក​កំពុង​បញ្ចេញ​មតិ​ដោយ​ប្រើ​គណនី Google+ របស់​អ្នក​។ Log Out / ផ្លាស់ប្ដូរ )

កំពុង​ភ្ជាប់​ទៅ​កាន់ %s

%d bloggers like this: