ស្ដេចយាងបើកការដ្ឋានផ្លូវរថភ្លើងភ្នំពេញ-បាត់ដំបង ថ្ងៃសុក្រ 27 ខែធ្នូ 2019
Posted by សុភ័ក្ត្រ in បុគ្គលសំខាន់, ប្រវត្តិសាស្ត្រ.add a comment
នេះកាលស្ដេចយាងបើកការដ្ឋានផ្លូវរថភ្លើងភ្នំពេញ-បាត់ដំបង។ ព្រះករុណា ព្រះបាទសម្ដេចព្រះសិរីសុវត្ថិ មុនីវង្ស ចមចក្រពង្ស ស្ដេចយាងជីកដីដំបូងជានិមិត្តរូបដើម្បីស្ថាបនាផ្លូវរថភ្លើងទី១របស់នគរកម្ពុជា ពីព្រះរាជធានីភ្នំពេញទៅកាន់ខេត្តបាត់ដំបង។
ព្រះបាទសម្ដេចព្រះសិរីសុវត្ថិ មុនីវង្ស ចមចក្រពង្ស ស្ដេចយាងបើកការដ្ឋានផ្លូវរថភ្លើងភ្នំពេញ-បាត់ដំបង
គម្រោងសាងសង់ផ្លូវដែកនៅក្នុងនគរកម្ពុជានេះ ធ្វើឡើងកាលគ្រានគរយើងស្ថិតនៅក្រោមការអភិបាលពីរាជការបារាំង និងត្រូវបានសិក្សាពីលទ្ធភាពនៃការសាងសង់នេះ តាំងតែពីឆ្នាំបារាំង១៩២១ រហូតមកដល់ថ្ងៃទី៤ ខែកក្កដា ឆ្នាំ១៩២៩ ទើបពិធីបើកការដ្ឋានសាងសង់ចាប់ផ្ដើម។
ក្រៅអំពីព្រះមហាក្សត្រិយ៍ខ្មែរស្ដេចយាងជាព្រះរាជាធិបតីក្នុងពិធីជាប្រវត្តិសាស្ត្រនោះ យើងនៅឃើញមានលោកអគ្គទេសាភិបាលឥណ្ឌូចិន Pierre Marie Antoine Pasquier, លោក Fontaine ជាវិស្វករគ្រប់គ្រងគម្រោង ព្រមទាំងមន្ត្រីជាន់ខ្ពស់ទាំងខ្មែរ និងបារាំងជាច្រើនទៀតបានយាង និងអញ្ជើញចូលរួម។ តាមគម្រោងនាពេលនេះ ខ្សែរថភ្លើងនេះ នឹងចំណាយពេលស្ថាបនារយៈពេល៤ឆ្នាំ៕
ដកស្រង់ចេញពីអត្ថបទដើមជាភាសាបារាំងសែស ចុចទីនេះ
