jump to navigation

Repost: ឬ​ថា​កង់​ប្រវត្តិ​សាស្ត្រ​នៃ​ទំនាក់​ទំនង​កម្ពុជា​អាមេរិក​វិល​មក​ដល់​កន្លែង​ដើម ថ្ងៃចន្ទ 18 ខែ​កុម្ភៈ 2019

Posted by សុភ័ក្ត្រ in នយោបាយ, បរិយាយ​ថ្ងៃ​នេះ, ប្រវត្តិសាស្ត្រ, អំពីស្រុកខ្មែរ.
add a comment

កកន ៖ អត្ថបទ​ខាង​ក្រោម​នេះ ជា​អត្ថបទ​ចាស់ ដែល​ត្រូវ​បាន​ដាក់​កាល​ពី​ថ្ងៃ​សុក្រ ទី​១៥ ខែ​កញ្ញា ឆ្នាំ​២០១៧​។ មូល​ហេតុ​ដែល​ស្រែ​ខ្មុក​ដាក់​ប្រកាស​នេះ​ជា​ថ្មី​​ម្ដង​ទៀត ដោយ​សារ​ហេតុ​ប៉ុន្មាន​ថ្ងៃ​កន្លង​មក​នេះ ស្ថានការណ៍​នៃ​ទំនាក់​ទំនង​រវាង​ខ្មែរ និង​អាមេរិក​នេះ ហាក់​បី​ដូច​ជា​លោតឡើង​មក​វិញ បន្ទាប់​ពី​ប្រកាស​មួយ​ក្នុង​ហ្វេសបុគ​ផ្លូវ​ការ​របស់​ស្ថាន​ទូត​អាមេរិក​ប្រចាំ​កម្ពុជា និង​ប្រតិកម្ម​មក​វិញ​នៃ​ក្រសួង​ការ​បរទេស នៃ​កម្ពុជា​….

ពេញ​មួយ​ដើម​ខែ​កញ្ញា​ (​២០១៧​) នេះ​ ទំនាក់​ទំនង​ការ​ទូត​រវាង​សហ​រដ្ឋ​អាមេរិក និង​ព្រះ​រាជាណាចក្រ​កម្ពុជា ហាក់​មិន​បាន​ធូរ​ស្រាល​ឡើយ ផ្ទុយ​ទៅ​វិញ​ កម្ដៅ​ហាក់​មាន​ការ​តាន​តឹង​ឡើង​មួយ​កម្រិត​ម្ដង​ៗ​គួរ​​ជា​ទី​ព្រួយ​បារម្ភ​។ ឬ​ថា​កង់​ប្រវត្តិ​សាស្ត្រ​នៃ​ទំនាក់​ទំនង​ខ្មែរ និង​អាមេរិក វិល​មក​ដល់​ទី​ដើម ឬ​ថា​ទំនាក់​ទំនង​នេះ​នឹង​ដល់​ទី​បញ្ចប់​។

បើ​ទោះ​បី​ជា​ពី​មុន​មក​ទំនាក់​ទំនង​កម្ពុជា​អាមេរិក​មិន​មាន​ភាព​តាន​តឹង​ដូច​ពេល​នេះ​ក្ដី ក៏​ប៉ុន្តែ​ទំនាក់​ទំនង​នៃ​ប្រទេស​ទាំង​ពីរ​នេះ​ក៏​មិន​មាន​ភាព​រលូន​ដូច​បណ្ដា​ទំនាក់​ទំនង​ជាមួយ​ប្រទេស​ដទៃ​ទៀត (​មួយ​ចំនួន​) ឡើយ​។ បញ្ហា​ចេះ​តែ​មាន​ឥត​ហូរ​ហែ​ ជា​ពិសេស​ការ​ដែល​កម្ពុជា​ជំពាក់​ប្រាក់​អាមេរិក​នា​សម័យ​សង្គ្រាម ដែល​កម្ពុជា [ត្រូវ​តែ​សង] អាមេរិក​។ ពិត​មែន​ហើយ អាមេរិក​មិន​មែន​ចេះ​តែ​យល់​ស្រប​អ្វី​លំ​ៗ​យក​តែ​ល្អ​មើល​នោះ​ទេ​។ បើ​ទោះ​បី​ជា​មាន​អ្នក​ខ្លះ ឬ​ប្រទេស​ខ្លះ​មិន​ចូល​ចិត្ដ​ក្ដី ក៏​ប៉ុន្តែ​មនុស្ស ឬ​ប្រទេស​ទាំង​នោះ មិន​អាច​ជៀស​ឆ្ងាយ​ពី​អាមេរិក​បាន​ទេ​។ នេះ​ជា​តថ​ភាព​ដែល​ត្រូវ​ទទួល​ស្គាល់​ ហើយ​ថា​ល្បែង «​មាន​អញ​អត់​អ្ហែង​» ពិត​ជា​មិន​ងាយ​លេង​នោះ​ទេ ជាមួយ​អាមេរិក​​។

បន្ទាប់​ពី​បញ្ហា​នយោបាយ​ដ៏​តាន​តឹង​កើត​មាន​ឡើង​នៅ​ស្រុក​ខ្មែរ​យ៉ាង​ប្រកៀក​ប្រកិត​គ្នា​ដូច​គ្រាប់​ពោត​នា​ដើម​ខែ​កញ្ញា ឆ្នាំ​២០១៧ នេះ​មក​ ជា​ពិសេស​ការ​ចោទ​ប្រកាន់​ពី​ទំនាក់​ទំនង អ្វី​ដែល​គេ​ហៅ​ថា «​បដិវត្តន៍​ពណ៌​» ទៅ​នឹង​សហ​រដ្ឋ​អាមេរិក​នោះ អាមេរិក​បាន​សម្ដែង​ការ​ព្រួយ​បារម្ភ​ពី​វោហារ​សព្ទ​​ [យ៉ាង​គួរ​ឲ្យ​ខ្លាច] ពី​សំណាក់​អ្នក​ដឹក​នាំ​ខ្មែរ ហើយ​ក៏​បាន​ធ្វើ​សេចក្ដី​ថ្លែង​ការណ៍​យ៉ាង​វែង​អន្លាយ​មួយ​តាម​រយៈ​ឯក​អគ្គ​រដ្ឋ​ទូត​របស់​ខ្លួន​នៅ​កម្ពុជា ស្ដី​អំពី​បរិយាកាស​នយោបាយ​នៅ​កម្ពុជា កាល​ពី​ថ្ងៃ​អង្គារ (​១២ កញ្ញា ២០១៧​) កន្លង​មក​នេះ​។

ភ្លាម​រំពេច នា​ថ្ងៃ​នេះ លោក​នាយក​រដ្ឋ​មន្ត្រី​កម្ពុជា បាន​បញ្ចេញ​ចំណាត់​ការ​យ៉ាង​ច្រើន ដែល​ត្រូវ​បាន​គេ​មើល​ឃើញ​ថា រឹត​តែ​ធ្វើ​ឲ្យ​ទំនាក់​ទំនង​កម្ពុជា អាមេរិក រឹត​តែ​តាន​តឹង​ឡើង​ដល់​កម្រិត​អតិ​បរមា​។ ការ​ប្រកាស​ផ្អាក​កិច្ច​សហ​ប្រតិបត្តិការ​រុក​រក​ឆ្អឹង​ទាហាន​អាមេរិក ដែល​បាត់​បង់​ជីវិត​នៅ​ក្នុង​សង្គ្រាម​នៅ​កម្ពុជា កាល​ពី​ទសវត្សរ៍​ឆ្នាំ​៧០​, ការ​ប្រកាស​ឲ្យ​ដក​​ភ្នាក់​ងារ​ភីស​ខ័រ (United States Peace Corps Cambodia) សហ​រដ្ឋ​អាមេរិក​នៅ​កម្ពុជា, ការ​ប្រកាស​ឲ្យ​ប្រជា​ជន (​ខ្មែរ​) ក្រោក​​ឈរ​ឡើង​ប្រកាន់​គោល​​នយោបាយ​ជាតិ​និយម​ប្រឆាំង​ការ​ជ្រៀត​ជ្រែក​ពី​បរទេស (​អាមេរិក​)​…​។ល។ សុទ្ធ​សឹង​ត្រូវ​បាន​គេ​មើល​ឃើញ​ថា​ជា​ការ​វិវត្ត​ថយ​ក្រោយ​នៃ​ទំនាក់​ទំនង​ការ​ទូត​រវាង​កម្ពុជា និង​សហ​រដ្ឋ​អាមេរិក​ ឬ​អាច​ថា​ជា​ចំណុច​ចាប់​ផ្ដើម​ឈាន​ទៅ​រក​អវសាន​នៃ​ទំនាក់​ទំនង​ការ​ទូត​រវាង​សហ​រដ្ឋ​អាមេរិក និង​កម្ពុជា​។

អ្វី​ៗ​សុទ្ធ​តែ​អាច​កើត​ឡើង​បាន​ទាំង​អស់​។ កម្ពុជា​ កាល​ពី​អតីត​ធ្លាប់​បាន​ផ្ដាច់​ទំនាក់​ទំនង​ការ​ទូត​ជាមួយ​សហ​រដ្ឋ​អាមេរិក​ម្ដង​រួច​មក​ហើយ​។ ហើយ​បើ​ពិនិត្យ​មើល​ស្ថាន​ភាព​បច្ចុប្បន្ន​នេះ​វា​គ្មាន​អ្វី​អះ​អាង​ថា​នឹង​មិន​អាច​កើត​ឡើង​ជា​លើក​ទី​២​នោះ​ទេ​​។ ទោះ​បី​ជា​យ៉ាង​នេះ​ក្ដី ទេសៈ​កាលៈ​រវាង​ឆ្នាំ​២០១៧ និង​ទសវត្សរ៍​៦០ ទំនង​ជា​មិន​ដូច​គ្នា​ទេ ជា​ពិសេស​បរិយាកាស​​ប្រទេស​នៅ​ក្នុង​តំបន់​។ ហេតុ​ដូច​នេះ​កម្ពុជា​គួរ​ដើរ​យ៉ាង​ប្រុង​ប្រយ័ត្ន ជា​ពិសេស​ភាព​ប្រថុយ​ប្រថាន​ក្នុង​ការ​ធ្វើ​ឲ្យ​សភាព​ការណ៍​នៃ​ទំនាក់​ទំនង​ការ​ទូត​មាន​ភាព​តាន​តឹង​ជាង​នេះ ឬ​ឈាន​ទៅ​រក​ការ​ផ្ដាច់​ទំនាក់​ទំនង​​ការ​ទូត​រវាង​ប្រទេស​ទាំង​ពីរ​​នោះ​៕

__________________________________________________________
អាន​ផង​ដែរ​៖
១. ស្ថាន​ទូត​អាមេរិក ប្រចាំ​កម្ពុជា ចេញ​សេចក្ដី​ថ្លែង​ការណ៍​ស្ដី​អំពី​បច្ចុប្បន្ន​ភាព​បរិយាកាស​នយោបាយ​នៅ​កម្ពុជា
២. ឯកសារ​ប្រវត្តិសាស្ត្រ​៖ Visa Restrictions on Individuals Responsible for Undermining Cambodian Democracy
៣. ឯកសារ​ប្រវត្តិសាស្ត្រ​៖ សេចក្ដី​ប្រកាស​របស់​អ្នក​នាំ​ពាក្យ​នៃ​ក្រសួង​ការ​បរទេស និង​សហ​ប្រតិបត្តិការ​អន្តរជាតិ នៃ​ព្រះ​រាជាណាចក្រ​កម្ពុជា
៤. ឯកសារ​ប្រវត្តិសាស្ត្រ​៖ សេចក្តីប្រកាស​របស់​រដ្ឋ​មន្រ្តីទទួល​បន្ទុក​ផ្នែក​សារ​ព័ត៌មាន ស្តី​អំពី​ការ​កាត់​បន្ថយជំនួយ​ដល់​រដ្ឋាភិបាល​កម្ពុជា

Advertisements

របត់​ប្រវត្តិ​សាស្ត្រ​នគរ​ថៃ ថ្ងៃសុក្រ 8 ខែ​កុម្ភៈ 2019

Posted by សុភ័ក្ត្រ in បរិយាយ​ថ្ងៃ​នេះ, ภาษาไทย.
1 comment so far

ថ្ងៃ​នេះ (​៨ កុម្ភៈ ២០១៩​) នយោបាយ​ប្រទេស​ថៃ​បាន​ឈាន​មក​ដល់​របត់​មួយ ដែល​មិន​ត្រឹម​តែ​ធ្វើ​ឲ្យ​ភ្ញាក់​ផ្អើល​​នៅ​ក្នុង​ប្រទេស​នេះ​ប៉ុណ្ណោះ​ទេ តែ​បាន​ថែម​ទាំង​​រង្គោះ​រង្គើ​ស្ទើរ​មួយ​ចំហៀង​ផែន​ដី​ទៅ​ទៀត​។ ពេញ​មួយ​ថ្ងៃ​ចាប់​ពី​វេលា​ព្រឹក​មក​ម្ល៉េះ បណ្ដា​អ្នក​សារព័ត៌មាន​ថៃ និង​សារព័ត៌មាន​អន្តរជាតិ​ល្បី​ៗ​ក្នុង​សាកល​លោក​បាន​តាម​ដាន ផ្ដិត​យក​ព័ត៌មាន​ពិសេស​មួយ​នោះ​គឺ​ការ «​ចូល​លេង​​នយោបាយ​» របស់​សែ​រាជ​វង្ស​ថៃ ដែល​មិន​ធ្លាប់​មាន​ព្រឹត្តិការណ៍​បែប​នេះ​សោះ​ឡើយ​នៅ​ក្នង​ប្រទេស​នេះ ចាប់​តាំង​ពី​​ការ​ផ្លាស់​ប្ដូរ​របប​នយោបាយ​រាជានិយម​ផ្ដាច់​ការ នា​ឆ្នាំ​១៩៣៦​មក​។

ព្រះ​​អង្គ​ម្ចាស់​ក្សត្រីយ៍​ឧបលរ័តន​រាជ​កញ្ញា សិរិវឌ្ឍនា​ពណ្ណវតី (​ថ. อุบลรัตนราชกัญญา สิริวัฒนาพรรณวดี) ដែល​ជា​បុត្រី​ច្បង​នៃ​​ព្រះបាទ សម្ដេចព្រះបរមិន្ទ្រមហាភូមិពល អតុល្យតេជ (រាមា​ទី​៩​) និង​ជា​ព្រះ​រៀម​នៃ សម្ដេចព្រះចៅយូហួមហាវជិរាលង្ករណ បតិន្ទ្រទេព្យវរាង្កូរ (​រាមា​ទី​១០​) ដែល​ជា​ព្រះ​មហា​ក្សត្រិយ៍​ថ្មី​នៃ​ប្រទេស​ថៃ​នោះ ព្រះ​អង្គ​បាន​សម្រេច​ព្រះ​ទ័យ​យល់​ព្រម​ឲ្យ​គណៈ​បក្សថៃ​រក្សា​ជាតិ (​ថ. ไทยรักษาชาติ) ដែល​គេ​ជឿ​ថា​ស្និទ្ធ​និង​​អតីត​លោក​នាយក​​រដ្ឋ​មន្ត្រី ទក្សិណ ជិនវ័ត្រ​​​​ ដាក់​ព្រះ​នាម​ព្រះ​អង្គ​ជា​បេក្ខជន​នាយក​រដ្ឋមន្ត្រី​របស់​គណៈ​បក្ស​នេះ​សម្រាប់​ការ​បោះ​ឆ្នោត​ជា​សាកល​លើក​ទី​១​បន្ទាប់​ពី​រដ្ឋ​ប្រហារ ដែល​គេ​រំពឹង​ថា​នឹង​មាន​នៅ​ថ្ងៃ​ទី​២៤ ខែ​មីនា ឆ្នាំ​២០១៩ ខាង​មុខ​នេះ​។

1625488718ព្រះ​​អង្គ​ម្ចាស់​ក្សត្រីយ៍​ឧបលរ័តន​រាជ​កញ្ញា សិរិវឌ្ឍនា​ពណ្ណវតី
1625488718
ប្រធាន​គណៈ​បក្ស​ថៃ​រក្សា​ជាតិ​កំពុង​បង្ហាញ​បណ្ណ​យល់​ព្រម​ធ្វើ​ជា​បេក្ខជន​នាយក​រដ្ឋមន្ត្រី​របស់​បក្ស​នេះ នៃ​ព្រះ​អង្គ​ម្ចាស់​ក្សត្រីយ៍ ដោយ​មាន​រូប​របស់​ព្រះ​អង្គ​ផង​ នៅ​ឯ​ទី​ស្នាក់​ការ​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត​របស់​ថៃ កាល​ពី​ព្រឹក​មិញ​នេះ (​៨ កុម្ភៈ ២០១៩​)

ការ​សម្រេច​ព្រះ​ទ័យ​ឈាន​ចូល​ក្នុង​ឆាក​នយោបាយ​របស់​ព្រះ​​អង្គ​ម្ចាស់​ក្សត្រីយ៍​ឧបលរ័តន​រាជ​កញ្ញា សិរិវឌ្ឍនា​ពណ្ណវតី នា​ពេល​នេះ​ប្រាកដ​ណាស់​ក្រៅ​ពី​បាន​ទាញ​ចំណាប់​អារម្មណ៍​ពី​ប្រជាជន​ថៃ និង​ប្រជាជន​ពិភព​លោក​នោះ មតិ​ជា​ច្រើន​ក៏​កើត​ឡើង​ព្រោង​ព្រាត​ទាំង​ក្នុង​ន័យ​វិជ្ជមាន និង​អវិជ្ជមាន​។ ហើយ​អ្វី​ដែល​ជា​ការ​ពិត​ឥត​ប្រកែក​បាន​នោះ គឺ​​បើ​ទោះ​បី​ជា​គណៈ​រដ្ឋ​ប្រហារ ដែល​ដឹក​នាំ​ប្រទេស​នេះ​​ដោយ​ ឧត្ដម​សេនីយ ប្រយុទ្ធ ចន្ទ្រអូជា តាំង​ពី​រដ្ឋ​ប្រហារ​នោះ​មក មិន​បាន​ធ្វើ​ឲ្យ​ប្រជាជាតិ​មួយ​នេះ​រួម​សាមគ្គី​គ្នា​ដូច​តាម​ក្ដី​រំពឹង​ទេ តែ​ផ្ទុយ​មក​វិញ​បាន​ត្រឹម​ធ្វើ់​ឲ្យ​ប្រជាជាតិ​មួយ​នេះ​កាន់​តែ​ផុយ​ស្រួយ​ទៅ​ៗ ក្នុង​ភាព​គ្រោះ​ថ្នាក់​ទៅ​វិញ​។

ព្រឹត្តិការណ៍​ជា​ប្រវត្តិ​សាស្ត្រ​នា​ព្រឹក​នេះ​បាន​ក្លាយ​ជា​របត់​នយោបាយ​ថ្មី​មួយ​សម្រាប់​ប្រទេស​ថៃ ដែល​ទោះ​បី​ជា​តាម​នីតិន័យ​ ស្ថាប័ន​ព្រះ​មហា​ក្សត្រិយ៍ (​ថៃ​) ត្រូវ​នៅ​ពី​លើ​នយោបាយ ក៏​ប៉ុន្តែ​​ពាក្យ​ចចាម​​អារ៉ាម​​ស្ដី​អំពី​ភាព​មិន​ជ្រះ​ស្រឡះ​នៃ​​ស្ថាប័ន​ក្សត្រិយ៍ (​ថៃ​) និង​នយោបាយ​ថៃ វា​ក៏​បាន​ប្រាកដ​ចេញ បើ​ទោះ​បី​ក្នុង​ន័យ​ល្អ ឬ​អាក្រក់​ក្ដី​។

ការ​បោះ​ឆ្នោត​នា​ពេល​ខាង​មុខ ​ដែល​ធ្វើ​ឡើង​តាម​ការ​គូស​វាស​រដ្ឋ​ធម្មនុញ​នៃ​របប​យោធា​ក្រោយ​រដ្ឋ​ប្រហារ​ឆ្នាំ​២០១៤​នោះ បាន​ក្លាយ​ជា​សមរភូមិ​ស៊ី​សាច់​ហុត​ឈាម និង​ការ​តស៊ូ​ដ៏​ក្ដៅ​គគុក​មួយ​នៃ​បណ្ដា​ជន​ដឹក​នាំ​ជាន់​ខ្ពស់ ឬ​ពួក​អេលីត​នៃ​ប្រទេស​នេះ និង​បណ្ដា​ប្រជាជន​ទូទៅ​។ ការ​ឈាន​ចូល​ក្នុង​សង្វៀន​ដោយ​ចំហ​នៃ​សមាជិក​រាជ​វង្ស​ថៃ​នា​ពេល​នេះ ត្រូវ​បាន​គេ​មើល​ឃើញ​ថា ចង់​មិន​ចង់​ស្ថាប័ន​ក្សត្រិយ៍​របស់​ប្រទេស​ថៃ​ត្រូវ​សម្រប​ខ្លួន​ទៅ​តាម​ការ​វិវត្ត​នៃ​របត់​សង្គម​នៃ​ប្រទេស​ផង​ខ្លួន​នេះ ក៏​ដូច​ជា​ទំនោរ​នៃ​សាក​លលោក​។

អាន​ប្រវត្តិ​របស់​ព្រះ​អង្គ​

សំណាក់​ព្រះ​រាជ​វាំង​ថៃ​ចេញ​ប្រកាស​ហាម​ព្រះ​​អង្គ​ម្ចាស់​ក្សត្រីយ៍​ឧបលរ័តន​រាជ​កញ្ញា សិរិវឌ្ឍនា​ពណ្ណវតី​ប្រឡូក​នយោបាយ

1625488718

ភ្លាម​ៗ​មិន​ដល់​មួយ​ថ្ងៃ​ផង នៅ​យប់​ថ្ងៃ​នេះ វេលា​ប្រមាណ​ម៉ោង​១០.០០​ សំណាក់​ព្រះ​បរម​មហា​រាជ​វាំង​ថៃ បាន​ចេញ​សេចក្ដី​ប្រកាស ជា​ព្រះ​រាជ​ឱង្ការ​នៃ​ សម្ដេចព្រះចៅយូហួមហាវជិរាលង្ករណ បតិន្ទ្រទេព្យវរាង្កូរ (​រាមា​ទី​១០​) ករណី​ការ​សម្រេច​ឈរ​ឈ្មោះ​ជា​បេក្ខភាព​នាយក​រដ្ឋមន្ត្រី​​របស់​ព្រះ​​អង្គ​ម្ចាស់​ក្សត្រីយ៍​ឧបលរ័តន​រាជ​កញ្ញា សិរិវឌ្ឍនា​ពណ្ណវតី​។ ព្រះ​រាជ​ឱង្ការ​​ដែល​មាន​ចំនួន​កម្រាស់​៣​ទំព័រ​​នេះ បាន​ពណ៌នា​អំពី​ស្ថាប័ន​ព្រះ​មហា​ក្សត្រិយ៍​ថៃ ដែល​ទោះ​បី​រដ្ឋធម្មនុញ្ញ​មិន​បាន​ហាម​ឲ្យ​ប្រឡូក​ក្នុង​នយោបាយ​ក្ដី ជា​ប្រតិបត្តិ​រាជ​វង្ស​ថៃ​ចាប់​តាំង​ពី​ឋានៈ​​អ្នក​អង្គ​​ម្ចាស់​ឡើង​ទៅ​ត្រូវ​ស្ថិត​ជា​អធ្យាក្រឹត​ក្នុង​នយោបាយ​ ហេតុ​ដូច​នេះ ការ​សម្រេច​ចូល​ក្នុង​ឆាក​នយោបាយ​របស់​ព្រះ​អង្គ​ម្ចាស់​ក្សត្រីយ៍​នា​ពេល​នេះ​គឺ​«​មិន​គួរ​»​​៕

__________________________________________________________
អាន​ផង​ដែរ​ ៖
១. ប្រវត្តិ​ព្រះ​អង្គ​ម្ចាស់​ក្សត្រីយ៍ ឧបល​រ័ត្ន

Repost : ការ​បាត់​បង់​ទំនៀម​និមន្ត​ព្រះ​សង្ឃ​ឆាន់​​ចង្ហាន់​នៅ​គេហ​ដ្ឋាន ឬ​កន្លែង​ប្រារព្ធ​ពិធី​បុណ្យ ថ្ងៃសៅរ៍ 9 ខែមិថុនា 2018

Posted by សុភ័ក្ត្រ in បរិយាយ​ថ្ងៃ​នេះ, អំពីស្រុកខ្មែរ.
add a comment

ទំនៀមដើមមួយកំពុងតែរងការបាត់បង់បណ្ដើរៗនៅក្នុងសង្គមខ្មែរទៀតនោះ គឺទំនៀមនៃការនិមន្តព្រះសង្ឃឆាន់ចង្ហាន់នៅគេហដ្ឋាន ឬកន្លែងប្រារព្ធពិធីបុណ្យ។ ការធ្វើបុណ្យតាមបែបព្រះពុទ្ធសាសនាជាមួយព្រះសង្ឃរបស់ជនជាតិខ្មែរ ថ្វីបើបន្តនៅមានតពូជពង្សតាមទំនៀមហើយ ក៏ប៉ុន្តែទំនៀមមួយចំនួន មិនទទួលបានការប្រតិបត្តិដូចសម័យដើមមិញទេ។ ការធ្វើបុណ្យឃើញតែពីធ្វើឲ្យរួចស្រេចឆាប់ៗ និងលឿនៗ។ យូរៗទៅ ការធ្វើបុណ្យរបស់ជនជាតិខ្មែរ គឺធ្វើឲ្យហៅតែធ្វើប៉ុណ្ណោះ។

ចំពោះទំនៀមនៃការនិមន្តព្រះសង្ឃឆាន់ចង្ហាន់នៅគេហដ្ឋាន ឬកន្លែងប្រារព្ធពិធីបុណ្យ បច្ចុប្បន្ន ជាពិសេសនៅតាមទីក្រុង ឬទីប្រជុំជនធំៗ ហាក់មិនឃើញធ្វើទៀតទេ រាប់ទាំងពិធីសាសនានៅក្នុងព្រះបរមរាជវាំងផងដែរ។ ព្រះសង្ឃដែលទទួលនិមន្តមកចូលរួមក្នុងពិធីបុណ្យតាមគេហដ្ឋានក្ដី នៅតាមកន្លែងប្រារព្ធពិធីបុណ្យនានាក្ដី មិនទទួលឆាន់ចង្ហាន់ថ្ងៃត្រង់នៅនឹងផ្ទះបុណ្យ ឬកន្លែងប្រារព្ធពិធីនោះទៀតទេ។ ពោលគឺក្រោយវេរភត្តរួច ក៏ម្ចាស់ពិធីនិមន្តព្រះសង្ឃត្រឡប់ទៅអារាមវិញ។ ចំណែកឯចង្ហាន់ ត្រូវបានម្ចាស់បុណ្យច្រកជាស្រេចដាក់ក្នុងស្រាក់ដើម្បីព្រះសង្ឃយកទៅឆាន់នៅឯវត្តវិញ។

ព្រះសង្ឃកំពុងឆាន់ចង្ហាន់ក្នុងថ្ងៃមួយនៃព្រះរាជពិធីបុណ្យព្រះមេរុ ហ្លួងកាញ្ចនកោដ្ឋ

ទំនៀម (ថ្មី) បែបនេះ ទំនងកើតមានឡើងប្រមាណទសវត្សរ៍ឆ្នាំ១៩៩០ គឺនៅពេលដែលព្រះពុទ្ធសាសនារីកដុះដាលឡើងវិញ និងមានព្រះសង្ឃបួសចាំវស្សាច្រើន ឬមានសិស្សនិស្សិតមកនៅវត្តច្រើន ជាពិសេសនៅក្នុងក្រុងភ្នំពេញ ហើយដែលកាលណុះ មានការអះអាងថា គឺដើម្បីព្រះសង្ឃយកទៅឆាន់ជាមួយព្រះសង្ឃឯទៀតៗនៅឯវត្ត ដែលមិនបាននិមន្តមកចូលរួមពិធីនោះ ក៏ដូចជាអាចារ្យ ឬសិស្សវត្ត ឬអ្នកចាំវត្តឯទៀតបានទទួលទានដែរ។ ការផ្ដល់សារហេតុបែបនេះ ទំនងជាហេតុផលដែលអាចទទួលយកបានមួយជ្រុងដែរ ខណៈដែលចង្ហាន់មានការខ្វះខាតសម្រាប់ផ្គត់ផ្គង់ព្រះសង្ឃនៅនឹងទីអារាមនោះ។

ទោះបីជាយ៉ាងនេះក្ដី មកដល់សម័យបច្ចុប្បន្ននេះ នៅខណៈដែលសាសនាមានសភាពរឹងម៉ាំជាងមុនហើយ ប្រពៃណី ឬទំនៀមទម្លាប់មួយចំនួន គួររុះរើមកវិញ ជាក់ស្ដែងទំនៀមនិមន្តព្រះសង្ឃឆាន់ចង្ហាន់នៅនឹងផ្ទះ ឬកន្លែងប្រារព្ធពិធីបុណ្យនេះផងដែរ៕

ជ័យ​ជម្នះ​នៃ​ប្រជាជាតិ​ម៉ាឡេ ថ្ងៃ​ព្រហស្បតិ៍ 10 ខែ​ឧសភា 2018

Posted by សុភ័ក្ត្រ in បរិយាយ​ថ្ងៃ​នេះ, Bahasa Melayu.
1 comment so far

បន្ទាប់​ពី​ការ​បោះ​ឆ្នោត​ជា​សាកល​ម្សិល​មិញ​នេះ (​៩ ឧសភា ២០១៨​) រួច​មក ប្រទេស​ម៉ាឡេស៊ី​បាន​ឈាន​មក​ដល់​របត់​ថ្មី​មួយ​ នោះ​គឺ​ការ​ឡើង​កាន់​អំណាច​ជា​ប្រវត្តិ​សាស្ត្រ​នៃ​សម្ព័ន្ធ​បក្ស​ប្រឆាំង​ម៉ាឡេ​។ ជ័យ​ជម្នះ​នេះ​ក៏​បាន​ក្លាយ​ជា​ប្រវត្តិ​សាស្ត្រ​មួយ​ថ្មី​ទៀត​​នៃ​បរាជ័យ​របស់​អង្គការ​ជាតិ​រួប​រួម​ម៉ាឡេ ឬ UMNO ដែល​បាន​កាន់​កាប់​ប្រទេស​សហ​ព័ន្ធ​មួយ​នេះ ជាង​​៦​ទសវត្សរ៍​។

ប្រជាជន​ម៉ាឡេស៊ី​បាន​នាំ​គ្នា​ចេញ​ទៅ​បោះ​ឆ្នោត​កាល​ពី​ថ្ងៃ​ពុធ​ ម្សិល​មិញ​នេះ ដើម្បី​កំណត់​ជោគ​វាសនា​របស់​ប្រទេស​ខ្លួន ដោយ​សំឡេង​ភាគ​ច្រើន​បាន​បោះ​ឆ្នោត​សម្ដែង​ការ​ទុក​ចិត្ត​លើ​ លោក​មហាធៀ មូហាម័ដ អតីត​នាយក​រដ្ឋ​មន្ត្រី ដែល​បាន​ប្រែ​ខ្លួន​ជា​មេ​ដឹក​នាំ​​នៃ​សម្ព័ន្ធ​បក្ស​ប្រឆាំង Pakatan Harapan និង​ដែល​អនុញ្ញាត​ឲ្យ​លោក​បាន​ឡើង​កាន់​តំណែង​ជា​នាយក​រដ្ឋ​មន្ត្រី​នៃ​ប្រទេស​នេះ​ម្ដង​ទៀត​ក្នុង​វ័យ​៩០​ឆ្នាំ​ប្លាយ ឬ​ដែល​គេ​ហៅ​ថា​ជា​​នាយក​រដ្ឋ​មន្ត្រី​វ័យ​ចំណាស់​ជាង​គេ​លើ​លោក​។

បន្ទាប់​ពី​ការ​បោះ​ឆ្នោត​ និង​ការ​រាប់​ឆ្នោត​បាន​បញ្ចប់​ភ្លាម​ គណៈ​កម្មាធិការ​រៀប​ចំ​ការ​បោះ​ឆ្នោត​ម៉ាឡេស៊ី បាន​ប្រកាស​ឲ្យ​ដឹង​ពី​ជ័យ​ជម្នះ​របស់​ សម្ព័ន្ធ​បក្ស​ប្រឆាំង យ៉ាង​ហោច​ណាស់​ទទួល​បាន​អាសនៈ​១១២ លើ​២២២ នឹង​ទទួល​បាន​សិទ្ធិ​ក្នុង​ការ​បង្កើត​រដ្ឋាភិបាល​សហ​ព័ន្ធ​ថ្មី​របស់​ម៉ាឡេស៊ី ដែល​ត្រូវ​ការ​​១១២​អាសនៈ​។ ការ​ប្រកាស​នេះ​បាន​ធ្វើ​ឲ្យ​លោក​មហាធៀ នឹង​ក្លាយ​ជា​នាយក​រដ្ឋ​មន្ត្រី​នៃ​ម៉ាឡេស៊ី​ភ្លាម បន្ទាប់​ពី​លោក​ចូល​គាល់ និង​ទទួល​បាន​ការ​តែង​តាំង​ពី​ព្រះ​មហា​ក្សត្រិយ៍​ម៉ាឡេស៊ី នៅ​វេលា​ល្ងាច​នេះ​។

ប្រជាជន​ម៉ាឡេស៊ី​បាន​បង្វែ​ការ​គាំទ្រ​របស់​ខ្លួន​ដែល​ធ្លាប់​តែ​បាន​ផ្ដល់​ទៅ​ឲ្យ​អតីត​គណបក្ស​កាន់​អំណាច​ UMNO ដែល​បាន​គ្រប់​គ្រង​ប្រទេស​នេះ​ជាង​៦០​ឆ្នាំ មក​ឲ្យ​សម្ព័ន្ធ​បក្ស​ប្រឆាំង​ក៏​ដ្បិត​ដោយ​សារ​​រឿង​អាស្រូវ​​ស្ដី​អំពី​អំពើ​ពុក​រលួយ​ជា​ច្រើន​កើត​ឡើង​នៅ​ក្នុង​ចំណោម​ថ្នាក់​ដឹក​​នាំ​ប្រទេស​នេះ ជា​ពិសេស​ដោយ​ផ្ទាល់​ទៅ​លើ​លោក ណាជីប រ៉ាហ្សាក់ អតីត​នាយក​រដ្ឋ​មន្ត្រី​។ ការ​បង្វែ​ការ​គាំទ្រ​នេះ បាន​បង្ហាញ​ពី​ភាព​ចេះ​ដឹង​របស់​ប្រជាជន​ម៉ាឡេ​ក្នុង​ការ​ជ្រើស​រើស​យក​អំពើ​ល្អ ជាជាង​ការ​គាំទ្រ​បុគ្គល ក្នុង​ន័យ​ផល​ប្រយោជន៍​នៃ​ជាតិ​ម៉ាឡេ​។

ថៃ​ចង់​បាន​ «​ស​» ខ្មែរ​ប្រែ​ចង់​បាន «​ខ្មៅ​» ថ្ងៃចន្ទ 26 ខែ​មីនា 2018

Posted by សុភ័ក្ត្រ in បរិយាយ​ថ្ងៃ​នេះ, អំពីស្រុកខ្មែរ, ภาษาไทย.
3 comments

កាល​ពី​ព្រះ​រាជ​ពិធី​បុណ្យ​ព្រះ​បរម​សព នៃ​ព្រះករុណា ព្រះបាទសម្ដេចព្រះ នរោត្តម សីហនុ ព្រះបរមរតនកោដ្ឋ ចាប់​តាំង​ពី​ថ្ងៃ​ព្រះ​អង្គ​សោយ​ព្រះ​ទិវង្គត រហូត​ដល់​ព្រះ​រាជ​ពិធី​បុណ្យ​ព្រះ​មេរុ​ថ្វាយ​ព្រះ​ភ្លើង​ព្រះ​បរម​សព ប្រជាជាតិ​ខ្មែរ បាន​បង្ហាញ​ឲ្យ​ពិភព​លោក​ឃើញ​នូវ​ប្រពៃណី​ដ៏​ល្អ​ផូរ​ផង់​ដែល​ជា​ទំនៀម​បុណ្យ​ព្រះ​សព ដែល​ខ្មែរ​យើង​បាន​ប្រកាន់​ខ្ជាប់​តាំង​ពី​បូរាណ​ព្រេង​នាយ​មក បើ​ទោះ​ជា​ពិធី​មួយ​ចំនួន​បាន​បាត់​បង់​ក្ដី​។ អ្វី​ដែល​ជា​ទំនៀម​ដ៏​សំខាន់​មួយ​នៃ​ព្រះ​រាជ​ពិធី​បុណ្យ​ព្រះ​បរម​សព​ដែល​ខ្មែរ​យើង​បាន​បង្ហាញ​នោះ​គឺ ការ​ស្លៀក​ពាក់ «​ស​» សម្រាប់​ការ​កាន់​ទុក្ខ​

ការ​ប្រើ​ប្រាស់​ព័ណ៌​ស​សម្រាប់​បុណ្យ​សព តាំង​តែ​ពី​សាមញ្ញ​ជន​រហូត​ដល់​វណ្ណៈ​ក្សត្រិយ៍​​នេះ ត្រូវ​បាន​ខ្មែរ​យើង​ប្រកាន់​ខ្ជាប់​ជា​យូរ​យារ​មក​ហើយ (​ស្រែ​ខ្មុក​សូម​មិន​បរិយាយ​ពី​រឿង​នេះ​) ដែល​មិន​មាន​ជា​ការ​ស្លៀក​តាម​ចិន ដូច​អ្នក​ប្រើ​ប្រាស់​ហ្វេសបុគ​ខ្លះ​បាន​​និយាយ​នោះ​ទេ​។ យ៉ាង​ណា​មិញ ទំនៀម​ស្លៀក​ស​នេះ ត្រូវ​បាន​ខ្មែរ​ផ្សព្ធ​ផ្សាយ​ឥទ្ធិពល​ដល់​រដ្ឋ​កើត​ថ្មី​ទាំង​ឡាយ​ឯ​ទៀត​មាន​សៀម លាវ ជា​ដើម​ឲ្យ​ប្រើ​ប្រាស់​ផង​ដែរ​។

ប្រទេស​សៀម ដែល​ស្ថិត​នៅ​ក្រោមការ​ទទួល​យក​វប្បធម៌​​ពី​ខ្មែរ​ដើម​នោះ ពី​អតីត​ក៏​ប្រើ​ប្រាស់​ព័ណ៌​ស​សម្រាប់​ពិធី​បុណ្យ​សព និង​ព្រះ​សព​ដែរ​។ មក​ដល់​​សម័យ​ក្រោយ​នេះ​ឯង គឺ​នៅ​ពេល​ដែរ​ប្រទេស​នេះ (​ថៃ​) បើក​ឱកាស​ និង​ប្រកាន់​យក​ទំនៀម​វប្បធម៌​លោក​ខាង​លិច (​សម័យ​នាយ​ឧត្ដម​សេនីយ​ពិបុល​សង្គ្រាម​) ទើប​ព័ណ៌​ខ្មៅ​ត្រូវ​បាន​យក​មក​ប្រើ​ប្រាស់​ និង​ផ្សព្ធ​ផ្សាយ​ជា​ទូ​ទៅ​សម្រាប់​បុណ្យ​សព​ ជា​ពិសេស​ក្នុង​ចំណោម​​អភិជន​ថៃ ក្នុង​ហេតុ​ផល​​ដើម្បី​ភាព​ជឿន​លឿន និង​សម័យ​និយម​របស់​ថៃ​។

កាល​ពី​បុណ្យ​ព្រះ​បរម​សព​នៃ​នៃ​ព្រះ​ករុណា ព្រះ​បរម​រតន​កោដ្ឋ​នោះ មាន​បណ្ដា​ជន​ជាតិ​ថៃ​ជា​ច្រើន​បាន​ឃើញ​ពី​ទំនៀម​នៃ​ការ​ប្រើ​ប្រាស់​ព័ណ៌​ស​នេះ ហើយ​ពួក​គេ​បាន​លួច​កោត​សរសើរ​ និង​បាន​និយាយ​មិន​ដាច់​ពី​មាត់​ពី​ភាព​ល្អ​ផូរ​ផង់​នេះ រហូត​ដល់​មាន​អ្នក​ខ្លះ​បាន​លើក​ឡើង និង​វែក​ញែក​នៅ​តាម​បណ្ដាញ​សង្គម​អំពី​បញ្ហា​នេះ និង​ចង់​ឲ្យ​មាន​ការ​សើរើ​ប្រើ​ប្រាស់​ព័ណ៌​ស​នេះ​ឡើង​វិញ​សម្រាប់​ប្រពៃណី​បុណ្យ​សព​នៅ​ប្រទេស​ថៃ​ផង​ទៀត​។

តែ​អ្វី​គួរ​ឲ្យ​អស់​សំណើច​នោះ ជា​ពិសេស​សម្រាប់​ពល​រដ្ឋ​ខ្មែរ​មួយ​ចំនួន​នា​ពេល​ថ្មី​ៗ​នេះ បាន​បង្ហាញ​ពី​ការ​ប្រើ​ប្រាស់​​ព័ណ៌​ «​ខ្មៅ​» សុទ្ធ (​តាម​ទំនៀម​ថៃ) សម្រាប់​បុណ្យ​សព នៅ​តាម​កញ្ចក់​ទូរទស្សន៍​រហូត​បណ្ដាល​​ឲ្យ​មាន​ការ​វែក​ញែក​ពី​ម្ខាង​ទៅ​ម្ខាង​ផង​ដែរ​។ ស្គាល់​គេ​ស្គាល់​យើង — នេះ​បាន​ជា​ថា​ថៃ​ចង់​បាន​ «​ស​» ឯ​​ខ្មែរ​ស​ហើយ ​ប្រែ​ចង់​បាន «​ខ្មៅ​» ទៅ​វិញ​!

ការ​ស្លៀក​ពាក់​ស​កាល​គ្រា​បុណ្យ​ព្រះ​សព ព្រះ​ករុណា ព្រះ​បរម​រាជា​នុ​កោដ្ឋព្រះ​ករុណា និង​សម្ដេច​ព្រះ​មហា​ក្សត្រិយ៍ ព្រះ​វរ​រាជ​មាតា ព្រម​ព្រះ​រាជ​វង្សានុវង្ស​ទ្រង់​គ្រង​ព័ណ៌ស កាល​គ្រា​បុណ្យ​ព្រះ​បរម​សព ព្រះ​ករុណា ព្រះ​បរម​រតន​កោដ្ឋ
ប្រជារាស្ត្រ​ខ្មែរ​ពាក់​ស​ចូល​រួម​បុណ្យ​ព្រះ​បរម​សព ព្រះ​ករុណា ព្រះ​បរម​រតន​កោដ្ឋ
ការ​ស្លៀក​ពាក់​ស​ក្នុង​បុណ្យ​ព្រះ​បរម​សព ព្រះ​ចៅ​ផែន​ដី​សៀម កាល​ពី​អតីត​កាល
ប្រជា​រាស្ត្រ​ថៃ​ស្លៀក​ពាក់​ខ្មៅ​សុទ្ធ ក្នុង​បុណ្យ​ព្រះ​បរម​សព​ព្រះ​មហា​ក្សត្រិយ៍​ថៃ រាមា​ទី​៩ កាល​ពី​ពេល​ថ្មី​ៗ​នេះ

_________________________________________________________________
អាន​ផង​ដែរ​៖
១. ប្រពៃណី​លូន​ក្រាប​កំពុង​ត្រូវ​បាន​រង្គោះ​រង្គើ​នៅ​មឿង​ថៃ

បញ្ហា​សង្គម និង​ «​ប្រជា​ទណ្ឌ​» ថ្ងៃចន្ទ 12 ខែ​មីនា 2018

Posted by សុភ័ក្ត្រ in បរិយាយ​ថ្ងៃ​នេះ.
add a comment

ជា​រឿយ​ៗ​ការ​ធ្វើ «​ប្រជា​ទណ្ឌ*» រមែង​កើត​មាន​​ឡើង​នៅ​ក្នុង​សង្គម​មួយ​ដែល​ការ​គ្រប់​គ្រង​ដោយ​នីតិ​​មាន​ភាព​ធូរ​រលុង​ ម្យ៉ាង​ដោយ​សារ​រដ្ឋ និង​ម្យ៉ាង​ដោយ​ភាព​ខ្វះ​ចំណេះ​ដឹង​ពី​ពល​រដ្ឋ ឬ​មួយ​ក៏​ដោយ​សារ​ភាព​អ​ជំនឿ​លើ​ប្រព័ន្ធ​ច្បាប់​ពី​សំណាក់​ពល​រដ្ឋ​។ ការ​ធ្វើ​ «​ប្រជា​ទណ្ឌ​» ដោយ​ជៀស​មិន​បាន វា​បាន​ធ្វើ​ឲ្យ​បញ្ហា​សង្គម​​មាន​ភាព​ហិង្សា និង​ពល​រដ្ឋ​ឯ​ទៀត​រស់​នៅ​ក្នុង​ភាព​ភ័យ​ខ្លាច​។

ការ​ធ្វើ «​ប្រជា​ទណ្ឌ​» មិន​បាន​ធ្វើ​ឲ្យ​បញ្ហា​សង្គម​ធូរ​ស្រាល ឬ​ដោះ​ស្រាយ​បាន​ឡើយ​។ នៅ​ក្នុង​រដ្ឋ​ទាំង​ឡាយ​ណា ដែល​បញ្ហា​សង្គម​មិន​ត្រូវ​បាន​ដោះ​ស្រាយ​ឲ្យ​បាន​ឆាប់​រហ័ស​តាម​នីតិ​វិធី​របស់​រដ្ឋ ព្រម​ទាំង​​ធានា​បាន​នូវ​ភាព​យុត្តិ​ធម៌​មួយ​ដែល​ទទួល​ស្គាល់​ពី​ពល​រដ្ឋ​ខ្លួន​នោះ «​ប្រជា​ទណ្ឌ​» ត្រូវ​បាន​គេ​យក​ទៅ​បម្រើ​ជា «​លេស​» ដើម្បី​យក​មក​បម្រើ​ក្នុង​ចេតនា​មិន​ល្អ ហើយ​នៅ​ក្នុង​ពេល​ខ្លះ​ទៀត វា​ក្លាយ​ទៅ​ជា​គ្រោះ​អន្តរាយ​ធំ​ផង​ដែរ​។

បញ្ហា «​ប្រជា​ទណ្ឌ​» ចាំ​បាច់​ត្រូវ​ដោះ​ស្រាយ​ឲ្យ​បាន​ឆាប់​រហ័ស នៅ​ក្នុង​សង្គម​ដែល​មាន​ការ​ពុក​ស្រួយ តាម​រយៈ​ការ​ពង្រឹង​នូវ​ប្រព័ន្ធ​ច្បាប់ ការ​អប់​រំ ព្រម​ទាំង​ការ​ដាក់​ទោស​ទណ្ឌ ដល់​អ្នក​រួម​គំនិត​ (​ជាក់​ស្ដែង​)​។ ដរាប​ណា «​ប្រជា​ទណ្ឌ​» នៅ​តែ​ត្រូវ​បាន​គេ​ប្រើ​ប្រាស់​ជា​រឿយ​ៗ រដ្ឋ​មួយ​នឹង​ពិបាក​ណាស់​ក្នុង​ការ​ក្លាយ​ជា​រដ្ឋ «​ស៊ីវិល័យ​»​៕

__________________________________________________________
ការ​ចូល​រួម​ក្នុង​អំពើ​ហិង្សា​ពី​សំណាក់​ហ្វូង​មនុស្ស ក្នុង​ន័យ​ដាក់​ទោស​ទណ្ឌ​ដល់​បុគ្គល​មួយ​រូប ឬ​ច្រើន​រូប ដោយ​ពួក​គេ​យល់​ថា​មាន​ទោស​កំហុស ដោយ​មិន​បាន​ឆ្លង​កាត់​ប្រព័ន្ធ​យុត្តិធម៌

«​អាំង​ប៉ាវ​»៖ ឯ​ណា​ទៅ​គុណ​តម្លៃ​នៃ​ឯក​សណ្ឋាន​​? ថ្ងៃសៅរ៍ 24 ខែ​កុម្ភៈ 2018

Posted by សុភ័ក្ត្រ in បរិយាយ​ថ្ងៃ​នេះ, អំពីស្រុកខ្មែរ.
1 comment so far

ប៉ុន្មាន​ឆ្នាំ​ចុង​ក្រោយ​នេះ យើង​សង្កេត​ឃើញ​មាន​ទំនៀម​ប្លែក​នៅ​ស្រុក​ខ្មែរ​យើង នោះ​គឺ​ការ​ចែក «​អាំង​ប៉ាវ​» ឬ​និយាយ​ឲ្យ​ស្រួស​ស្ដាប់ គឺ​ចែក​ «​លុយ​» ពី​សំណាក់​អ្នក​មាន​ខ្មែរ ក្នុង​ឱកាស​បុណ្យ​ចូល​ឆ្នាំ​ចិន​។ ស្រែ​ខ្មុក​មិន​និយាយ​ដល់​ពី​ទំនៀម​ចែក «​សំបុត្រ​ក្រហម​» ឬ​អាំង​ប៉ាវ​នេះ​របស់​ជនជាតិ​ចិន​ក្នុង​ឱកាស​បុណ្យ​ចូល​ឆ្នាំ​ចិន​នេះ​ទេ តែ​សូម​បង្វែរ​អារម្មណ៍​ប្រិយមិត្រ​មក​មើល​ពី​ភាព​គួរ​ឲ្យ​អនិច្ចា​ក្នុង​ការ​អនុវត្ត​ទំនៀម​បែប​នេះ​វិញ​។

នៅ​ក្នុង​ពេល​ចូល​ឆ្នាំ​ចិន​កន្លង​មក​នេះ លោក​អ្នក​បាន​ឃើញ​ហើយ ជា​ពិសេស​អ្នក​នៅ​ភ្នំពេញ នៅ​តាម​ដង​វិថី​នានា​ស្ទើរ​តែ​គ្រប់​ទី​កន្លែង​ហាក់​មាន​សមត្ថកិច្ច​ច្រើន​ប្លែក​ឈរ​យាម​កាម​នៅ​តាម​ច្រក​ផ្លូវ​បំបែក​នានា ខុស​ពី​សព្វ​មួយ ថែម​ទាំង​សមត្ថកិច្ច​ខ្លះ​មិន​មែន​ជា​អ្នក​ចាត់​ចែង​ចរាចរណ៍​ផង​។ ការ​ដែល​ពួក​គាត់​មក​ឈរ​រាង​រាយ​បែប​នេះ គឺ​មក​រង់​ចាំ​គេ​ចែក​ «​អាំង​ប៉ាវ​» ទេ​តើហ៍ ហេហេ​…​។

ការ​​ដែល​ពួក​គាត់​កំពុង​ស្ថិត​ក្នុង​ភារ​កិច្ច ប្រកប​ដោយ​ឯក​សណ្ឋាន​ក្នុង​ភាព​ថ្លៃ​ថ្នូរ​នោះ តែ​បែរ​ជា​មក​ឈរ​តម្រៀប​គ្នា​តាម​ផ្លូវ​ហុច​ដៃ​យក​អាំង​ប៉ាវ​ពី​តាម​រថយន្ត «​អ្នក​មាន​» នានា​ដែល​ហុច​ឲ្យ​នោះ មើល​ទៅ​គួរ​ឲ្យ​ខ្មាស​អៀន​ជំនួស​ ព្រម​ទាំង​បាត់​អស់​នូវ​តម្លៃ​របស់​ពួក​គាត់​ដែល​ជា​សមត្ថកិច្ច​បំពេញ​ការងារ​រាជការ និង​ទទួល​ប្រាក់​បំណាច់​ដោយ​សារ​ការ​បង់​ពន្ធ​របស់​ប្រជា​រាស្ត្រ​ខ្មែរ​។ ទិដ្ឋភាព​បែប​នេះ មិន​គួរ​ណា​កើត​មាន​ឡើយ​ចំពោះ​មន្ត្រី​រាជការ​ខ្មែរ ក្នុង​ឱកាស​បែប​នេះ​។

ក្រៅ​ពី​ការ​ចែក​ «​អាំង​ប៉ាវ​» បែប​នេះ ដល់​ភ្នាក់​ងារ​មាន​សមត្ថកិច្ច​របស់​រដ្ឋ​ហើយ នៅ​តាម​ទី​សាធារណៈ​ឯកជន​នានា ដូច​ជា​នៅ​តាម​ច្រក​ចូល​បូរី ឬ​កន្លែង​មួយ​ចំនួន​ទៀត ក៏​ឃើញ​មាន​ការ​ធ្វើ​បែប​នេះ​ដែរ​។ វា​បាន​ក្លាយ​ទៅ​ជា «​ទំនៀម​» មួយ​បាត់​ទៅ​ហើយ​។

អ្វី​ដែល​ជា​ការ​គួរ​ឲ្យ​ចាប់​អារម្មណ៍​ទៅ​វិញ​ទៀត​នោះ ទំនៀម​បែប​នេះ នៅ​ឯ​ប្រទេស​ចិន​ ដែល​ជា​ប្រភព​នៃ​ទំនៀម​នេះ បាន​មាន​ការ​ចាត់​វិធានការណ៍​តឹង​រឹង ដោយ​មិន​ឲ្យ​មាន​ការ​ជូន​រង្វាន់​នានា​ក្នុង​ឱកាស​បុណ្យ​ជាតិ​ផង ដោយ​រដ្ឋាភិបាល​ចិន​ចាត់​ទុក​ថា នេះ ជា ចំណែក​មួយ​នៃ «​អំពើ​ពុក​រលួយ​» ផង​ដែរ​៕

%d bloggers like this: