jump to navigation

កម្រង​រូប​ភាព​ខួប​អនុស្សាវរីយ៍​លើក​ទី​៦៧ ទិវា​បុណ្យ​ឯករាជ្យ​នៃ​ព្រះរាជាណាចក្រ​កម្ពុជា ថ្ងៃអង្គារ 10 ខែវិច្ឆិកា 2020

Posted by សុភ័ក្ត្រ in ប្រវត្តិសាស្ត្រ.
1 comment so far

__________________________________________________________
អាន​ផង​ដែរ ៖
១. អបអរសាទរ​ខួប​អនុស្សាវរីយ៍​លើក​ទី​៦៧ ទិវា​បុណ្យ​ឯករាជ្យ​នៃ​ព្រះរាជាណាចក្រ​កម្ពុជា

ថ្វាយ​គ្រឿង​​ឥស្សរិយ​យស «​រដ្ឋ​មិត្រភរណ៍​» ចំពោះ​សម្ដេច​​ព្រះ​វរ​រាជ​មាតា​ជាតិ​ខ្មែរ ថ្ងៃសុក្រ 6 ខែវិច្ឆិកា 2020

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ, 中文.
4 comments

នានាប្រទេស៖ រដ្ឋធានី​ប៉េកាំង, ស.ប.ចិន – នា​រសៀល​ថ្ងៃ​សុក្រ ទី​៦ ខែ​វិច្ឆិកា ឆ្នាំ​២០២០ នេះ នៅ​ឯ​សាល​ប្រជាជន ឯ​រដ្ឋធានី​ប៉េកាំង ប្រទេស​ចិន​ប្រជាមានិត មាន​ប្រារព្ធ​រដ្ឋ​ពិធី​ដ៏​ធំ​ជា​មហា​កិត្តិយស​មួយ ថ្វាយ​គ្រឿង​ឥស្សរិយ​យស «​រដ្ឋ​មិត្រភរណ៍​» ឬ​គ្រឿង​ឥស្សរិយ​យស​ដ៏​ខ្ពង់​ខ្ពស់​ឧត្តុង្គ​ឧត្ដម​មិត្តភាព នៃ​សាធារណ​រដ្ឋ​ប្រជាមានិត​ចិន ចំពោះ​សម្ដេច​ព្រះ​វរ​រាជ​មាតា​ជាតិ​ខ្មែរ ជា​ទី​គោរព​សក្ការ​ដ៏​ខ្ពង់​ខ្ពស់​បំផុត​។

ពិធី​ជា​ប្រវត្តិ​សាស្ត្រ​នា​ថ្ងៃ​នេះ ត្រូវ​បាន​ចូល​រួម​ដោយ​ប្រមុខ​រដ្ឋ​នៃ​ប្រទេស​ចិន គឺ​ឯក​ឧត្តម ស៊ី ជីនភីង ប្រធានាធិបតី នៃសាធារណរដ្ឋប្រជាមានិតចិន លោក​ជំទាវ​ទី​១ ព្រម​ទាំង​ថ្នាក់​ដឹក​នាំ​ជាន់​ខ្ពស់​ជា​ច្រើន​ទៀត​នៃ​ប្រទេស​ចិន​។ ដោយ​ឡែក​ភាគី​ខាង​កម្ពុជា មាន​ព្រះ​ករុណា ជា​អម្ចាស់​ជីវិត​លើ​ត្បូង​ជា​ទី​គោរព​សក្ការ​ដ៏​ខ្ពង់​ខ្ពស់​បំផុត សម្ដេច​ព្រះ​វរ​រាជ​មាតា​ជាតិ​ខ្មែរ​ជា​ទី​គោរព​សក្ការ​ដ៏​ខ្ពង់​ខ្ពស់​បំផុត ព្រះ​រាជ​វង្សានុវង្ស ព្រម​ទាំង​ថ្នាក់​ដឹក​នាំ​មួយ​ចំនួន​ទៀត​ផង​ដែរ​។

“គ្រឿងឥស្សរិយយស ដែល​ខ្ញុំ​មាន​​កិត្តិយស​ថ្វាយ​​ជូន សម្តេច​ព្រះ​មហាក្សត្រីយ៍​ នៅ​ពេល​នេះ គឺ​តំណាង​ឱ្យ​ការ​គោរពរបស់​ប្រជាជន​ចិន ចំពោះ សម្តេច​ព្រះ​មហាក្សត្រីយ៍ និង​មិត្តភាព​ដ៏​ជ្រាល​ជ្រៅ​របស់​ពួក​គេ​ចំពោះ​ប្រជាជន​កម្ពុជា ហើយ​ខ្ញុំ​​សូម​ជូន​ពរ​ប្រជាជន​ចិន និង​កម្ពុជា ឱ្យ​មាន​វិបុលភាព និង​មិត្តភាព​ជា​រៀងរ​ហូត​”

ឯក​ឧត្តម ស៊ី ជីនភីង ប្រធានាធិបតី
នៃសាធារណរដ្ឋប្រជាមានិតចិន

ការ​ថ្វាយ​គ្រឿង​ឥស្សរិយ​យស​ខ្ពស់​បំផុត «​រដ្ឋ​មិត្រភរណ៍​» នា​ឱកាស​នេះ គឺ​ជា​ការ​​បញ្ជាក់​ថា ព្រះ​រាជ​វង្សា​នុវង្ស​កម្ពុជា បាន​ដើរ​តួនាទី​យ៉ាង​សំខាន់ និង​មិន​អាច​ជំនួស​បាន​ក្នុង​ចំណង​​មិត្ត​ភាព​​​ចិន-កម្ពុជា ដែល​ក្នុង​នោះ​សម្តេច​ព្រះ​វរ​រាជ​មាតា​​ជាតិ​​ខ្មែរ ​ព្រះ​អង្គ​បាន​បំពេញ​​ព្រះ​រាជ​តួនាទី​យ៉ាង​​សំខាន់​បំផុត ក្នុង​បុព្វ​ហេតុ​នៃ​ចំណង​​មិត្តភាព​​រវាង​ប្រទេស​ទាំង​ពីរ ក្នុង​រយៈ​ពេល​ជាង ៦០​ឆ្នាំកន្លង​មក​នេះ​។

ថ្លែង​ក្នុង​ឱកាស​នេះ ឯក​ឧត្តម ស៊ី ជីនភីង ប្រធានាធិបតី នៃសាធារណរដ្ឋប្រជាមានិតចិន បាន​​លើក​ឡើង​ថា សម្តេច​ព្រះ​មហា​វរ​រាជ​មាតា​ជាតិ​ខ្មែរ​ ព្រះ​អង្គ​គឺ​ជា​សាក្សី​​ដ៏​សំខាន់ និង​ជា​អ្នក​ជំរុញ​នូវ​ចំណង​មិត្តភាព​ចិន​-​កម្ពុជា ចាប់​តាំង​ពី​ពេល​ដែល​ទ្រង់​បាន​ដង្ហែ​ព្រះ​រាជ​ដំណើរ​ទស្សន​កិច្ច នៃ​ព្រះ​ករុណា ​​ព្រះ​មហា​វីរ​ក្សត្រិយ៍ ព្រះ​បរម​រតន​កោដ្ឋ ជា​លើក​ដំបូង​មក​កាន់​ប្រទេស​ចិន នៅក្នុង​ឆ្នាំ​១៩៥៨​ មក​ម្ល៉េះ​៕

______________________________________________________________
អាន​ផង​ដែរ​៖
១. ថ្វាយ​គ្រឿង​ខត្តិយរាជ​ឥស្សរិយាភរណ៍​ចំពោះ​ព្រះ​មហា​ក្សត្រិយ៍​កម្ពុជា
២. គ្រឿង​ឥស្សរិយ​យស​ជាន់​ខ្ពស់​ផ្កា​ស្បៃ​រឿង​ទេស​នៃ​ជប៉ុន
៣. គ្រឿង​រាជ​ឥស្សរិយ​យស​លាន​ជាង​រុម​ខាវ
៤. គ្រឿង​ឥស្សរិយ​យស «​រដ្ឋ​មិត្រភរណ៍​» ឬ​គ្រឿង​ឥស្សរិយ​យស​ដ៏​ខ្ពង់​ខ្ពស់​ឧត្តុង្គ​ឧត្ដម​មិត្តភាព នៃ​សាធារណ​រដ្ឋ​ប្រជាមានិត​ចិន

កម្រង​ព្រះ​ឆាយា​លក្ខណ៍​នៃ​សម្ដេច​ព្រះ​មហា​ក្សត្រីយ៍ ព្រះ​វរ​រាជ​មាតា​ជាតិ​ខ្មែរ ជាមួយ​បណ្ដា​​ថ្នាក់​ដឹក​នាំ​ជាន់​ខ្ពស់​នៃ​សាធារណ​រដ្ឋ​ប្រជាមានិត​ចិន ថ្ងៃ​ព្រហស្បតិ៍ 5 ខែវិច្ឆិកា 2020

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ, 中文.
1 comment so far

___________________________________________________________
អាន​ផង​ដែរ ៖
១. កម្រង​ព្រះ​ឆាយា​លក្ខណ៍​នៃ​ព្រះ​ករុណា ព្រះ​បរមរតន​កោដ្ឋ ជាមួយ​បណ្ដា​​ថ្នាក់​ដឹក​នាំ​ជាន់​ខ្ពស់​នៃ​សាធារណ​រដ្ឋ​ប្រជាមានិត​ចិន

Repost: ប្រទេស​ហត្ថលេខី​នៃ​កិច្ច​ព្រម​ព្រៀង​សន្តិភាព​ទីក្រុង​ប៉ារីស ២៣ តុលា ១៩៩១ ថ្ងៃសៅរ៍ 24 ខែតុលា 2020

Posted by សុភ័ក្ត្រ in ប្រវត្តិសាស្ត្រ.
add a comment

ក្រៅ​អំពី​ភាគី​ជម្លោះ​ដែល​តំណាង​ឲ្យ «​កម្ពុជា​» ធ្វើ​ការ​ចុះ​ហត្ថលេខា​លើ​កិច្ច​ព្រម​ព្រៀង​សន្តិភាព កាល​ពី​ថ្ងៃ​ទី​២៣ ខែ​តុលា ឆ្នាំ​១៩៩១ នៅ​ទីក្រុង​ប៉ារីស ប្រទេស​បារាំង​នោះ នៅ​មាន​តំណាង​រដ្ឋ​ចំនួន​១៨​ទៀត ដែល​បាន​ធ្វើ​ជា​ប្រទេស​ហត្ថលេខី​លើ​កិច្ច​ព្រម​ព្រៀង​នោះ​។ ប្រទេស​ទាំង​នោះ​ រួម​មាន ៖

  1. កាណាដា
  2. ចិន
  3. ជប៉ុន
  4. ថៃ
  5. បារាំង
  6. ប្រុយ​ណេ
  7. ភីលីព្ពីនស៍
  8. ម៉ាឡេស៊ី
  9. យូហ្គូស្លាវី
  10. លាវ
  11. វៀតណាម
  12. សហរដ្ឋ​អាមេរិក
  13. សិង្ហបុរី
  14. អង់គ្លេស
  15. អតីត​សហ​ភាព​សូវៀត
  16. ឥណ្ឌា
  17. ឥណ្ឌូណេស៊ី និង
  18. អូស្ត្រាលី

ជយោ! ខួបឆ្នាំទី២៩ នៃកិច្ចព្រមព្រៀងសន្តិភាព ទីក្រុងប៉ារីស ស្ដីអំពីកម្ពុជា!

___________________________________________________
អាន​ផង​ដែរ​៖
១. សន្តិភាព​នៃ​កម្ពុជា​មិន​បាន​មក​ពី​​ជន​ណា​ម្នាក់ ឬ​ក្រុម​ណា​មួយ​ផ្ដាច់​មុខ​ទេ

ព្រះ​រាជ​តម្រិះ​រឿង​កោដ្ឋ​សព​អង្គ​សម្ដេច​ព្រះ​ហរិរក្ស ថ្ងៃអង្គារ 20 ខែតុលា 2020

Posted by សុភ័ក្ត្រ in ថៃ​ស្ថាបនា​ក្សត្រិយ៍​ខ្មែរ, បុគ្គល​សំខាន់, ប្រវត្តិសាស្ត្រ.
3 comments

កកន ៖ ក្នុង​ឱកាស​​ខួប​ឆ្នាំ​ទី​១៦០ សោយ​ព្រះ​ទិវង្គត​នៃ​ព្រះ​បាទ​សម្ដេច​ព្រះ​ហរិរក្សរាមា​ឥស្សរាធិបតី ព្រះ​អង្គ​ដួង ក្នុង​ព្រះ​បរម​កោដ្ឋ នេះ ស្រែ​ខ្មុក​មាន​​កិត្តិយស​លើក​យក ដោយ​បាន​ព្យាយាម​បក​ប្រែ​ទាំង​ស្រុង​នូវ​អត្ថបទ​មួយ​ដែល​គិត​ថា​មាន​តម្លៃ​ជា​ប្រវត្តិសាស្ត្រ​ពី​​កម្រង​សៀវភៅ ថៃ​ស្ថាបនា​ក្សត្រិយ៍​ខ្មែរ ដែល​រៀប​រៀង​ដោយ​​លេខាធិការដ្ឋាន​គណៈ​រដ្ឋមន្ត្រី​ថៃ​​​។

អត្ថបទ​ដែល​លើក​យក​មក​ដាក់​នេះ​បាន​រៀប​រាប់​យ៉ាង​លម្អិត​លម្អន់​មួយ​ពី​ទំនាក់​ទំនង​នគរ​ខ្មែរ​យើង​និង​សៀម​កាល​ណុះ ក្រោយ​ព្រះ​ករុណា ព្រះ​បរម​កោដ្ឋ​ស្ដេច​សោយ​ព្រះ​ទិវង្គត​ និង​វា​ក៏​បាន​បង្ហាញ​ពី​មនោ​សញ្ចេតនា​ដ៏​គួរ​រំភើប​មួយ​រវាង​ព្រះ​ចៅ​ផែន​ដី​សៀម ព្រះ​បាទ​សម្ដេច​ព្រះ​ចម​ក្លៅ​ចៅ​យូហួ ឬ​រាមា​ទី​៤ និង​ព្រះ​ករុណា ព្រះ​បរម​កោដ្ឋ​ នៃ​យើង​។ ដោយ​មិន​មាន​ការ​បក​ស្រាយ​បន្ថែម ខ្ញុំ​សូម​អញ្ជើញ​លោក​អ្នក​អាន​សេចក្ដី​ប្រែ​ទាំង​ស្រុង​ ​ដូច​ខាង​ក្រោម ៖

ព្រះ​រាជ​តម្រិះ​រឿង​កោដ្ឋ​សព​អង្គ​សម្ដេច​ព្រះ​ហរិរក្ស​​
ព្រម​ទ្រង់​បញ្ជា​ឲ្យ​ការ​ពារ​រក្សា​ស្រុក​ខ្មែរ

សុភ​អក្សរ​មក​ដល់ អង្គ​ព្រះ​នរោត្ដម​ព្រហ្ម​បរិ​រក្សា​មហា​ឧបរាជ អង្គ​ព្រះ​ហរិរាជ​តន័យ​ក្រៃ​កែវ​ហ្វា ពញា​ព្រះ​ខ្មែរ ក្រុង​ឧត្ដុង្គ​មាន​ជ័យ

ដោយ​មាន​ព្រះ​បរម​រាជ​ឱង្ការ​មាន​ព្រះ​បន្ទូល​សូរសីហនាទ​ត្រាស់​បង្គាប់​លើ​ត្បូង បញ្ញា​ឲ្យ​ផ្ដល់​ដំណឹង​មក​ថា​អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី មាន​សុភ​អក្សរ​ឲ្យ​ព្រះ​ពិពិធ​រាជា​ក្រុង​បាត់​ដំបងយក​ចូល​ទៅ​ក្រុង​ទេព​មហា​នគរ នា​ថ្ងៃ​​ ៥​ ᧳ ១២ ឆ្នាំ​វក ទោ​ស័ក ថា​​អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី​​ឈឺ ​បាន​ទទួល​ដំណឹង​​ទ្រង់​មាន​ក្ដី​ព្រួយ​បារម្ភ​ខ្លាំង​ថា អង្គ​សម្ដេច​ព្រះ​ហរិរក្សា​មាន​វ័យ​វឌ្ឍនាការ​ច្រើន ជន្មាយុ​ដល់​៦៤-៦៥ ឆ្នាំ​ហើយ ពេល​នេះ​ក៏​ឈឺ​អស់​ពេល​ជា​យូរ​អាការ​រោគ​ស្ដាប់​មើល​ក៏​ច្រើន ក្រែង​ថា​អាការ​នឹង​ចុះ​ខ្សោយ​ខ្លាំង​ទៅ​ទើប​ប្រោស​បញ្ជា​ឲ្យ​ចម៉ឺន​ទិព្វ​សេនា បាឡាត់​ក្រុម​ព្រះ​តម្រួត​ក្នុង​ស្ដាំ ហ្លួង​ចិន្តា​រក្ស ក្រុម​មហា​ផ្ទៃ ​នាំ​ហ្មឺន​វិសេស​ពេទ្យា ហ្មឺន​ជ័យ​ពេទ្យា គ្រូ​​ហ្ម​ថ្នាំ ហ្មឺន​វាតា​ពិនាស គ្រូ​ហ្ម​ចាប់​សសៃ ហ្មឺន​ជ័យ​លោក​នាស គ្រូ​ហ្ម​មុខ​របួស ចុះ​ទូក​ចរចាប់​ចោរ ដែល​មាន​ហ្លួង​ស្រី​មហា​រាជា​ក្រុម​អាសា​ចាម​ជា​​អ្នក​បញ្ជា​ទូក​ ដោយ​នាំ​ព្រៃ​ពល​ទាហាន​និង​នាំ​ទៅ​ជាមួយ​នូវ​គ្រឿង​​សាស្ត្រា​វុធ​ចេញ​មក​ល្បាត​នៅ​ឯ​ផ្ទៃ​សមុទ្ទ​បាន​ចុះ​ទៅ​លឿន​ពី​ក្រុង​ទេព​មហា​នគរ​​។

នៅពេល​ចម៉ឺន​ទិព្វ​សេនា ហ្លួង​ចិន្ដា​រក្ស ជាមួយ​គ្រូ​ហ្ម​ទាំង​៤​រូប​ ក្រាប​ថ្វាយ​បង្គំ​លា​ហើយ​​អញ្ជើញ​សុភ​អក្សរ​ចុះ​ទូក​ចរចាប់​ចោរ​ជិះ​ចុះ​ទៅ​ពី​ក្រុង​ទេព​មហា​នគរ​ហើយ តែ​នៅ​ថ្ងៃ ៥ ᧺ ១២ ឆ្នាំ​វក​ ទោ​ស័ក អស់​ពេល​៥​ថ្ងៃ​មក ទូក​នៅ​​ឆ្លង​ដី​កោះ​នៅ​ឡើយ រហូត​មក​ដល់​ថ្ងៃ ៤ ᧡ ១ មាន​សំបុត្រ​​​របស់​ចាងហ្វាយ​ក្រុម​ព្រះ​តម្រួត​ហ្លួង​និករ​ចំនង្គ ហ្លួង​ត្រៃទេព ខ្ញុំ​ហ្លួង​ដែល​បាន​ឲ្យ​មក​ស្ដាប់​រាជការ​ឯ​ក្រុង​បាត់ដំបង ជាមួយ​ព្រះ​គទាធរធរណិន្ទ្រ ក្រុម​ការ​បញ្ជូន​មក​ដល់​ក្រុង​ទេព​មហា​នគរ ចែង​សេចក្ដី​ថា ពញា​រតនា​វិសេស​ភូ​សម្រេច​រាជការ​ស្រុក​ស្វាយ​ចេក ដែល​អង្គ​សម្ដេច​ព្រះ​ហរិរក្សារាម​មហាឥស្សា​ធិបតី​រាប់​ថា​ជា​ហ្ម សូម​ចេញ​ទៅ​ព្យាបាល​រោគ​ពី​មុន​ពេល​នេះ​ទៅ​នា​ខែ​​ភទ្របទ បាន​ត្រឡប់​មក​ដល់​ក្រុង​បាត់ដំបង នា​ថ្ងៃ ៧ ᧭ ១២ ចែង​សេចក្ដី​ថា ពញា​រតនា​វិសេស​ចេញ​ទៅ​នៅ ឯ​ក្រុង​ឧត្ដុង្គ​មាន​ជ័យ​២៦​ថ្ងៃ បាន​សួរ​អាការ​ដែល​ពញា​ព្រះ​ខ្មែរ​ផ្ដល់​រាល់​ថ្ងៃ នា​ថ្ងៃ ៥ ᧤ ១២ ពញា​ព្រះ​ខ្មែរ​ថា អាការ​ចុះ​ខ្សោយ​ខ្លាំង​។ ព្រឹក​ឡើង​នា​ថ្ងៃ ៦ ᧥ ១២ (* ថ្ងៃ​ទី​១៩ ខែ​តុលា ឆ្នាំ​១៨៦០) អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី​ទ្រង់​ពិរាល័យ​។ អង្គ​ព្រះ​នរោត្ដម​ព្រហ្ម​បរិរក្សា​មហា​ឧបរាជ ពញា​ព្រះ​ខ្មែរ​​រក្សា​សព​ទុក​ក្នុង​មឈូស ហើយ​បាន​កេណ្ឌ​ព្រៃ​ការពារ​​ប៉ម ទ្វារ ជើង​បន្ទាយ​ក្រុង​ឧដុង្គ​មាន​ជ័យ​ឲ្យ​​រឹង​មាំ ទើប​មាន​ព្រះ​បរម​រាជ​ឱង្ការ​តម្រាស់​​ថា បើ​អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី​ទ្រង់​ពិរាល័យ​មែន​ដូច​ដំណឹង​ដែល​បាន​ស្ដាប់​មក អង្គ​ព្រះ​នរោត្ដម​ព្រហ្ម​បរិរក្សា​មហា​ឧបរាជ អង្គ​ព្រះ​ហរិរាជតន័យ​ក្រៃ​កែវហ្វា ពញា​ព្រះ​ខ្មែរ​​ក៏​គង់​នឹង​ផ្ដល់​ដំណឹង​មក​ដល់​ក្រុង​ទេព​មហា​នគរ តែ​គ្រា​នេះ​រាជការ​ស្រុក​ខ្មែរ​កំពុង​មាន​សឹក​ជាមួយ​យួន អង្គ​ព្រះ​នរោត្ដម ​និង​ពញា​ព្រះ​ខ្មែរ​ក៏​កំពុង​គិត​វិធី​ការពារ​រក្សា​ស្រុក​ទេស​គ្រប់​ប្រការ ទើប​នៅ​មិន​ទាន់​មាន​ពេល​ធ្វើ​លិខិត​ផ្ដល់​ដំណឹង​។

ដូច​ជ្រាប​ដំណឹង​នេះ​ទ្រង់​ព្រះ​រាជ​តម្រិះ​ឃើញ​ថា ពញា​រតនា​វិសេស​ជា​ហ្ម​បាន​ចេញ​ទៅ​នៅ​ក្រុង​ឧដុង្គ​មាន​ជ័យ ចូល​មក​ចែង​សេចក្ដី​ដែល​ខ្ញុំ​ហ្លួង​ក្រុង​បាត់ដំបង​ដូច​នេះ មើល​ក៏​ឃើញ​ជា​ដំណឹង​ពិត​ប្រាកដ ក៏​គួរ​ឲ្យ​ជឿ​ជាក់​បាន​។ ពេល​នេះ​ទ្រង់​ព្រះ​រាជ​កង្វល់ មាន​សេចក្ដី​អាល័យ​ស្ដាយ​អង្គ​សម្ដេច​ព្រះ​ហរិរក្សារាម​មហា​ឥស្សរា​ធិបតី​ជា​ខ្លាំង ទើប​ប្រោស​ព្រះ​រាជានុញ្ញាតឲ្យ​នាយ​ត្រៃភក្ដី​នាយ​វេន ក្រុម​ព្រះ​តម្រួត​ក្នុង​ស្ដាំ ប្រញាប់​អញ្ជើញ​សុភ​អក្សរ​ច្បាប់​នេះ​តាម​មក​ឲ្យ​ទាន់​ចម៉ឺន​ទិព្វ​សេនា​ ឲ្យ​ចម៉ឺន​ទិព្វ​សេនា ហ្លួង​ចិន្ដា​រក្ស នាយ​ត្រៃភក្ដី ប្រញាប់​ទៅ​ស្ដាប់​ដំណឹង​ដំណឹង​អង្គ​សម្ដេច​ព្រះ​ហរិរក្សារាម​មហា​ឥស្សរាធិបតី និង​ដំណឹង​រាជការ​ស្រុក​យួន ស្រុក​ខ្មែរ ចូល​ទៅ​ឲ្យ​ច្បាស់​ប្រាកដ​។ ឲ្យ​អង្គ​ព្រះ​នរោត្ដម​ព្រហ្ម​បរិរក្សា​មហា​ឧបរាជ​ អង្គ​ព្រះ​ហរិរាជ​តន័យ​ក្រៃ​កែវហ្វា ពញា​ព្រះ​ខ្មែរ​​រួម​ជួយ​គ្នា​ការពារ​បន្ទាយ​ច្រក​ផ្សេង​ៗ​ឲ្យ​មាំ​មួន​បិទ​ជិត​គ្រប់​កន្លែង គ្រប់​តំបន់ ខ្លាច​ថា​យួន​ដឹង​ថា​អង្គ​សម្ដេច​ព្រះ​ហរិរក្សារាម​មហា​ឥស្សរាធិបតី​ទ្រង់​ពិរាល័យ​ នឹង​លើក​ទ័ព​រុក​ចូល​ទឹក​ដី​ស្រុក​ខ្មែរ​។ ប្រសិន​បើ​ដូច​នោះ​ក៏​គិត​ស៊ូ​ចម្បាំង​ឲ្យ​បាន​ខ្លាំង​ក្លា កុំ​ឲ្យ​បាត់​បង្អែក​ ឬ​​​បាត់​បង់​ទឹក​ដី​ឲ្យ​ទៅ​យួន​ដោយ​ប្រការ​ណា​មួយ​ឡើយ​។ ការងារ​ជា​ប្រការ​ណា​ឲ្យ​ប្រញាប់​មាន​សុភ​អក្សរ​ប្រាប់​ចូល​ទៅ​ក្រុង​ទេព​មហា​នគរ​ជា​ប្រញាប់​​។ បើ​នឹង​ត្រូវ​ចម្បាំង​ធំ​ជាមួយ​យួន​ក៏​នឹង​បាន​តែង​តាំង​ឲ្យ​កង​ទ័ព​គោក ទ័ព​ទឹក​ ប្រញាប់លើក​ចេញ​មក​ជួយ​គិត​រាជការ​ត​ទៅ​​។

គ្រា​នេះ​បើ​អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី​ទ្រង់​ពិរាល័យ​ហើយ ក៏​ឲ្យ​អង្គ​ព្រះ​នរោត្ដម​ព្រះ​បរិរក្សា​មហា​ឧបរាជ អង្គ​ព្រះ​ហរិរាជ​តន័យ​ក្រៃ​កែវហ្វា ពញា​ព្រះ​ខ្មែរ​​ចាត់​ចែង​ការ​សព​អង្គ​សម្ដេច​ព្រះ​ហរិរក្សា​រាម​មហា​ឥស្សាធិបតី​ឲ្យ​សម​គួរ​កិត្តិយស​ដូច​ស្ដេច​ផែន​ដី​ស្រុក​​ខ្មែរ​ពី​មុន​​​បាន​ធ្វើ​។ គ្រា​នេះនឹង​ប្រោស​ព្រះ​រាជានុញ្ញាត​ឲ្យ​ចៅ​ភ្នាក់​ងារ​ចាត់​កោដ្ឋ ព្រម​គ្រឿង​អាវ​ទ្រង់​​ប្រពាត ម្កុដ​សម្រាប់​​ប្រដាប់​សព​ដែល​សម​គួរ​ចៅ​មឿង​ប្រទេស​រាជ​ចេញ​មក ព្រះ​រាជ​ទាន​ដោយ​ទ្រង់​​ប្រកាន់​តាម​ទម្លាប់​ព្រះ​រាជ​ទាន​ដល់​ចៅ​ប្រទេស​រាជ​ធំ​នោះ​ ក៏​គង់​នឹង​មិន​ទាន់​ពេល​ចំអាស​សព​អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី ហើយ​ក្រុង​ឧដុង្គ​មាន​ជ័យ​ក៏​នៅ​មិន​ទាន់​មាន​សុភ​អក្សរ​ប្រាប់​ចូល​មក​ដល់​ក្រុង​ទេព​មហា​នគរ ថែម​នៅ​មិន​ទាន់​ជ្រាប​ថា​គ្រា​នេះ​អង្គ​ព្រះ​នរោត្ដម​ព្រហ្ម​បរិរក្សា​មហា​ឧបរាជ ព្រះ​ហរិរាជ​តន័យ​ក្រៃ​កែវហ្វា ពញា​ព្រះ​ខ្មែរ នឹង​ពិភាក្សា​យោបល់​ជាមួយ​គ្នា​នឹង​សុំ​ចាត់​ចែង​ការ​សព​អង្គ​សម្ដេច​ព្រះ​ហរិ​រក្សា​រាម​មហា​ឥស្សរាធិបតី​យ៉ាង​ណា នឹង​ចង់​បាន​ធ្វើ​អ្វី​ខ្លះ​ ឬ​សុំ​ធ្វើ​ការ​សព​ជា​ការ​ធំ​តូច​ត្រឹម​ណា​សម​គួរ​តាម​កម្លាំង​ស្រុក​ទេស​ខ្មែរ​នៅ​កាល​គ្រា​នេះ​ក៏​មិន​ជ្រាប​​យ៉ាង​ជាក់​លាក់ ទើប​ព្រះ​រាជានុញ្ញាត​ឲ្យ​ខ្ញុំ​ហ្លួង​ពួក​នេះ​ចេញ​មក​ស្ដាប់​ការ​មើល​ជា​មុន និង​គ្រឿង​សម្រាប់​​ទុក​ដាក់​សព​ឲ្យ​បាន​ល្អ​សម​គួរ​ចំពោះ​ចៅ​ប្រទេស​រាជ​តាម​តាម​ទំនៀម​ធ្លាប់​​ព្រះ​រាជ​ទាន​​ជា​យស​ចៅ​ប្រទេស​រាជ​នោះ​ ហើយ​ចំពោះ​វត្ថុ​ដែល​ជា​របស់​ធំ​របស់​ធ្ងន់ គឺ​កោដ្ឋ​​ខាង​ក្នុងខាង​ក្រៅ មាន​​គ្រែ​វែន​ហ្វា​ជើង​២​ជាន់​ខ្លះ​៣​ជាន់​ខ្លះ​ និង​មាន​ទម្រ​ឈើ​បិទ​មាស​ជា​កន្លែង​ដោត​គ្រឿង​ខ្ពស់​ទាំង​សម្រាប់​តាំង​ជុំ​វិញ​កោដ្ឋ គ្រឿង​ធ្ងន់ គ្រឿង​ធំ យ៉ាង​នេះដែល​នឹង​យក​ទៅ​មឿង​ប្រទេស​រាជ​ដែល​សព​នៅ​នោះ​ដែល​អាច​ទៅ​តាម​ទូក​បាន​ ដូច​មឿង​ជៀងហ្ម៉ៃ មឿង​នគរ​លាំប៉ាង មឿង​លាំពូន និង​មឿង​នគរ​ស្រី​ធម្មរាជ​នោះ​ហើយ ក៏​ធ្លាប់​ព្រះ​រាជ​ទាន​ពេញ​លេញ​គ្រប់​យ៉ាង​។

ពេល​ខ្លះ​ឯ​មឿង​នគរ​ស្រី​ធម្មរាជ​ជា​មឿង​ជិត​ឆ្នេរ​ទន្លេ​ទៅ​មក​ងាយ​ស្រួល​ នៅ​ពេល​យក​សព​ចេញ​មក​មេរុ ធ្លាប់​ព្រះ​រាជ​ទាន​ឲ្យ​ខោល​ឲ្យ​អាយ៉ង​ទៅ​លេង​ក៏​មាន និង​វត្ថុ​ធ្ងន់​ដែល​ជា​គ្រឿង​សម្រាប់​ប្រដាប់​សព​យ៉ាង​នេះ បើ​មធ្យោបាយ​ទៅ​មឿង​ប្រទេស​រាជ​នោះ​ត្រូវ​ធ្វើ​មាន​ជើង​គោក​​តាម​ទី​ជិត​ឆ្ងាយ​ក្ដី ត្រូវ​ប្រើ​ការ​កម្លាំង​ដំរី កម្លាំង​រទេះ បញ្ជូន​តាម​ជើង​គោក​ ឬ​ឆ្លង​ទឹក​ដោយ​ប្រការ​ណា ធ្លាប់​មាន​លិខិត​បញ្ជា​​ទៅ​ប្រឹក្សា​អ្នក​មាន​តំណែង​បន្ទាប់​រក្សា​មឿង និង​ជា​ម្ចាស់​បុណ្យ​នោះ​ៗ ឲ្យ​ព្រម​គ្នា​ជាមួយ​ខ្ញុំ​ហ្លួង​គិតស្រប​គ្នា​ថា​អ្វី​ដែល​ត្រូវ​លី​អ្វី​ដែល​ត្រូវ​រែក ឬ​នឹង​ត្រូវ​ដាក់​តាម​ដំរី​តាម​រទេះ​ដឹក​ជញ្ជូន​ទៅ​ឲ្យ​ដល់​បាន​​។ វត្ថុ​ណា​ដែល​ទៅ​មិន​បាន នឹង​ទៅ​ផ្លូវ​ណា ពេល​ណា​ ត្រូវ​គិត​គូរ​រឿង​ពេល​វេលា​រដូវ​ដែល​គួរ​ទៅ​បាន​ដោយ​ស្រួល​ហើយ ទើប​ព្រះ​រាជ​ទានទៅ​ឲ្យ​ទាន់​ការ​កំណត់​របស់​ម្ចាស់​បុណ្យ​។ ក៏​នៅ​គ្រា​នេះ​ មាន​មធ្យោបាយ​ដែល​នឹង​ដឹក​ជញ្ជូន​វត្ថុ​គ្រឿង​ប្រដាប់​សព​អង្គ​សម្ដេច​ព្រះ​ហរិ​រក្សារាម​មហា​ឥស្សរាធិបតី​ ដែល​គួរ​នឹង​ព្រះ​រាជ​ទាន​ចេញ​មក​នោះ​ក៏​មាន​ពីរ​ផ្លូវ គឺ​ចេញ​ពី​ក្រុង​មក​ផ្លូវ​សមុទ្ទ​ រួច​ឡើង​គោក​តាម​ផ្លូវ​កំពត មួយ​ផ្លូវ​ គឺ​ចេញ​ពី​ក្រុង​​ដោយ​ជើង​ទឹក រួច​ឡើង​គោក​ឯ​មឿង​កបិន្ទ្រ​បុរី ធ្វើ​ដំណើរ​តាម​ជើង​គោក​មក​ចុះ​ទូក​​ឯ​ក្រុង​បាត់ដំបង​​បញ្ជូន​មក​តាម​ទន្លេ​សាប​​ មួយ​ផ្លូវ​ទៀត​ ត្រូវ​ធ្វើ​ដំណើរ​តាម​ផ្លូវ​គោក​​ទាំង​ពីរ​ផ្លូវ​ នឹង​ទៅ​ផ្លូវ​ទូក​ឲ្យ​ដល់​ក្រុង​ឧដុង្គ​មាន​ជ័យ​តែ​ម្ដង​មិន​បាន​ទៀត​ឡើយ​។

ទាំង​នោះ​ទ្រង់​ព្រះ​រាជ​តម្រិះ​ឃើញ​ថា កោដ្ឋ​ក្នុង​កោដ្ឋ​ក្រៅ គួរ​ត្រូវ​តែ​ព្រះ​រាជ​ទាន​ឲ្យ​បាន គ្រែ​វែន​ហ្វា​ជា​របស់​ធំ គ្រឿង​ខ្ពស់​ជា​របស់​ច្រើន​នឹង​សែង​រែក​លើក​ជញ្ជូន​ទៅ​ដោយ​ផ្លូវ​គោក​ច្រើន​យប់​លំបាក សុំ​ឲ្យ​អង្គ​ព្រះ​នរោត្ដម ជាមួយ​អង្គ​ព្រះ​ហរិរាជ​តន័យ​ និង​ពញា​ព្រះ​ខ្មែរ​គិត​ធ្វើ​ចម្លង​បែប ឲ្យ​សម​គួរ​ទទួល​យក​បាន​។ គ្រឿង​ខ្ពស់​ជា​របស់​ព្រះ​រាជ​ទាន​ទៅ​ជា​គ្រឿង​យស​ពី​មុន​នោះ​ក៏​មាន​ស្រាប់​ ឲ្យ​ធ្វើ​ជើង​ដោត​ទៅ​នឹង​កម្រាល​ហើយ​ដោត​គ្រឿង​ខ្ពស់​ជុំ​វិញ​សព​អង្គ​សម្ដេច​ព្រះ​ហរិ​រក្សារាម​មហា​ឥស្សរាធិបតី​។ ចំណែក​​​ឯ​​ខោ​អាវ​មួក​មាលា ម្កុដ គ្រឿង​ប្រកប​ផ្សេង​ៗ ដែល​ជា​របស់​ព្រះ​រាជ​ទាន​ពី​មុន​នោះ វត្ថុ​ណា​ៗ​ពេល​ចំអាស​សព​ហើយ ឲ្យ​គិត​គ្នា​បំពាក់​ប្រដាប់​សព​ទៅ​តាម​ការ​នោះ​ក៏​ជា​ការ​សម​ស្រប​ស្រេច​ហើយ​។ អ្វី​ដែល​នៅ​សល់​នោះ​​ជាមួយ​នឹង​ពាន​ស្លា គ្រឿង​ច្រូច​​ទឹក​ គ្រឿង​​ឧបភោគ​បរិភោគ​ ដែល​ជា​របស់​ព្រះ​រាជ​ទាន​ទាំង​ពួង ក៏​ឲ្យ​ចាត់​ចែង​រៀប​រៀង​តាំង​ក្បែរ​​សព​ឲ្យ​សម​គួរ​ជា​កិត្តិយស​ ទម្រាំ​នឹង​ដល់​ពេល​ព្រះ​រាជ​ទាន​ភ្លើង​​។

គ្រា​​នេះ​មាន​ដំណឹង​មក​ថា​អង្គ​សម្ដេច​ព្រះ​ហរិ​រក្សារាម​មហា​ឥស្សរាធិបតី​ទ្រង់​ពិរាល័យ​ហើយ ព្រះ​បាទ​សម្ដេច​ព្រះ​ចម​ក្លៅ​ចៅយូហួ ទ្រង់​ព្រះ​ទោមនស្ស​ក្នុង​ព្រះ​រាជ​ហឫទ័យ មាន​សេចក្ដី​អាល័យ​សោក​ស្ដាយ​ខ្លាំង​ ទ្រង់​ព្រះ​រាជ​តម្រិះ​ថា បក​អាការ​ដំណឹង​ឈឺ​ចោល​មក​នោះ​ចួន​ណាស់ មិន​ទាន់​ព្រះ​រាជ​ទាន​ពេទ្យ​ហ្ម​ពេទ្យ​ថ្នាំ ដែល​ធ្លាប់​ប្រើ​ពី​មុន​មក​ចេញ​ទៅ​រក្សា​ព្យាបាល​ឲ្យពេញ​ដៃ​។ សុភ​អក្សរ​ប្រាប់​ដំណឹង​ឈឺ​ចូល​មក​ដល់​ក្រុង​នៅ​វេលា​ក្រោយ​ដែល​ទ្រង់​ជ្រាប​មក​ថា​អង្គ​សម្ដេច​ព្រះ​ហរិរក្សា​រាម​មហា​ឥស្សរា​ធិបតី​​ទទួល​ពិរាល័យ​ទៅ​ហើយ​។ គ្រា​នេះ​ព្រះ​រាជ​ទាន​សំពត់​ត្រៃ​១០​ត្រៃ ឲ្យ​នាយ​ត្រៃ​ភក្ដី​យក​មក​ធ្វើ​បុណ្យ បង្សុកុល​ក្នុង​សព​អង្គ​សម្ដេច​ព្រះ​ហរិរក្សារាម​មហា​ឥស្សរាធិបតី​មុន ជា​របស់​​គួរ​នឹង​ព្រះ​រាជ​ទាន​ឲ្យ​ធ្វើ​បុណ្យ​ពេល​ដែល​ឈឺ​ធ្ងន់​ ដោយ​ប្រសិន​ថា បើ​ដំណឹង​ថា​អង្គ​សម្ដេច​ព្រះ​ហរិ​រក្សារាម​មហា​ឥស្សរាធិបតី​ទទួល​ពិរាល័យ​នេះ ត្រឡប់​ជា​រឿង​មិន​ពិត​​ទៅ ក៏​បាន​មាន​ព្រះ​បរម​រាជ​ឱង្ការ​តម្រាស់​បញ្ជា​ហាម​នាយ​ត្រៃ​ភក្ដី​ចេញ​មក ហើយ​ថា​កុំ​ឲ្យ​យក​សុ​ភ​អក្សរ​ច្បាប់​ដាក់​ដាក់​ពី​លើ​ឡើយ តែ​សំពត់​ត្រៃ​១០​ត្រៃ​នោះ ឲ្យ​ប្រគល់​ឲ្យ​អង្គ​ព្រះ​នរោត្ដម​ព្រះ​បរិរក្សា​មហា​ឧបរាជ និង​អង្គ​ព្រះ​ហរិរាជ​តន័យ​ក្រៃ​កែវហ្វា​ ទទួល​យក​ទៅ​ឲ្យ​អង្គ​សម្ដេច​ព្រះ​ហរិរក្សា​រាម​មហា​ឥស្សរាធិបតី ប្រាប់​ថា ជា​របស់​ព្រះ​រាជ​ទាន​មក​ឲ្យ​ធ្វើ​បុណ្យ​រំដោះគ្រោះ​បាប ដើម្បី​ឲ្យ​រោគា​ទាំង​ឡាយ​ជា​ស្រឡះ​​បាត់​ទៅ​ហោង​។

បើ​ចម៉ឺន​ទិព្វ​សេនា ហ្លួង​ចិន្ដា​រក្ស នាយ​ត្រៃ​ភក្ដី ចេញ​មក​ដល់​ទទួល​រាជការ​បាន​សេចក្ដី​ប្រការ​ណា កោដ្ឋ​ក្រៅ​កោដ្ឋ​ក្នុង​គួរ​នឹង​ឲ្យ​ទៅ​តាម​ផ្លូវ​ណា​នឹង​ធ្វើការ​សព នឹង​ឃើញ​ការ​គួរ​នឹង​ធ្វើ​ក្នុង​ការ​សព​អង្គ​សម្ដេច​ព្រះ​ហរិរក្សារាម​មហា​ឥស្សរាធិបតី​​ប្រការ​ណា ច្រើន​តិច​ត្រឹម​ប៉ុន​ណា នឹង​សុំ​ទុក​យូរ​ឆាប់​ត្រឹម​ណា នឹង​សុំបាន​ជ្រាប​ជា​ប្រាកដ​ហើយ​នឹង​ទ្រង់​ព្រះ​រាជ​តម្រិះ​ការ​ដែល​សម​គួរ​ហើយ នឹង​ចាត់​របស់​ព្រះ​រាជ​ទាន​ឲ្យ​ចៅ​ភ្នាក់​ងារចេញ​មក​បាន​តាម​វេលា​ប្រាថ្នា​។

ឲ្យ​អង្គ​ព្រះ​នរោត្ដម​ព្រហ្ម​បរិរក្សា​​មហា​ឧបរាជ អង្គ​ព្រះ​ហរិរាជ​តន័យ​ក្រៃ​កែវហ្វា ពញា​ព្រះ​ខ្មែរ​មាន​សុភ​អក្សរ​ឲ្យ​ចម៉ឺន​ទិព្វ​សេនា ហ្លួង​ចិន្តារក្ស នាយ​ត្រៃ​ភក្ដី ប្រញាប់​កាន់​ចូល​ទៅ​ ឯ​ក្រុង​ទេព​មហា​នគរ​ជា​ការ​បន្ទាន់​។

សុភ​អក្សរ​មក នា​ ថ្ងៃ​៦ ᧣ ១ ឆ្នាំ​វក ទោ​ស័ក (* ត្រូវ​នឹង​ថ្ងៃ​ទី​១៦ ខែ​វិច្ឆិកា ឆ្នាំ​១៨៦០)

លេខ
ចំណាត់​ថ្នាក់ កំណត់​ហេតុ រ. ៤ ច.ស.​១២២២
ឈ្មោះ សុភ​អក្សរ មក​អង្គ​ព្រះនរោត្ដម
ប្រវត្តិ បាន​មក​ពី​ក្រសួង​មហា​ផ្ទៃ

______________________________________________________
អាន​ផង​ដែរ ៖
១. ថៃ​ស្ថាបនា​ក្សត្រិយ៍​ខ្មែរ
២. អង្គ​សម្ដេច​ព្រះ​ហរិរក្ស​​ថ្វាយ​រាយការណ៍​អាការ​ប្រឈួន
៣. «វរ​វង្ស សូរ​វង្ស» អំណោយ​​ពី​អតីត​ព្រះ​ចៅ​ផែន​ដី​ខ្មែរ ថ្វាយ​អតីត​ព្រះ​ចៅ​ផែន​ដី​សៀម

សេចក្តី​ប្រកាស​ព័ត៌មាន​ស្តី​ពី​លទ្ធផល​ទស្សន​កិច្ច​ផ្លូវ​ការ​របស់​ឯក​ឧត្តម វ៉ាង យី ទី​ប្រឹក្សា​រដ្ឋ និង​ជា​រដ្ឋ​មន្រ្តី​ការ​បរទេស នៃ​សាធារណ​រដ្ឋ​ប្រជា​មានិត​ចិន នៅ​ព្រះ​រាជាណាចក្រ​កម្ពុជា នៅ​ថ្ងៃ​ទី ១១-១២ ខែ​តុលា ឆ្នាំ​២០២០ ថ្ងៃអង្គារ 13 ខែតុលា 2020

Posted by សុភ័ក្ត្រ in ប្រវត្តិសាស្ត្រ, 中文.
1 comment so far

___________________________________________________________
អាន​ផង​ដែរ ៖
១. ចុះ​ហត្ថលេខា​កិច្ច​ព្រម​ព្រៀង​ពាណិជ្ជកម្ម​សេរី​កម្ពុជា​-ចិន

ស្ដេច​យាង​សម្ពោធ​ប៉ុស្តិ៍​សុខភាព​សម្ដេច​ព្រះ​មហា​សង្ឃ​រាជ បួរ គ្រី​ – ព្រះ​ករុណា​ព្រះមហា​ក្សត្រ សីហមុនី ថ្ងៃសៅរ៍ 3 ខែតុលា 2020

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ.
add a comment

នាវេលាព្រឹកថ្ងៃទី០៣ ខែតុលា ឆ្នាំ២០២០ ព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រិយ៍ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឫទ័យស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីសម្ពោធប៉ុស្តិ៍សុខភាពសម្តេចព្រះមហាសង្ឃរាជ បួរ គ្រី – ព្រះករុណាព្រះមហាក្សត្រ សីហមុនី ស្ថិតក្នុងបរិវេណវត្តព្រះឥន្រ្ទសាមគ្គីធម៌ ភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល​៕

%d bloggers like this: