jump to navigation

WE ARE UNITY ថ្ងៃអង្គារ 19 ខែ​ឧសភា 2020

Posted by សុភ័ក្ត្រ in ពីនេះពីនោះ.
add a comment

៦៧​វស្សា មហា​មង្គល ថ្ងៃ​ព្រហស្បតិ៍ 14 ខែ​ឧសភា 2020

Posted by សុភ័ក្ត្រ in ពីនេះពីនោះ.
1 comment so far

King 67

អនុមោទនា ​វិសាខ​បូជា ព.ស.​២៥៦៤ ថ្ងៃពុធ 6 ខែ​ឧសភា 2020

Posted by សុភ័ក្ត្រ in ពីនេះពីនោះ.
1 comment so far

Visak2564

ពិសាខបូជា ឬ វិសាខបូជា (អានថា _ ខៈបូជា) ន. (បា. វិសាខ + បូជា) ឈ្មោះពិធីបុណ្យ ឬការធ្វើសក្ការបូជាក្នុងថ្ងៃពេញបូណ៌មីខែពិសាខ ជាថ្ងៃដែលព្រះសក្យមុនីសម្មាសម្ពុទ្ធទ្រង់ប្រសូត, ទ្រង់បានបរមាភិសម្ពោធិ, ទ្រង់រលត់ខន្ធចូលកាន់បរិនិព្វាន, ធ្វើរំឭកដល់ព្រះគុណរបស់ព្រះអង្គ, ជាការបូជាពិសេសមួយយ៉ាង សម្រាប់ពុទ្ធសាសនិកជនទាំងបព្វជិតទាំងគ្រហស្ថនាំគ្នាធ្វើរាល់ឆ្នាំ, រាប់ថាជាបុណ្យសម្រាប់ពុទ្ធសាសនាៈ ថ្ងៃពិសាខបូជា, ធ្វើពិសាខបូជា។ (វ. ខ្មែរ ទំព័រ ៧៥៩)

  • សម្រាប់​ឆ្នាំ​២០២០ នេះ ថ្ងៃ​វិសាខបូជា ត្រូវនឹងថ្ងៃ​ពុធ ទី​៦ ខែ​ឧសភា

____________________________________________
អានព័ត៌មាន៖

រណ្ដាប់​ទទួល​ទេវតា​នៅ​ផ្ទះ​ខ្ញុំ សម្រាប់​ឆ្នាំ​ជូត ទោ​​​ស័ក ច.ស.​១៣៨២ ថ្ងៃអង្គារ 14 ខែ​មេសា 2020

Posted by សុភ័ក្ត្រ in ពីនេះពីនោះ.
2 comments

ជា​រៀង​រាល់​ឆ្នាំ​ ខ្ញុំ​តែង​រៀប​ចំ​រណ្ដាប់​ទទួល​ទេវតា​ ដូច​ដែល​ប្រជា​ពល​រដ្ឋ​ខ្មែរ​ជា​ច្រើន​ទៀត​ក្នុង​កម្ពុជ​រដ្ឋ​​ប្រណិ​ប័តន៍​ផង​ដែរ​​។ ឆ្នាំ​នេះ​​គឺ​ជា​ឆ្នាំ​ទី​៣​ហើយ ដែល​ខ្ញុំ​បាន​ប្រារព្ធ​ពិធី​សែន​បុណ្យ​ចូល​ឆ្នាំ​ថ្មី នៅ​គេហ​ដ្ឋាន​ផ្ទាល់​។ ចំណែក​​គ្រឿង​រណ្ដាប់ ព្រម​ទាំង​ការ​តុប​តែង​លម្អ គឺ​ជា​ការ​រៀប​ចំ​តាម​បែប​ផែន​គ្រួសារ ដែល​បន្ត​អំពី​ជី​ដូន​ខ្ញុំ ជា​អ្នក​ប្រណិប័តន៍​ខ្ជាប់​និង​ព្រះ​ពុទ្ធ​សាសនា ប្រពៃណី និង​ទំនៀម​ទម្លាប់​​។

ខាង​ក្រោម​នេះ​ជា​​រណ្ដាប់​ទទួល​ទេវតា​ឆ្នាំ​ថ្មី ឆ្នាំ​ជូត ទោ​​ស័ក ច.ស.​១៣៨២ ដែល​ខ្ញុំ​បាន​រៀប​ចំ​សម្រាប់​ឆ្នាំ​នេះ​។

thumbnail_20200413_205553រណ្ដាប់​ទទួល​ទេវតា​នៅ​ផ្ទះ​ខ្ញុំ សម្រាប់​ឆ្នាំ​​ជូត ទោ​​​ស័ក ច.ស.​១៣៨២

រណ្ដាប់​ដែល​ខ្ញុំ​បាន​រៀប​ចំ​នា​ឆ្នាំ​នេះ​មាន ដូច​ជា ​៖

  1. ព្រះ​ពុទ្ធ​រូប​ស្នង​អង្គ​មួយ​​ជា​ប្រធាន​ ព្រម​ទាំង​គ្រឿង​សក្ការ​បូជា​មាន​ដូច​ជា​៖ ដើម​ចេក​មួយ​ដើម​អម​ដោយ​ស្លា​ធម៌​៤​, ផ្កា​ឈូក​១​ថូ​, បាយ​ស្រី​១​គូ​, ទៀន​៥, ធូប​៥​, លាច និង​ផ្កា​៥​
  2. ពាន​ទឹក​ចំនួន​១
  3. ថាស​មួយ​មាន​ដាក់​ភេសជ្ជៈ ដូច​ជា​៖ ផ្លែ​ឈើ​កំប៉ុង​, ទឹក​បរិសុទ្ធ​​​២​ដប​, ទឹក​ក្រូច​, កូកា-កូឡា និង​ទឹក​ផ្លែ​ត្រសក់​ស្រូវ​​
  4. ចាន​មួយ​មាន​ដាក់​ផ្លែ​ឈើ​មួយ​ចំនួន​មុខ មាន​ដូច​ជា​ ៖ ចេក​មួយ​ស្និត, ប៉ោម​, ក្រូច​ និង​ផ្លែ​ស្វាយ
  5. ចាន​មួយ​មាន​ដាក់​នំ​មួយ​ចំនួន​មុខ
  6. ជើង​ពាន​តូច​មួយ មាន​ដាក់​ម្លូ ស្លា
  7. ប្រេង​អូលីវ​មួយ​ដប
  8. ទៀន​មួយ​គូ និង​ធូប សម្រាប់​ដុត​ទទួល​ទេវតា

រណ្ដាប់​ទាំង​អស់​នេះ ត្រូវ​បាន​ដាក់​នៅ​ពី​លើ​តុ​មួយ ដោយ​មាន​ក្រាល​កម្រាល​ពណ៌​ស ព្រម​ទាំង​មាន​ដាក់​ភ្លើង​លម្អ​ផង​នា​ពេល​រាត្រី​​ផង៕

___________________________________________________
អាន​ផង​ដែរ ៖
១. រណ្ដាប់​ទទួល​ទេវតា​នៅ​ផ្ទះ​ខ្ញុំ សម្រាប់​ឆ្នាំ​ច សំរឹទ្ធិ​ស័ក ច.ស.​១៣៨០
២. រណ្ដាប់​ទទួល​ទេវតា​នៅ​ផ្ទះ​ខ្ញុំ សម្រាប់​ឆ្នាំ​កុរ ឯក​​​ស័ក ច.ស.​១៣៨១

ប.ជ.ព.​ចុល្ល​សករាជ​១៣៨២ ពី ស្រែ​ខ្មុក ថ្ងៃចន្ទ 13 ខែ​មេសា 2020

Posted by សុភ័ក្ត្រ in ពីនេះពីនោះ.
add a comment

b1382new

មហា​សង្ក្រាន្ត ឆ្នាំ​ជូត ទោ​ស័ក ចុល្ល​សករាជ ១៣៨២ ថ្ងៃសៅរ៍ 11 ខែ​មេសា 2020

Posted by សុភ័ក្ត្រ in ពីនេះពីនោះ.
add a comment

Khmer-Vector-Angkor-Cambodiaមហាសង្ក្រាន្តឆ្នាំជូត ទោ​ស័ក
ចុល្លសករាជ ១៣៨២ – មហាសករាជ ១៩៤២
ពុទ្ធសករាជ ២៥៦៤ – គ្រឹស្តសករាជ ២០២០

សុភមស្ដុ! វរមង្គលាជយាតិរេក

ព្រះពុទ្ធសករាជព្រះសាសនា អតិក្កន្តាកន្លងទៅបាន ២៥៦៣ ព្រះវស្សា ត្រឹមថ្ងៃ១៥កើត ខែពិសាខ លុះដល់ថ្ងៃ ១​រោច ខែពិសាខ ឆ្នាំជូត ទោ​​ស័ក ចូលពុទ្ធសករាជ ២៥៦៤ ព្រះ​វស្សា​ត​ទៅ​។

នឹងគណនាឆ្នាំជូត ឥឡូវនេះ សង្ក្រាន្តចូលមក​វេលា​ម៉ោង ២០:៤៨​នា​ទី​ នៅថ្ងៃ​ចន្ទ ៦​រោច ខែចេត្រ ត្រូវនឹងថ្ងៃទី១៣ ខែមេសា ឆ្នាំ​២០២០ នោះព្រះអាទិត្យ​ចរ​ចេញពីមីនរាសីទៅឋិតនៅឯមេសរាសី ដើរ​តាម​គោវិថី គឺផ្លូវកណ្ដាល ទើបមានទេព​ធីតាមួយព្រះអង្គជាមគ្គនាយិកាព្រះនាម គោរាគៈទេវី ជា​បុត្រី​ទី​២ នៃ​កបិល​មហា​ព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង សៀត​ផ្កា​អង្គាបុស្ប អាភរណៈ​កែវ​​មុក្ដា ភក្សាហារ​ទ្រង់​តេលំ​ ព្រះហស្តស្ដាំទ្រង់​ព្រះ​ខ័ឌ្គ ព្រះហស្តឆ្វេងទ្រង់​ឈើ​ច្រត់ ទ្រង់​ផ្ទុំ​​បើក​ព្រះ​នេត្រ​​​លើ​ខ្នង​ព្យគ្ឃ (​ស្ដេច​ខ្លា) ​​ជាពាហនៈ នាំអស់​ពួក​ទេព​និករ បវរ​កញ្ញា ទាំង​​មួយសែនកោដិ ហោះទៅកាន់​គុហាកែវ ឈ្មោះ​ធម្មមាលី នាទីភ្នំកៃលាស ខេត្តហិមពាន្ត ដែល​ប្រតិស្ថាន​ទុក​ព្រះ​សិរសា​កបិលមហាព្រហ្ម តម្កល់​នៅ​លើពានមាស នាំ​ចេញ​មកដង្ហែប្រទក្សិណភ្នំព្រះសុមេរុរាជ ជុំ​ចក្រវាឡ តាមផ្លូវព្រះអាទិត្យចរជា​គម្រប់​៦០នាទី (២៤ម៉ោង) ហើយ​ដង្ហែ​ចូល​ទៅតម្កល់ទុកដូចដើមវិញ ទើបប្រជុំទេវបុត្រទេវធីតាទាំងមួយសែនកោដិ ចូលទៅស្រង់ទឹកអនោតត្តមហាស្រះ ដែលមានទឹកហូរចេញពីបំពង់ថ្មកែវទាំង៧ ជាមាត់គោ ឧសភរាជទាំង៧ ត្រជាក់ត្រជុំក្សេមក្សាន្តព្រះហ្ឬទ័យ ទើបនាំគ្នាចូលទៅសមាទានសីល ដោយព្រះទ័យសោមនស្សរីករាយគ្រប់ៗអង្គ ក្នុងភគវតីសភាដែលវិស្វកម្មទេវបុត្រនិមិត្តថ្វាយ ហើយបន្ទោរបង់នូវអពមង្គល ឲ្យជ្រះស្រឡះ ចម្រើននូវសុភមង្គល សិរីសួស្ដី ជន្មាយុយឺនយូរតរៀងទៅ។

  • ថ្ងៃ​ចន្ទ ៦​រោច ខែចេត្រ ត្រូវនឹងថ្ងៃទី១៣ មេសា ឆ្នាំ២០២០ ម៉ោង២០:៤៨នាទី ជាថ្ងៃចូលឆ្នាំ​ជូត ទោ​ស័ក (​ជា​វារៈ​មហា​សង្ក្រាន្ត​)
  • ថ្ងៃអង្គារ ៧​រោច​ ខែចែត្រ​ ត្រូវនឹងថ្ងៃទី១៤ មេសា ឆ្នាំ២០២០ ជាវារៈវ័នបត
  • ថ្ងៃពុធ ៨​រោច​ ខែចែត្រ​ ត្រូវនឹងថ្ងៃទី១៥ មេសា ឆ្នាំ២០២០ ជាវារៈវ័នបត
  • ថ្ងៃព្រហស្បតិ៍ ៩​រោច​ ខែខែត្រ​ ត្រូវនឹងថ្ងៃទី១៦ ខែមេសា ឆ្នាំ២០២០ នៅ​វេលា​ម៉ោង​១​និង​២៤​នាទី​៣៦​វិនាទី ជាវារៈឡើងស័ក​

គម្រប់សង្ក្រាន្ត៤ថ្ងៃស្រេចបរិបូណ៌ ចូលជាសកលឆ្នាំជូត ទោ​​​ស័ក ចុល្លសករាជ១៣៨២ និងមហាសករាជ១៩៤២ តទៅ។

ក្នុងឱកាសសង្ក្រាន្តបួន ថ្ងៃ សូមអស់ប្រជាពលរដ្ឋប្រុសស្រីផងទាំងឡាយរៀបចំពលិកាគ្រឿងសក្ការបូជា អុចប្រទីបជ្វាលា ថ្វាយព្រះរតនត្រ័យ និងទទួលស្វាគមន៍ទេវបុត្រ ទេវធីតាឆ្នាំថ្មី ហើយខំលះបង់ចិត្តអាក្រក់អន្យតិរ្ថីយជាចិត្តអប្រីយ៍ ជាប់ដោយគំនុំគុំគួនព្យាបាទឈ្នានីសដែលកើតមានក្នុងឆ្នាំចាស់ឲ្យ ជ្រះស្រឡះតាំងចិត្តប្រព្រឹត្តល្អ ប្រកបដោយ មេត្តា ករុណា មុទិតា ឧបេក្ខា និងបញ្ញា ធ្វើបុណ្យសុន្ទរ៍ទានតាមប្រពៃណី រក្សាសីលប្រាំឲ្យបានជាប់ជានិច្ច នោះទើបទេវតានឹងឲ្យពរ សព្ទសាធុការ លោកអ្នកនឹងមានសិរីសួស្ដី សុភមង្គល វិបុលសុខគ្រប់ប្រការ តាំងពីឆ្នាំថ្មីនេះតរៀងទៅ។

រណ្ដាប់ទទួលទេវតា

រណ្ដាប់ទទួលនូវទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះមួយ សម្រាប់តាំងគ្រឿងពលីការផ្សេងៗ។ ត្រូវរៀបក្រាលសំពត់ពណ៌ស ឬស្រគាំ ហើយរៀបបាយសី ៩ ថ្នាក់មួយគូ បាយសី ៧ ថ្នាក់មួយគូ បាយសី ៥ ថ្នាក់មួយគូ បាយសី ៣ ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ (ទៀន ៥ ធូប ៥) លាជ ៥ ផ្កា ៥ ដាក់លើជើងពាន ១ គូ ចេកនួន ចេកណាំវ៉ា ពីរជើងពាន ផ្លែឈើ ១១ មុខ រៀបដាក់ជើងពាន ១១ គូ ដូងឡៅមួយគូ ទឹកស្អាតពីរកែវ។ ស្រេចហើយ នៅវេលាម៉ោងដែលទេវតាចុះ ត្រូវជួបប្រជុំក្រុមគ្រួសារដើម្បីថ្វាយបង្គំព្រះ នមស្សការព្រះរតនត្រ័យ ព្រះពុទ្ធ ព្រះធម៌ ព្រះសង្ឃ ជាទីពឹងទីរឮក លុះចប់ពិធីទទួលទេវតា។

កំណត់សម្គាល់

ចំពោះបាយសី ៩ ថ្នាក់ ៧ ថ្នាក់ សម្រាប់នៅព្រះបរមរាជវាំង ចំពោះប្រជារាស្ត្រគួរធ្វើត្រឹម ៥ ថ្នាក់ចុះមក ឬរៀបត្រឹមគ្រឿងសក្ការៈបូជាដែលមានទៀនប្រាំ ធូបប្រាំ ស្លាធម៌ កូនចេកមួយគូក៏ល្អដែរ។ ចំពោះផ្លែឈើសម្រាប់ប្រជារាស្ត្រ គួររៀបឲ្យបានត្រឹម ៣ ឬ ៥ មុខជាការប្រសើរ គឺរៀបទៅតាមធនធានរបស់ខ្លួន។ នៅគ្រប់ដង្វាយទាំងអស់ត្រូវដាក់ផ្កាម្លិះភួងពីលើគ្រប់ដង្វាយ នៅលើជើងពាន និងលើបាយសីត្រូវដោតទៀនហើយដុតបំភ្លឺ។

ទំនាយប្រចាំឆ្នាំ

  • កេណ្ឌព្រះពិរុណសាស្ត្រ៖ ឆ្នាំនេះ ភព​សុក្រ​ ជាអធិបតី មាននាគ២បង្អុរភ្លៀង៦០០មេ។ ភ្លៀងធ្លាក់នៅចក្រវាឡ២៤០មេ ហេមពាន្ត១៨០មេ មហាសមុទ្ទ១២០មេ ជម្ពូទ្វីបមនុស្សលោក៦០មេ​។ ឆ្នាំ​នេះ​ដើម​ឆ្នាំ​តិច កណ្ដាល​ឆ្នាំ​ភ្លៀង​ល្អ និង​ចុង​ឆ្នាំ មាន​ភ្លៀង​ច្រើន​។
  • កេណ្ឌធារាទិគុណរ៖ ឆ្នាំនេះមានកេណ្ឌ (២) ត្រូវត្រង់​បឋវី​ធាតុ​ចុះ ទំនាយ​ថា មិន​ក្ដៅ​មិន​ត្រជាក់ មាន​ខ្យល់​ព្យុះ​ម្ដង​ម្កាល​។ ការ​រស់​នៅ​របស់​អាណា​ប្រជា​នុរាស្ត្រ​មាន​សេចក្ដី​សុខ​សាន្ត​។
  • ទំនាយទឹកទន្លេ៖ ឆ្នាំនេះទំនាយអំពីទឹកទន្លេមានសំណល់០ (សូន្យ​​) ទំនាយថាទឹកទន្លេបឹងបួរធំ​ណាស់ ធំ​ជាង​ឆ្នាំ​ទាំង​ពួង។
  • កេណ្ឌធញ្ញាហារ៖ ឆ្នាំនេះមានកេណ្ឌ (១) មានឈ្មោះថាលាភៈ ទំនាយថា ស្រូវ​ក្នុង​ស្រែ​ចម្ការ ​បាន​ផល​១០​ភាគ ខូច​ខាត​អស់​១​ភាគ។ ប្រជា​នុរាស្ត្រ​មាន​សេចក្ដី​សុខ សិរី​សួស្ដី​ចម្រើន​ជា​ភយ្យោភាព ធុញ្ញហារ មង្សាហារ ផល្លាហារ និង​ឧត្ដម​បរិបូណ៌​ប្រសើរ​ណាស់​។
  • ទំនាយការធ្វើស្រែ៖ ទំនាយកេណ្ឌការធ្វើស្រែមានសេស (៧) ទំនាយថា ស្រែដីទំនាប និងស្រែដីទួលគ្រប់ទីកន្លែងបានផលល្អដូចគ្នាទាំងពីរយ៉ាង។
  • កេណ្ឌព្រឹក្សា៖ ឆ្នាំនេះត្រូវចំសេស០ត្រូវត្រង់ ត្បាល់ អង្រែ ​ជា​ស្ដេចមាន​ទំនាយ​ថា មាន​​ទំនាយ​ថា មាន​កើត​ជំងឺ​ដំបៅ និង​អត់​បាន​ដោយ​អន្លើរ​ៗ។ ដំណាំ​ផ្លែ​ឈើ​បាន​ផល​ល្មម​សម​គួរ​។
  • កេណ្ឌព្រះអាទិត្យ៖ ឆ្នាំនេះ​ព្រះ​អាទិត្យ​គឺ​​ភិមាន ជា​ដើម​​ទៅ​ទំនាយ​ថា គឺ​មោះ​​ពុំ​មាន​អន្តរាយ​អ្វី​ឡើយ។

ទំនាយតាមថ្ងៃសង្ក្រាន្ត

  • ទំនាយថ្ងៃមហាសង្ក្រាន្ត៖ ថ្ងៃចូលឆ្នាំត្រូវនឹងថ្ងៃចន្ទ ទំនាយថា ៖ ឆ្នាំនេះ​​នឹង​ចាញ់​សេនាបតី​អ្នក​ធំ​ឧកញ៉ា​លោក​ជំទាវ​ទាំង​ឡាយ​។ ភ្លៀង​នឹង​មាន​ដើម​ឆ្នាំ ស្រូវ​អង្ករ​ល្អ​ណាស់​តែ​មនុស្ស​នៅ​ជួប​ផល​លំបាក​ឲ្យ​លក្រែង​ប្រយ័ត្ន​ក្សត្រ និង​មន្ត្រី​លោក​ជំទាវ​ធ្វើ​អាក្រក់​ធ្វើ​បាប នឹង​កើត​មាន​ការ​តស៊ូ​រើ​បម្រះ មនុស្ស​នឹង​កើត​ជំងឺ​តម្កាត់​ច្រើន​។
  • ទំនាយថ្ងៃវ័នបត៖ ថ្ងៃកណ្ដាលត្រូវនឹងថ្ងៃអង្គារ និង​ពុធ​​ ទំនាយថា ៖ ឆ្នាំ​នេះ​អាមាត្យ​មន្ត្រី នឹង​ខូច​បុណ្យ​ស័ក្ដិ ឬ​ត្រូវ​ក្ដៅ​ក្រហាយ​ចិត្ត​ជា​ច្រើន ស្រូវ​អង្ករ ផ្លែ​ឈើ​ស្លា​ម្លូ​នឹង​ថ្លៃ មនុស្ស​ទាំង​ឡាយ​នឹង​ក្ដៅ​ក្រហាយ​ចិត្ត​ជា​ទី​បំផុត​​។ ស្ត្រី​ទាំង​ឡាយ​នឹង​ត្រូវ​និរាស​ព្រាត់​ប្រាស់​ពី​ទី​កន្លែង​រស់​នៅ​ទៅ​ទី​ដទៃ​ផ្សេង​ៗ​។
  • ទំនាយថ្ងៃឡើងស័ក៖ ថ្ងៃចុងក្រោយត្រូវនឹងថ្ងៃព្រហស្បតិ៍ ទំនាយថា ៖ ឆ្នាំនេះ ​សមណៈ​ព្រាហ្មណាចារ្យ នឹង​ប្រណិបត្តិ​ចូល​ចិត្ត​ដោយ​ធម្ម​ដែល​ប្រសើរ​វិសេស​។

ស្រង់ចេញពីមហា​សង្ក្រាន្ត​របស់​គណៈ​កម្មាធិការ​រៀប​ចំ​បុណ្យ​ជាតិ អន្តរជាតិ​ និង​ មហា​សង្ក្រាន្ត​របស់​​លោក អ៊ឹម បុរិន្ទ

_____________________________________________________
អានផងដែរ៖
១. មហាសង្ក្រាន្តខ្មែរ ពុទ្ធសករាជ ២៥៥១
២. មហាសង្ក្រាន្ត ឆ្នាំជូត សំរឹទ្ធិស័ក ពុទ្ធសករាជ២៥៥២
៣. មហាសង្ក្រាន្តឆ្នាំឆ្លូវ ឯកស័ក ពុទ្ធសករាជ២៥៥៣
៤. មហាសង្ក្រាន្តឆ្នាំខាល ទោស័ក ពុទ្ធសករាជ២៥៥៤
៥. មហាសង្ក្រាន្តឆ្នាំថោះ ត្រីស័ក ពុទ្ធសករាជ២៥៥៥
៦. មហាសង្ក្រាន្តឆ្នាំរោង ចត្វាស័ក ពុទ្ធសករាជ២៥៥៦
៧. មហាសង្ក្រាន្តឆ្នាំម្សាញ់ បញ្ចស័ក ពុទ្ធសករាជ២៥៥៧
៨. មហាសង្ក្រាន្តឆ្នាំមមី ឆស័ក ពុទ្ធសករាជ២៥៥៨
៩. មហាសង្ក្រាន្តឆ្នាំមមែ សប្ដស័ក ពុទ្ធសករាជ២៥៥៩
១០. មហាសង្ក្រាន្តឆ្នាំវក អដ្ឋស័ក ពុទ្ធសករាជ២៥៦០
១១. មហា​សង្ក្រាន្ត​ឆ្នាំ​រកា នព្វ​​ស័ក ពុទ្ធសករាជ​២៥៦១
១២. មហា​សង្ក្រាន្ត ឆ្នាំ​ច សំរឹទ្ធិ​ស័ក ចុល្ល​សករាជ ១៣៨០
១៣. មហា​សង្ក្រាន្ត ឆ្នាំ​កុរ ឯក​ស័ក ចុល្ល​សករាជ ១៣៨១
១៤. អំពី​នាង​គោរាគៈ​ទេវី

អំពី​នាង​គោរាគៈ​ទេវី ថ្ងៃចន្ទ 6 ខែ​មេសា 2020

Posted by សុភ័ក្ត្រ in ពីនេះពីនោះ.
6 comments

ដូច​លោក​អ្នក​ដឹង​ស្រាប់ហើយ​ពី​តំណាល​រឿង និង​ប្រវត្តិ​ពិធី​បុណ្យ​ចូល​ឆ្នាំ​ខ្មែរ​ ជា​ពិសេស​ប្រវត្តិ​នៃ​ធីតា​ទាំង​៧​របស់​កបិល​មហា​ព្រហ្ម​។ ដោយ​​​ឆ្នាំ​ថ្មី​ដែល​នឹង​ឈាន​ចូល​មក​ដល់​នៅ​ពេល​ដ៏​ខ្លី​​ខាង​មុខ​នេះ ស្រែខ្មុក​សូម​លើក​យក​ត្រួស​ៗ​ពី​ទេវ​ធីតា​ឆ្នាំ​នេះ ព្រះ​នាង​​គោរាគៈ​​ទេវី[អាន​៖ មហា​សង្ក្រាន្ត ឆ្នាំ​ជូត ទោ​ស័ក ចុល្ល​សករាជ ១៣៨២] បុត្រី​ទី​២​នៃ​កបិល​មហា​ព្រហ្ម ទុក​ជា​គតិ​ដូច​ត​ទៅ​នេះ​។

សម្រាប់​សង្ក្រាន្ត​ទាំង​៧​ថ្ងៃ នៅ​ពេល​ដែល​សង្ក្រាន្ត​ប៉ះ​ចំ​ថ្ងៃ​ចន្ទ​នោះ (​ដូច​តួ​យ៉ាង​ឆ្នាំ​ជូត​​​នេះ​) ទេវ​ធីតា​ដែល​នឹង​ត្រូវ​យាង​ចុះ​មក​ស្ថាន​មនុស្ស​លោក​នេះ ត្រូវ​ធ្លាក់​មក​លើ​នាង​គោរាគៈ​​ទេវី ដែល​ជា​បុត្រី​ទី​២​។ ព្រះ​នាង​គោរាគៈ​​​ទេវី​នេះ មាន​លក្ខណៈ​ពិសេស និង​សម្គាល់​ដូច​ត​ទៅ​នេះ​ ៖

  • ទ្រង់​អម្ពរពណ៌លឿង និង​ពាហុ​រត្ន​សៀត​ផ្កា​អង្គាបុស្ប អាភរណៈ​កែវ​​មុក្ដា
  • ភក្សាហារ​ទ្រង់​តេលំ​
  • ព្រះហស្តស្ដាំទ្រង់​ព្រះ​ខ័ឌ្គ ឯ​ព្រះហស្តឆ្វេងទ្រង់​ឈើ​ច្រត់
  • ស្ដេច​យាង​គង់​លើ​ខ្នង​ព្យគ្ឃ (​ស្ដេច​ខ្លា) ​​ជាពាហនៈ

Untitled-1
រូប​ទេវ​ធីតា​គោរាគៈ​ទេវី (​រូប​៖ គឹម សុភណ្ឌ)

ក៏​ប៉ុន្តែ​ទោះ​បី​ជា​យ៉ាង​នេះ​ក្ដី​ កាយ​វិការ​របស់​ទ្រង់​ដែល​យាង​ចុះ​មក​មាន​ភាព​ខុស​គ្នា​ទៅ​តាម​វេលា​នៃ​សង្ក្រាន្ត​សម្រាប់​ឆ្នាំ​នីមួយ​ៗ ឧទាហរណ៍​ ៖

  1. ប្រសិន​បើ​យាង​ចុះ​មក​​វេលា​ព្រឹក​រហូត​ដល់​ថ្ងៃ​ត្រង់​នោះ ស្ដេច​នឹង​យាង​ចុះ​មក​ដោយ​ឈរ​លើ​ពាហនៈ​របស់​ទ្រង់​។ ការ​នេះ ត្រូវ​បាន​​ខាង​ហោរាសាស្ត្រ​ទាយ​ថា ឆ្នាំនោះ​​ មនុស្ស​ម្នា​នឹង​កើត​ក្ដី​ក្ដៅ​ក្រហាយ ជំងឺ​ឈឺ​ថ្កាត់​​
  2. ប្រសិន​បើ​យាង​ចុះ​មក​វេលា​ថ្ងៃ​ត្រង់​រហូត​ដល់​វេលា​ល្ងាច​នោះ ស្ដេច​នឹង​យាង​ចុះ​មក​ដោយ​អង្គុយ​លើ​ពាហនៈ​របស់​ទ្រង់​។ ការ​នេះ ត្រូវ​បាន​ខាង​ហោ​រាសាស្ត្រ​ទាយ​ថា ឆ្នាំ​នោះ មនុស្ស​ម្នា​ស្លាប់ និង​កើត​ហេតុ​ភេទ​ភ័យ​នានា​
  3. ប្រសិន​បើ​យាង​ចុះ​មក​វេលា​ល្ងាច​រហូត​ដល់​អាធ្រាត​នោះ ស្ដេច​នឹង​យាង​ចុះ​មក​ដោយ​ផ្ទុំ​បើក​ព្រះ​នេត្រ លើ​ពាហនៈ​របស់​ទ្រង់​។ ការ​នេះ ត្រូវ​បាន​ខាង​ហោ​រា​សាស្ត្រ​ទាយ​ថា ឆ្នាំ​នោះ ប្រជាជន​នឹង​រស់​នៅ​ប្រកប​ដោយ​សេចក្ដី​សុខ​។
  4. ប្រសិន​បើ​យាង​ចុះ​មក​វេលា​អាធ្រាត​ដល់​ព្រឹក​ព្រលឹម​នោះ ស្ដេច​នឹង​យាង​ចុះ​មក​ដោយ​ផ្ទុំ​បិទ​ព្រះ​នេត្រ​ លើ​ពាហនៈ​របស់​ទ្រង់​។ ការ​នេះ ត្រូវ​បាន​ខាង​ហោរា​សាស្ត្រ​ទាយ​ថា ឆ្នាំ​នោះ ព្រះ​មហា​ក្សត្រិយ៍ នឹង​ចម្រើន​រុង​រឿង​។

សម្រាប់​ទេវ​ធីតា​គោរាគៈ​ទេវី ឆ្នាំ​នេះ ទ្រង់​យាង​មក​​ដោយ​​ផ្ទុំ​បើក​ព្រះ​នេត្រ​​លើ​ខ្នង​ខ្លា ដោយ​ហេតុ​ថា សង្ក្រាន្ត​ចូល​មក​នៅ​ម៉ោង​​២០:៤៨​នា​ទី ថ្ងៃ​ចន្ទ​​​នេះ​ឯង​។

* ព្រះ​នាម​ខុស​ៗ​គ្នា

បើ​ទោះ​បី​ជា​យ៉ាង​នេះ​ក្ដី ព្រះ​នាម​របស់​បុត្រី​ទី​២​នៃ​កបិល​មហា​ព្រហ្ម​នេះ មាន​ភាព​ដូច និង​​ខុស​ៗ​គ្នា​ទៅ​តាម​ប្រទេស​នីមួយ​ៗ សូម្បី​នៅ​កម្ពុជា​យើង​តែ​មួយ​ក៏​មាន​តម្រា​សរសេរ​ខុស​គ្នា​ពី​ព្រះ​នាម​នៃ​ទ្រង់​ផង​ដែរ​។

សៀវភៅ​មហា​សង្ក្រាន្ត​របស់​លោក​អ៊ឹម បុរិន្ទ បាន​សរសេរ​ថា​​ទ្រង់​មាន​ព្រះ​នាម គោរាគៈ​​​ទេវី (ទំព័រ​៨)​។ ឯ​​​មហា​សង្ក្រាន្ត​ដែល​ចេញ​ផ្សាយ​ដោយ​គណៈ​កម្មាធិការ​ជាតិ រៀប​ចំ​បុណ្យ​ជាតិ អន្តរជាតិ​វិញ​បាន​សរសេរ​ថា ទ្រង់​ព្រះ​នាម​​គោរាគ​ទេវី (​ទំព័រ​៧​)​។

ដោយ​ឡែក​សម្រាប់​ប្រទេស​ថៃ និង​លាវ ដែល​មាន​ទំនៀម​សង្ក្រាន្ត​នេះ ដូច​កម្ពុជា​យើង​ដែរ​នោះ បាន​សរសេរ​ថា ទ្រង់​មាន​ព្រះ​នាម​ โคราคะเทวี (​គោរាគៈ​​ទេវី​)​ [អាន​៖ មហាសង្ក្រាន្តថៃ ចុល្ល​សករាជ ១៣៨២] និង​​ ໂຄຣາຄະເທວີ (​គោរាគៈ​​ទេវី​) [អាន​៖ មហាសង្ក្រាន្តលាវ ចុល្ល​សករាជ ១៣៨២]។ ដោយ​ឡែក​នៅ​ឯ​អតីត​នគរ​លាន្នា (​កកន៖ ឡាន​ណា បច្ចុប្បន្ន​ស្ថិត​ចំណុះ​ជាមួយ​ប្រទេស​ថៃ​) ព្រះ​នាម​បុត្រី​ទី​២ នៃ​កបិល​មហា​ព្រហ្ម​នេះ មាន​ឈ្មោះ​ថា មហោស្ថា

ឆ្នាំ​ដែល​ទេវ​ធីតា​គោរាគៈ​​ទេវី ចុះ​មក​កន្លង​ទៅ

  • ឆ្នាំ​ជូត ទោ​ស័ក ចុល្ល​សករាជ ១៣៨២ គ្រឹស្តសករាជ ២០២០
  • ឆ្នាំ​មមី ឆ​ស័ក ចុល្លសករាជ ១៣៧៦ គ្រឹស្តសករាជ ២០១៤

___________________________________________________________________
អាន​ផង​ដែរ​៖
១. អំពី​គំនូរ​ទេព​ធីតា​សង្ក្រាន្ត
២. អំពី​នាង​មហោធរ​ទេវី
៣. អំពី​នាង​ទុង្ស​​ទេវី

%d bloggers like this: