jump to navigation

ថ្ងៃ​ទី​២ នៃ​ដំណើរ​ទស្សនកិច្ច​ផ្លូវ​រដ្ឋ​មក​កម្ពុជា របស់​ឯក​ឧត្ដម​ប្រធានាធិបតី​ទីតូ ថ្ងៃ​ព្រហស្បតិ៍ 18 ខែមករា 2018

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ, សង្គម​រាស្ត្រ​និយម, អំពីស្រុកខ្មែរ.
1 comment so far

ថ្ងៃ​ព្រហស្បតិ៍ ទី​១៨ ខែ​មករា ឆ្នាំ​១៩៦៨ ដែល​ជា​ថ្ងៃ​ទី​២ នៃ​ដំណើរ​ទស្សនកិច្ច​ផ្លូវ​រដ្ឋ​នៃ​ឯក​ឧត្ដម​ប្រធានាធិបតី​​នៃ​ប្រទេស​​អតីត​សហ​ព័ន្ធ​សង្គម​និយម​សាធារណ​រដ្ឋ​យូហ្គូស្លាវី​​ ចូស៊ីព ប្រូហ្ស ទីតូ និង​លោក​ជំទាវ​នោះ មាន​ព្រឹត្តិការណ៍​ប្រវត្តិ​សាស្ត្រ​ជា​ច្រើន​ដែល​គណៈ​ប្រតិភូ​បាន​បំពេញ​នៅ​ក្នុង​ទឹក​ដី​នៃ​ព្រះ​រាជអាណាចក្រ​កម្ពុជា ក្រោម​របប​សង្គម​នៃ​អង្គ​សម្ដេច​ព្រះ​ប្រមុខ​រដ្ឋ​។

នៅ​ឯ​ប្រាសាទ​ខេមរិន្ទ្រ​ឯណោះ ថ្នាក់​ដឹក​នាំ​ជា​ប្រមុខ​រដ្ឋ​នៃ​ប្រទេស​ទាំង​ពីរ ព្រម​ទាំង​ប្រមុខ​រដ្ឋាភិបាល​ជា​ថ្នាក់​ដឹក​នាំ​ស្ថាប័ន​រដ្ឋ​បាន​ជួប​ប្រជុំ​គ្នា​ជា​ផ្លូវ​ការ ពិភាក្សា​ពី​​ទំនាក់​ទំនង​ទ្វេ​ភាគី​នៃ​ប្រទេស​ទាំង​ពីរ​លើ​គ្រប់​វិស័យ​។ រាជ​គណៈ​ប្រតិភូ​ខ្មែរ​កាល​ណុះ ក្រៅ​ពី​សម្ដេច​ព្រះ​ប្រមុខ​រដ្ឋ​ជា​អង្គ​ប្រធាន ក៏​មាន​ការ​យាង និង​អញ្ជើញ​ពី​សំណាក់​ថ្នាក់​ដឹក​នាំ​ជាន់​ខ្ពស់ខ្មែរ​ជា​ច្រើន​រូប​ទៀត មាន​ជា​អាទិ៍​ ៖ លោក​នាយក​រដ្ឋ​មន្ត្រី សឺន សាន​, ឯក​ឧត្ដម​ឧត្ដម​សេនីយ៍ ញឺក ជូឡុង អគ្គ​មេ​បញ្ជាការ​កង​យុទ្ធ​ពល​ខេមរ​ភូមិន្ទ​, ព្រះ​អង្គ​ម្ចាស់ នរោត្ដម ភូរិស្សរា រដ្ឋ​មន្ត្រី​ក្រសួង​ការ​បរទេស និង​ឯក​ឧត្ដម កួន វិគ ឯក​អគ្គ​រាជ​ទូត​នៃ​ព្រះ​រាជ​អាណាចក្រ​កម្ពុជា ប្រចាំ​ទីក្រុង​ Belgrade ក៏​បាន​ចូល​រួម​ផង​ដែរ​។

  • នៅ​មន្ទីរ​ពិព័រណ៍​អចិន្ត្រៃយ៍​នៃ​សមិទ្ធិ​សង្គម​រាស្ត្រ​និយម

សម្ដេច​ព្រះ​ប្រមុខ​រដ្ឋ រួម​និង​អ្នក​ម្នាង បាន​រួម​ដំណើរ​ជាមួយ​លោក​ប្រធានាធិបតី និង​លោក​ជំទាវ ធ្វើ​ការ​ទត និង​ទស្សនា​​នៅ​មន្ទីរ​ពិព័រណ៍​អចិន្ត្រៃយ៍​នៃ​សមិទ្ធិ​សង្គម​រាស្ត្រ​និយម​។ សមិទ្ធផល​នានា​នៃ​របប​សង្គម ដែល​ជា​ស្នាដៃ​នៃ​រដ្ឋាភិបាល​សង្គម​រួម​ជាមួយ​ប្រជា​ពល​រដ្ឋ​បាន​នាំ​គ្នា​កសាង​យ៉ាង​សម្បូរ​បែប ស័ក្ដិសម​ជា​ប្រទេស​ឯករាជ្យ​ត្រូវ​បាន​ដាក់​តាំង​បង្ហាញ​ជូន​ភ្ញៀវ​រដ្ឋ​ទស្សនា ប្រកប​ដោយ​ភាព​មោទន​នៃ​ប្រជាជាតិ​ខ្មែរ​នា​សម័យ​នោះ​​។

ដោយ​ឡែក​នា​វេលា​ព្រឹក​ថ្ងៃ​នោះ​ដែរ លោក​ជំទាវ​ប្រធានាធិបតី​ ជូវ័នកា ប្រូហ្ស ដែល​រួម​ដំណើរ​ដោយ​អ្នក​ម្នាង បាន​អញ្ជើញ​ទៅ​ទស្សនា​​ព្រះ​បរម​រាជ​វាំង ដែល​ជា​ទ្រព្យ​សម្បត្តិ និង​មរតក​ជា​ប្រវត្តិសាស្ត្រ​នៃ​ប្រទេស​ជាតិ ព្រម​ទាំង​បាន​ទៅ​ទស្សនា​ការ​ហាត់​សម​សិល្បៈ​របស់​ កង​របាំ​ព្រះ​រាជ​ទ្រព្យ នៅ​ឯ​ប្រាសាទ​ចន្ទច្ឆាយា​ផង​ដែរ​។

  • ចាត់​សម្ដែង​សិល្បៈ​នៅ​ឯ​សាល​ចតុម្មុខ

ដើម្បី​ជូន​ជា​កិត្តិយស​ជូន​ដល់​លោក​ប្រធានា​ធិបតី រួម​និង​គណៈ​ប្រតិភូ សម្ដេច​ព្រះ​ប្រមុខ​រដ្ឋ​ស្ដេច​បាន​ចាត់​ឲ្យ​មាន​ការ​សម្ដែង​សិល្បៈ​មួយ​ នៅ​ឯ​សាល​ចតុម្មុខ នា​រាជ​ធានី​ភ្នំពេញ ក្នុង​ន័យ​ផ្សព្ធ​ផ្សាយ​ពី​សិល្បៈ​ខ្មែរ ដែល​មាន​ការ​រីក​ចម្រើន​ឥត​ឈប់​ឈរ ជូន​ដល់​លោក​ប្រធានាធិបតី និង​គណៈ​ប្រតិភូ បាន​ទស្សនា​ផង​ដែរ​៕

_____________________________________________________________
អាន​ផង​ដែរ​៖
១. ខួប​ឆ្នាំ​ទី​៥០ ទស្សនកិច្ច​ផ្លូវ​រដ្ឋ​នៃ​ឯក​ឧត្ដម​ប្រធានាធិបតី​ទីតូ នៅ​ប្រទេស​កម្ពុជា

Advertisements

ខួប​ឆ្នាំ​ទី​៥០ ទស្សនកិច្ច​ផ្លូវ​រដ្ឋ​នៃ​ឯក​ឧត្ដម​ប្រធានាធិបតី​ទីតូ នៅ​ប្រទេស​កម្ពុជា ថ្ងៃពុធ 17 ខែមករា 2018

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ, សង្គម​រាស្ត្រ​និយម, អំពីស្រុកខ្មែរ.
1 comment so far

ទស្សនកិច្ច​ផ្លូវ​រដ្ឋ​នៃ​ឯក​ឧត្ដម​ប្រធានាធិបតី​ទីតូ នៅ​ប្រទេស​កម្ពុជា

ទំនាក់​ទំនង​ជា​ប្រវត្តិ​សាស្ត្រ​នៃ​ព្រះ​រាជ​អាណាចក្រ​កម្ពុជា រដ្ឋ​ដែល​ទើប​ទទួល​បាន​ឯករាជ្យ​ថ្មី​ៗ ជាមួយ​បណ្ដា​ប្រទេស​ធំ​ៗ​លើ​លោក​ក្នុង​ន័យ​បង្កើន​ចំណង​មេត្រី​ភាព​មាន​ន័យ​ធំ​ធេង​ខ្លាំង​ណាស់ ក្រោម​ព្រះ​រាជ​កិច្ច​ដឹក​នាំ​​របស់​របប​សង្គម​ជា​អមតៈ​នៃ​សម្ដេច​ព្រះ​ប្រមុខ​​​ជាតិ​ខ្មែរ នរោត្ដម សីហនុ​។ ពី​ថ្ងៃ​ទី​១៧ រហូត​ដល់​២២ ខែ​មករា ឆ្នាំ​១៩៦៨ គឺ​កន្លះ​សតវត្សរ៍​មុន​នេះ ព្រះ​រាជ​អាណាចក្រ​កម្ពុជា មាន​កិត្តិយស​ទទួល​ស្វាគមន៍​ប្រមុខ​នៃ​ចលនា​មិន​ចូល​បក្ស​សម្ព័ន្ធ និង​ជា​រដ្ឋ​បុរស​មួយ​រូប​នៃ​ប្រទេស​​អតីត​សហ​ព័ន្ធ​សង្គម​និយម​សាធារណ​រដ្ឋ​យូហ្គូស្លាវី​​ ចូស៊ីព ប្រូហ្ស ទីតូ (Josip Broz Tito)​។

នៅ​ឯ​អាកាស​យាន​ដ្ឋាន​អន្តរជាតិ​ពោធិចិនតុង នា​ព្រឹក​ថ្ងៃ​​ពុធ ទី​១៧ ខែ​មករា ឆ្នាំ​១៩៦៨ សម្ដេច​ព្រះ​ប្រមុខ​រដ្ឋ ព្រម​ទាំង​មន្ត្រី​រាជការ​ និង​ប្រជា​ពល​រដ្ឋ​គ្រប់​ជាន់​ថ្នាក់ បាន​យាង និង​អញ្ជើញ​ចូលរួម​ធ្វើ​បដិសណ្ឋារកិច្ច​ឯក​ឧត្ដម​ប្រធានាធិបតី និង​លោក​ជំទាវ ព្រម​គណៈ​ប្រតិភូ​​។ បន្ទាប់​ពី​សន្ទរកថា​ស្វាគមន៍​ភ្ញៀវ​រដ្ឋ​នៃ​កម្ពុជា​រួច​មក សម្ដេច​ព្រះ​​ប្រមុខ​រដ្ឋ​ស្ដេច​យាង​រួម​ដំណើរ​ឯក​ឧត្ដម​ប្រធានាធិបតី​តាំង​ពី​ចំណត​អាកាស​យាន​ដ្ឋាន​រហូត​ដល់​ប្រាសាទ​ខេមរិន្ទ្រ​នៃ​ព្រះ​បរម​រាជ​វាំង ដោយ​កាត់​តាម​វិថី​នានា​ដ៏​ស្រស់​ឆើត​ឆាយ​របស់​ក្រុង​ភ្នំពេញ​នា​សម័យ​នោះ​។

ព្រះ​រាជ​ពិធី​សវនាការ​​ជា​ផ្លូវ​ការ​រវាង​​ប្រមុខ​រដ្ឋ​ទាំង​ពីរ​បាន​ធ្វើ​ឡើង​នា​ព្រះ​ទីន័ង​ទេវាវិនិច្ឆ័យ នា​រសៀល​ថ្ងៃ​ដដែល​នោះ បន្ត​ដោយ​ការ​ផ្លាស់​ប្ដូរ​នូវ​គ្រឿង​រាជ​ឥស្សរិយយស​រវាង​សម្ដេច​ព្រះ​ប្រមុខ​រដ្ឋ និង​លោក​ប្រធានាធិបតី​ផង​ដែរ​។

ដោយ​ឡែក​នៅ​វេលា​ល្ងាច​​នៅ​ឯ​វិមាន​រដ្ឋ​នា​ព្រះ​ដំណាក់​ចម្ការ​មន សម្ដេច​ព្រះ​ប្រមុខ​រដ្ឋ​ស្ដេច​បាន​​​​យាង​ចូល​រួម​ក្នុហ​ពិធី​មហា​សាយ​ភត្ត​មួយ​​រៀប​ចំ​ឡើង​ជា​កិត្តិយស​ជូន​លោក​ប្រធានាធិបតី ព្រម​លោក​ជំទាវ និង​គណៈ​ប្រតិភូ​របស់​ប្រទេស​ជាមិត្រ​ អម​ដោយ​ការ​ផ្លាស់​ប្ដូរ​វត្ថុ​អនុស្សាវរីយ៍​រវាង​គ្នា​ទៅ​វិញ​ទៅ​មក​ផង​ដែរ​៕

ពិធី​បដិសណ្ឋារកិច្ច​នៅ​ព្រលាន​យន្តហោះ​អន្តរជាតិ​ពោធិចិនតុង
ពិធី​បដិសណ្ឋារកិច្ច​នៅ​ព្រលាន​យន្តហោះ​អន្តរជាតិ​ពោធិចិនតុងពិធី​បដិសណ្ឋារកិច្ច​នៅ​ព្រលាន​យន្តហោះ​អន្តរជាតិ​ពោធិចិនតុងពិធី​បដិសណ្ឋារកិច្ច​នៅ​ព្រលាន​យន្តហោះ​អន្តរជាតិ​ពោធិចិនតុងពិធី​បដិសណ្ឋារកិច្ច​នៅ​ព្រលាន​យន្តហោះ​អន្តរជាតិ​ពោធិចិនតុងពិធី​បដិសណ្ឋារកិច្ច​នៅ​ព្រលាន​យន្តហោះ​អន្តរជាតិ​ពោធិចិនតុងតាម​ដង​វិថី​នានា​នៅ​ក្នុង​ក្រុង​ភ្នំពេញ និង​នៅ​មហា​ប្រាសាទ​ខេមរិន្ទ្រពិធី​ទទួល​ផ្លូវ​ការ​នៅ​ព្រះ​ទីន័ង​ទេវា​វិនិច្ឆ័យ
ពិធី​ទទួល​ផ្លូវ​ការ​នៅ​ព្រះ​ទីន័ង​ទេវា​វិនិច្ឆ័យការ​ផ្លាស់​ប្ដូរ​គ្រឿង​ឥស្សរិយយស​នៃ​ប្រទេស​ទាំង​ពីរការ​ផ្លាស់​ប្ដូរ​គ្រឿង​ឥស្សរិយយស​នៃ​ប្រទេស​ទាំង​ពីរនា​វិមាន​រដ្ឋ​ចម្ការ​មនការ​ផ្លាស់​ប្ដូរ​វត្ថុ​អនុស្សាវរីយ៍នា​វិមាន​រដ្ឋ​ចម្ការ​មន
ការ​ផ្លាស់​ប្ដូរ​វត្ថុ​អនុស្សាវរីយ៍នា​វិមាន​រដ្ឋ​ចម្ការ​មនពិធី​លៀង​សាយភោជន៍​ជូន​ជា​កិត្តិយស​ដល់​លោក​ប្រធានាធិបតីពិធី​លៀង​សាយភោជន៍​ជូន​ជា​កិត្តិយស​ដល់​លោក​ប្រធានាធិបតីពិធី​លៀង​សាយភោជន៍​ជូន​ជា​កិត្តិយស​ដល់​លោក​ប្រធានាធិបតី

_____________________________________________________________
អាន​ផង​ដែរ​៖
១. ថ្ងៃ​ទី​២ នៃ​ដំណើរ​ទស្សនកិច្ច​ផ្លូវ​រដ្ឋ​មក​កម្ពុជា របស់​ឯក​ឧត្ដម​ប្រធានាធិបតី​ទីតូ

ខួប​ឆ្នាំ​ទី​៥០ សម្ពោធ​គិលាន​ដ្ឋាន ព្រះ​សីហនុ​ប្រទាន ថ្ងៃសៅរ៍ 16 ខែធ្នូ 2017

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី១៦ ខែ​ធ្នូ ឆ្នាំ២០១៧ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅទឹក​ដី​ដំបូក​ខ្ពស់ ខេត្ត​តាកែវ នោះគឺពិធីសម្ពោធគិលាន​ដ្ឋាន​ «​ព្រះ​សីហនុ​ប្រទាន​»​។ សម្ដេចព្រះប្រមុខរដ្ឋអមតៈនៃប្រជាជនខ្មែរបានស្ដេចយាងសម្ពោធដាក់ឲ្យប្រើប្រាស់ជាផ្លូវការនូវគិលាន​ដ្ឋាន​នេះដោយព្រះអង្គផ្ទាល់។

សមិទ្ធិ​ដ៏​ថ្លៃ​ថ្លា​ដែល​របប​សង្គម ក្រោម​ព្រះ​រាជ​កិច្ច​ដឹក​នាំ​នៃ​អង្គ​សម្ដេចឪ​ដែល​បាន​សម្ពោធ​នា​ពេល​នោះ ត្រូវ​បាន​កសាង​​ក្នុង​តម្លៃ​២៦៥.០០០​រៀល​។

នេះជាសមិទ្ធផលដ៏ថ្លៃថ្នាមួយទៀតនៃរបបសង្គម ដែលបានសម្រេចលទ្ធផលផ្នែកសុខុមាលភាពជូនប្រជារាស្ត្រដាច់ស្រយាលតាមទីជនបទនានានៃព្រះនគរ ដើម្បីទទួលបានការរក្សាសុខភាពទាន់សម័យមួយដូចបណ្ដាប្រជារាស្ត្រឯទៀតនៅតាមទីប្រជុំជននានាផងដែរ៕

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

ខួប​ឆ្នាំ​ទី​៥០ នៃ​ពិធី​សម្ពោធ​អគារ​សិក្សា «​ព្រះ​នរោត្ដម សីហមុនី​» នៅ​ស្វាយ​ទាប ថ្ងៃសុក្រ 15 ខែធ្នូ 2017

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី២៥ ខែ​ធ្នូ ឆ្នាំ២០១៧ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅទឹក​ដី​នៃ​ខេត្ត​ស្វាយ​រៀង​ជា​ថ្មី​ម្ដង​ទៀត នោះគឺពិធី​​សម្ពោធ​អគារ​សិក្សា «​ព្រះ​នរោត្ដម សីហមុនី​» នៃ​អនុ​​វិទ្យាល័យ​យសោវរ្ម័ន នៅ​ប្រសូត ស្រុក​ស្វាយ​ទាប​​។ សម្ដេចព្រះប្រមុខរដ្ឋអមតៈនៃប្រជាជនខ្មែរបានស្ដេចយាងសម្ពោធដាក់ឲ្យប្រើប្រាស់ជាផ្លូវការនូវអគារ​សិក្សា​​នេះដោយព្រះអង្គផ្ទាល់។

ក្រៅ​អំពី​អគារ​សិក្សា «​ព្រះ​នរោត្ដម សីហមុនី​» នេះ សិមិទ្ធិ​ជា​ច្រើន​ផ្សេង​ទៀត​របស់​អនុ​វិទ្យាល័យ​ ត្រូវ​បាន​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ ដោយ​សម្ដេច​ព្រះ​ប្រមុខ​រដ្ឋ​ផ្ទាល់​ព្រះ​អង្គ​​ដើម្បី​​បម្រើ​ដល់​ការ​សិក្សា​របស់​សិស្សានុសិស្ស​ក្នុង​តំបន់​។

សិស្សានុសិស្ស ព្រម​ប្រជា​រាស្ត្រ​ជា​ច្រើន​បាន​ចេញ​មក​សាទរ និង​ទទួល​ស្វាគមន៍​ព្រះ​រាជ​ដំណើរ​របស់​សម្ដេច​ព្រះ​ប្រមុខ​រដ្ឋ​ក្នុង​បរិយាកាស​សប្បាយ​រីក​រាយ​រក​អ្វី​ប្រៀប​ពុំ​បាន​។

នៅ​ក្នុង​របប​សង្គម​រាស្ត្រ​និយម​ក្រោម​មគ្គុទេសក៍​របស់​សម្ដេច​ព្រះ​ប្រមុខ​រដ្ឋ​អមត​នៃ​ពួង​ជន​ខ្មែរ ព្រះ​អង្គ​ក៏​ដូច​ជា​រាជ​រដ្ឋាភិបាល​​សង្គម​តែង​តែ​យក​ព្រះ​ទ័យ​ទុក​ដាក់​ចំពោះ​​ការ​សិក្សា​របស់​យុវជន​ជំនាន់​ក្រោយ​ឲ្យ​ស្មើ​មុខ​មាត់ និង​អ្នក​រស់​នៅ​តាម​ទី​ប្រជុំ​ជន​ធំ​ៗ​ឯ​ទៀត​របស់​ព្រះ​នគរ

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

ខួប​ឆ្នាំ​ទី​៥០ ពិធី​សម្ពោធ​គិលាន​ដ្ឋាន​លីម ហួត ក្រោល​គោ ថ្ងៃចន្ទ 4 ខែធ្នូ 2017

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី៤ ខែ​ធ្នូ ឆ្នាំ២០១៧ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅទឹក​ដី​នៃ​ខេត្ត​ស្វាយ​រៀង នោះគឺពិធីសម្ពោធគិលាន​ដ្ឋាន​លីម ហួត ដែល​ស្ថិត​នៅ​ក្រោល​គោ​។ សម្ដេចព្រះប្រមុខរដ្ឋអមតៈនៃប្រជាជនខ្មែរបានស្ដេចយាងសម្ពោធដាក់ឲ្យប្រើប្រាស់ជាផ្លូវការនូវគិលាន​ដ្ឋាន​នេះដោយព្រះអង្គផ្ទាល់។

នេះជាសមិទ្ធផលដ៏ថ្លៃថ្នាមួយទៀតនៃរបបសង្គម រួម​នឹង​ការ​ចូល​រួម​ពី​គ្រប់​ភាគី​របស់​ប្រទេស​ ដែលបានសម្រេចលទ្ធផលផ្នែកសុខុមាលភាពជូនប្រជារាស្ត្រដាច់ស្រយាលតាមទីជនបទនានានៃព្រះនគរ ដើម្បីទទួលបានការរក្សាសុខភាពទាន់សម័យមួយដូចបណ្ដាប្រជារាស្ត្រឯទៀតនៅតាមទីប្រជុំជននានាផងដែរ៕

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

ខួប​ឆ្នាំ​ទី​៥០ ទស្សនកិច្ច​នៃ​ឯក​ឧត្ដម​លី ក្វាន យូវ និង​លោក​ជំទាវ​នៅ​កម្ពុជា ថ្ងៃសៅរ៍ 2 ខែធ្នូ 2017

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ, សង្គម​រាស្ត្រ​និយម, អំពីស្រុកខ្មែរ.
1 comment so far

ការ​អញ្ជើញ​ដល់​ពោធិចិនតុង

កាល​ពី​ព្រឹក​ថ្ងៃ​សៅរ៍​ទី​២ ធ្នូ ១៩៦៧ នៅ​ចំណត​អាកាស​យាន​ដ្ឋាន​អន្តរជាតិ​ពោធិចិនតុង មាន​រៀប​ចំ​ពិធី​បដិ​សណ្ឋារ​កិច្ច​មួយ​យ៉ាង​មហោឡារិក ចំពោះ​ភ្ញៀវ​កិត្តិយស​របស់​យើង គឺ​ឯក​ឧត្តម​លី ក្វានយូវ រដ្ឋ​មន្ត្រី​ទី​១​នៃ​សាធារណ​រដ្ឋ​សិង្ហបូរី ដែល​ត្រូវ​អញ្ជើញ​មក​ធ្វើ​ទស្សនកិច្ច​ជា​ផ្លូវ​ការ​ចំនួន​មួយ​សប្ដាហ៍​នៅ​ប្រទេស​កម្ពុជា​។

នៅ​ពេល​ចុះ​ពី​យន្តហោះ សម្ដេច​សហ​ជីវិន​ព្រះ​ប្រមុខ​រដ្ឋ​ទ្រង់​បាន​ស្ដេច​យាង​ទៅ​ប្រទាន​ព្រះ​ហស្ត​សម្ផស្ស​ ចំពោះ​ភ្ញៀវ​ដ៏​ឧត្ដម​នេះ រួច​ហើយ​មាន​យុវ​នារី​ដ៏​ស្រស់​ប្រិម​ប្រីយ​ពីរ​រូប​ជូន​បាច់​ផ្កា ចំពោះ​ឯក​ឧត្ដម និង​លោក​ជំទាវ លី ក្វាន​យូវ ផង​។

បន្ទាប់​ពី​បាន​គោរព​ភ្លេង​ជាតិ​នៃ​ប្រទេស​ទាំង​ពីរ​មក ឯក​ឧត្ដម​ លី ក្វាន​យូវ បាន​អញ្ជើញ​ត្រួត​ពល​ទាំង​៣​ក្រុម​នៃ​កង​ខេមរ​ភូមិន្ទ ហើយ​ក៏​បាន​អញ្ជើញ​ទៅ​កាន់​វេទិកា​ពិសេស ដោយ​បាន​ទទួល​ការ​អប​អរ​សាទរ​ពី​គណៈ​ប្រតិភូ​នៃ​ចលនា​យុវជន​រាជ​សង្គម​និយម​ខ្មែរ ពី​មន្ត្រី​រាជការ​គ្រប់​ក្រសួង ព្រម​ទាំង​ពី​ប្រជា​ពល​រដ្ឋ​យ៉ាង​ច្រើន​កក​កុញ​។

ក្រោយ​ពេល​ដែល​សម្ដេច​ឪ ទ្រង់​បាន​ថ្លែង​ព្រះ​សុន្ទរ​កថា​ស្វាគមន៍ ចំពោះ​ដំណើរ​ទស្សន​កិច្ច​នេះ​ហើយ ឯក​ឧត្ដម លី ក្វាន​យូវ បាន​ថ្លែង​សុន្ទរ​កថា​ជា​ភាសា​អង់គ្លេស​តប​វិញ​ប្រកប​ដោយ​អត្ថន័យ​យ៉ាង​ជ្រាល​ជ្រៅ​ក្រៃលែង និង​ប្រកប​ដោយ​សេចក្ដី​សោមនស្ស​ចំពោះ​បដិ​សណ្ឋារកិច្ច​ដ៏​កក់​ក្ដៅ នៃ​ប្រទេស​កម្ពុជា​។

លុះ​បាន​ទទួល​បដិ​សណ្ឋារកិច្ច​អំពី​ឥស្សរជន​ជាន់​ខ្ពស់​ខ្មែរ​បរទេស​នានា​ហើយ​មក សម្ដេច​ព្រះ​អគ្គ​មគ្គុទ្ទេសក៍​ដ៏​ជា​ទី​គោរព​ស្នេហា​នៃ​យើង និង​ឯក​ឧត្ដម​ លី ក្វានយូវ ទ្រង់​បាន​ស្ដេច​យាង និង​បាន​អញ្ជើញ​ឡើង​រថយន្ត​ពិសេស​ឆ្ពោះ​ទៅ​កាន់​រាជធានី ដែល​មាន​សិស្សានុសិស្ស​និង​ប្រជា​ពល​រដ្ឋ ជា​ច្រើន​ម៉ឺន​នាក់​រង់​ចាំ​ធ្វើ​គារ​វ​កិច្ច​អប​អរ​សាទេ ចំពោះ​ការ​អញ្ជើញ​មក​ដល់​នៃ​ឯក​ឧត្ដម លី ក្វាន​យូវ នេះ តាម​ដង​វិថី​នានា​ផង​។

______________________________________________________
អាន​ផង​ដែរ​
១. លោក លី និង​កម្ពុជា

ខួប​ឆ្នាំ​ទី​៥០ នៃ​ពិធី​សម្ពោធ​ដាក់​នាម​រុក្ខ​វិថី​ថ្មី រុក្ខ​វិថី ហ្ស​-ហ្វ កេណ្ណឺឌី ថ្ងៃចន្ទ 6 ខែវិច្ឆិកា 2017

Posted by សុភ័ក្ត្រ in បុគ្គល​សំខាន់, ប្រវត្តិសាស្ត្រ, សង្គម​រាស្ត្រ​និយម, អំពីស្រុកខ្មែរ.
3 comments

សម្ដេច​ឪ និង​លោក​ជំទាវ​ហ្សាក្កឺលីន កេណ្ណឺឌី យាង និង​អញ្ជើញ​បើក​ស្លាក​រុក្ខ​វិថី​ថ្មី «​រុក្ខ​វិថី ហ្ស​-ហ្វ កេណ្ណឺឌី​»

កាល​ពី​ព្រឹក​ថ្ងៃ​ទី​៦ វិច្ឆិកា ១៩៦៧ សម្ដេច​ឪ ទ្រង់​បាន​ស្ដេច​យាង​គង់​លើ​ព្រះ​ទី​នាំង​ឧទ្ធម្ភាគ​ចក្រ​ចេញ​ពី​រាជ​ធានី​ភ្នំពេញ​ឆ្ពោះ​ទៅ​កាន់​ទីក្រុង​ព្រះ​សីហនុ ដើម្បី​ទ្រង់​ជា​ព្រះ​អធិបតី​ក្នុង​ពិធី​សម្ពោធ​ដាក់​នាម​រុក្ខ​វិថី «​រុក្ខ​វិថី ហ្ស​-ហ្វ កេណ្ណឺឌី»​។

នៅ​ពេល​ស្ដេច​យាង​ទៅ​ដល់​ចំណត​យន្ត​ហោះ នៃ​ក្រុង​ព្រះ​សីហនុ ហើយ​សម្ដេច​ឪ​ទ្រង់​បាន​អញ្ជើញ​លោក​ជំទាវ ហ្សាក្កឺលីន កេណ្ណឺឌី ដែល​ជា​ភ្ញៀវ​ដ៏​ឧត្ដម​របស់​សម្ដេច​ឪ និង​ប្រជា​ពល​រដ្ឋ​ខ្មែរ​នោះ​ជិះ​នៅ​លើ​រថ​យន្ត​ពិសេស​របស់​ព្រះ​អង្គ​ឆ្ពោះ​ទៅ​កាន់​ព្រះ​ពន្លា​ពិសេស​ដែល​បាន​រចនា​ដោយ​ស្លឹក​រុក្ខ​ជាតិ និង​ទង់​ជាតិ​យ៉ាង​ល្អ​វិចិត្រ ដើម្បី​​សម្ពោធ​ដាក់​នាម​រុក្ខ​វិថី​ថ្មី ដែល​មាន​នាម​ថា​៖ «រុក្ខ​វិថី ហ្ស​-ហ្វ កេណ្ណឺឌី​» នាម​ស្វាមី​របស់​លោក​ជំទាវ ហ្សាក្កឺលីន កេណ្ណឺឌី​។

ក្នុង​ឱកាស​នោះ​សម្ដេច​ឪ និង​លោក​ជំទាវ ហ្សាក់​ក្កឺលីន កេណ្ណឺឌី បាន​ទទួល​ការ​ក្រាប​បង្គំ​ថ្វាយ និង​ទទួល​ការ​អប​អរ​សាទរ​ពី​មន្ត្រី​រាជការ យុវ័ន​យុវតី សិស្ស​សាលា និង​ប្រជា​ពល​រដ្ឋ​​ជា​ច្រើន​ម៉ឺន​នាក់ ដែល​បាន​មក​រួម​ក្នុង​ពិធី​នេះ​។

ក្រោយ​ដែល​បាន​ធ្វើ​ពិធី​ផ្សេង​ៗ​តាម​ផ្លូវ​ការ​រួច​ហើយ សម្ដេច​ឪទ្រង់​បាន​ថ្លែង​ព្រះ​រាជ​សុន្ទរ​កថា​មួយ​មាន​អត្ថន័យ​យ៉ាង​ពីរោះ ហើយ​ត​មក​លោក​ជំទាវ ហ្សាក្កឺលីន កេណ្ណឺឌី ក៏​បាន​ថ្លែង​សន្ទរ​កថា​តប​វិញ​។ នៅ​គ្រប់​ចំណុច​នៃ​ព្រះ​រាជ​សុន្ទរ​កថា និង​សុន្ទរ​កថា​នេះ ប្រជា​ពល​រដ្ឋ​បាន​ទះ​ដៃ​សំដែង​នូវ​សេចក្ដី​ពេញ​ចិត្ត​យ៉ាង​ក្រៃលែង​​។

លុះ​ចប់​ព្រះ​រាជ​សន្ទរ​កថា​ និង​​សុន្ទរ​កថា​ហើយ សម្ដេច​ឪ​ទ្រង់​បាន​អញ្ជើញ​លោក​ជំទាវ ហ្សាក្កឺលីន កេណ្ណឺឌី ទៅ​បើក​រនាំង​សំពត់​ដែល​គ្រប​ផ្ទាំង​សិលា​ចារឹក​នាម​ផ្លូវ​ថា​៖ «​រុក្ខ​វិថី ហ្ស​-ហ្វ កេណ្ណឺឌី​» ដែល​ទុក​ជា​ភ័ស្តុតាង​នៃ​នាម​វិថី​ថ្មី​នេះ​។ ត​មក​សម្ដេច​ឪ​ទ្រង់​បាន​អញ្ជើញ​​លោក​ជំទាវ​ឡើង​ជិះ​រថ​យន្ត​ដើម្បី​ធ្វើ​ការ​ទស្សនា​តាម​រុក្ខ​វិថី​ ហ្ស​.​ហ្វ​ កេណ្ណឺឌី​នេះ​ដែល​មាន​ចម្ងាយ​ផ្លូវ​២.៩០០​ម៉ែត្រ​។

ក្រោយ​ដែល​ចប់​ពិធី​សម្ពោធ​ដាក់​នាម​រុក្ខ​វិថី​ថ្មី​ដ៏​ល្អ​នេះ​រួច​សព្វ​គ្រប់​ហើយ សម្ដេច​ឪ​ទ្រង់​បាន​អញ្ជើញ​លោក​ជំទាវ​ ហ្សាក្កឺលីន កេណ្ណឺឌី ព្រម​ទាំង​មិត្រ​ដ៏​ជិត​ស្និទ្ធ​របស់​លោក​ជំទាវ ចូល​ទៅ​សំណាក់​នៅ​ព្រះ​រាជ​តំណាក់​ឈើ​ទាល ក្នុង​ក្រុង​ព្រះ​សីហនុ​។

______________________________________________________________
អាន​ផង​ដែរ​៖
១. ខួប​ឆ្នាំ​ទី​៥០ ទស្សន​កិច្ច​ជា​ប្រវត្តិ​សាស្ត្រ​នៃ​លោក​ជំទាវ កេណ្ណឹឌី នៅ​ប្រទេស​កម្ពុជា
២. ពិធី​លៀង​សាយ​ភោជន៍ និង​ការ​សម្ដែង​សិល្បៈ
៣. ការ​ចូល​ក្រាប​បង្គំ​គាល់​សម្ដេច​ព្រះ​មហា​ក្សត្រិយានី​នៅ​ព្រះ​បរម​រាជ​វាំង

%d bloggers like this: