jump to navigation

ថ្ងៃ​ទី​៣​នៃ​ដំណើរ​ទស្សនកិច្ច​ជា​ផ្លូវ​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​កម្ពុជា ថ្ងៃអង្គារ 5 ខែវិច្ឆិកា 2019

Posted by សុភ័ក្ត្រ in ប្រវត្តិសាស្ត្រ, សង្គម​រាស្ត្រ​និយម.
2 comments

ថ្ងៃ​ពុធ ទី​៥ ខែ​វិច្ឆិកា ឆ្នាំ​១៩៦៩
ថ្ងៃ​ទី​៣ នៃ​ដំណើរ​​ទស្សន​កិច្ច​ជា​ផ្លូវ​​​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​​ព្រះ​រាជ​អាណាចក្រ​កម្ពុជា

ថ្ងៃ​ពុធ ទី​៥ ខែ​វិច្ឆិកា ឆ្នាំ​១៩៦៩ ដែល​ជា​ថ្ងៃ​ទី​៣ នៃ​ដំណើរ​ទស្សនកិច្ច​ផ្លូវ​រដ្ឋ​នៅ​ប្រទេស​កម្ពុជា​នៃឯ.ឧ.​មហាមានី ឌីយ៉ូរី ប្រធានាធិបតី​នៃ​ប្រទេស​ហ្គីណេ មាន​ព្រឹត្តិការណ៍​ប្រវត្តិ​សាស្ត្រ​ជា​ច្រើន​ដែល​​​​គណៈ​ប្រតិភូ​បាន​បំពេញ​នៅ​ក្នុង​ទឹក​ដី​នៃ​ព្រះ​រាជអាណាចក្រ​កម្ពុជា ក្រោម​របប​សង្គម​នៃ​អង្គ​សម្ដេច​ព្រះ​ប្រមុខ​រដ្ឋ​។

  • នៅ​មន្ទីរ​ពិព័រណ៍​អចិន្ត្រៃយ៍​នៃ​សមិទ្ធិ​សង្គម​រាស្ត្រ​និយម

សម្ដេច​ព្រះ​ប្រមុខ​រដ្ឋ បាន​រួម​ដំណើរ​ជាមួយលោក​ប្រធានាធិបតី​នៃ​ប្រទេស​ហ្គីណេ លោក​ជំទាវ​ប្រធានាធិបតី និង​​គណៈ​ប្រតិភូ​ ធ្វើ​ការ​ទត និង​ទស្សនា​​នៅ​មន្ទីរ​ពិព័រណ៍​អចិន្ត្រៃយ៍​នៃ​សមិទ្ធិ​សង្គម​រាស្ត្រ​និយម​។ សមិទ្ធផល​នានា​នៃ​របប​សង្គម ដែល​ជា​ស្នាដៃ​នៃ​រដ្ឋាភិបាល​សង្គម​រួម​ជាមួយ​ប្រជា​ពល​រដ្ឋ​បាន​នាំ​គ្នា​កសាង​យ៉ាង​សម្បូរ​បែប ស័ក្ដិសម​ជា​ប្រទេស​ឯករាជ្យ​ត្រូវ​បាន​ដាក់​តាំង​បង្ហាញ​ជូន​ភ្ញៀវ​រដ្ឋ​ទស្សនា ប្រកប​ដោយ​ភាព​មោទន​នៃ​ប្រជាជាតិ​ខ្មែរ​នា​សម័យ​នោះ​​។

123

  • ប្រទាន​គ្រឿង​រាជ​ឥស្សរិយ​យស​ដល់​ភ្ញៀវ​រដ្ឋ

នៅ​ឯ​ព្រះ​ទីន័ង​ទេវាវិនិច្ឆ័យ​នៃ​ព្រះ​បរម​រាជ​វាំង​វិញ សម្ដេច​ព្រះ​ប្រមុខ​រដ្ឋ​ស្ដេច​បាន​រៀប​ចំ​ពិធី​ប្រទាន​ជា​កិត្តិយស​នូវ​គ្រឿង​រាជ​ឥស្សរិយ​យស​នៃ​ព្រះ​រាជ​អាណាចក្រ​កម្ពុជា ជូន​លោក​ប្រធានាធិបតី លោក​ជំទាវ ព្រម​ទាំង​ឥស្សរជន​រួម​ដំណើរ​មួយ​ចំនួន​ទៀត​ផង​ដែរ​។ បន្ទាប់​មក​សម្ដេច​ព្រះ​ប្រមុខ​រដ្ឋ​ និង​លោក​ប្រធានាធិបតី​ក៏​បាន​ចុះ​ហត្ថលេខា​លើ​សេចក្ដី​ប្រកាស​រួម​រវាង​ប្រទេស​ទាំង​ពីរ​ផង​។

45

  • ដំណើរ​និវត្តនៃ​លោក​ប្រធានាធិបតី

នៅ​វេលា​ព្រលប់​ថ្ងៃ​ដដែល​នេះ ដែល​​ជា​ថ្ងៃ​បញ្ចប់​នៃដំណើរ​ទស្សនកិច្ច​ផ្លូវ​រដ្ឋ​ រយៈ​ពេល​៣​​ថ្ងៃ​នៅ​ប្រទេស​កម្ពុជា ប្រកប​ដោយ​ជោគ​ជ័យ និង​ផ្លែ​ផ្កា ស​បញ្ជាក់​ពី​ទំនាក់​ទំនង​រវាង​ប្រទេស​ទាំង​ពីរ ជា​ពិសេស​រវាង​ថ្នាក់​ដឹក​នាំ​កំពូល​ទាំង​ពីរ​ គឺ​សម្ដេច​ព្រះ​ប្រមុខ​រដ្ឋ និង​​លោក​ប្រធានាធិបតី​នៃ​ប្រទេស​ហ្គីណេ​។

នៅ​តាម​ដង​វិថី​នានា​ក្នុង​ក្រុង​ភ្នំពេញ ចាប់​ពី​ព្រះ​រាជ​ដំណាក់​ រហូត​ដល់​អាកាស​យានដ្ឋាន​អន្តរជាតិ​ពោធិចិន​តុង ប្រជា​រាស្ត្រ​ខ្មែរ សិស្សានុសិស្ស និង​អ្នក​រាជការ​គ្រប់​លំដាប់​បាន​ចេញ​មក​ស្វាគមន៍​ដំណើរ​និវត្ត​របស់​​​លោក​ប្រធានាធិបតី និង​​​​គណៈ​ប្រតិភូ​។ សម្ដេច​ព្រះ​ប្រមុខ​រដ្ឋ និង​អ្នក​ម្នាង ស្ដេច​យាង និង​អញ្ជើញ​ជូន​ដំណើរ​ភ្ញៀវ​រដ្ឋ​រហូត​ដល់​អាកាស​យាន​ដ្ឋាន​ផង​ដែរ​។

នៅ​ឯ​អាកាស​យាន​ដ្ឋាន​ឯណុះ​ពិធី​​បដិ​សណ្ឋារកិច្ច​ជូន​​ព្រះ​រាជ​ដំណើរ​និវត្ត​ជា​ផ្លូវ​ការ​ត្រូវ​បាន​រៀប​ចំ​ឡើង​ជូន​ជា​កិត្តិយស​ដល់​​លោក​ប្រធានាធិបតី​ ដោយ​មាន​ការ​អញ្ជើញ​ត្រួត​ពល​កង​ទាហាន​កិត្តិយស​ខ្មែរ​ ព្រម​ទាំង​ការ​ជូន​បាច់​ផ្កា​ជា​ទី​អនុស្សាវរីយ៍​ដល់​​ភ្ញៀវ​រដ្ឋ​ផង​ដែរ​។

ដំណើរ​ទស្សនកិច្ច​របស់​លោក​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី និង​លោក​ជំទាវ​​ រយៈ​ពេល​៣​ថ្ងៃ​នៅ​នគរ​កម្ពុជា កាល​ពី​៥០​ឆ្នាំ​មុន​នេះ ពិត​ជា​បាន​បញ្ជាក់​ពី​នយោបាយ​ការទូត​ដ៏​ប៉ិន​ប្រសប់​មួយ​នៃ​អង្គ​សម្ដេច​ឪ​ក្នុង​ការ​ស្វះ​ស្វែង​រក​មិត្រ​ពី​គ្រប់​ទ្វីប​នៅ​ទូទាំង​ពិភព​លោក បន្ទាប់​ពី​ប្រទេស​កម្ពុជា ក៏ដូច​ជា​ប្រទេស​ឯ​ទៀត​ៗ​ទើប​ឆ្លង​ផុត​ពី​សម័យ​អាណា​និគម​និយម​មក​នោះ​៕

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

67

________________________________________________________________________
អាន​ផង​ដែរ​៖
១. មហា​បាតុកម្ម​ប្រជាពល​រដ្ឋ​នៅ​ពហុ​កីឡដ្ឋាន​ជាតិ​ជូន​ជា​កិត្តិយស​ចំពោះ​ឯក​ឧត្ដម​ប្រធានាធិបតី​នៃ​ប្រទេស​ហ្គីណេ
២. ខួប​ឆ្នាំ​ទី​៥០ ទស្សនកិច្ច​ជា​ផ្លូវ​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​កម្ពុជា

មហា​បាតុកម្ម​ប្រជាពល​រដ្ឋ​នៅ​ពហុ​កីឡដ្ឋាន​ជាតិ​ជូន​ជា​កិត្តិយស​ចំពោះ​ឯក​ឧត្ដម​ប្រធានាធិបតី​នៃ​ប្រទេស​ហ្គីណេ ថ្ងៃចន្ទ 4 ខែវិច្ឆិកា 2019

Posted by សុភ័ក្ត្រ in ប្រវត្តិសាស្ត្រ, សង្គម​រាស្ត្រ​និយម.
2 comments

ថ្ងៃ​អង្គារ ទី​៤ ខែ​វិច្ឆិកា ឆ្នាំ​១៩៦៩
ថ្ងៃ​ទី​២ នៃ​ដំណើរ​​ទស្សន​កិច្ច​ជា​ផ្លូវ​​​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​​ព្រះ​រាជ​អាណាចក្រ​កម្ពុជា

  • មហា​បាតុកម្ម​ប្រជា​ពល​រដ្ឋ​ជូន​ជា​​កិត្តិយស​ចំពោះ​ឯ.ឧ.​ប្រធានាធិបតី

នៅ​ឯ​ពហុ​កីឡដ្ឋាន​ជាតិ​អូឡាំពិក នា​ទី​ក្រុង​ភ្នំពេញ មហា​បាតុកម្ម​ប្រជាជន​ខ្មែរ​ដ៏​ធំ​មួយ​ត្រូវ​បាន​រៀប​ចាត់​ឡើង​ដើម្បី​ទទួល​ស្វាគមន៍ និង​ជូន​ជា​កិត្តិយស​ចំពោះ​ឯ.ឧ.​មហាមានី ឌីយ៉ូរី ដែល​ជា​ភ្ញៀវ​រដ្ឋ​ដ៏​សំខាន់​របស់​កម្ពុជា​។

ប្រជាជន​ខ្មែរ​ជា​ច្រើន​ម៉ឺន​នាក់​បាន​នាំ​គ្នា​អង្គុយ​តម្រៀប​ជា​តួ​អក្ស​រ​នានា ដើម្បី​ស្វាគមន៍​ភ្ញៀវ និង​ការ​សម្ដែង​សិល្បៈ​ជា​ច្រើន​ទម្រង់ នៅ​ខាង​ក្នុង​បរិវេណ​នៃ​ទី​លាន​កីឡា​បាល់​ទាត់​របស់​ពហុ​កីឡដ្ឋាន​ផង​ដែរ​ អម​ដោយ​សំឡេង​ទះ​ដៃ​សាទរ​យ៉ាង​កង​រំពង​ទូទាំង​ពហុ​កីឡដ្ឋាន ក្នុង​ទិដ្ឋភាព​គួរ​ឲ្យ​រំភើប និង​ចង់​គយ​គន់​យ៉ាង​ខ្លាំង​។

បន្ទាប់​ពី​សន្ទរកថា​ស្វាគមន៍ និង​កិច្ច​សំណេះ​សំណាល​របស់​​ឯ.ឧ.​ប្រធានាធិបតី និង​​មុន​ពេល​បញ្ចប់​​កម្ម​វិធី ឯ.ឧ.​ប្រធានាធិបតី រួម​និង​សម្ដេច​ព្រះ​ប្រមុខ​រដ្ឋ បាន​យាង​​ជិះ​លើ​ព្រះ​ទីន័ង​រថយន្ត​បើក​ដំបូល​ ជុំ​វិញ​ទី​លាន​បាល់​ទាត់​ដើម្បី​ឲ្យ​អ្នក​ចូល​រួម​ទាំង​អស់​បាន​ឃើញ​យ៉ាង​ជិត​​នូវ​ព្រះ​អគ្គ​មគ្គុទេសក៍​របស់​ពួក​គេ ក៏​ដូច​ជា​ភ្ញៀវ​រដ្ឋ​នៃ​កម្ពុជា ឯ.ឧ.​មហាមានី ឌីយ៉ូរី ​​ផង​ដែរ​​។

ការ​សម្ដែង​ និង​មហា​បាតុកម្ម​របស់​ប្រជាពល​រដ្ឋ​ខ្មែរ​នា​ពេល​នោះ បាន​សម្ដែង​ឲ្យ​ឃើញ​ពី​ភាព​រីក​ចម្រើន​របស់​ប្រទេស​កម្ពុជា នា​របប​សង្គម ក្រោម​ការ​ដឹក​នាំ​នៃ​អង្គ​សម្ដេច​ព្រះ​ប្រមុខ​រដ្ឋ មគ្គុទេសក៍​ដ៏​ឆ្នើម​នៃ​ពល​រដ្ឋ​ខ្មែរ ក៏​ដូច​ជា​ភាព​ស៊ីវិល័យ​នានា​របស់​ប្រជាជន​ខ្មែរ និង​ប្រទេស​ខ្មែរ​ទាំង​មូល​។ ទិដ្ឋភាព​អស់​ទាំង​នោះ​ក៏​បាន​ឆ្លុះ​បង្ហាញ​ពី​ទំនាក់​ទំនង​ដ៏​ល្អ​របស់​ព្រះ​រាជ​អាណាចក្រ​កម្ពុជា ជាមួយ​ប្រទេស​ជា​មិត្រ​ក្រោយ​កម្ពុជ​រដ្ឋ​ទទួល​បាន​ឯក​រាជ្យ​ពី​សាធារណ​រដ្ឋ​បារាំង​សែស​ ក៏​ដូច​ជា​បង្ហាញ​ពិភព​លោក​ឲ្យ​ឃើញ​ពី​កិត្តិនាម​របស់​កម្ពុជា​លើ​ឆាក​អន្តរជាតិ​ផង​ដែរ​​។

1234

​ដោយ​ឡែក​នៅ​រសៀល​ថ្ងៃ​ដដែល​នេះ​ដែរ ឯ.ឧ.​ប្រធានាធិបតី ព្រម​​ទាំង​​​គណៈ​ប្រតិភូ អម​ដំណើរ​ដោយ​សម្ដេច​ព្រះ​ប្រមុខ​រដ្ឋ​បាន​ធ្វើ​ដំណើរ​ចេញ​ពី​​រាជធានី​ភ្នំពេញ ឆ្ពោះ​មក​កាន់​ខេត្ត​សៀមរាប​​​។ ចាប់​តាំង​ពី​ទីក្រុង​ភ្នំពេញ រហូត​មក​ដល់​ព្រលាន​យន្តហោះ​អន្តរជាតិ​ពោធិចិន​តុង មាន​ប្រជា​រាស្ត្រ​ឈរ​តាម​ដង​វិថី​នានា​ស្វាគមន៍​យ៉ាង​កក់​ក្ដៅ​បំផុត​។ ការ​ធ្វើ​ដំណើរ​ទៅ​កាន់​ខេត្ត​សៀមរាប​នោះ គឺ​ធ្វើ​ឡើង​តាម​ជើង​អាកាស​ចរ​ភូមិន្ទ​កម្ពុជា​។

ចាប់​តាំង​ពី​ព្រលាន​យន្តហោះ​អន្តរជាតិ​ខេត្ត​សៀមរាប​មក មាន​ប្រជាជន និង​អ្នក​រាជការ​ខ្មែរ​ក្នុង​ខេត្ត​ច្រើន​ម៉ឺន​នាក់​នាំ​គ្នា​ឈរ​ទទួល​ឯក​ឧត្ដម យ៉ាង​កក់​ក្ដៅ​បំផុត​។ ឯ.ឧ.​ប្រធានាធិបតី និង​លោក​ជំទាវ បាន​​​ទស្សនា​ប្រាង្គប្រាសាទ​ខ្មែរ​ដ៏​ល្បី​ល្បាញ​ជា​ច្រើន​រួម​មាន ប្រាសាទ​នគរ​វត្ត បាយ័ន … ជា​ដើម ដោយ​មាន​ការ​យាង​អម​ដំណើរ​គណៈ​ប្រតិភូ​​ជា​មគ្គុទេសក៍ ​ពី​សំណាក់​សម្ដេច​ព្រះ​ប្រមុខ​រដ្ឋ និង​អ្នក​ម្នាង​ផង​ដែរ​។

នៅ​ឯ​ខាង​មុខ​ស្រះ​ស្រង់​ឯណុះ ក៏​មាន​ការ​ចាត់​សម្ដែង​របាំ​ខ្មែរ​ជូន​​ជា​ព្រះ​កិត្តិយស​ចំពោះ​ភ្ញៀវ​រដ្ឋ​ដ៏​សំខាន់​ និង​មាន​ការ​រៀប​ចំ​លៀង​សាយភោជន៍​ផង​៕

567

________________________________________________________________________
អាន​ផង​ដែរ​៖
១. ខួប​ឆ្នាំ​ទី​៥០ ទស្សនកិច្ច​ជា​ផ្លូវ​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​កម្ពុជា
២. ថ្ងៃ​ទី​៣​នៃ​ដំណើរ​ទស្សនកិច្ច​ជា​ផ្លូវ​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​កម្ពុជា

ខួប​ឆ្នាំ​ទី​៥០ ទស្សនកិច្ច​ជា​ផ្លូវ​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​កម្ពុជា ថ្ងៃអាទិត្យ 3 ខែវិច្ឆិកា 2019

Posted by សុភ័ក្ត្រ in ប្រវត្តិសាស្ត្រ, សង្គម​រាស្ត្រ​និយម.
3 comments

ទំនាក់​ទំនង​ជា​ប្រវត្តិ​សាស្ត្រ​នៃ​ព្រះ​រាជ​អាណាចក្រ​កម្ពុជា រដ្ឋ​ដែល​ទើប​ទទួល​បាន​ឯករាជ្យ​ថ្មី​ៗ ជាមួយ​បណ្ដា​ប្រទេស​​នានា​​លើ​លោក​ទាំង​ធំ​ទាំង​តូច ​ក្នុង​ន័យ​បង្កើន​ចំណង​មេត្រី​ភាព​មាន​ន័យ​ធំ​ធេង​ខ្លាំង​ណាស់ ក្រោម​ព្រះ​រាជ​កិច្ច​ដឹក​នាំ​​របស់​របប​សង្គម​ជា​អមតៈ​នៃ​សម្ដេច​ព្រះ​ប្រមុខ​​​ជាតិ​ខ្មែរ នរោត្ដម សីហនុ​។ ថ្ងៃ​ទី​៣ ខែ​វិច្ឆិកា ឆ្នាំ​២០១៩ នេះ មាន​រយៈ​ពេល​៥០​ឆ្នាំ​គត់​នៃ​ដំណើរ​​ទស្សន​កិច្ច​ជា​ផ្លូវ​​​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​​ព្រះ​រាជ​អាណាចក្រ​កម្ពុជា​។

នៅ​ឯ​អាកាស​យាន​ដ្ឋាន​អន្តរជាតិ​ពោធិចិនតុង នា​​ថ្ងៃ​ចន្ទ ទី​៣ ខែ​វិច្ឆិកា ឆ្នាំ​១៩៦៩ សម្ដេច​ព្រះ​ប្រមុខ​រដ្ឋ ព្រម​ទាំង​មន្ត្រី​រាជការ​ និង​ប្រជា​ពល​រដ្ឋ​គ្រប់​ជាន់​ថ្នាក់ បាន​យាង និង​អញ្ជើញ​ចូលរួម​ធ្វើ​បដិសណ្ឋារកិច្ច​យ៉ាង​អធិក​អធមជូន​​ជា​​​កិត្តិយស​ចំពោះ​​ដំណើរ​​ទស្សន​កិច្ច​ជា​ផ្លូវ​រដ្ឋ​នៃ​ឯ.ឧ.​មហាមានី ឌីយ៉ូរី ប្រធានាធិបតី​នៃ​សាធារណ​រដ្ឋ​ហ្គីណេ និង​លោក​ជំទាវ ព្រម​ទាំង​​​គណៈ​ប្រតិភូ​​។

បន្ទាប់​ពី​សន្ទរកថា​ស្វាគមន៍​ភ្ញៀវ​រដ្ឋ​នៃ​កម្ពុជា​រួច​មក សម្ដេច​ព្រះ​​ប្រមុខ​រដ្ឋ​ស្ដេច​យាង​រួម​ដំណើរ​​ជា​មួយ​ឯ.ឧ.​ប្រធានាធិបតី​​តាំង​ពី​ចំណត​អាកាស​យាន​ដ្ឋាន​រហូត​ដល់​​​ព្រះ​បរម​រាជ​វាំង ដោយ​កាត់​តាម​វិថី​​ដ៏​ស្រស់​ឆើត​ឆាយ​ និង​សមិទ្ធផល​​នានា​​ដ៏​ច្រើន​សម្បើម​​របស់​ក្រុង​ភ្នំពេញ​នា​សម័យ​នោះ​។

នៅ​ថ្ងៃ​ដដែល​នោះ​ដែរ នៅ​ឯ​ព្រះ​ទីន័ង​ទេវាវិនិច្ឆ័យ សម្ដេច​ព្រះ​ប្រមុខ​រដ្ឋ​បាន​ធ្វើ​ពិធី​ទទួល​សវនការ​ជា​ផ្លូវ​ការ​ជាមួយ​ភ្ញៀវ​រដ្ឋ ប្រកប​ដោយ​ភាព​ស្និទ្ធ​ស្នាល​ជា​ក្រែលែង​។ វេលា​បន្ទាប់ ព្រះ​អង្គ​ក៏​បាន​រៀប​ចំ​ពិធី​លៀង​សាយ​ភោជន៍​ជា​ផ្លូវ​ការ​មួយ​ផង​ដែរ នៅ​ឯ​វិមាន​រដ្ឋ​ចម្ការ​មន​។​ នា​យប់​ថ្ងៃ​ដដែល​នោះ​ដែរ នៅ​ឯ​សាល​មហោស្រព​ជាតិ​ព្រះ​សុរាម្រឹត ព្រះ​អង្គ​ក៏​មាន​ចាត់​ការ​សម្ដែង​សិល្បៈ​ជាតិ​ជូន​ភ្ញៀវ​ទស្សនា និង​ស្វែង​យល់​ពី​ប្រពៃណី​វប្បធម៌​ខ្មែរ​ផង​ដែរ​។

ឯ.ឧ.​មហាមានី ឌីយ៉ូរី ប្រធានាធិបតី​នៃ​សាធារណ​រដ្ឋ​ហ្គីណេ និង​លោក​ជំទាវ បាន​អញ្ជើញ​​​មក​បំពេញ​​​ទស្សនកិច្ច​នៅ​កម្ពុជា​ចាប់​ពី​ថ្ងៃ​ទី​៣ ដល់​ទី​៥ ខែ​វិច្ឆិកា ឆ្នាំ​១៩៦៩ តប​តាម​ការ​យាង​ពី​សំណាក់​​សម្ដេច​ព្រះ​ប្រមុខ​​​ជាតិ​ខ្មែរ នរោត្ដម សីហនុ​៕

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

12345678

________________________________________________________________________
អាន​ផង​ដែរ​៖
១. មហា​បាតុកម្ម​ប្រជាពល​រដ្ឋ​នៅ​ពហុ​កីឡដ្ឋាន​ជាតិ​ជូន​ជា​កិត្តិយស​ចំពោះ​ឯក​ឧត្ដម​ប្រធានាធិបតី​នៃ​ប្រទេស​ហ្គីណេ
២. ថ្ងៃ​ទី​៣​នៃ​ដំណើរ​ទស្សនកិច្ច​ជា​ផ្លូវ​រដ្ឋ​នៃ​ប្រធានាធិបតី​ហ្គីណេ ឯ.ឧ.​មហាមានី ឌីយ៉ូរី នៅ​កម្ពុជា

ខួប​ឆ្នាំ​ទី​៥០ ពិធី​សម្ពោធ​ព្រែក​ជីក​នៅ​បន្ទាយ​ចាស់ ខេត្តកំពង់ធំ ថ្ងៃសុក្រ 18 ខែតុលា 2019

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី១៨ ខែ​តុលា ឆ្នាំ២០១៩ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅ​​​ក្នុង​ទឹក​ដី​​​បន្ទាយ​ចាស់ ឃុំ​ត្នោត​ជុំ ស្រុក​បារ៉ាយ ខេត្ត​កំពង់ធំ នោះ​​គឺ​ការ​សម្ពោធ​​សមិទ្ធផល​ព្រែក​ជីក​។ សម្ដេចព្រះប្រមុខរដ្ឋអមតៈនៃប្រជាជនខ្មែរបានស្ដេចយាងសម្ពោធដាក់ឲ្យប្រើប្រាស់ជាផ្លូវការនូវសមិទ្ធផល​​នោះ​ដោយព្រះអង្គផ្ទាល់។

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

123

ខួប​ឆ្នាំ​ទី​៥០ ពិធី​បើក​ការដ្ឋាន​ស្ថាបនា​ផ្លូវ​នៅ​ស្ទឹង​មានជ័យ ថ្ងៃចន្ទ 14 ខែតុលា 2019

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី១៤ ខែតុលា ឆ្នាំ២០១៩ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅ​ស្ទឹង​មាន​ជ័យ នោះ​គឺ​​ពិធី​បើក​ការដ្ឋាន​ស្ថាបនា​ផ្លូវ​ថ្មី​មួយ​ទៀត​ ក្រោម​ព្រះ​អធិបតី​នៃ​​សម្ដេចព្រះប្រមុខរដ្ឋអមតៈនៃប្រជាជនខ្មែរ ព្រម​ទាំង​ប្រជា​រាស្ត្រ​នៃ​ព្រះ​អង្គ​យ៉ាង​ច្រើន​កុះ​ករ​។

នៅ​ក្នុង​សម័យ​សង្គម ផ្លូវ​ថ្មី​ៗ​ជា​ច្រើន​ទាំង​នៅ​តាម​ទីក្រុង និង​ជនបទ​ត្រូវ​បាន​ស្ថាបនា​ឡើង​ជា​ច្រើន ដើម្បី​ភាព​រីក​លូត​លាស់​នៃ​ប្រទេស​ជាតិ ជា​មធ្យោបាយ​ដើម្បី​សម្រួល​ដល់​ការ​ធ្វើ​ដំណើរ និង​ដឹក​ជញ្ជូន​របស់​ប្រជាជន​។

សម្រាប់​​ការដ្ឋាន​ស្ថាបនា​ផ្លូវ​នៅ​ស្ទឹង​មានជ័យ​នា​៥០​ឆ្នាំ​មុន​នេះ គឺ​ជា​ផ្លូវ​ក្រវ៉ាត់​រាជធានី​ថ្មី​មួយ ដែល​ពេល​នោះមាន​សភាព​ជា​ទី​ទឹក​លិច​ដោយ​អន្លើៗ​នៅ​ឡើយ​។

សម្ដេច​ឪ​ស្ដេច​បាន​ទ្រង់​ប្រទាន​ឧទាហរណ៍​ដោយ​កាប់​គាស់​ដី​បើក​ការដ្ឋាន​មុន​គេ​។ នៅ​លើ​ការ​ដ្ឋាន​គេ​ឃើញ​មាន​ជន​បរទេស បាន​ស្ម័គ្រ​ចិត្ត​ចូល​រួម​កាប់​ដី​ជាមួយ​នឹង​ពល​ករ​ខ្មែរ​ផង​។ ដោយ​ឡែក​ក្រុម​អ្នក​យក​ព័ត៌មាន​របស់​ស្ថានីយ​ទូរទស្សន៍​អង់គ្លេស «​ថែម ធីវី​» ក៏​បាន​ចូល​មក​ផ្ដិត​យក​រូប​ថត និង​ព័ត៌មាន​ពី​ការ​ហត្ថកម្ម​នា​ពេល​នោះ​ដែរ​៕

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

123

ឆ្នាំ​ទី​៥០ ពិធី​សម្ពោធ​ផ្លូវ​ថ្មី ព្រៃ​ទទឹង-ពាមជីកង ថ្ងៃអាទិត្យ 13 ខែតុលា 2019

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី១៣ ខែតុលា ឆ្នាំ២០១៩ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅ​ទឹក​ដី​ខេត្ត​កំពង់ចាម នោះ​គឺ​ការ​សម្ពោធ​​ផ្លូវ​ថ្មី ពី​ព្រៃ​ទទឹង-ពាមជីកង ព្រម​ទាំង​សមិទ្ធផល​ជា​ច្រើន​ទៀត​​របស់​ខេត្ត​​ ក្រោម​ព្រះ​អធិបតី​នៃ​​សម្ដេចព្រះប្រមុខរដ្ឋអមតៈនៃប្រជាជនខ្មែរ ព្រម​ទាំង​ប្រជា​រាស្ត្រ​នៃ​ព្រះ​អង្គ​យ៉ាង​ច្រើន​កុះ​ករ​។

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

1234567

ខួប​ឆ្នាំ​ទី​៥០ ពិធី​បើក​ការដ្ឋាន​ស្ថាបនា​ផ្លូវ​នៅ​គគី ថ្ងៃចន្ទ 16 ខែកញ្ញា 2019

Posted by សុភ័ក្ត្រ in សង្គម​រាស្ត្រ​និយម.
add a comment

ថ្ងៃទី១៦ ខែកញ្ញា ឆ្នាំ២០១៩ នេះ មានរយៈពេល៥០ឆ្នាំគត់ ដែលពិធីជាប្រវត្តិសាស្ត្រជាតិខ្មែរមួយបានកើតឡើងនៅ​ទឹក​ដី​​គគី នោះ​គឺ​​ពិធី​បើក​ការដ្ឋាន​ស្ថាបនា​ផ្លូវ​ថ្មី​មួយ​ទៀត​ពី​គគី​ទៅ​ស្អាង​ ក្រោម​ព្រះ​អធិបតី​នៃ​​សម្ដេចព្រះប្រមុខរដ្ឋអមតៈនៃប្រជាជនខ្មែរ ព្រម​ទាំង​ប្រជា​រាស្ត្រ​នៃ​ព្រះ​អង្គ​យ៉ាង​ច្រើន​កុះ​ករ​។

ស្រង់ចេញពីកម្រងអនុស្សាវរីយ៍ដោយរូបភាពនៃកម្ពុជា សង្គមរាស្ត្រនិយម

Untitle-d-1

%d bloggers like this: