jump to navigation

ពល​រដ្ឋ​ជប៉ុន​ចេញ​មក​ថ្វាយ​ព្រះ​ពរ​ព្រះ​ចៅ​អធិរាជ​ថ្មី ថ្ងៃពុធ 8 ខែ​ឧសភា 2019

Posted by សុភ័ក្ត្រ in 日本語.
2 comments

59904105_1998723713566005_2957492214915137536_n

នានាប្រទេស៖ ក្រុងតូក្យូ, ប្រទេស​ជប៉ុន – កាល​ពី​ថ្ងៃ​សៅរ៍ ទី​៤ ខែ​ឧសភា ឆ្នាំ​២០១៩ សប្ដាហ៍​មុន​នេះ ព្រះ​ចៅអធិរាជ​ជប៉ុន ណារុហ៊ិតុ រួម​ទាំង​ព្រះ​ចៅ​អធិរាជិនី និង​ព្រះ​ញាតិ​វង្ស​ជាន់​ខ្ពស់​របស់​ជប៉ុន ស្ដេច​បាន​​សព្វ​ព្រះ​រាជ​ហឫទ័យ​ចេញ​មក​ទទួល​ស្វាគមន៍ ពល​រដ្ឋ​ជប៉ុន​រាប់​ពាន់​នាក់ និង​បង្ហាញ​ព្រះ​ភ័ក្ត្រ​លើក​ដំបូង បន្ទាប់​ពី​ព្រះ​រាជ​ពិធី​ឡើង​គ្រង​សិរីរាជ្យ​សម្បត្តិ កាល​ពី​ថ្ងៃ​ទី​១ ខែ​ឧសភា ឆ្នាំ​២០១៩ កន្លង​មក​នេះ​។

ព្រះ​ចៅ​អធិរាជ អធិរាជិនី ព្រម​ទាំង​ព្រះ​ញាតិ​វង្ស ស្ដេច​បង្ហាញ​ព្រះ​ភ័ក្ត្រ​ឯ​សីហ​បញ្ជរ​នៃ​ព្រះ​បរម​រាជ​វាំង​ព្រះ​ចៅ​អធិរាជ ក្រុង​តូក្យូ និង​បាន​មាន​រាជ​ឱង្កា​រ​​ថ្លែង​អំណរ​គុណ​ចំពោះ​ប្រជា​ពល​រដ្ឋ​ជប៉ុន​រាប់​ពាន់​នាក់​ដែល​មក​ថ្វាយ​ព្រះ​ពរ​ទ្រង់​។

ខ្ញុំ​សូម​ជូន​ពរ​ឲ្យ​អ្នក​ទាំង​អស់​គ្នា​មាន​សុខភាព​ល្អ និង​សុភមង្គល​ ហើយ​ក៏​ជូន​ពរ​ឲ្យ​ប្រទេស​របស់​យើង​មាន​ការ​អភិវឌ្ឍ​ឥត​ឈប់​ឈរ ដោយ​សហការ​យ៉ាង​ជិត​ស្និទ្ធ​ជាមួយ​ប្រទេស​ទាំង​អស់​ ដើម្បី​​សុខ​សន្តិភាព​នៅ​លើ​ពិភព​លោក​យើង​នេះ​។
ព្រះ​រាជ​បបន្ទូល​សូរ​សីហ​នាថ​នៃ​ព្រះ​ចៅ​អធិរាជ​ជប៉ុន​មាន​ទៅ​កាន់​ប្រជារាស្ត្រ​

សម្ដេច​ព្រះ​ចៅ​អធិរាជ​ណារុហ៊ិតុ ស្ដេច​ឡើង​ស្នង​រាជ​ជា​ព្រះ​ចៅ​អធិរាជ​ព្រះ​អង្គ​ទី​១២៦​របស់​ជប៉ុន បន្ត​ពី​ព្រះ​រាជ​ជនក​នាថ ដែល​បាន​ដាក់​រាជ​សម្បត្តិ កាល​ពី​ថ្ងៃ​ទី​៣០ ខែ​មេសា ឆ្នាំ​២០១៩ កន្លងមក​​។ ចំណែក​ឯ​ព្រះ​រាជ​ពិធី​បរម​អធិ​​រាជាភិសេក​ផ្លូវ​ការ នឹង​ត្រូវ​ចាត់​ធ្វើ​ឡើង​នា​ខែ​តុលា ឆ្នាំ​២០១៩ ខាង​មុខ​នេះ​៕​៚

59700651_1998723706899339_2601691922909102080_n59847957_1998723736899336_2014742113144537088_n60104229_1998723730232670_5247415300780982272_nd5cdb12e-6e0a-11e9-994e-1d1e521ccbf6_image_hires_145058

_______________________________________________________
អាន​ផង​ដែរ ៖
១. ប្រមុខ​​​១៩៥​ប្រទេស​ ​ចូល​រួម​ព្រះ​រាជ​ពិធី​បរម​រាជាភិសេក អធិរាជ​ជប៉ុន
២. ជប៉ុន​ប្រកាស​រជ្ជ​ស័ក​ថ្មី «​រេវ៉ៈ​»
៣. ព្រះ​រាជ​ពិធី​ដាក់​រាជ្យ​នៃ​ព្រះ​ចៅ​អធិរាជ​ជប៉ុន
៤. ព្រះ​រាជ​ពិធី​គ្រង​សិរី​រាជ​សម្បត្តិ​នៃ ព្រះ​ចៅ​អធិរាជ​ជប៉ុន ព្រះ​អង្គ​ថ្មី

Advertisements

ព្រះ​រាជ​ពិធី​គ្រង​សិរី​រាជ​សម្បត្តិ​នៃ ព្រះ​ចៅ​អធិរាជ​ជប៉ុន ព្រះ​អង្គ​ថ្មី ថ្ងៃពុធ 1 ខែ​ឧសភា 2019

Posted by សុភ័ក្ត្រ in 日本語.
2 comments

នានាប្រទេស៖ ក្រុងតូក្យូ, ប្រទេស​ជប៉ុន – ថ្ងៃ​ទី​១ ខែ​ឧសភា ឆ្នាំ​២០១៩ នេះ នៅ​ឯ​ព្រះ​បរម​រាជ​វាំង​ព្រះ​ចៅ​អធិរាជ ក្រុង​តូក្យូ ប្រទេស​ជប៉ុន មាន​ចាត់​ព្រះ​រាជ​ពិធី​ឡើង​គ្រង​រាជ​សម្បត្តិ​នៃ​ព្រះ​ចៅ​អធិរាជ​អង្គ​ថ្មី ណារុហ៊ិតុ​។

ព្រះ​រាជ​ពិធី​ឡើង​គ្រង​រាជ​ត្រូវ​បាន​ចាត់​ធ្វើ​យ៉ាង​សាមញ្ញ​នៅ​វេលា​ម៉ោង​ប្រមាណ​៨.៣០​នាទី (​ម៉ោង​នៅ​កម្ពុជា​) ព្រឹក ដោយ​មាន​ប្រកប​ព្រះ​រាជ​ពិធី​ថ្វាយ​​គ្រឿង​រាជ​កកុធ​ភណ្ឌ និង​ព្រះ​រាជ​លញ្ឆករ​។

បន្ទាប់​មក​នៅ​វេលា​ម៉ោង​ប្រមាណ​៩.១០​នាទី (​ម៉ោង​នៅ​កម្ពុជា​) ព្រះ​​ចៅ​អធិរាជ​ព្រះ​អង្គ​ថ្មី ព្រម​ដោយ​ព្រះ​អធិរាជនី និង​ព្រះ​រាជ​វង្សានុវង្ស ស្ដេច ថ្លែង​ព្រះ​បឋម​បរម​រាជ​ឱង្កា ​នូវ​ព្រះ​បន្ទូល​សូរ​សីហនាថ ទៅ​កាន់​ប្រជាជន​របស់​ទ្រង់ ដោយ​មាន​ន័យ​សង្ខេប​ថា ៖ ទ្រង់​នឹង​បដិបត្តិ​តាម​អតីត​ព្រះ​ចៅ​អធិរាជ និង​ឧទ្ទិស​ព្រះ​អង្គ​ដើម្បី​នាំ​ប្រទេស​ជាតិ​ឲ្យ​រុង​រឿង​បន្ត​ទៀត​​។

សម្ដេច​ព្រះ​ចៅ​អធិរាជ​ណារុហ៊ិតុ ស្ដេច​ឡើង​ស្នង​រាជ​ជា​ព្រះ​ចៅ​អធិរាជ​ព្រះ​អង្គ​ទី​១២៦​របស់​ជប៉ុន បន្ត​ពី​ព្រះ​រាជ​ជនក​នាថ ដែល​បាន​ដាក់​រាជ​សម្បត្តិ កាល​ពី​ថ្ងៃ​ទី​៣០ ខែ​មេសា ឆ្នាំ​២០១៩ (​ម្សិល​មិញ​) នេះ​​។ ចំណែក​ឯ​ព្រះ​រាជ​ពិធី​បរម​រាជាភិសេក​ផ្លូវ​ការ នឹង​ត្រូវ​ចាត់​ធ្វើ​ឡើង​នា​ខែ​តុលា ឆ្នាំ​២០១៩ ខាង​មុខ​នេះ​៕​៚

_______________________________________________________
អាន​ផង​ដែរ ៖
១. ប្រមុខ​​​១៩៥​ប្រទេស​ ​ចូល​រួម​ព្រះ​រាជ​ពិធី​បរម​រាជាភិសេក អធិរាជ​ជប៉ុន
២. ជប៉ុន​ប្រកាស​រជ្ជ​ស័ក​ថ្មី «​រេវ៉ៈ​»
៣. ព្រះ​រាជ​ពិធី​ដាក់​រាជ្យ​នៃ​ព្រះ​ចៅ​អធិរាជ​ជប៉ុន
៤. ពល​រដ្ឋ​ជប៉ុន​ចេញ​មក​ថ្វាយ​ព្រះ​ពរ​ព្រះ​ចៅ​អធិរាជ​ថ្មី
៥. អំពី​គ្រឿង​ត្រី​រាជ​កកុធ​ភណ្ឌ​ជប៉ុន

ព្រះ​រាជ​ពិធី​ដាក់​រាជ្យ​នៃ​ព្រះ​ចៅ​អធិរាជ​ជប៉ុន ថ្ងៃអង្គារ 30 ខែ​មេសា 2019

Posted by សុភ័ក្ត្រ in 日本語.
3 comments

នានាប្រទេស៖ ក្រុងតូក្យូ, ប្រទេស​ជប៉ុន – ព្រះ​ចៅ​អធិរាជ​ជប៉ុន​អាគីហ៊ិតុ​ទ្រង់​បាន​ប្រកាស​ដាក់​រាជ្យ​សម្បត្តិ​ជា​ផ្លូវ​ការ​ហើយ​នា​រសៀល​ថ្ងៃ​នេះ (​៣០ មេសា ២០១៩​) ដើម្បី​ផ្ទេរ​ព្រះ​រាជ​បល្ល័ង្ក​ទៅ​ឲ្យ​រជ្ជ​ទាយាទ​ទ្រង់​គឺ​ព្រះ​អង្គ​ម្ចាស់ ​ណារុហ៊ិតុ ដែល​នឹង​ត្រូវ​ឡើង​គ្រង​រាជ្យ​បន្ត​នៅ​វេលា​ថ្ងៃ​ស្អែក​នេះ​។

​ព្រះ​ចៅ​អធិរាជ​ជប៉ុន ដែល​បច្ចប្បន្ន​ទ្រង់​មាន​ព្រះ​ជន្ម​៨៥​ព្រះ​វស្សា​​នោះ នឹង​នៅ​កាន់​តំណែង​ជា​ប្រមុខ​ប្រទេស​រហូត​ដល់​រាត្រី​នេះ មុន​នឹង​បញ្ចប់​រជ្ជ​សម័យ «​ហេសេ» ដែល​បាន​ចាប់​ផ្ដើម​តាំង​ពី​ថ្ងៃ​ទី​៧ ខែ​មករា ឆ្នាំ​១៩៨៩​មក​នោះ​។ បន្ទាប់​នៅ​ថ្ងៃ​ទី​១ ខែ​ឧសភា នឹង​ត្រូវ​ចាប់​ផ្ដើម​សករាជ​ថ្មី​របស់​ជប៉ុន គឺ «​រេវ៉ៈ​»​។

នៅ​ក្នុង​ព្រះ​រាជ​ពិធី​ដាក់​រាជ្យ​នេះ ទ្រង់​បាន​មាន​ព្រះ​រាជ​បន្ទូល​ចុង​ក្រោយ​ថា​ ទ្រង់​បាន​ប្រើ​ប្រាស់​ពេល​វេលា​ក្នុង​រជ្ជកាល​របស់​ទ្រង់​ចំនួន​៣០​ឆ្នាំ បដិបត្តិ​ព្រះ​រាជ​ករណី​កិច្ច ដោយ​ផ្ដល់​កិត្តិយស និង​ស្រឡាញ់​ប្រជា​រាស្ត្រ​របស់​ព្រះ​អង្គ​ជា​អនេក រាប់​ថា​ជា​ការ​ផ្ដល់​ពរ​ដ៏​ប្រសើរ ហើយ​ព្រះ​អង្គ​សូម​អរគុណ​ដល់​ប្រជា​រាស្ត្រ​ជប៉ុន​ដែល​គោរព​ស្រឡាញ់​​ព្រះ​អង្គ​ក្នុង​ឋានៈ​ជា​និមិត្ត​រូប​នៃ​ប្រទេស​។

ព្រះ​រាជ​ពិធី​ដាក់​រាជ្យ ត្រូវ​បាន​ប្រារព្ធ​ធ្វើ​ឡើង​យ៉ាង​សាមញ្ញ​ដោយ​ប្រើ​ថិរវេលា​ប្រមាណ​១០​នាទី​ប៉ុណ្ណោះ នៅ​វេលា​ម៉ោង​១៧.០០ នា​ថ្ងៃ​នេះ ម៉ោង​នៅ​ជប៉ុន ដែល​ត្រូវ​នឹង​ម៉ោង​១៥.០០ ម៉ោង​នៅ​កម្ពុជា នា​ព្រះ​រាជ​វាំង​ព្រះ​ចៅ​អធិរាជ​។ នៅ​ក្នុង​ព្រះ​រាជ​ពិធី​នោះ ព្រះ​ចៅ​អធិរាជ​ស្ដេច​ប្រគល់​ព្រះ​រាជ​លញ្ជករ និង​គ្រឿង​រាជ​កកុធភណ្ឌ មាន​ដូច​ជា ព្រះ​ឆាយ ព្រះ​ខឌ្គ និង​អញ្ញមណី​។

ព្រះ​រាជ​ពិធី​នេះ​មាន​ការ​យាង​ និង​អញ្ជើញ​ចូល​រួម ដោយ​សម្ដេច​ព្រះ​ចៅ​អធិរាជ​ជប៉ុន និង​អធិរាជនី ព្រម​ទាំង​ព្រះ​រាជ​វង្សានុវង្ស នាយករដ្ឋមន្ត្រី ព្រម​ទាំង​មន្ត្រី​ជាន់​ខ្ពស់​ជប៉ុន​ជា​ច្រើន​រូប​ទៀត​៕៚

_106647181_akihito3captureUntitled-2yq-akihito5-30042019_0

_______________________________________________________
អាន​ផង​ដែរ ៖
១. ប្រមុខ​​​១៩៥​ប្រទេស​ ​ចូល​រួម​ព្រះ​រាជ​ពិធី​បរម​រាជាភិសេក អធិរាជ​ជប៉ុន
២. ជប៉ុន​ប្រកាស​រជ្ជ​ស័ក​ថ្មី «​រេវ៉ៈ​»
៣. ព្រះ​រាជ​ពិធី​គ្រង​សិរី​រាជ​សម្បត្តិ​នៃ ព្រះ​ចៅ​អធិរាជ​ជប៉ុន ព្រះ​អង្គ​ថ្មី
៤. ពល​រដ្ឋ​ជប៉ុន​ចេញ​មក​ថ្វាយ​ព្រះ​ពរ​ព្រះ​ចៅ​អធិរាជ​ថ្មី
៥. អំពី​គ្រឿង​ត្រី​រាជ​កកុធ​ភណ្ឌ​ជប៉ុន

ហ្លួង​សីហមុនី និង​ព្រះ​ចៅ​អធិរាជ​អាគីហ៊ីតុ ថ្ងៃអាទិត្យ 21 ខែ​មេសា 2019

Posted by សុភ័ក្ត្រ in បុគ្គល​សំខាន់, 日本語.
2 comments

ទំនាក់​ទំនង​ជា​ព្រះ​ប្រមុខ​រដ្ឋ​នៃ​នគរ​ទាំង​ពីរ កម្ពុជា​-​ជប៉ុន រវាង​ព្រះ​កុរណា ព្រះ​បាទ​សម្ដេច​ព្រះ​នរោត្ដម សីហមុនី និង​ព្រះ​ចៅ​អធិរាជ​ជប៉ុន អាគីហ៊ិតុ មាន​រយៈ​ពេល​១៥​ឆ្នាំ​គត់ គឺ​ចាប់​តាំង​ពី​ព្រះ​មហាក្សត្រិយ៍​ខ្មែរ​ទ្រង់​បាន​ឡើង​គ្រង​រាជ្យ​បន្ត​ពី​ព្រះ​វរ​រាជ​ជនក​នាថ និង​រហូត​មក​ដល់​ចុង​ខែ​មេសា (​២០១៩​) ខាង​មុខ​នេះ ដែល​ព្រះ​ចៅ​អធិរាជ​ជប៉ុន ស្ដេច​នឹង​ដាក់​រាជ្យ​សម្បត្តិ​។

តាំង​ពី​ដើម​រៀង​មក ព្រះ​រាជ​វង្ស​នៃ​នគរ​ទាំង​ពីរ​តែង​មាន​ទំនាក់​ទំនង​យ៉ាង​ជិត​ស្និទ្ធ ជា​ពិសេស​តាំង​ពី​រាជ្យ​ព្រះ​ករុណា ព្រះ​បរម​រតន​កោដ្ឋ គ្រា​ទី​១ និង​តាំង​ពី​សម័យ​អតីត​ព្រះ​ចៅ​អធិរាជ​​ហ៊ិរូហ៊ិតុ​មក​ម្ល៉េះ​។

ជំនួប​រវាង​ព្រះ​ចៅ​ផែន​ដី​ទាំង​ពីរ​ព្រះ​អង្គ​ជាលើក​ដំបូង ទំនង​មាន​ឡើង​នៅ​ខែ​មិថុនា ​ឆ្នាំ​២០០៦ កាល​ទ្រង់​បាន​យាង​ទៅ​ចូល​រួម​ព្រះ​រាជ​ពិធី​​​​ឆ្លង​សិរិរាជ​សម្បត្តិ​គ្រប់​៦០​ឆ្នាំ របស់​អតីត​ព្រះ​ចៅ​ផែន​ដី​សៀម ព្រះ​បាទ​​ សម្ដេចព្រះបរមិន្ទ្រមហាភូមិពល អតុល្យតេជ ឬ​រាមា​ទី​៩​។

យ៉ាង​ណា​ម៉ិញ ព្រះ​ករុណា ព្រះ​បរម​នាថ ស្ដេច​ទ្រង់​បាន​យាង​បំពេញ​ព្រះ​រាជ​ទស្សនកិច្ច​ទាំង​ផ្លូវ​ការ​ក្ដី​មិន​ផ្លូវ​ការ​ក្ដី​ជា​ច្រើន​លើក​ច្រើន​គ្រា​ទៅ​កាន់​ប្រទេស​ជប៉ុន និង​ជា​ពិសេស កាល​ពី​អំឡុង​​ខែ​ឧសភា ឆ្នាំ​២០១០ ក្នុង​ឋានៈ​ជា​ព្រះ​ប្រមុខ​រដ្ឋ​នៃ​ព្រះ​រាជា​ណាចក្រ​កម្ពុជា​។ ព្រះ​ចៅ​អធិរាជ​ជប៉ុន​អាគីហ៊ិតុ និង​​អធិរាជិនី ស្ដេច​យាង​មក​ទទួល​បដិសណ្ឋារកិច្ច​យ៉ាង​កក់​ក្ដៅ​ជា​ព្រះ​រាជ​ពិធី​នៅ​​ឯ​ព្រះ​បរមរាជ​វាំង​ព្រះ​ចៅ​អធិរាជ នា​ក្រុង​តូក្យូ​ផង​។

បើ​ទោះ​បី​ក្នុង​មួយ​រជ្ជកាល​នៃ​ព្រះ​ចៅ​អធិរាជ​អាគីហ៊ិតុ ស្ដេច​មិន​ធ្លាប់​បាន​យាង​មក​បំពេញ​ព្រះរាជ​ទស្សនកិច្ច​ជា​ផ្លូវ​រដ្ឋ​នៅ​ក្នុង​ព្រះ​រាជាណាចក្រ​កម្ពុជា​ក្ដី ទំនាក់​ទំនង​នៃ​កម្ពុជា​-ជប៉ុន និង​ជា​ពិសេស​រវាង​ព្រះ​អង្គ​ទាំង​ពីរ​ត្រូវ​បាន​បង្ហាញ​ឲ្យ​ឃើញ​តាម​រយៈ​ព្រះ​រាជ​សារ​ឆ្លង​ឆ្លើយ​ជា​លំដាប់ ប្រចាំ​ឆ្នាំ ក្នុង​វរោកាស​សំខាន់​ៗ ជា​ពិសេស​ព្រះ​រាជ​សារ​នៃ​ព្រះ​ករុណា ព្រះ​បរម​នាថ ផ្ញើ​ថ្វាយ​ព្រះ​ចៅ​អធិរាជ​ក្នុង​ឱកាស​បុណ្យ​ចម្រើន​ព្រះ​ជន្ម​ ឬ​គ្រោះ​មហន្តរាយ​នានា​ដែល​កើត​មាន​ឡើង​នៅ​ជប៉ុន​ ជា​ដើម​។ល។

gettyimages-99629408-2048x2048gettyimages-99629410-2048x2048gettyimages-99629498-2048x2048Untitled-22018-07-12_1

______________________________________________________________
អាន​ផង​ដែរ​៖
១. ហ្លួង​សីហមុនី និង​រាមា​៩
២. ហ្លួង​សីហមុនី និង​ព្រះ​មហា​ក្សត្រិយ៍​ថៃ ​មហា​​វជិរាលង្ករណ

អំពី​គ្រឿង​ត្រី​រាជ​កកុធ​ភណ្ឌ​ជប៉ុន ថ្ងៃសៅរ៍ 20 ខែ​មេសា 2019

Posted by សុភ័ក្ត្រ in 日本語.
3 comments

ត្រី​រាជ​កកុធ​ភណ្ឌ ជា​គ្រឿង​រាជ​កកុធ​ភណ្ឌ​៣​ប្រភេទ របស់​ព្រះ​ចៅ​អធិរាជ​ជប៉ុន ដែល​ប្រកប​ដោយ​ព្រះ​ខ័ឌ្គ​គុសាណាងិ (ជ. 草薙劍), កញ្ចក់​យ៉ា​តៈ ណុ កាង៉ាមិ (​ជ. 八咫鏡) និង​​ត្បូង​យ៉ាសាកានិ ណុ ម៉ាង៉ា​តា​ម៉ៈ (​ជ. 八尺瓊勾玉)​។

imagesគ្រឿង​ត្រី​រាជ​កកុធ​ភណ្ឌ​ជប៉ុន

ត្រី​រាជ​កកុធ​ភណ្ឌ​ទាំង​បី​គឺ​ជា​គ្រឿង​សម្គាល់​គុណ​ធម៌​បី​ប្រការ​របស់​ព្រះ​ចៅ​អធិរាជ គឺ​ ភាព​ក្លាហាន (ព្រះ​ខ័ឌ្គ), បញ្ញា (​កញ្ចក់​) និង​ភាព​ក្ដី​មេត្តា​ករុណា (​ត្បូង​)​។

ចាប់​តាំង​ពី​ឆ្នាំ​៦៩០​មក ការ​ថ្វាយ​​​ត្រី​រាជ​កកុធ​ភណ្ឌ​ចំពោះ​ព្រះ​ចៅ​អធិរាជ ធ្វើ​ឡើង​ដោយ​សំណាក់​អ្នក​បួស​ដែល​ជា​ការ​ចាប់​ផ្ដើម​នៃ​ព្រះ​រាជ​ពិធី​ឡើង​សោយរាជ្យ​សម្បត្តិ​នៃ​ព្រះ​ចៅ​អធិរាជ​។ ព្រះ​រាជ​ពិធី​នេះ​មិន​ត្រូវ​បាន​បើក​ចំហ​ជា​សាធារណៈ​ឡើយ​ ហើយ​តាម​ទំនៀម​ជប៉ុន ការ​បើក​គ្រឿង​រាជ​កកុធ​ភណ្ឌ​នេះ គឺ​ធ្វើ​ឡើង​តែ​ចំពោះ​ព្រះ​ភក្ត្រ​អង្គ​ព្រះ​ចៅ​អធិរាជ​តែ​ប៉ុណ្ណោះ ហេតុ​​ដូច​នេះ​ទើប​មិន​មាន​រូប​ភាព​ពិត​ប្រាកដ​នៃ​​​ត្រី​រាជ​កកុធ​ភណ្ឌ​ទាំង​នោះ​ណាស់ រូប​ខាង​លើ​គ្រាន់​តែ​ជា​ការ​ប៉ាន់​ប្រមាណ​ប៉ុណ្ណោះ​។

ប្រទេស​ជប៉ុន​នឹង​មាន​ចាត់​ព្រះ​រាជ​ពិធី​ឡើង​គ្រង​រាជ្យ​សម្បត្តិ​ព្រះ​ចៅ​អធិរាជ​ថ្មី ​ណារុហ៊ិតុ នា​ថ្ងៃ​ទី​១ ខែ​ឧសភា ឆ្នាំ​២០១៩ ខាង​មុខ​នេះ បន្ត​ពី​​ព្រះ​រាជ​ជនក​នាថ ដែល​គ្រោង​នឹង​​ដាក់​រាជ​សម្បត្តិ នា​ថ្ងៃ​ទី​៣០ ខែ​មេសា ឆ្នាំ​២០១៩ ខាង​មុខ​នេះ​​៕

_______________________________________________________
អាន​ផង​ដែរ ៖
១. ប្រមុខ​​​១៩៥​ប្រទេស​ ​ចូល​រួម​ព្រះ​រាជ​ពិធី​បរម​រាជាភិសេក អធិរាជ​ជប៉ុន
២. ជប៉ុន​ប្រកាស​រជ្ជ​ស័ក​ថ្មី «​រេវ៉ៈ​»
៣. ព្រះ​រាជ​ពិធី​ដាក់​រាជ្យ​នៃ​ព្រះ​ចៅ​អធិរាជ​ជប៉ុន
៤. ព្រះ​រាជ​ពិធី​គ្រង​សិរី​រាជ​សម្បត្តិ​នៃ ព្រះ​ចៅ​អធិរាជ​ជប៉ុន ព្រះ​អង្គ​ថ្មី

 

 

ជប៉ុន​ប្រកាស​រជ្ជ​ស័ក​ថ្មី «​រេវ៉ៈ​» ថ្ងៃចន្ទ 1 ខែ​មេសា 2019

Posted by សុភ័ក្ត្រ in 日本語.
4 comments

នានាប្រទេស៖ ក្រុងតូក្យូ, ប្រទេស​ជប៉ុន – បន្ទាប់​ពី​មាន​ការ​ប្រជុំ​ពិភាក្សា​ជ្រើស​រើស​រជ្ជ​ស័ក ឬ​សករាជ​ថ្មី សម្រាប់​ព្រះ​ចៅ​អធិរាជ​អង្គ​ថ្មី​មក នា​ថ្ងៃ​នេះ (​១ មេសា ២០១៩​) ប្រទេស​ជប៉ុន​បាន​ប្រកាស​ជា​ផ្លូវ​ការ​​នូវ​ឈ្មោះ​សករាជ​ថ្មី ដែល​មាន​ឈ្មោះ​ថា «​រេវ៉ៈ​» (Reiwa – 令和) ដែល​នឹង​ត្រូវ​ចាប់​ផ្ដើម​ប្រើ​ចាប់​តាំង​ពី​ថ្ងៃ​ទី​១ ខែ​ឧសភា ឆ្នាំ​២០១៩ ខាង​មុខ​នេះ​ត​ទៅ​។

1179458780-Recovered-Recovered«​រេវ៉ៈ​» ឈ្មោះ​រជ្ជ​កាល​ថ្មី នៃ​ព្រះ​ចៅ​អធិរាជ​ជប៉ុន ព្រះ​អង្គ​ថ្មី

សម្រាប់​ឈ្មោះ​សករាជ​ថ្មី​នេះ ត្រូវ​បាន​បង្កើត​ឡើង​ដើម្បី​ជំនួស​សករាជ​បច្ចុប្បន្ន​ដែល​មាន​ឈ្មោះ​ថា «​ហេសេ» និង​ត្រូវ​ជា​ឈ្មោះ​សករាជ​លំដាប់​ទី​២៤៨ រាប់​តាំង​ពី​មាន​ការ​ប្រើ​ក្នុង​ប្រព័ន្ធ​ប្រក្រតិទិន​បូរាណ​របស់​ជប៉ុន នា​គ.ស.​៦៤៥ រហូត​មក​ដល់​បច្ចុប្បន្ន​​។

គួរ​បញ្ជាក់​ដែរ​ថា ការ​ផ្លាស់​ប្ដូរ​ឈ្មោះ​សករាជ​នេះ គឺ​ចំ​ថ្ងៃ​​​ដែល​ព្រះ​ចៅ​អធិរាជ​អង្គ​ថ្មី ណារុហ៊ិតុ នឹង​ត្រូវ​​​ឡើង​ស្នង​រាជ​សម្បត្តិ​​នោះ​ឯង​​។ ព្រះ​រជ្ជទាយាទ​ណារុហ៊ិតុ ស្ដេច​នឹង​ឡើង​ស្នង​រាជ្យ​សម្បត្តិ​ជា​ព្រះ​ចៅ​អធិរាជ​ថ្មី​របស់​ជប៉ុន​ នៅ​​​ថ្ងៃ​ទី​១ ខែ​ឧសភា ឆ្នាំ​២០១៩​​ ចំណែក​ឯ​ព្រះ​រាជ​ពិធី​បរម​​រាជាភិសេក​ផ្លូវ​ការ នឹង​ប្រារព្ធ​ធ្វើ​នៅ​ខែ​តុលា ឆ្នាំ​២០១៩​៕៚

_______________________________________________________
អាន​ផង​ដែរ ៖
១. ប្រមុខ​​​១៩៥​ប្រទេស​ ​ចូល​រួម​ព្រះ​រាជ​ពិធី​បរម​រាជាភិសេក អធិរាជ​ជប៉ុន
២. ព្រះ​រាជ​ពិធី​ដាក់​រាជ្យ​នៃ​ព្រះ​ចៅ​អធិរាជ​ជប៉ុន
៣. ព្រះ​រាជ​ពិធី​គ្រង​សិរី​រាជ​សម្បត្តិ​នៃ ព្រះ​ចៅ​អធិរាជ​ជប៉ុន ព្រះ​អង្គ​ថ្មី

ប្រមុខ​​​១៩៥​ប្រទេស​ ​ចូល​រួម​ព្រះ​រាជ​ពិធី​បរម​រាជាភិសេក អធិរាជ​ជប៉ុន ថ្ងៃសុក្រ 22 ខែ​មីនា 2019

Posted by សុភ័ក្ត្រ in 日本語.
4 comments

នានាប្រទេស៖ ក្រុងតូក្យូ, ប្រទេស​ជប៉ុន – កាល​ពី​ថ្ងៃ​ពុធ (​២០ មីនា ២០១៩​) កន្លង​មក​នេះ​​ អ្នក​នាំ​ពាក្យ​រាជ​រដ្ឋាភិបាល​ជប៉ុន​​បាន​ធ្វើ​សន្និសីទ​ស្ដី​អំពី​ការ​ចាត់​ត្រៀម​ព្រះ​រាជ​ពិធី​បរម​រាជា​ភិសេក​ព្រះ​ចៅ​អធិរាជ​ថ្មី​របស់​ជប៉ុន ដែល​នឹង​ធ្វើ​ឡើង​នៅ​ថ្ងៃ​ទី​២៣ ខែ​តុលា ឆ្នាំ​២០១៩ ខាង​មុខ​នេះ​។

Crown+Prince+Naruhito+People+Celebrate+Emperor+bh7GEEBsROKlព្រះ​រជ្ជ​ទាយាទ​ណារុហ៊ិតុ (​ឆ្វេង​) និង​ព្រះ​ចៅ​អធិរាជ​បច្ចុប្បន្ន​អាគីហ៊ិតុ

សម្រាប់​ព្រះ​រាជ​ពិធី​បរម​រាជាភិសេក​គ្រា​នេះ នឹង​មាន​ការ​ក្រាប​បង្គ​យាង និង​អញ្ជើញ​ ព្រះ​ប្រមុខ​រដ្ឋ រាជ​វង្ស និង​ភ្ញៀវ​រដ្ឋ​ដទៃ​ទៀត​ប្រមាណ​១៩៥​ប្រទេស ដើម្បី​ចូល​រួម​ព្រះ​រាជ​ពិធី​ជា​ប្រវត្តិ​សាស្ត្រ​របស់​ប្រទេស​ជប៉ុន​។ តាម​ការ​ប៉ាន់​ប្រមាណ នឹង​មាន​ភ្ញៀវ​យាង​ និង​អញ្ជើញ​ចូល​រួម​ជា​កិត្តិយស​ប្រមាណ​៩០០​នាក់ នៅ​ព្រះ​រាជ​វាំង​ព្រះ​ចៅ​អធិរាជ នា​ក្រុង​តូក្យូ​។

គួរ​បញ្ជាក់​ដែរ​ថា ព្រះ​ចៅ​អធិរាជ​បច្ចុប្បន្ន​របស់​ជប៉ុន អាគីហ៊ីតុ ស្ដេច​នឹង​​កំណត់​ដាក់​រាជ​សម្បត្តិ​នៅ​ថ្ងៃ​ទី​៣០ ខែ​មេសា ឆ្នាំ​២០១៩ ខាង​មុខ​នេះ វេលា​ម៉ោង​១៧.០០ (ម៉ោង​ជប៉ុន) ហើយ​បន្ទាប់​មក​ព្រះ​រជ្ជទាយាទ​ណារុហ៊ិតុ ស្ដេច​នឹង​ឡើង​ស្នង​រាជ្យ​សម្បត្តិ​ជា​ព្រះ​ចៅ​អធិរាជ​ថ្មី នៅ​ថ្ងៃ​បន្ទាប់​គឺ​ថ្ងៃ​ទី​១ ខែ​ឧសភា ឆ្នាំ​២០១៩​។ ចំណែក​ឯ​ព្រះ​រាជ​ពិធី​រាជាភិសេក​ផ្លូវ​ការ នឹង​ប្រារព្ធ​ធ្វើ​នៅ​ខែ​តុលា ឆ្នាំ​២០១៩ ខាង​មុខ​នេះ​៕៚

_______________________________________________________
អាន​ផង​ដែរ ៖
១. ជប៉ុន​ប្រកាស​រជ្ជ​ស័ក​ថ្មី «​រេវ៉ៈ​»
២. ព្រះ​រាជ​ពិធី​ដាក់​រាជ្យ​នៃ​ព្រះ​ចៅ​អធិរាជ​ជប៉ុន
៣. ព្រះ​រាជ​ពិធី​គ្រង​សិរី​រាជ​សម្បត្តិ​នៃ ព្រះ​ចៅ​អធិរាជ​ជប៉ុន ព្រះ​អង្គ​ថ្មី

%d bloggers like this: