jump to navigation

ង្វៀន ហ្វុ ត្ចុង ក្លាយ​ជា​ប្រធានាធិបតី​ថ្មី​វៀតណាម ថ្ងៃពុធ 24 ខែតុលា 2018

Posted by សុភ័ក្ត្រ in Tiếng Việt.
1 comment so far

លោក​ប្រធានាធិបតី​ថ្មី​វៀតណាម ង្វៀន ហ្វុ ត្ចុង ធ្វើ​ពិធី​ស្បថ​ចូល​កាន់​តំណែង​ថ្មី

នានាប្រទេស៖ ហាណូយ, សស. វៀតណាម – ម្សិល​មិញ​នេះ (​២៣ តុលា ២០១៨​) រដ្ឋ​សភា​វៀតណាម បាន​សម្រេច​ជ្រើស​រើស​ឲ្យ​សមមិត្ត ង្វៀន ហ្វុ ត្ចុង (​វ. Nguyễn Phú Trọng) អគ្គ​លេខាធិការ​បក្ស​កុម្មុយនីស្ត​វៀតណាម ឲ្យ​ធ្វើ​ជា​ប្រធានាធិបតី​ថ្មី​របស់​ប្រទេស​កុម្មុយនីស្ត​មួយ​នេះ​។ ការ​បោះ​ឆ្នោត​ដែល​គ្រាន់​តែ​ជា​នីតិវិធី​ ដោយ​សារ​បក្ស​បាន​ស្នើ​រូប​លោក​ជា​ឯកច្ឆ័ន​តែ​មួយ​រូប​ប៉ុណ្ណោះ​សម្រាប់​ទទួល​តំណែង​ប្រធានាធិបតី​ថ្មី​នេះ​។

សមមិត្ត ង្វៀន ហ្វុ ត្ចុង ដែល​បច្ចុប្បន្ន​មាន​អាយុ​៧៤​ឆ្នាំ នេះ បាន​ក្លាយ​ជា​ប្រធានាធិបតី​វៀតណាម​លំដាប់​ទី​៩ (​រាប់​ចាប់​ពី​ឆ្នាំ​១៩៩២​ មក​) និង​ជា​មេ​ដឹក​នាំ​វៀតណាម​ទី​១ ដែល​កាន់​កាប់​តំណែង​ពីរ​​ក្នុង​ពេល​តែ​មួយ រាប់​តាំង​ពី​លោក​ប្រធានាធិបតី​ហូ ជី ម៉ិញ មក​។

…ខ្ញុំ​នឹង​ព្យាយាម​ឲ្យ​អស់​ពី​សមត្ថភាព​ក្នុង​ការ​ធ្វើ​ឲ្យ​សម្រេច​បាន​នូវ​ភារកិច្ច​ដែល​បក្ស រដ្ឋ និង​ប្រជាជន ប្រគល់​ឲ្យ…។

សមមិត្ត ង្វៀន ហ្វុ ត្ចុង បាន​ថ្លែង​ ខណៈ​ពេល​ធ្វើ​សច្ចា​ប្រណិធាន​ស្បថ​ឡើង​កាន់​តំណែង​ប្រធានាធិបតី​។

ការ​ជ្រើស​រើស​ប្រធានាធិបតី​ថ្មី​របស់​វៀតណាម​នា​ពេល​នេះ គឺ​បន្ទាប់​ពី​អតីត​ប្រធានាធិបតី​វៀតណាម ត្រាន់ ដៃ ក្វាង បាន​ទទួល​មរណភាព​កាល​​ពី​ខែ​កញ្ញា (​២០១៨​) កន្លង​មក​នេះ​៕

ទិដ្ឋភាព​ការ​បោះ​ឆ្នោត​នៅ​ក្នុង​សភា​វៀតណាម
ទិដ្ឋភាព​ការ​បោះ​ឆ្នោត​នៅ​ក្នុង​សភា​វៀតណាម

_________________________________
អាន​ផង​ដែរ​៖
១. ក្រៅ​ពី​ភូមា វៀតណាម​ក៏​មាន​ប្រធានា​ធិបតី​ថ្មី

Advertisements

«វីន​ហ្វាសត៍​» ម៉ូដែល​រថយន្ត​ថ្មី​របស់​វៀតណាម ថ្ងៃពុធ 3 ខែតុលា 2018

Posted by សុភ័ក្ត្រ in Tiếng Việt.
add a comment

«វីន​ហ្វាសត៍​» ម៉ូដែល​រថយន្ត​ថ្មី​របស់​វៀតណាម

នានាប្រទេស៖ ក្រុងប៉ារីស, ស. បារាំង​សែស – ម្សិល​មិញ​នេះ (​២ តុលា ២០១៨​) ប្រទេស​វៀតណាម បាន​បង្អួត​ភ្នែក​ពិភព​លោក ដោយ​បើក​បង្ហាញ​ជា​ផ្លូវ​ការ​ នូវ​ម៉ូដែល​រថយន្ត​ថ្មី​របស់​ខ្លួន​ឈ្មោះ​ថា «​វីនហ្វាសត៍​»​។ ប្រទេស​វៀតណាម​បាន​កំពុង​​​បោះ​ជំហាន​ចូល​ទៅ​ក្នុង​ឧស្សាហកម្ម​យាន​យន្ត ជាមួយ​នឹង​ប្រេនដ៍​ផ្ទាល់​ខ្លួន​​។ គំរូ​រថយន្ត​ចំនួន​ពីរ គឺ រថយន្ត​ខ្នាត​តូច (LUX A2.0 Sedan) និង​អេស​យូវី (LUX SA2.0 SUV)​ ត្រូវ​បាន​ដាក់​ជូន​ទស្សនជិក​ចូល​ទស្សនា​ជា​សាធារណៈ លើក​ដំបូង​នៅ​ឯ​ពិព័រណ៍​យាន​យន្ត​ក្រុង​ប៉ារីស ឆ្នាំ​២០១៨ កាល​ពី​ម្សិល​មិញ​នេះ​។

អ្វី​ដែល​ជា​ការ​គួរ​ឲ្យ​ចាប់​អារម្មណ៍​នោះ ក្រុមហ៊ុន​វីនហ្វាសត៍ បាន​ផ្ដល់​ឱកាស​ដល់​ប្រជាជន​វៀតណាម​ធ្វើ​ការ​កំណត់​រចនា​ម៉ូដ​រថយន្ត​ទាំង​នេះ តាំង​ពី​ពេល​ចាប់​ផ្ដើម​ធ្វើ​ការ​រចនា​ម៉ូដ​។ មាន​ប្រជាជន​វៀតណាម​ប្រមាណ​ជាង​៦២.០០០​នាក់ បាន​ចូល​រួម​ធ្វើ​ការ​បោះ​ឆ្នោត​ជ្រើស​រើស​គម្រោង​រចនា​ចំនួន​២០ ដែល​ត្រូវ​បាន​គូស​វាស​ឡើង​ក្រុមហ៊ុន Italdesign របស់​ប្រទេស​អ៊ីតាលី​។

រោង​ចក្រ​ផលិត​រថយន្ត​របស់​ក្រុមហ៊ុន​វីនហ្វាសត៍​នេះ មាន​មូល​ដ្ឋាន​នៅ​ក្នុង​ទី​ក្រុង​ហៃ ផុង ដោយ​បាន​បោះ​ទុន​វិនិយោគ​ប្រមាណ ៣,៥​ប៊ីលាន​ដុល្លារ​អាមេរិក និង​មាន​គម្រោង​នាំ​ចេញ​រថយន្ត​របស់​ខ្លួន​ចូល​ទៅ​ក្នុង​ទី​ផ្សារ​អន្តរជាតិ​នា​ពេល​ឆាប់​ៗ​ខាង​មុខ​នេះ​។

ទោះ​បី​ជា​យ៉ាង​នេះ​ក្ដី តម្លៃ​នៃ​រថយន្ត​ទាំង​ពីរ​គ្រឿង​ថ្មី​នេះ របស់​វីនហ្វាសត៍ មិន​ត្រូវ​បាន​បញ្ជាក់​ឲ្យ​ដឹង​នៅ​ឡើយ​ទេ​៕

គំរូ​ម៉ូដែល​រថយន្ត​ថ្មី​របស់​វៀតណាម វីនហ្វាសត៍ ទាំង​ពីរ​គ្រឿង

ប្រធាន​រដ្ឋ​នៃ​ស.ស.​វៀតណាម ទទួល​មរណភាព ថ្ងៃសុក្រ 21 ខែកញ្ញា 2018

Posted by សុភ័ក្ត្រ in មរណភាព, Tiếng Việt.
2 comments

នានាប្រទេស៖ ហាណូយ, សស. វៀតណាម – ប្រធាន​រដ្ឋ​នៃ​សាធារណ​រដ្ឋ​សង្គម​និយម​វៀតណាម (ស.ស.​វៀតណាម​) សម​មិត្ត ត្រាន់ ដៃ ក្វាង (​វ. Trần Đại Quang) បាន​ទទួល​មរណភាព​ហើយ​នា​ថ្ងៃ​នេះ (​សុក្រ ២១ កញ្ញា ២០១៨​) នៅ​មន្ទីរ​ពេទ្យ​ទាហាន​មជ្ឈិម​ ១០៨ នា​រដ្ឋ​ធានី​ហាណូយ ក្នុង​អាយុ​៦១​ឆ្នាំ​។

សម​មិត្ត ត្រាន់ ដៃ ក្វាង ត្រូវ​បាន​ជ្រើស​រើស​ឲ្យ​ធ្វើ​ជា​ប្រធាន​រដ្ឋ ឬ​ប្រធានាធិបតី​នៃ​ស.ស.​វៀតណាម កាល​ពី​ថ្ងៃ​ទី​២ ខែ​មេសា ឆ្នាំ​២០១៦ កន្លង​មក​។ ស្ថិត​ក្នុង​តំណែង​ជា​ប្រធានាធិបតី សម​មិត្ត ត្រាន់ ដៃ ក្វាង ក៏​ធ្លាប់​បាន​មក​​បំពេញ​​ដំណើរ​ទស្សនកិច្ច​ជា​ផ្លូវ​រដ្ឋ​មក​កាន់​ព្រះ​រាជាណាចក្រ​កម្ពុជា កាល​ពី​ថ្ងៃ​ទី​១៤ ដល់ ១៦ ខែ​មិថុនា ឆ្នាំ​២០១៦ កន្លង​មក​ដែរ​៕

សម​មិត្ត ត្រាន់ ដៃ ក្វាង ក្នុង​ពេល​មក​បំពេញ​ទស្សនកិច្ច​ផ្លូវ​រដ្ឋ​នៅ​កម្ពុជា នា​ពេល​កន្លង​ទៅ

_________________________________
អាន​ផង​ដែរ​៖
១. ក្រៅ​ពី​ភូមា វៀតណាម​ក៏​មាន​ប្រធានា​ធិបតី​ថ្មី

កន្លែង​កម្សាន្ត​មួយ ណៃ នៅ​ហាទៀន ថ្ងៃពុធ 23 ខែ​ឧសភា 2018

Posted by សុភ័ក្ត្រ in Tiếng Việt.
4 comments

នៅ​ឯ​ក្រុង​ហាទៀន​នោះ មាន​រមណីយ​ដ្ឋាន​សមុទ្ទ​មួយ​ឈ្មោះ​ថា​មួយ​ ណៃ (​យ​. Mũi Nai) ដែល​នៅ​មិន​ឆ្ងាយ​ប៉ុន្មាន​ពី​ទី​ប្រជុំ​ជន​ហា​ទៀន​។

កន្លែង​កម្សាន្ត​នេះ​មាន​ភាព​ស្រដៀង​គ្នា​នឹង​កែប​កាល​ពី​មុន​ដែល ពោល​គឺ​ទឹក​សមុទ្ទ មាន​ភាព​ខ្មៅ មើល​ទៅ​មិន​គួរ​ចុះ​លេង​សោះ​។ ក្រៅ​ពី​នោះ មាន​គេ​លេង​កីឡា​លើ​ទឹក​មួយ​ចំនួន ដូច​ជា​ជិះ​ទូក ឬ​អ៊ូប័រ​ជា​ដើម​។ល។​ នៅ​ឯ​លើ​ឆ្នេរ​វិញ មាន​គេ​រៀប​ចំ​ជា​តូប​ៗ ដោយ​មាន​ដាក់​កៅអី​អង្គុយ​ទទួល​ទាន​អាហារ​ដូច​គ្នា​នឹង​នៅ​កម្ពុជា​ដែរ​។ ចំពោះ​ភាសា​វិញ លោក​អ្នក​មិន​បាច់​បារម្ភ​ទេ បណ្ដា​អ្នក​លក់​នៅ​ទី​នោះនិយាយ​ភាសា​ខ្មែរ​បាន​ស្ទើរ​គ្រប់​ៗ​គ្នា​។

មណ្ឌល​កម្សាន្ត​មួយ ណៃ នេះ ត្រូវ​តម្រូវ​ឲ្យ​មាន​​ការ​បង់​ថ្លៃ​ចូល​ផង នៅ​ឯ​ច្រក​ចូល​៕

_______________________________________________________________
អាន​ផង​ដែរ​៖
១. ចប់​វិស្សម​កាល​បុណ្យ​ចូល​ឆ្នាំ​ថ្មី ឆ្នាំ​ច ១៣៨០
២. ការ​ឆ្លង​ព្រំ​ដែន នៅ​ព្រែក​ចាក
៣. សម្រស់​ក្រុង​ហាទៀន នា​ពេល​រាត្រី
៤. សណ្ឋាគារ​ហា​ទៀន

សណ្ឋាគារ​ហា​ទៀន ថ្ងៃអង្គារ 8 ខែ​ឧសភា 2018

Posted by សុភ័ក្ត្រ in សណ្ឋាគារ, Tiếng Việt.
5 comments

កាល​ពី​ទៅ​លេង​ហាទៀន នា​ឱកាស​បុណ្យ​ចូល​ឆ្នាំ​ថ្មី​កន្លង​មក​នេះ ខ្ញុំ​បាន​ស្នាក់​នៅ​សណ្ឋគារ​មួយ​ឈ្មោះ​សណ្ឋាគារ​ហា​ទៀន​។ ជា​ប្រភេទ​សណ្ឋាគារ​ចាស់​ខ្នាត​តូច​មួយ នៅ​មិន​ឆ្ងាយ​ប៉ុន្មាន​ពី​ផ្សារ និង​ដៃ​សមុទ្ទ​ហាទៀន​។

ចំពោះ​តម្លៃ​បន្ទប់​វិញ​ក៏​មិន​ជា​ថ្លៃ​ប៉ុន្មាន ដោយ​បន្ទប់​គ្រែ​ពីរ​មាន​តម្លៃ​ប្រមាណ​​៨០.០០០​រៀល​ប៉ុណ្ណោះ​ តែ​មិន​រាប់​បញ្ចូល​អាហារ​ពេល​ព្រឹក​ទេ​។

អាសយដ្ឋាន៖

៣៥ ត្រាន ហួ, ធី សា ហា ទៀន​, ខេត្ត​ពាម (​កម្ពុជា​ក្រោម​)
ទូរស័ព្ទ៖ ០២៩៧ ៣៨៥១ ៥៦៣

ការផ្ដល់តម្លៃ៖ 

បន្ទប់​សណ្ឋាគារ
បន្ទប់​សណ្ឋាគារបន្ទប់​ទឹកសម្ភារៈ​បន្ទប់​ទឹកអាហារ​ដ្ឋាន

_______________________________________________________________
អាន​ផង​ដែរ​៖
១. ចប់​វិស្សម​កាល​បុណ្យ​ចូល​ឆ្នាំ​ថ្មី ឆ្នាំ​ច ១៣៨០
២. ការ​ឆ្លង​ព្រំ​ដែន នៅ​ព្រែក​ចាក
៣. សម្រស់​ក្រុង​ហាទៀន នា​ពេល​រាត្រី
៤. សណ្ឋាគារ និងទីកន្លែងស្នាក់នៅនានា
៥. កន្លែង​កម្សាន្ត​មួយ ណៃ នៅ​ហាទៀន

វត្ត​គិរី​ឥសី​សិទ្ធិ វាល​បើស ឯ​ហាទៀន ដែន​កម្ពុជា​ក្រោម ថ្ងៃសៅរ៍ 21 ខែ​មេសា 2018

Posted by សុភ័ក្ត្រ in Tiếng Việt.
7 comments

ហាទៀន​ក្រុង ដែល​ជាប់​នឹង​​មិន​ឆ្ងាយ​ប៉ុន្មាន​ពី​ខេត្ត​កំពត​នោះ មាន​ស្ថិត​ដាម​ខ្មែរ​ជា​ច្រើន​អនេក​។ វត្ថុ​តាង​មួយ​ចំនួន តួ​យ៉ាង​ប្រជាជន និង​វត្ត​អារាម ខ្មែរ​នោះ គឺ​ជា​សក្ខីភាព​នៃ​អតីត​ចក្រ​ភព​ខ្មែរ ដែល​ពេល​នេះ​កំពុង​ស្ថិត​នៅ​ក្នុង​ដែន​អាណា​នៃ​ប្រទេស​វៀតណាម​។ ក្រុង​ហាទៀន​នេះ យ៉ាង​ហោច​ណាស់​មាន​វត្ត​ខ្មែរ​ចំនួន​ពីរ​ដែរ ដែល​​បម្រើ​ឲ្យ​វិស័យ​ព្រះ​ពុទ្ធ​សាសនា​បែប​ខ្មែរ​​ទាំង​សម្រាប់​ប្រជាជន​ខ្មែរ​កម្ពុជា​ក្រោម ប្រជាជន​វៀតណាម ក៏​ដូច​ជា​ប្រជាជន​ខ្មែរ​នៅ​កម្ពុជា​។

វត្ត​គិរី​ឥសី​សិទ្ធិ វាល​បើស គឺ​ជា​វត្ត​ខ្មែរ​ចំណាស់​មួយ​​ស្ថិត​នៅ​តាម​បណ្ដោយ​ផ្លូវ ដេតេ​២៨ ក្រុង​ហា​ទៀន ខេត្ត​កៀនយ៉ាង​ ឬ​អតីត​ខេត្ត​ពាម នៃ​អាណាចក្រ​ខ្មែរ​។ ដោយ​ស្ថិត​នៅ​លើ​កូន​ភ្នំ​តូច​មួយ វត្ត​គិរី​ឥសី​សិទ្ធិ វាល​បើស ត្រូវ​បាន​សាង​សង់​ឡើង​តាម​រចនា​ប័ទ្ម​ខ្មែរ និង​មាន​ព្រះ​សង្ឃ​ប្រមាណ​៣០​អង្គ​គង់​ចាំ​ព្រះ​វស្សា​ផង​។

ព្រះ​វិហារ​ធំ​មួយ​បែរ​ទិស​ទៅ​ខាង​កើត និង​នៅ​ពី​ក្រោយ​មាន​ដង​ទង់​ជាតិ​ធំ​មួយ ដាក់​ម្ខាង​ទង់​ព្រះ​ពុទ្ធ​សាសនា និង​ម្ខាង​ទង់​ជាតិ​នៃ​ប្រទេស​វៀតណាម​។ បន្ទាប់​មក​មាន​​​សាលា​ឆាន់​ចាស់​មួយ​ធ្វើ​អំពី​ឈើ និង​សាលា​ឆាន់​ថ្មី​មួយ​ធ្វើ​អំពី​ឥដ្ឋ​។ វត្ត​គិរី​ឥសី​សិទ្ធិ វាល​បើស ត្រូវ​បាន​ថែ​ទាំ​ និង​រៀប​ចំ​យ៉ាង​មាន​របៀប​ ស្អាត​ជាង​វត្ត​មួយ​ចំនួន​នៅ​ដែន​កម្ពុជា​បច្ចុប្បន្ន​ផង​។

ទាំង​រូប​គំនូរ​ពុទ្ធ​ប្រវត្តិ​នានា​នៅ​ក្នុង​ព្រះ​វិហារ និង​សាលា​ឆាន់ ទាំង​សមិទ្ធផល​នានា​ជុំ​វិញ​វត្ត​សុទ្ធ​តែ​ត្រូវ​បាន​ចារឹក​ទុក​ជា​អក្សរ និង​ភាសា​ខ្មែរ អម​ជាមួយ​ភាសា​វៀតណាម​មួយ​ចំនួន​ផង​។ សមិទ្ធិ​មួយ​ចំនួន​ទៀត មាន​ចារឹក​ជា​អក្សរ​ខ្មែរ​សុទ្ធ​ក៏​ឃើញ​មាន​។ អ្វី​ដែល​គួរ​កត់​សម្គាល់​ផង​ដែរ​នោះ គឺ​បណ្ដា​ឈ្មោះ​ពុទ្ធ​បរិស័ទ​មួយ​ចំនួន (​ភាគ​ច្រើន​) ដែល​បាន​ចារ​នៅ​តាម​សមិទ្ធិផល​ទាំង​នោះ មាន​ឈ្មោះ​ជា​ខ្មែរ​សុទ្ធ (​មិន​មាន​ឈ្មោះ​តាម​ត្រកូល​អ្នក​ខ្មែរ​ក្រោម​) ជា​ច្រើន​ផង​ដែរ​។ ការ​នេះ អាច​សន្និដ្ឋាន​ថា ប្រជាជន​ដើម​កំណើត​ខ្មែរ​នៅ​ម្ដុំ​នោះ នៅ​និយម​ដាក់​ឈ្មោះ និង​ការ​ហៅ​ជា​បែប​ខ្មែរ​ច្រើន​។

តាម​ការ​សាក​សួរ​ឲ្យ​ដឹង​ជាមួយ​នឹង​ដូន​ចាស់​ម្នាក់ ព្រម​ទាំង​ព្រះ​សង្ឃ​ផង បច្ចុប្បន្ន​វត្ត​នេះ​ត្រូវ​បាន​ប្រជាជន​ខ្មែរ​ចំណុះ​ជើង​វត្ត​មក​ធ្វើ​បុណ្យ ព្រម​ទាំង​ពុទ្ធ​បរិស័ទ​មក​ពី​ខាង​កម្ពុជា​ផង​។ ដោយ​សារ​ទេស​កាល​បុណ្យ​ចូល​ឆ្នាំ​ថ្មី​ខ្មែរ មិន​ស្ថិត​ជា​ថ្ងៃ​ឈប់​សម្រាក​របស់​ប្រទេស​វៀតណាម​នោះ ពិធី​មួយ​ចំនួន​ត្រូវ​បាន​លើក​យក​ទៅ​ធ្វើ​នៅ​ថ្ងៃ​អាទិត្យ​វិញ ដូច​ជា​ថ្ងៃ​ស្រង់​ព្រះ (​សម្រាប់​ឆ្នាំ​នេះ​) ជា​ដើម​។

ចំពោះ​សេរី​ភាព​នៃ​ការ​ប្រតិបត្តិ​ខាង​សាសនា​នេះ​វិញ ត្រូវ​បាន​មើល​ឃើញ​ថា​មាន​ភាព​ពេញ​លេញ​បរិបូរណ៍ គ្មាន​អ្វី​គួរ​កត់​សម្គាល់​ទេ​។ ព្រះ​សង្ឃ​កំពុង​មើល​យូធូប​ដែល​ទាក់​ទង​នឹង​ខ្សែ​ភាព​យន្ត​នៅ​កម្ពុជា​ ការ​ប្រើ​ប្រាស់​ភាសា​ខ្មែរ តួ​អក្សរ​ខ្មែរ និង​ការ​និយាយ​ស្ដី​…​។ល។ គឺ​ឃើញ​មាន​ភាព​ដូច​គ្នា​នឹង​កម្ពុជា មិន​ខុស​អ្វី​ឡើយ​។ អ្វី​មួយ​ទៀត​ដែល​គួរ​កត់​សម្គាល់​នោះ ទំនង​ដោយ​សារ​ទី​នេះ​ជាប់​នឹង​ប្រទល់​ដែន​កម្ពុជា ប្រជាជន​ដើម​កំណើត​ខ្មែរ ព្រម​ទាំង​ព្រះ​សង្ឃ និយាយ​ភាសា​ខ្មែរ​បាន​សំនៀង​ដូច​គ្នា​នឹង​ប្រជាជន​ខ្មែរ​កណ្ដាល​យើង ខុស​គ្នា​ពី​ប្រជាជន​ខ្មែរ​ក្រោម​ដែល​ស្ថិត​នៅ​ខេត្ត​ផ្សេង​ៗ​ទៀត ចូល​ជ្រៅ​ពី​កម្ពុជា​៕

ខ្លោងទ្វារ​ចូល​វត្តព្រះ​វិហារពុទ្ធ​បដិមា​ក្នុង​ព្រះ​វិហារ
គំនូរ​ពុទ្ធ​ព្រះ​វត្ត​ក្នុង​ព្រះ​វិហារដង​ទង់​ក្រោយ​ព្រះ​វិហារសាលា​ឆាន់​ចាស់ និង​ថ្មី នៅ​ពី​ក្រោយទិដ្ឋភាព​មួយ​ជុំ​វិញ​វត្តស្គរ​នៅ​ខាង​មុខ​ព្រះ​វិហារខាង​ក្នុង​សាលា​ឆាន់​ថ្មីព្រះ​សង្ឃ​កំពុង​មើល​យូធូប

_______________________________________________________________
អាន​ផង​ដែរ​៖
១. ចប់​វិស្សម​កាល​បុណ្យ​ចូល​ឆ្នាំ​ថ្មី ឆ្នាំ​ច ១៣៨០
២. សម្រស់​ក្រុង​ហាទៀន នា​ពេល​រាត្រី
៣. ដើម​ឈើ​ធំ​ៗ​ពីរ​នៅ​​​វត្ត​គិរី​ឥសី​សិទ្ធិ វាល​បើស

សម្រស់​ក្រុង​ហាទៀន នា​ពេល​រាត្រី ថ្ងៃសុក្រ 20 ខែ​មេសា 2018

Posted by សុភ័ក្ត្រ in Tiếng Việt.
5 comments

ខាង​ក្រោម​នេះ​ជា​រូប​ភាព​មួយ​ចំនួន នៃ​ក្រុង​ហាទៀន ប្រទេស​វៀតណាម នា​ពេល​រាត្រី

_______________________________________________________________
អាន​ផង​ដែរ​៖
១. ចប់​វិស្សម​កាល​បុណ្យ​ចូល​ឆ្នាំ​ថ្មី ឆ្នាំ​ច ១៣៨០
២. ការ​ឆ្លង​ព្រំ​ដែន នៅ​ព្រែក​ចាក
៣. វត្ត​គិរី​ឥសី​សិទ្ធិ វាល​បើស ឯ​ហាទៀន ដែន​កម្ពុជា​ក្រោម
៤. សណ្ឋាគារ​ហា​ទៀន
៥. កន្លែង​កម្សាន្ត​មួយ ណៃ នៅ​ហាទៀន

%d bloggers like this: